¢ Lalhruaitluanga Chawngte & Vanlalremruata Tonson
Thingtlang loneih chu a hlawk lo mai a ni lo, innghahna tlak a ni lo. Kum khat ei thlawh chhuah pawh thil har a ni. Thingtlang loneih bansana eizawnna dang leh hlawk zawk beiseia Aizawl lama pem an tam kumtin hle reng a ni. Thingtlanga la awmte pawh hian kuthnathawhin awmzia a nei tak tak lo tih ngaihdan avangin hnathawh an phur chuang lo.
Mahse, thingtlang loneih chu Mizo mipui tam takin ei an hmuhna leh an innghahna a la ni tho. Chutih rualin thingtlang loneiha hnathawkte chu nu leh pa, duhthlan tur dang nei chuang lo an ni tlangpui. Riltama thih loh nan leh chhungkaw chawmtu an nih vangin an thawk hram hram a ni ber. Chuti a nih chuan, Mizorama 'work force' lian ber chu thalai tha chakte ni lovin loh theih loh avanga eichawp dapa thawk, kum uai thla lam an ni tihna a nih chu.
"Loneih chu kan hna pui ber a ni a, mahse, a hlawk lo em em a. Kum khatah buh tin 200/300 te an thar a, sum chantir chuan buh tin khat chu Rs 100 man vel a ni. Mizoram sorkar hnuaia thawk, a hniam lama mite pawhin ni khatah Rs 200/300 te an hlawh a, loneitute erawhin an thawkchhuak tlem tak zet a ni. An dinhmun hi a tha lo tak zet," Dr James LT Thanga, economist chuan a ti.
Ei leh bar lama Mizoram dinhmun chhutna - "Economic Survey Mizoram 2008-2009"-a a lan dan chuan agriculture lamah Mizoram a tlahniam; 2006-2007 chhunga buh tharchhuah chu 420,901 MT a ni a, 2007-2008-ah chuan hei hi 15,688 MT-ah a tlahniam. 2005-2006 phei kha chuan 1,07,740 MT lai Mizoram hian a tharchhuak nia tarlan a ni.
2001 chhiarpui-a a lan dan chuan Mizoram puma hnathawktu zawng zawng zinga 60.6% chu loneitu an ni a, leilet leh thingtlang loneiha eizawng chhungkua 88819 an awm. Chutih laiin 2006-2007 khan agriculture and allied sector hian GSDP (Mizoram gross state domestic product)-ah 16.02% lek a thawh thung. 2007-2008 chhung phei chuan 14% chauh a thawh a ni. Mi tam ber - 60.6% te thawhchhuah hi a tlem naran a ni lo, a tunlai tawngin a tlem 'over' a, lungchhiatthlak khawpin a tlem. A awmzia chu - Mizoram mipuite eizawnna lian ber - a mi tam berte eizawnna chu a hlawk lo em em a, Mizorama mi tam berte chu rethei takin, dinhmun hrehawm takah an ding tihna a ni. Chuvang te chu a ni mahna, loneiha eizawn loh hram hram kan tum vek ni!
Loneiha eizawngte chu an khawsak a harsa mai a ni lo, diriam pawh an hlawh. An hna chu Mizorama hnapui ber ni mah se hmuhsit hlawh ber pawh a ni mai thei. Khawtlang inrelbawlnaah pawh an pawimawh pha lo a, Mizoram boruak tithianghlim lotu hialah mi tam tak chuan an puh nghe nghe. Mizoram sik leh sa a mumal lo sawt hle a, khua pawh a lum sawt hle a nih hi. Ruahin sur hun bi a nei hek lo. Tuman khawpuia lirthei khu leh tuialhthei khu an puh lo a, sorkar leh mimalin mahni thli paih dan (liquid waste management) lam a ngaihthah avanga boruak a thianghlim loh sawt thu te chuan sawi a hlawh hek lo. Loneitute'n eizawnna dang an neih loh vanga ning chung chunga an thawh ve tauh tauh - ramngaw vah chereu hnua hala lo an neih chu mi tam takin an puh a, chu chauh chuan sawi a hlawh. Kuminah pawh lo vah hun laiin mi hausate chuan thinna thlawhna chu a tum thei lo fo a, mi changkangte chu an zak a nih kha! Ram hmangaihtu chuan zak lovin loneitute dinhmun chhiatzia a ngaihtuah tur a ni dawn lo'm ni?
