¢ Lalhruaitluanga Chawngte & Vanlalremruata Tonson
Community siam a ni ang a, chu communiy chu an hlawhtlin theih nan tanpuina pek an ni ang. Tanpui dawngtu, mahse, hlawhchham ta site chu hrem an ni ang. Tichuan tribal communism mawlmang tak kalsan mek Mizo thingtlang society chu civilized communism(?)-ah hruailuh a ni ang a, corporate nen thlunzawm a ni ang. Chu chu NLUP kalpui tumtute rilru sukthlek niin a lang.
Development sawi nikhuaah mitthlaah Brig T Sailo a lang ang a, ei leh bara intodelh sawi a nih chuan Zoramthanga, mirethei chawikan chungchang sawi a nihin Lal Thanhawla. Brig T Sailo hming a lan chuan Wet Rice Cultivation (WRC), garden colony, basic needs, power etc a rawn lang zut zut ang a, Zoramthanga hming lam a nih chuan sapthei, bamboo etc a lang ang. Lal Thanhawla hming sawi a nih chuan NLUP a chu a langsar ber tur a ni.
Mizoram chief minister-te hian thil tlangaupui an nei thin. NLUP chu Lal Thanhawla pual deuh a ni. A hlawhtling a nih chuan Mizo hnam awm chhungin a hming a dai tawh lo ang a, a hlawhchham a nih pawhin a dai chuang lo ang. Lal Thanhawla kaihhruaia Mizoram sorkar a din apiangin NLUP thawm a ring thin. NLUP-ah hian a hlawhtling niin a inhria a, tlangaupui hlawh ve lem lo, Mizoram hun tawngin a ken ve hrim hrim sorkar hna leh inhlawhna dang nena khaikhinin Mizoram economy-ah nghawng a la nei lo thung.
Hlawhtling tho nia Lal Thanhawla a inhriat laiin NLUP chu an lo 'zan kalpui' thin a ni tih he hmachhawp turu tak kalpui tura mawhphurhna pek R Selthuama chuan a pha lo a, chuvangin an lo dai sual palh lai leh dai fuh laite hriain hma lak a tum niin a sawi. Chu chu Zoram Research Foundation (ZoRF) te'n May ni 6-a agriculture department committee room-a NLUP chungchang sawihona an buatsaih tum khan a sawi a ni.
Ni dang ang bawkin chumi ni-ah pawh chuan agriculture directorate kawtah chuan lirthei chi hrang hrang a ngir khup a, a chhipchhuan sen chi te pawh a awm. Mahse, he department-in building leh hmanraw changkang tak tak a neih teuh hnu-ah pawh an enkawl tur, loneitute erawh mi vanduaia ngaih an la ni a, Mizoramah hian eizawnna peng hrang hrang zingah loneih chu mipuite thawh hreh ber a ni hial awm asin! Loneitute erawhin chuti zawngin an ngaihtuah lem lo a, agriculture deptt. committee room, pindan nuam takah mahnia lirthei hawlchhuak theite'n an chungchang an sawiho tih pawh an hre lo ang.
Chhun dar 1 a ni a, tan a hun ta. Mark Twain-a'n 'King Arthur's Round Table' a tih ang chi ni awm tak mai kilin mi zahawm pui pui an thu a, NLUP chu an sawiho ta a ni.
NLUP Apex Board vice chairman, NLUP Implementation Board chairman ni bawk, R Selthuama chuan NLUP lo chhuah dan te a sawi a, 1984-ah, rural development secretary a nih laiin Congress sorkarin bul a tan thu a sawi.
"Thingtlangpa an taima a, an chawfun tur tumsak ila, Rs 3000 velin kum 1-ah pui ang u" tih rilru puin NLUP chu tan a nih thu ani hian a sawi a ni.
Congress an tla a, anmahni thlaktu MNF chuan Jhum Control Project tia vuahin loneitute tihhmasawnna tur ruahmanna an siam ve thung. Aibawk-ah bul an tan a, mahse, an sorkar rei loh avangin hna an thawk tak tak hman lo. Hemi atana sum ruahman pawh state plan-ah a lut lo.
