Pu Nick-a Kiangah Mizo Naupang Basil-a a Kal Dawn!

¢ Joseph Lalrintluanga

Mizoram Tennis Association-a an ziaktu Lalfakzuala Hmar-in Nick Bollettieri Academy-a zir tura Basil-a thlan a nih chungchang SMS a rawn thawn ka'n dawng zet chu, a hnên atanga SMS ka dawn tawh azawnga chhiar tlâk ber leh min tilawm bertu a la ni hial âwm e!!


Ka lawmpuizia ka'n thawn kir nghal thuai a; Mizoram Tennis chhungkua pawh an lawm a ni tih ka hre zui ta zel. Herman S Khuma fapa, khawvela tennis zirna tha bera ngaih Bradenton, Florida, USA-a inkulh Nick Bollettieri Tennis Academy-a tennis zir tura thlan a ni ta mai hi mumang te pawh a ang rum rumin ka hria. A chhan chu tennis hi game har lutuk mai, ram changkang zawk leh India ramah ngei pawh mi tam takin nasa taka an beih fe hnuah pawh an hlawhtlinpui theih loh khawpa game har a ni a. Chutiang khawvela cheng ve tan Basil-a, amah Basil-ah ngei mai, grand slam champion tam tak chher chhuaktu Nick Bollettieri te angin thiamna leh theihna (potential) a'n hmu ta mai hi, kei chuan ropui ka ti êm a ni.

Ka ngaihtuah zui ta zel a, TV-ah tunhma deuhin Leander Paes leh Mahesh Bhupathi te inkhel kan hmu ngun deuh a, tunhnuah rawlthar Yuki Bambhri teho kan hmu ngun leh tawh a, Basil-a hi engtikah nge kan hmuh ve ang aw, ka lo ti thin a; 'tunah chuan a kal hlat dawn êm avangin a hmel hmuh hun kan hnaih sawtin ka hria.'

Basil L Khuma hi India ram atanga he hmuna zir thei tura thlan mi 4-te zingah telin September ni 4 emaw ni 5 emaw hian USA an pan dawn a ni. Hetiang tennis zirna changkang leh thaa zir thei tura Mizo naupang ngei thlan a ni hi Mizoram infiamna history-a thil chhinchhiahtlak tak a nih bakah Mizoram tennis history-ah phei chuan heia aia thil lawmawm hi a la awm awm lo e. He hmuna zir tura thlan a nih chungchang hi Basil a nu leh pate hnenah IMG Reliance hotute chuan e-mail in an rawn hrilh a, Mizoram Tennis Association hruaitute chuan lawmawm an tihzia leh an lawmpuizia an sawi a ni.

India rama mipa naupang kum 12 hnuailam leh kum 14 hnuailamte inelnaa vawi duai lo champion tawh, Number one nihna chelh deuh reng Basil L Khuma hian talent a nei tha a ni tih IMG Reliance hotute'n an hmu a, Florida-a awm Nick Bolletieri Academy-ah hian zir tlak a nih ngei beiseiin trial turin an thawn thla a. Tun thla tir lam khan an zu trial a, an lo thlang ta nalh a ni. IMG Reliance hian Basila zirna senso zawng zawng pawh an tum sak vek dawn a ni.

He Tennis Academy-ah hian mi nazawng tan a zir theih loh a, Academy dintu Nick Bollettieri leh a hoten uluk taka a inkhel lai an lo en hnuah, court chhung leh pawn lama a hawiher chitin an enthla leh vek a, chumi hnuah chuan tennis zirtir zui tlak a ni tiin Basil-a chu an thlang ta a ni.

Nick Bolletieri Academy hian tennis bakah education pawh an ngai pawimawh hle a, an academy-a inzirte reng reng hi education tha tak an pe tel thin. Basil pawh hi a lehkha zir chhung zawng a awm dawn avangin a rei lo berah kum hnih tal chu an kawl dawn niin a lang. Hetih chhunga a inzirna senso zawng zawng, School chawlh chhunga a rawn haw leh a kal lehna senso zawng zawngte pawh IMG Reliance chuan a tum vek dawn a, chu chu cheng nuai 75 zet a tling dawn nia chhût a ni. A inzir chhung hian a chhungte pawn engtiklai pawhin an tlawhpawh phal a ni bawk.

Nick Bollettieri Tennis Academy
He tennis academy hi kum 79 mi Nicholas James Bollettieri chuan 1978 khan a din a, he hmunah hian uluk taka tennis an zirtir bakah uluk takin lehkha an zirtir bawk thin. Academy-ah chuan US Open khelhna ang chi Outdoor Hard Courts 35 zet a awm a, heng court-te hi video camera nena thuam vek an ni a, hemi hmang hian an khelh dan (performance) te uluk takin an ennawn leh thin. Hard Court hi indoor-ah 4 an la nei bawk a; chu mai a la ni lo, Green Clay Court 16 an la nei a, Red Clay Court 1 an la nei cheu bawk.

