Chhuat phah dup

¢ Lalhruaitluanga Chawngte

A chhungte chu tui takin an mu a, ani erawh a muhil ve thei lo. Lalin ti tura a tih chu a'n ngaihtuah thin a, thil theih a ni lo tih a hrechiang hle. A tih theih loh chuan a thi dawn si; a lu an tan dawn!

Lal khawnbawl upa a ni a, an lalin a ram chhung zawng zawngah chhuatphah dup chi phah chhuak turin a ti. Lal chuan "chhuatphah dupah lo chuan ka kal peih lo" tiin a khawnbawl upa pakhat chu chhuatphah dup chi ngaihtuah turin a ti a ni.

Chu khawnbawl chu a mangang em em mai a, an lal lah chuan a thupek a tihhlawhtlin loh chuan thahah a vau si. Han muhil ziazang a ni lo; a tal a tal a, a inlet sek mai.

Khua chu a var lek lek tawh a, lal thupek chu khawvar hma ngeia a tihhlawhtlin loh chuan a lu an tan dawn. A hmabak chu a'n ngaihtuah a, a thlan a tla bap bap mai.

Khua a var ta.

Lal chu a khum atangin a zuangtho a, tukverh lam panin a tlan nghal. Chhuatphah dup chi a inphah leh inphah loh a en a ni.

Chhuatphah reng reng a hmu lo. A thin a rim a, "Khawiah nge khawnbawlpa chu a awm? A lu tan nghal rawh u!" a ti tun tun mai.

Chutia a thinrim a insawh bap bap lai chuan a khawnbawl upa chu kawngkaah a rawn lut a, kut hnung a suih tat mai. Mangang tak chungin lal hmaah chuan a bawkkhup a, a thusawi ngaithla phawt turin lal chu a ngen a ni.

A ngenna chu lal chuan a lo pawm hlauh mai, a duh chu sawi turin a ti. Chu veleh khawnbawlpa chu a rawn thochhuak a, silipar a rawn lek kang va mai.

Khawnbawl upa chuan inthlahrung tak chungin silipar chu lal chu a'n pe a, "He silipar, dup nuam tak mai hi i bun ang a, i kalna apiang chu chhuatphah nuam tak a ni zel mai dawn zu nia, ka lal-zahluai..." tih pahin.

Lal chu a nui ta vur vur mai; a thinrimna zawng zawng chu thawk-leh-khatah a bo duak a, a hlim ta em em mai a ni.

A khawbawl upa chu lawmthu a hrilh a, a kuah vel chung bawk.

Malsawmna hi kan beisei loh zawngin a rawn thleng fo a, kan beisei loh dana a rawn thlen hian malsawmna a ni tih kan hre lo thin. Ngaihthlak peih hi a tul khawp mai, mi thusawi ngaithla hman lova kan rik buan buan thin avangin malsawmna kan hrethiam lo fo. He lal pawh hian a khawnbawlpa thusawi hi ngaithla hman lovin a thinrim hrithla buan buan se chu malsawmna a hai ang a, malsawmna a hai vanga thi an awm ngei ang.

Related Posts :