"Thingtlang loneiha eizawng ni ta ila, thlan sa phul kaiin ni tin fehchhuak thin ila, ka hna chu hlawk lo em em bawk se, eikhawp tharchhuak tawng tawng chauh ila, chutih laiin kan lo hal khu avangin mihausate an zinchhuak thei lo a nih chuan ka lawm ngawt ang," tiin tlangval pakhat chuan a sawi.
Chu chu thil awm thei a ni. Mizoram sorkar chuan Mizoram mipui tam ber - kuthnathawktute dinhmun aiin thlawhna tumhmun te, Millennium Centre te a ngai pawimawh zawk a, he'ng hian Mizorama eizawnna pui ber agriculture nen tun dinhmunah chuan inzawmna a nei lo. Thlawhna chu mi tlem te chauh chuan phakna a ni a, chu'ng mite nuamsa taka an zin theih nana Aizawl leh Lengpui Airport inkar kawng, kumtluana hnum hlarha a enkawlna sum hi tam tham tak a ni! Mihausate leu thinna Aizawl leh Lengpui Airport inkar kawng hi Mizorama kawng tha ber a ni hial ang chu!
"Kan population-ah kuthnathawktute an tam ber a, kuthnathawktute'n hma an sawn loh chuan kan ramin hma a sawn dawn lo. Ram hmasawnna kan duh a nih chuan kuthnathawktute dinhmun chawisan kan tum tur a ni," Dr James LT Thanga chuan a ti.
Kuthnathawktute tan hian sum chu Mizoram sorkar hian a ruahman thin ngei alawm; Congress-in kum 10 ro an rel chhungin NLUP-ah Rs 1,51,44,02,538 an sengral a, MNF-in kum 10 ro an rel chhungin MIP-ah kum tin cheng nuai sing chuang an sengral bawk. A hlawhtlin leh hlawhtlin lohah inhnialna tur a awmin a lang lo, vawiin thlenga kan hnapui ber chu 'shifting cultivation'-a innghat a la ni hian thil engemaw chu a lantir a ni. Chuti chung chuan loneitute lo hal khu avanga thlawhna a tum theih loh changa thlawhnaa chuangte an zak thin hi eng nge a awmzia?
"Sorkarin a tih tur a tih loh vangin project leh scheme hrang hrangte a hlawhchham thin a, a target group a thleng lo thin," tiin Dr James LT Thanga, 'A Study of Social Consumption Behaviour in Mizoram' tih chungchanga research ti tawh chuan a sawi.
"Loneitute leh kuthnathawktute, miretheite tan pawh scheme te, project te kan nei ve thin a, mahse, sum za zela 60 chu a thlenna tur a thlen hmain sorkar hnathawkteah a kalral," tiin economist Dr James LT Thanga chuan Zozam Weekly a hrilh a ni.
"Sorkar hnathawkte chauh an ni lo a, politician, ram hruaitute'n an tidik lo, chung lam atangin ruahmanna an siam a, a grassroot an hre si lo. Eng ruahmanna pawh siam se politician-te hian 'planning for the people' an hria a, 'planning with the people' erawh an hre lo. Planning hi mipuite nena kal tur, a kalpuinaah pawh mipuite an tel ve tur a ni a, a target group - mipuite an tel ve chuan hlemhletna pawh a veng dawn a ni," a ti bawk.
He economist hian thingtlangmi, loneih leh kuthnathawha eizawngte dinhmun a lo zirchian tawhnaah thingtlang mite 'standard of living' chu sorkar hnathawkte 'standard of living' aiin a let nga vel laiin a hniam tih a hmu a ni.