1989-ah Congress an rawn sorkar leh a, NLUP chu changtlung zawkin an kalpui leh ta. Rural Development deptt. chu a enkawltu (nodal deptt) atan an ruat a, directorate atangin commissionarate-ah an hlangkai nghe nghe.
Hetih laia RD director R Selthuama, tuna NLUP hotupa ni leh tain ZoRF huaihawta NLUP sawiho a nih tuma a sawi dan chuan, hetia NLUP changtlung zawk kalpui a nih lai hian inkaihruaina (guideline) engmah a awm lo a, kalphung tura duan a awm hek lo. 'Loneitute hi Rs 30000-in puih tur, Annual Plan-ah lo dah r'u' tih thu chu hotute hnen atangin an dawng a, hotute thu awihin chutiang tur chuan hma an la ta a ni.
RD deptt. chuan ruahmanna an siam ta a, NLUP atana sum mamawh zat tur pawmpui tura planning commission rilru hneh chu an huphurh hle tih R Selthuama chuan a sawi. Planning commission chuan cheng nuai 1000 an lo rawt (recommend) a, final-ah chuan cheng nuai 1200 an pe ta thung. Mizoram plan kha 10%-in a pung a, chuta tang chuan cheng nuai 285 an neih belh bawk. Tichuan, cheng nuai 1450-in NLUP chu an tan ta a ni.
1991 atangin NLUP chu Mizoramah kalpui a ni ta a, Lungsen, Thingdawl, Reiek leh West Phaileng Block-ahte (RD Block) an tan a ni. Heng block 4-ah hian chhungkaw 17159 thlanchhuah an nih thu R Selthuama chuan a sawi.
Vawk in ruak chu NLUP hlawhchhamnaah mi thenkhatin an sawi thin a, R Selthuama chuan hei hi a dik tiin a sawi. Chhungkaw 5570-in vawkvulh an thlang tih sawiin, "Vawk 4 vulh tur chuan vawk 20000 daih a ngai. Mizoramah khati zat hmuh tur a awm lo," a ti. Hetiang hi an lo ngaihtuah lawk lo tih a sawi nghe nghe.
'NLUP & Revised NLUP' tih thupui sawihona huna thupui sawitu R Selthuama chuan Congress sorkar hmasaka NLUP hlawhchham chhan chu "sorkar a zan kal" tiin a sawi. "Guideline a awm lo a, thawktuteah training leh thiamna pawh a awm lo," a ti a, "Trial and Error Method-in kan kal," a ti bawk. A hlawhchham chhan hrang hrang hi point 10 chuang a sawi a ni.
1998 inthlanpuiah Congress an tla a, NLUP hmachhawp awmsa chu anmahni thlaktu MNF sorkar-in a chhunzawm a, a hmawr bawk a ni ta.
Hun a liam a, kum 10 zet eptu pawl an nih hnuah 2008 inthlanah Congress chuan hnehna changin sorkarna an siam leh ta. Eptu pawl an nih lai leh inthlan campaign laia an auhla ber chu NLUP hi a ni awm e.
Mizoram hmel thlakna tur niin an hria a, sorkar chhiahhlawh rinawm tak ni thin R Selthuama chu sorkar hna atanga a pension hnuah NLUP sulsutu atan a sawmchhuak a, ani hian eptu pawl an nih laiin Congress a zawm a ni. MLA atana a tling a, sorkarna an siam hnuah NLUP-ah mawhphurhna sang tak pek a ni ta. Revised NLUP tia sawi chu Mizoram sorkar hmachhawp a ni ta.
Chief minister-in eptu pawl an nih laiin a tlangaupui nasa hle a, party pawhin an tlangaupui nasa hle. Mahse, miretheite tana an programme pawimawh bera an pawm chu sorkarna an lak atanga ni 200 dawn a liam hnuah pawh a kalphung tur a la chiang lo!
