¢ Debbie Chawngthu
Tleirawl chhuah hian mawi tumna a nasa bik a, hmeichhia lek phei chu a hma zawnga tih ngai log make-up hman te kan chak a, a hman pawh kan hmang nasa hlawm reng a ni. Tleirawl inhnawih chiam mai hi chu a nalh lova, an 'innocent' na zawng zawng a tibo vek a, a mawi ber lem lo. Make- up hman vak ai chuan skin lotion vun tih that nan hmang sela, hei bakah hian vun rawng milin foundation tlem inhnawih thin sela, a nalh tawk em em a ni. Lipstick inhnawih duh pawhin rawng lar aiin rawng dal lam ni thei se, lip glos te pawh hi a lang 'natural' a, a mawi tawk a ni.
Nail polish pawh hi tin chhe deuh tan phei chuan hnawih loh aiin hnawih a nalh zawk a, mahse tleirawl tan chuan rawng lar aiin a sendang dal emaw transparent nail polish te hi a tawk hrih chauh a ni. Tunlaiin nail polish dum an uar hle a, nalhpui tak tak te pawh an tam. Amaherawhchu, heng nail polish reng reng te hi a rawng khawk tawh emaw hnawih ruallo tak anih chuan a mawi lam aiin hmuh nuamlo a ni thei tih hriat reng a tha. Foundation hi vun hang tak tan lo chuan satin glow hi inhmeh a awl ber a, inhnawihin a chhuk zawnga nuai lovin a chho zawngin dimtea nuai rual tur a ni. Blusher hman pawh hi tleirawl tan chuan a tul vak lem lova, mahse thisen nei tlem leh vun rawng dang tan chuan tlema hnawih sen deuh pawh a pawi lo a ni. Mahse hetah pawh hian man tlawm lutuk hman loh hram a tha a, chutilo chu vunin a chhiat phah thei a, hmai leh vun hnawih te hi man to apiang a tha tihna nilovin man tlawm lutuk leh company lar sa anih loh chuan hman loh hram a tha.
Powder hi inhnawih kan ching hlawm hle a, hei pawh hi puitling tawh tan a tul bik a, tleirawl lai chuan vun a la mam a, hnawih vak a tul lo. Kan sawi tawh ang khan nisa leh thli laka veng tur engemaw lotion hnawih mai a la tawk a ni. Make-up tak tak hi chu nulat puitlin hun atan chauh nise vun tan pawh a tha zawk daih. Mit hnawih hi a mawipui theih viau a, mithmul sei er tan phei chuan mitmeng a ti nalh em em a ni. I mit i chei dawn anih chuan a hmasain i mit vun vel tifai tha la, chutah eyebrow pencil-in i duh angin rin rawh. Tak deuha hnawih dum vak ai chuan tlema dum ni thehise tleirawl ho chuan an mawipui fo zawk. Eyebrow pencil emaw eye- shadow tle miah lova mithmul er nalh tak hi hmuh a nuam a, mithmul ti langsar turin mascara hman a pawi lo.
I mithnawih i tihfaiin ngun takin tifai thin la, chumi zawhah olive oil hmangin i mithmul ti mawm la, a thang duhin a dum duh sawt bawk ang. Face pack hman hi upa tan chauh a ni lova, naupang deuh tan pawh tih a tul tho a ni. Make-up hmang lo mah ila, vaivut khu leh boruaka bal leng vel hian kan vun a ti bal tho tho a, heng tifai tur hian face-pack hi hman thin a tul a ni. Face-pack atana tha ber pawl chu thingfanghma hi a ni a, rawt diak la, minute 30 chhung i hmai chiah nan hmang thin la, i vun a nung sarh mai ang.
Make-up products reng reng lei dawnin fimkhur a tul a. Engtika siam nge, engang vun atana siam nge tih te leh eng company siam nge tih thlengin enfiah thin tur a ni. Vun mil lo leh a siamna rei tawh lutuk hman chuan vun a ti hmelhem thei a, vun bawl leh thak te pawh a awmtir thei a ni. Tar thlenga vun tha leh mam i nei duh anih chuan a hmasain faina ngai pawimawh la, i hmai leh taksaa i hnawih tur reng reng i hman hmain uluk takin bihchiang la, i vun mil zawng a ni tih i hirat hnuah chauh inhnawih thin ang che.
Thingfanghma hi thei tui tak a ni a, taksa tan a tha bawk a, a bikin pumpui chaklo tan a tha a ni. Thingfanghmaah hian thei danga hmuh tur vang tak, 'fibrin' an tih mai chu a awm a, hei hian thisen chhuak tur a dang thei a, chuvang chuan taksa hliam, chhunglam leh pawn lam ami pawh a tidam rang thei a ni. Thingfanghma la hmin lo tui hi ril lam natna nei tan leh ulcer neni tan damdawi tha tak a ni. A hmin leh a hel hi taksa tan a tha em em a, taksa natna chi hrang hrang damdawi atan hman uar ber pawl a ni.
No comments:
Post a Comment