Chutiang chu loneitute dinhmun chu a ni a, loneih chu a theih hram chuan tlansan an tum ngar ngar thin. Mahse, beiseina neia khawpuia lutte pawh an dinhmun a tha chuang lo. Khawpuia inhlawhna tur tam ber chu lehkhathiam lote tan a ni. Thil siamna hmunpui a awm loh avangin inhlawhna tur tam ber chu service industry-ah a ni a, mahse, service industry pawh chu industry awm chhun ni mah se a lian chuang lo.
Service industry chu hnathawh tur tam berna a ni a, nitin khawsak dan pangngai tan tura mi an rawn chet chhuah tan atangin an mamawh thawhsak tura lo inpeih a ngai. Zana chawl hahdam tura an haw leh thlengin 'tih sak theih an nei em?' tia lo chan a ngai bawk. Nitin ei khawp hmu tur chuan khawpuia che velte an chet chhuah hma deuh hleka thawhchhuah tan a ngai a, khaw thima an chawlh thlengin thawh a ngai thin. Vanneih thlak zaphian erawh chu, Pathianniah mite'n hna an thawk lo hi a ni. Chumi ni-ah chuan chawlh an hmu ve tawk.
Restaurant leh thingpui dawr chu thingtlang thalai, khawpuia inhlawhna zawngte thawhna hmun ber pakhat a ni. Aizawl khawpuiah chuan zing dar 6 vel atangin thingpui dawra chawl tur an awm tawh a, a thawktute tan chuan chutiang hunah chuan lo inpeih at a ngai tawh thin. Tichuan, nilengin an thawk a, zan dar 7-8 velah an haw leh thei a; darkar 12 chuang mah hna an thawk tihna a nih chu. Mahse, nilenga hna an thawk chung pawhin tam tak chuan thla khatah Rs 1000 pawh tling mang lo an hlawhchhuak tawk thung. An thawhnate hian ei leh inte an tum sak tlangpui a, chuti chung pawh chuan thla khata an hlawh chuan Rs 1500 a pel mawh hle. |halai tam takin dinhmun tha zawk beisei tur awm em em lovah an hun hlu tak an khawh ralna tihna a ni.
Dawrnghak an nih pawhin an dinhmun a danglam chuang lo. Mi dawr nghaka inhlawhte hian thla khatah Rs 1000 te an hlawh a, chutiang hlawh pha lo pawh an tam. Dawrnghaka thawk duh an tam avangin a chhawrtu tan ren an ngai lo a, duat an ngai hek lo.
Construction work-a inhlawhte dinhmun hi an ziaawm deuh. Ni khatah Rs 100 chuang an hlawh a, Minimum Wages Act-in 'unskill labourer'-te hlawh tura a phut Rs 103 atanga chhut pawhin a pangngai viau. Mahse, an hnathawhna chu hna dang aiin chetsual a hlauhawm bik thung. Sorkar lam atangin an tana ruahmanna engmah a awm lo a, vanduaina chu thleng zen zen lo mah se vanduai tawh tan erawh khawvel hi a tawp ngawih ngawih thin. A ruaituin chhawmdawlna mumal a pek a beisei awm loh a, workman's compensation beisei dawn se a hmaa lo ruaitu nen inkhin buai hrep emaw a ngai dawn a ni si. Chumi buaipui ringawt pawh chu mimawl leh rethei tan thil awlsam a ni lo, Lalremsiami anga ngaihven hlawh, MZP te meuhin 'compensation' an phutsak ang chi an ni te a nih ngawt loh chuan.
Hnathawktu ruaitute hi dem theih an ni ngawt lo. Sorkar lamin hnathawktute dinhmun a ngaihsak lo a, engtiang pawhin hnathawktu chu lo ruai mah se sawi buaitu tur an awm lo. Anni lahin hlawh hniam te te hlawha chhawr tur chu an duh aia tam an hmu zawk a ni a!