Hma laa theihtawp chhuah turin legislator pakhat chu mawhphurhna pek a ni a, chu chu official ni lovin mipuiin an aiawh tura an thlanchhuah ngat, public support nei ngat a ni. NLUP Apex Board-ah vice chairman atan ruat a ni a, NLUP Implementation Board-ah chairman a ni bawk. Mawhphurhna pawimawh tak pek a nih atangin thla engemaw zat a liam tawh a, mipui pawhin NLUP-in a lo tiam tawh zawng zawng, chief minister-in a lo sawifiah tawh dan zawng zawngte chu a taka hmuh mai an inbeisei.
An sorkar tuk atangin chhung tin hnenah cheng nuai 1 an sem dawn niin an sawi thin a, mahse, tun thlengin NLUP kal dan tur chiang fekfawka ruahmanna a la awm lo. Chu chu a mawh la tura ruat R Selthuama chak loh vang pawh niin a lang lo, a ngaihtuahnaa thil awmte a taka chan tir turin puitu tur a nei lo a ni. Staff pakhat mah a la neih loh thu sawihonaah a sawichhuak nghe nghe.
"IAS supertime scale pawh ni ula staff pakhat mah in neih loh chuan hna in thawk thei chuang lo ang," tiin R Selthuama chuan a dinhmun a sawi.
Mizoram sorkar chuan commission leh hna bik thawk tur body thenkhat a din a, chu chu inthlan hma, opposition an nih lai atang tawha tuna sorkar chelhtute'n an lo sawi thin dan a ni. Manifesto an tihlawhhtling ni chuan an insawi a, mahse, hnathawh tir tumna tak tak an nei emaw? Ethics committee member atana ruat pakhat chuan ruat a nih thu bak eng thu mah a dawng zui lo niin a sawi. Chutiang chuan body danga mi tur pawh ruat an ni tawp a, an mamawh tur inpek zui a awm lem lo ni awm tak a ni. Manifesto tihhlawhtlinna ni maw, hmai phihna ni maw!
Mirethei, thingtlanga chengte chawikanna tur programme tihlawhtling tura ruat chuan staff nei lovin hma a la la thei lo a, chutih laiin state planning board lam chuan planning-ah hian grassroot level participation awm tir tumin thingtlang khuate pawh an tlawh nual tawh. Planning board hian ruahmanna an siam ang a, chu chu NLUP hmingin an tihlawhtling dawn ni maw? NLUP bakah planning lam atangin rural development programme tha tak duan a ni tho dawn tihna ni maw?
NLUP chungchang sawihona hunah hian mithiam thenkhat, sawihonaa tel tura an sawmte chuan NLUP hmalakna atan rawtna hrang hrang an an sawi hlawm.
Apex Board hotupa chuan an kal dan tur chiang fakin a la sawi thei lo a, trade (eizawnna atana thlan tur) chu an 'zan kal' lai khan a lo tam lutuk a, tun tumah chuan 15 emaw lekte awm se a duh thu erawh a sawi.
Amah leh sawihonaa sawitu tam ber chuan a area zawnga hmalakna tur bik thliarfel chu tha an ti deuh vek. Khawchhak tlangdunga grape chin hlawhtlinna chuan an rilru a luah tlang a, chu chu entir nan an hmang tlangpui; entirnan - khawchhak tlang dungah chuan grape a tha duh a, chu lamah chuan ti ta vak ila tiin an sawi hlawm. NLUP hotupa leh midangte sawi dan atanga a lan dan chuan, chutiang chu NLUP-ah hian kalpui a nih hmel.
A awmzia chu khawchhak lam tlang dungah chuan grape community siam a ni ang, grape chinga eizawng duhte chuan NLUP tanpuina an dawng ang. Thil danga eizawng duhte chuan an dawng dawn lo tihna nge ni ang, grape ching turin nawr luih an ni dawn? Engpawhnise, eizawnna turah mahni tuina leh duhthlanna a awm lo ang a, sorkar chuan hmasawnna leh hmingthatna duh vangin mimal zalenna chu a rapbet dawn ta ni awm tak a ni. Chu bak baka communism thurin! NLUP hotupa chuan assembly house-ah chutiang tur chuan dan an siam dawn niin a sawi.
