¢ Lalthlamuana Ralte
May ni 1 hi khawvel pumah kut hnathawktute puala serh thin a ni a, 'May Day' tih a ni. Khawvel ram hrang hrangah hnathawktuten an hmang thin a, holiday atana hman a ni thin bawk.
May ni 1 hi hmanlai atang tawhin hnam thenkhat chuan ni pawimawh bikah an neih a, an pathian biakna ni leh an kut pawimawh atan an hmang thin a ni. Mahse, tunlai hunah chuan he ni hi kum zabi 19-na lai vela kuthnathawktute beihpui thlak hriatrengna atan hman a ni a, Workers' Day tih te, Labour Day ti tea hriat a ni.
Kum 1886, May ni 1 khan US ram chhung hmun hrang hrangah kuthnathawktu pawl 'labour union'-in nawrh an huaihawt a, an thil phut ber chu thilsiamna hmuna thawkte hnathawh hun chhung tihtawi a ni.
Factory-a thawkte hian an thawkrim hle a, ni chhuah atanga tlai ni tlak thleng rim takin an thawk thin. Industrial Revolution vangin sumdawnnain nasa takin hma a sawn a, mi hausate'n thil siamchhuah lamah tan an la nasa em em. Factory-a thawkte chu sal chhawr takin an chhawr a, an intunnunna ngawr ngawr hlawh an pe thin. Hnathawktute dinhmun rapthlakzia chu sawiin a siak lo, thenkhat phei chu sal dinhmun ai pawhin an dinhmun a chhe zawk.
Hun a lo kal zel a, hnathawktute chuan an dinhmun siamtha turin hma an la ta a, pawlte hial an lo din ta. An hmalakna langsar ber thin chu an hlawh tipung tura anmahni chhawrtute an nawr thin hi a ni.
An thawhrim hlawkna zawng zawng an pute'n an tel vek a, anni chuan an nitin khawsakna daih tawk ngawr ngawr chauh an hlawh thung. An hnathawh hun darkar titlemsak tura an nawrna ai hian an hlawh tihpunna tura an hmalakna hi a langsar zawk hle. Nawrh an huaihawt chhan pawh an hlawh chungchangah hian a ni fo thin.
Zing ni chhuah rualin hna an thawk tan a, tlai ni tlak hnuah an bawng chauh thin. Kum zabi 19-na a lo thlen chuan US-a factory hrang hranga hnathawkte chuan hma an la tan ta. Heng hnathawktute hi sal tluk deuhthawa chhawr an ni a, tharum hmanga hnathawk chi (labourer) an ni.
Mahse, an thawh hun darkar tihtawi an dilna, anmahni ruaitute leh sorkara an thlen chuan ngaihven a hlawh thei lo. Darkar rei tak tak chhung hna rim tak thawkin an chhawr lui zel a, heng hnathawktute hian mihring pangngai zahawmna an chang pha lo hle a, a ruaitute chuan ran u awrhah an ngai emaw tih mai tur a ni.
A tlangpuiin nitin darkar 14 te, darkar 16 te, darkar 17 te hna an thawk thin. Hmun thenkhatah phei chuan chu aia rei te pawh an thawk.
Hnathawktu pawlin hma an han la sa teh thin a, eng khaw ruai a ang thei lo.
Kum 1806 khan pheikhawk siamna hmuna thawkte an nuar ngawt mai a, anmahni ruaitute thinrim chuan an factory-a hnathawkte thawh hun chhung an pawhsei sak sauh a, nitin darkar 19 leh 20 te an thawhtir zui ta mai. Darkar 24-a darkar 20 hna han thawh chu rapthlak tak a ni!
An thawhhlawh an chang lo chi thu hran ni se, ran chhawr ai pawha rim zawka hna an thawh avang hian beidawng lovin hma an la zui ta zel a. 1820 leh 1830 bawrah phei kha chuan an hmalakna a lian ta viau a, America khawmualpui leh Europe khawmualpuia thilsiamna hmunpui hrang hrangaahte chuan nitin darkar 10 chhung labour union-te'n hnathawh dilna hial te an thlen ngam tawh a ni.
1840 chho velah khan kuthnathawktuten khawvel puma hnathawkte thawh hun chhung darkar 10 ni turin an nawr chhunzawm ta zel bawk. An duh anga darkar 10 thawk tura an tihhlawhtlinsak tak hnuah chuan industry thenkhata thawkte chuan darkar 8 ni turin an nawr chhunzawm leh ta thuai bawk.
Hnathawh hun chhung darkar 8 ni tura hmalakna vung chho tial tial chu 1857-a industry-te'n harsatna lian tak an tawh avangin a zuai leh ta deuh. Hnathawh hun chhung darkar tihtlem a nih theihna tura hmalakna hi US atanga intan a ni a, ram hrang hrangah a kangkai ta zel a ni.
A hma lama hmun thenkhata hmalakna hi chu thuhran ni se, May Day hringchhuaktu ber ni ta - hnathawktute thawh chhung darkar 8 ni tura nawrna beihpui tak tak chu kum 1886 May ni 1 kha nia chhuilet a ni.
May ni 1, 1886 hian US ram pum puia labour union hrang hrangten nawrh an huaihawt a, an thil nawr ber chu hnathawh hun chhung darkar 8 ni se tih a ni. An nuar zel a, May ni 4 a lo thleng a, Chicago khawpuia Haymarket Square-ah chuan lungawilo pungkhawm zinga pakhat chuan bomb a vawm a, mi 10 chuang an thi a, mi 100 chuangin hliam an tuar bawk.
Heti chung hian an thil nawr chuan thuneitute ngeng a chhun mai lo a, mahse, an tum a ruh em avangin nasa zawkin an bei zui zel tho. A tawi zawngin sawi ta ila, a hnuah chuan an thil nawr hi an hlawhtlinpui ta a, thilsiamna hmuna thawkte thawh hun chhung chu darkar 8 a lo ni ta a ni.
Kuthnathawktu buaipuitu pawl The International Labour Organisation din thar leh chuan Paris khawpuiah kum 1899 khan inhmuhkhawm an buatsaih a. Chutah chuan May ni 1 hi khawvel puma kuthnathawkte pual ni turin an rel ta. An dinhmun siamthatna atana an hmalakna leh kuthnathawktu pawl thil nawr hlawhtlinna chhinchhiahna atan hman a ni zui ta a ni.
May Day hian kuthnathawktute dinhmun chhiat thinzia leh mi hausaten an chhawr retheihzia leh chumi lak atanga an talchhuahna lawmawm tak a entir a ni. He ni hi vawiin thleng ram hrang hrangah lawm a ni thin.
Ram hrang hrangah chuan hnathawka inhlawhfa thinten kawng an zawh thin. Kuthnathawktuten intihhlimna hun te an hmang thin a, an fate tan infiamna leh intihsiakna chi hrang hrangte an buatsaih thin bawk.
Tunlai hunah chuan May Day lawm dan hi a danglam deuh hlek tawh. Kuthnathawktute leh an inzawmkhawmna pawl trade union te'n an dinhmun siamthatna atan leh hamthatna an dawn theihna tura hmalakna ni atan te an hmang thin.
No comments:
Post a Comment