A peih leh taima tan chuan hna thawh tur a awm tia sawi a ni chawk. Awm zawng a awm teh meuh mai, mahse, hna awm apiang thawk la, poverty line chungah nge i awm a hnuaiah? "Eng hna pawh thawk ila, chhungkua ka chawm thei ang," ti thei chu mi tlemte an ni. Rinawm taka thawh avang ringawta pute khawngaihnaa dinhmun tha zawka invawrh chhoh theihna tur pute nei pawh an tam lo. Hnathawktu chu a lo lang ang a, a liam ang a, midang an rawn kal leh mai ang. Hmalakna engmah nei lo sorkarin hian 'Laissez-faire theory' a pawm chiang hle a ni.
Sorkar-in a tih tur a ti lo a, a mawhphurhna a hlen hek lo. Tunlai khawvel, modern period-a state nihphung langsar ber pakhat chu welfare state a ni. Hmanlai chuan a chak leh thil ti thei te'n mipui an awp khawm a, an khawvel pawh chutiang mite venhimna leh duhthala an bawlzanna hmun a ni. Tunlai khawvel ram tam berah chuan sorkar chu mipui tan liau liau a ding a, Mizoramah erawh chuan mipui chhuanlama mahni inhaivur nan a ding tlat si!
Mi thenkhat chu eng dinhmunah pawh ding se riltama thi lo tur an ni. Tuna Aizawl pa zahawm chinte ngat chu an mit tuam sakin Kolkata khawpuiah chhuah tawp mah ila hausain an rawn haw leh tho mai thei. Mahse, chutiang ti thei ve lo leh ti thei lova inngai chu a tam zawk an ni. Lehkhathiam pawh hian sorkar chu an hnathawh tur petu turah an ngai a ni ang, mifel tak tak, vantlang chunga lengte pawhin sorkar hnaah chuan an fate, laina hnai leh hmelhriat tha tan an chuh chak leh viau thin. |anpui ngai tam takte tan sorkar chu a chet a ngai a ni. Mahse, sorkar a che lo chu a nih si hi.
Hnathawktu tam ber chu mahni hna bak ngaihtuah pha lo leh tuamhlawmtu sorkar mamawh ngawih ngawih an ni. A then phei chu an thawh tur thlenga ngaihtuahsak ngai pawh an ni. Mizoram sorkar chuan heti lam buaipui tura ngaih, labour and employment department a nei ve a, a hming chauhin a ni ber. A thawktute chuan tih tur leh thawh tur a tam thu an sawi a, mahse, department ngaihsak hlawh lo tak a ni thung. Labour welfare a ni emaw, employment thil a ni emaw, he department kuta tla chuan ngaihsak a hlawh lo a, thawh tur tam tak awm mah se a thawktu tur an awm mumal lo zawk.
Labour and employment deptt. hian Mizoramah chuan employment lamah hriat a hlawh a zawk. Tunhma chuan hei hi thil vanneih thlak tak pawh a ni mai thei, tunah erawh state-ah pawh puitling rual kan nih tawh avangin hei hi lungchhiat thlak lamah a kal tawh thung. Sorkar laipuiah chuan ministry of labour a awm a, state puitlingte chuan labour department an nei thin. Mizoram erawh a letling hlauh! Mizorama department lian tia kan sawite hi sorkar laipui hnuaia ministry hran pawh nei lo a ni fur a, chutih laiin sorkar laipui chuan labour deptt. mai ni lo labour ministry hial a nei. Khawvel ram dangah pawh labour ministry/deptt chu department lian a ni a, khawvel huapin International Labour Organisation te hial a ding nghe nghe. Mizoramah erawh labour leh employment tham kawpin a hmingin department a ding ve a, department mawm lo, sum awm lohna department a ni. Minister-te pawh hian duh an thlang thei a nih chuan he department hi an thlang ngai lo ang tih a rinawm.
A thawktute chuan: "Employment chungchangah hna a tam lo a, hna zawngte hnena employment market information pek leh a tul dan a zira lo kaihhruai, guidance pek a ni mai. Thawh tur dik tak zawk chu labour welfare a ni zawk," tiin an sawi.