Creativity a ni lo, spiritual leh 'tual lo pawh a ni lo, economy a ni tawp mai. Peih leh peih loh, nuam tih leh tih loh, phur leh phur loh pawh a ni lo, community-ah 'obligation' (mawhphurhna) a awm a, chumi chu hlenchhuah tur! Hnahlan-pa pakhat chuan sanghadil siam a duh a, chu chu a tuina lam a ni. Mahse, NLUP tanpuina sum (tanpuina nge loan?) a dawng ve duh a nih chuan sanghadil a ngaihtuah thei lo ang, grape huan a siam tur a ni mai!
Chutiang chu philosophy pakhat - 'Utilitarianism' an tih hi a ni mai em? Chu philosophy pawmtute chuan lunglenna te, thil mawi te, mihring tuina leh ngainatna lam te, 'world of fancies' te an hnawl a, thil reng reng hi a bungrua leh pawisa zawngin a hlutna an chhut thin. English novelist Charles Dickens-a khan a haw hle a, a novel pakhat - "Hard Times" phei kha chu 'utilitarianism' leh a koki lehlam 'materialism' beihna a nih ber kha.
Sorkar hi eng nge a nih-a eng nge a mawhphurhna? Khua leh tuite hnathawh tur tuksaktu tur nge a nih khua leh tuite hnathawh kaihruaia viltu tur?
NLUP hotupa sawi dan chuan, NLUP-ah hian a titha duh lote chu hrem an ni dawn bawk. Chu chu agriculture directorate committee room-a thusawi vete chuan an thlawp hle. NLUP hotupa phei chuan NLUP hmanga hmalakna a nih hmasak tuma a hlawhtlin loh chhan pakhatah a ti tha duh lote hremna dan a awm lo chu a puh nghe nghe.
NLUP hotupa chuan NLUP chungchangah hian assembly house-in dan a siam dawn niin a sawi a, NLUP chu an 'legislate' thlap dawn tihna a ni. Chu dan hmang chuan NLUP chu kalpui a ni ang a, NLUP hnuaia hnathawh tur thlanna thu-ah mahni chenna hmun chu a pawimawh ber a ni ang. Tin, a hlawhchhamte chuan hremna an tuar bawk ang.
Hlawhtlin loh a hlauhawm bawk si a, a ti tha duh lote chu tanpuina pek chhunzawm loh mai pawh ni lovin an lo dawn tawh sa pawh rulh tir leh ni se thain an ring a, a titha duh lo chu hrem a nih theihna tur dan te pawh siam ni se, NLUP hotupa chuan a ti. 'A ti tha duh lote hremna' tur chungchang hi kalkhawmte chuan an tuipui viau niin a lang. Tichuan, mi taima leh titha duh tan chuan NLUP chu tanpuina, mi rinawm lo leh ti tha duh lo tan erawh loan a ni dawn tih chu sawihonaa an sawi dan a ni.
Engtin nge a ti tha duh leh ti tha duh lo an thliar ang? A nih leh a hlawhchham chin leh hlawhtling chin engtin nge an thliar dawn? Chutiang tehkhawng tha leh rintlak, mi zawng zawngina an pawm tlan theih tur ngaihtuahchhuak thei chu khawvelah hian an awm ang em? Engpawhnise, ZoRF huaihawta NLUP sawihonaa a lan dan chuan, khua leh tuite chuan sorkarin thawk tura a tih an thawkang a, a ti tha duh lo/hlawhchhamte chu sorkarin a hrem zui ang. Chutiang tur chuan MLA te'n dan an siam ang. Chu chu Communist-ho kal dan ni awm tak a ni.