"Labour hi kan ngaihthah a, heti lamah hmalakna a awm lo a, engmah hi kan 'organise' lo hrim hrim. Labour Law te pawh kan ngaihthah a, Mizoram kuthnathawktute dinhmun hi a tha lo tak zet a ni. Labour deptt hran kan mamawh," Dr James LT Thanga chuan a ti.
He deptt. hnuaiah hian wing pathum - labour welfare, craftman training (ITI te hi) leh employment service (employment exchange tia hriat lar) te a awm. Khawi wing mah hi an indaih lo; indaih se chu unemployment problem hi a ziaawm ang a, labour welfare (kuthnathawktute hamthatna) pawh Mizoramah a awm ve ang. Lungrem chimin a thawktute a delhhlum lo mai thei a, a delhhlum palh a nih pawhin zangnadawmna te an dawng ve thin ang.
Labour welfare buaipui turin labour inspector an awm ang a, hnathawktute dinhmun an thlithlai thin tur a ni. Sorkarin lung a rem pawhin chu hmunah chuan hnathawktute an him em tih an enfiah ang a, an him loh chuan an chhan thin ang. Mahse, Mizoramah chutiang ti tur an awm si lo!
2007 kum chawhma lamah khan L&E deptt.-ah hian labour officer pakhat chu lak a ni ve a, chu bak chu labour welfare buaipuitu tur an awm lo. Mizoramah kuthnathawktu mi engemaw zat an awm a, chu'ng mite chu labour officer pakhatin a vil a nih chu! Kuthnathawktute hian hrethiam se chu na an ti ngawt ang. Mahse, kuthnathawktute chu thil awmze hre lo tak tak te an ni a, a namnul duhtu tan chuan namnul theih tak an ni.
Kuthnathawktute thlavang hauhtu tur dan a awm neuh neuh a, lekkawh erawh a ni lo. "Tuin nge enforce ang? Dan a awm a, mihring an awm si lo a nih hi," tiin L&E deptt. officer pakhat chuan a ti.
"Kan deptt.-a officer-te hi employment mi leh sa deuh vek kan ni a, labour lam hi chu a tul avangin kan hmui ve mai a ni. Employment lamah pawh kan indaih lo em em a, dan pawh kan lekkawh thei lo. Kan indaih loh em avangin employment lamah hian kan thawhhlawk lo hle tih kan hria a, mahse, tih theih dang kan nei si lo. Chutiang chu kan dinhmun a nih laiin engtin nge labour lamah kan inhman vak theih ang?" a ti bawk.
Hnathawk tura thalaite kaihruaitu tur leh hnathawktute tiphura an hamthatna ngaihsaktu tur an nih laiin a thawktute ber hi an hnual hle thung! "Zep thu a cheng lo, kan frustrate khawp mai. Kaisanna tur a awm si lo, kan indaih bawk si lo. Tihian office kan kai ve nawk nawk a ni ber mai e. Kum 30 dawn kaisang lote kan ni a, kan thawhpui pakhat pawh a luhna post-ah chiah pension-in a chhuak! Officer kan ni ve a, kan buaipuina hnuaia hna rawn dil, tuna kan chung daiha awm ta site hi an tam a nia," tiin officer pakhat chuan an dinhmun a sawi hial!
L&E deptt. director post hi MCS-in an chang a, joint director an nei a, assistant director erawh an nei lo. Director thachhang chu deputy director-in a dawl a ni. Hetih lai hian tourism deptt. chuan deputy director pathum an nei! Tourism deptt hi a pawimawh ngang a ni ngei ang!
He labour and employment deptt.-ah hian job mobility/career prospect hi a tha lo ve hrim hrim. Department tam tak chuan head of department hi a department mi leh sa, experience nei tawh leh a hna chenchilh tak tak an nei ni thin. Chutiang a nih chiah loh pawhin department hnathawh bik hrechiangtu joint director post te a awm thin bawk. Engineering service-ah phei chuan department head chu sawi loh, administrative head-a commissioner & secretary thlengin Mizoram Engineering Service-in an hauh vek a nih kha. Labour and employment deptt.-ah erawh administration khawih tura lak, MCS officer te'n department hotu lu ber, director an chang thung. MCS te hi a that zawng an tha teh meuh mai, mahse, administrative service an nih avangin labour thilah chuan ngaihtuahna thuk tak an pe reng lem lo thei.
Ram hi eng nge a niha, hnam hi eng nge a nih chiah tih ngaihtuah a ngai a, mipui te'n eizawnna an neih hi a tul bawk. Chumi atan chuan sorkar hian a theih chin chinah a tanpui tur a ni. Eizawnna kawng hrang hranga thawkte chu a hum tur a ni a, a chawkphur tur a ni bawk. India sorkar chuan The Employment Exchanges (Compulsory Notification of Vacancies) Act a siam a, he dan-ah hian chu chu a chiang khawp; private pawh ni se mi 25 aia tam ruai chuan an hnaruakte hi employment exchange an hriattir tur a ni, a ti hial. Chutiang khatiang mite chu an la tur a ni, a ti lo. Khua leh tuiin employment opportunity tha ber a nei tur a ni, a ti a ni zawk.
Department hrang hrangin hnathawktu neia an insawi zat leh a tak taka hlawh a pek zatte hi a inmil em tih thlengin labour and employment deptt. hian a enfiah thin tur a ni, The Employment Exchanges (Compulsory Notification of Vacancies) Act-a a lan dan chuan. Mizoram erawhin hei hi a la hlat hle.
Private hnuai a ni emaw, sorkar hnuai a ni emaw, khua leh tuite hnathawhna hmun chu mihring khawsakna awm a ni em tih hi sorkarin a ngaihtuah tur a ni a, eng dinhmunah nge an din tih te enfiah turin labour department chu tih a ni a, mihring awm dan tur pangngaia hnathawktute an awm theihna tura hma la turin a ti bawk. Ran leh khawl ang maia mihring inchhawr a thiang lo. Khua leh tui, mihring tlawm ber atanga a sang ber thlengin sorkar chuan a hmangaih vek si a.
Social worker Angela Ch Ralte chuan, "Labour welfare lam kan ngaihthah hi chu a pawi khawp mai, a pawizia kan la hre dawn chauhvin a rinawm. Hmun him lovah mi tam takin hna an thawk a, sorkarin a ngaihsak si lo hi a pawi a, nunna an chan phah lo a nih pawhin hetiang hmuna hnathawkte lungawi loh hun hi a thleng ang tih a hlauhawm," tiin a ngaihdan a sawi.
"Workman's compensation a awm a, mahse, hnathawktu thil hre lo zawkte tan chuan hmalak ngaihna a vang hle. Compensation kher lo pawh, loneitute tan medical aid te pawh a awm a, kan ngaihsak si lo a ni," a ti bawk.
Sorkarin ruahmanna tha a neih a pawimawh hle. Hnathawktute dinhmun tha se mipui vantlangin sorkar hna hi beisei berah an neih kher lo ang. Kalphung thar dap lo thei lovah kan awm. Mi tam ber chuan sorkar hnaa luh tumin lehkha an zir a, chu chu kan khawvel tawng meka hmasawnna kawng awm chhun pawh a ni. Mahse, lehkhathiam, zirna pangngaia a tawp thleng chauhin an thawh theih lecturer chu luh theihna kawng a tlem hle. A lut thei chin tana beisei awm chu guest lecturer a ni deuh mai. Sorkar hnaruak awm chhun chu contract basis emaw, muster roll vela luhna a ni deuh mai. Thla khatah Rs 7000-8000 vel an hlawh tlangpui. Chu pawh a thei deuh tan lo chuan a har hle. Sorkar lahin a duhsak zawngte thun hram a tum niin mipui vantlang chuan an ngai der tawh lehnghal. Mizoram dinhmun hi a lungawithlak loh tak zet a ni.