Dan chu siam se, hremna pawh chu lekkawh se, rulling party mi leh sate chuan hremna an han pumpelh bik ngei ang a! MNF pawh sorkar se, UDA pawh sorkar se, tu pawh sorkar se chutiang chu tuna Mizoram kal dan chu a ni tlat si. Chu chuan mipui hi a thenhrang phawk ang a, sap tawnga 'social conflict' an tih hi Mizo society-ah a thleng zui ang.
"Lo hlawhchham ta ila, ka hlawhchham chhan chu thihna emaw dam lohna emaw vang a ni thei. Ka thiam loh ni lovin ka vanduai vangin ka hlawhchham ang a, min la hrem zui ang maw?" tiin ZoRF huaihawt NLUP chungchang sawihonaa tel pakhat chuan a thuthmunah nui chungin a lo ti a nih kha.
Chief minister Lal Thanhawla chuan NLUP hi hlawhchham se titu an awm niin a sawi a, chutiangho chu pek ve zel tul lova a hriat thu May ni 2-a thuthar lakhawmtute a kawm tum khan a sawi. Hetiang lam hawi tawngkam hi chief minister chuan VC inthlan campaign nan khan a lo hmang tawh a, ruling VC lo chu an inthlahrun dawn avangin development thilah an hnufual ang tih a hlauh thu a sawi a nih kha.
Mihring chuan a ngaihtuahnaa thil awm emaw a thil tih tum emaw chu a duh dan zawngin a sawichhuak thei, ruling VC neih loh erawh he ramah hian a hlauhawm a ni. Congress lo chu NLUP tihhlawhchham tumah puh an nih pawhin chief minister rilru puthmang tur chu a chiang thawkhat tho lo'm ni?
NLUP titha duh lo tia thiam loh chantir tura thuneihna hi executive hnenah an pe dawn nge, judiciary-in an keng dawn? Ti tha duh loa puh thingtlang mimawl tê tê te chu ukil an rawihsak dawn em ni? NLUP leh natural principle of justice hi kalkawp thei tak ang maw?
NLUP hnuaia hmalakna chu khauh leh fet (strict) taka vil (monitor) tur tih chu sawitute zinga rawtna lian leh langsar a ni, tiin a sawi theih ang. Tanpuina an dawn tur ang dawng loten complaint nachang an hriat ngai pawimawhte pawh an awm bawk. Sawitu thenkhat chuan land reform neiha, land ceiling siama, thingtlang khua sawikhawmte pawh thain an ring. Khua hi sawikhawm a nih chuan thingtlanga cheng engemaw zat chu hmasawnna duh vangin 'uproot' an ni dawn tihna a nih chu.
Sawitute zingah NLUP chu ecology leh environment nena kalkawp tir duh an awm. Sawihona hun hawngtu Prof Tlanglawma chuan Mizoram leilung hi enkawl that a nih lohva, ecology leh environment humhalh a nih loh chuan kum 100 hnuah chuan Mizoramah hian thlai chinna tlak a awm loh mai a hlauhthawn thu a sawi nghe nghe. Prof C Lalkima pawhin ram leilung eichhe nasatu sawhthing ang chite chu Mizoramah hian chin tawh loh law law mai thaa a hriat thu a sawi bawk.
Prof H Lalramnghinglova chuan medicinal plant leh thlai atanga thil hlu leh man to lakchhuah theih lamte hi ngaih pawimawh a duh a, chumi atan chuan processing lam pawh NLUP hian hma tel se thaa a hriat thu a sawi.
Sawitu thenkhat chuan sorkar hi facilitator-ah tang se thaa an hriat thu an sawi. Henry Zodinliana Pachuau, Mizoram University-a social works lecturer chuan NLUP hmalak tumnaah hian mamawh a nih leh nih loh hre tura 'need assessment' neih phawt tha a tih thu a sawi a, chumi zulzuia hmalak chu himah a ngai a ni. Pawng kal a nih chuan NLUP hian corporate world-ah Mizoram a hnuklut ang tih a hlauh thu a sawi a, chu chu Mizo society tan him lo niin a hre bawk.
'Need assessment' ni chiah lo mah se chumi lam hawi deuha sawitu Prof H Lalramnghinglova chuan AMFU (All Mizoram Farmers' Union)-in thingtlang khaw hrang hranga an thlai chin duh zawng leh an thatpui tura an ngaihte an lo lakkhawm atangin thlai chin tur chi 15 vel leka hlawmkhawm theih nia a hriat thu a sawi a ni.
NLUP hmalakna hnuaia thar chhuahte hralhna tur lam ngaih pawimawh nghal duh an awm laiin Dr Lalnilawma, Mizoram University-a rural development chungchang zirtirtu chuan tharchhuahte hi ramchhungah tihral dan awmin a ring a, a chi supply chungchangah pawh supplier hmanga tih loh a duh thu a sawi. Chu bakah NLUP tanpuina sum hi plan-a a luh chuan a hman lehna lamah hun a duh ang a, a hun takah sum pekchhuah theih a ni lo ang tih a hlauh thu a sawi bawk.
He huna telte hi an tui tlang hle a, sawi tur pawh an ngah hlawm hle. Mahse, a tu-a mah khan inthlan hma leh sorkarna siam hnua NLUP awmze danglam ta chungchang an sawi lo, tul an ti lo a ni ngei ang.
Chhung tin hnenah cheng nuai 1 sem a ni dawn lo tih a chiang tawh niin a lang; hotute chuan chutiang an sawi ngai lo niin an sawi. Chu chu mipuite'n an hnial lem lo a, pa rawnkaite pawhin an hnial lo. 'NLUP & Revised NLUP' tih thupui sawihonaah pawh NLUP hotupa zawt phaka thu kualte chuan "inthlan hma kha chuan chhung tin hnena cheng nuai 1 sem in tiam kha..." tiin an zawt lo. Chutiang an sawi lo hrim hrim.
Chutiang sawi a hnekin NLUP chu hmanhmawha kalpui lo tur te'n thurawn an pe a, a then phei chuan 'awareness campaign' neih phawt tul an tih thu te an sawi. Sorkar tukah cheng nuai 1 an sem dawn emaw tia Congress vote-tute tan chuan NLUP hi a nghahhlelhawm em em ang a, hmanhmawh lo tura han inngen leh rih te chu a huatthlala duh mai thei. Awareness campaign pawh neih a ngai em ni? 2007 July thlaah khan "New Land Use Policy changtlung zawk" tih bu an tlangzarh a, khata tang khan ngawrh takin awareness campaign an tan daih tawh a ni lo'm ni? An awareness campaign chu a hlawhtling a, an lo heti ta a ni mai lo'm ni? Chutiang a nih laia hmanhmawh lo tura han inhrilh leh rih te chu mawle! Chutiang a nih laia awareness campaign nei phawt tura thurawn han inpek leh hnuhnawh te chu!
Khati khawpa an aupui hnu-ah sorkarna an chang a, chuti chunga heti taka an lo la inpeih lo hi a mak viau; mahse, chanchinbu-a mahni ngaihdan tarlang ngam khawpa mahni inrintawkna ngahte'n "chhung tin hnena cheng nuai 1 sem in tiam kha mawle" tia kuthnathawktute thlavang an hauh hlawm lo hi a mak zawkin a lang. Zalen Cabin-a mi R Vanlawma kha chu la dam se, tu tute emaw hi chu a chhuahchhal leh khel khel tawhin a rinawm!
Engpawhnise, sorkarna an siam hnua an hrilhfiah dan hian inthlan hma khan NLUP hi lo sawi thin ta se chu a hralh a tla tehchiam lo ang tih thu-ah zawng kan chiang tlangin a rinawm.
ZoRF sawihona buatsaihah hian university leh college zirtirtu, sorkar hnathawk pension leh chanchinbu mite an kal a, mi 30 vel an kalkhawm.
No comments:
Post a Comment