Thenkhat chuan ram pawnah thawh tur a tam, an ti. Dik tak chuan ram pawna hnathawh tur tha chu mi tam zawk tan chanphak rual a ni lo. Tam tak hi chu a tling lo tih chiangsa kan ni. A fel pawh kan fel tawk lo. Mahse, chungho pawh chu sorkar chuan a ngaihsak vek a ngai tho si. Call centre a lar em em. Mahse, call centre hna chu eng tikah nge he centre hi an tihtawp dawn tih hre lo chunga thawh a ngai. Security awm miah lo a ni. Mi zawng zawng mut reh laia thawh ngaite a ni fur lehnghal. Ei hmu mah ila, kan nun dan hian hlutna a nei em? A duh tan chuan luh tur phei chu a ni lutuk.
Burma, sipai sorkar hnuaia awmte chuan lo ti pawh ni se beisei tur dang a awm lo, mahse, state ralmuang nih chhuang em em Mizoram, hmasawnna hna thawh theihna tura boruak ralmuang nei nia sawi thinah hian thil awm dan tur a ni em? Kan fanu fapate hi mi ramah security awm lovin kan thawn liam ngawt ang maw? Kan tum a ruhin kan chhel tur phei zawng a ni. Mahse, thil ti thei leh ti tur sorkar a awm a, chu chuan a tih tur han ti phawt se?
Tunah chuan sorkarin budget a siam a, a tam ber chu mi tlem te, economy atana tangkai vak lo hovin an chang thin. Chung mite chu society-ah high class an ni a, Mizoram budget chu vai ram leh ram pawnah an zu thehthang thin ti ila kan sawisual lo ang . An sum chan chhan berah an thawh that tawk loh avangin kawng engkimah infrastucture a chhe em em. An hnuaiah sumdawng thenkhat leh sorkar hna thawk an awm a, chutah mi hnuaihnung an awm leh. Mizo society chu a kehdarh chhe mek a ni. Sorkar sum bawm tuai vir pha chin hnuaiah middle class leh lower class an tal hiar hiar hlawm mek a, kan ngaimawh leh si!
Sorkar hnathawkte hlawhah Mizoram economy a innghat a, chu chu pawi tih a hnekin sorkar hnathawkte chuan "kan hlawh hi sum lengvel siamtu a ni a, kan hlawh hnem leh midang dawhthlengah a luang lut hnem a ni mai" tiin 6th Pay Commission rawtna hman ve an nawr ngat ngat duh. Finance secretary Lalsawta'n March ni 23-a thuthar lakhawmtute a hrilh dan chuan Mizoram sorkar sum non-plan atangin sorkar hnathawk mi 48,000 velin 54.5% an ei a, plan sumah pawh 25% vel chu sorkar hnathawkte'n an ei a ni. Chuti chung chuan Mizoram sorkar chuan 6th Pay Commission rawtna hman a tum mek. A hrisel lohzia hrechiangtute chu politician-te leh sorkar hnathawkte hi an ni a, anni hi Mizorama a thu thute an ni. Mahse, a hrisel lohzia hrechiangtu pahnihte hian 6th Pay Commission rawtna hman chu an duh miau a, a duh tan chuan hei hi miretheite hmuhsitna tiin a sawi theih hial ang.
"Mizorama eizawnna pui ber chu agriculture a ni a, mahse, kan state economy khalhtu chu sorkar hnathawkte hlawh, public sector expenditure a ni. Kan rama sum lengvel zawng zawng hi sorkar hnathawkte'n an chang a ni deuh ber a, kuthnathawktute chu sorkar hnathawkte aiin an tam zawk fe a, mahse, sum lengvel hi an chang pha lo," tia sawiin Dr James LT Thanga chuan, "Education lamah pawh kuthnathawktute dinhmun hi a tha lo khawp mai. Thingtlang mi chhungkaw 100 zela chhungkaw 10 pawh hian an fate chu khawpuiah lehkha an zirtir thei lo," a ti bawk.
No comments:
Post a Comment