Tawngkam nalh leh dangdai tak tak hmangtu a nih vanga Nickabulary engemawzat chherchhuaktu Pu Nick-a War Room-ah chuan class-room style-in match strategy te an zir thin. Academy-ah hian full time-a thawk, a hmuna thutchilh coach thiam tak tak an awm teuh bakah thutchilh ve lem lo, pawnlammi an rawih (Guest Coaches) lar tak tak Brad Gilbert, Brian Gottfried, Jimmy Arias, Petr Korda leh Cyril Suk te an la awm thut mai bawk. Hengho ten kum hnih vel an kaihhruai hnua Basil-a inkhel han en leh mawlh mai chu a ni, ka châk tawh chu ni!!

Nick Bollettieri Tennis Academy hi khawvela tennis academy tha bera ngaih a ni a, he hmun hi tennis player ropui tak tak, Grand Slam a champion tawh, heng Andre Agassi, Boris Becker, Pete Sampras, Martina Hingis, Venus Williams, Serena Williams, Mary Pierce, Monica Seles, Maria Sharapova etc. leh Russian nula no nalh tak mai Anna Kournikova teho inzir chhuahna hmun a ni.

Basil L Khuma
Mahni khaw aiawha chhuah pawh a harsat tehlul vei nen, Basil L Khuma hi kum 15 emaw lek la ni mah se India ram aiawh hian khawvel ram hrang hrangah tennis khelin a kal tawh a. Tunhnai mai pawh khan Asia team-ah telin Europe ah inkhelin a kal leh tawh a; tlem lai khan China leh Malaysia ahte a han khel tawh bawk.

Nikum khan Germany ram Munich khawpuia tennis zirna lar Niki Pilic Academy ah thla 2 chhung vel Ministry of Sports sponsored in a zu zir tawh a, Basil chuan Germany ah hian hlawkna tam tak a zu chhar tih sawiin a serve te pawh tunhma zawng aia a that thu a sawi a. Coach te'n an lo zirtir dante chu India ram nen chuan a inthlau hle nia sawiin, "Hlah har (consistency) min zirtir nasa hle a; min train dan pawh a hautak (a intense) hle bawk" tiin a sawi a nih kha.

Chutiang taka thla hnih chhung vel lek training pawh a hlawkpui a nih chuan Nick Bollettieri Tennis Academy a kum hnih vel training han neih chu ani anga talent nei tha tan chuan a hlawkthlak tur zia kan hrethiam mai awm e.

Basil hi a nuin Delhi-ah a awmpui chawt a, a pa hi Police Officer niin Aizawl-ah hna a thawk thung a, a ute pawh ram pawn leh India ram hmun hrang hrangah eizawngin an khawsa mek a ni.

Delhi-ah hian Tennis bakah lehkha a zir a, a nu hian duat takin a kaihruai a ni. India ram khawpui hrang hranga tournament a khelhnaahte a nu hian a kalpui zel a, inkhel entute thutna atanga amah chauha a fapa lo tan chu a chang chuan a khawharthlakin a hrehawm thei hle thin niin Pi Mary chuan a sawi.

Family Catch Them Young
Pi Mary hian Mizo nu leh paten kan fate inzirchhohnaah hian tih tur kan ngahzia leh kan mawhphurhna sanzia a sawi a. Hei hi an fapa Basil a kalkawngah hian a dik zia a lang reng mai. Pu Herman-a hian a fapa hi Aizawl tennis court-ah hian naupang tê a la nih laiin a hruai ve thin a, a pate inkhelh lai hian tennis court bang velah chuan ball a lo vaw sawt ve thin a, a pa chuan a fapa chu a ball vuak dan leh a zei dan a hmuhin zirtir zui zel tlak niin a hria a, Basil-a u Joseph Z Khuma chu tennis khel thin a lo ni bawk nen, a u chuan a kaihruai zui ta a ni.

Sorkarin Catch Them Young a kalpui mek lai hian nu leh pate hian kan fate hi kan phur pui ve tak meuh em? An hmalam hun atan kan sum leh paite kan ‘invest’ phal em? Chhungkaw tin chuan hei hi kan ti thei hauh lo, a ti thei chhungkua chu kan tlem pharh ang, mahse tithei dinhmuna dingte pawhin a nachang kan la hre mawlh si lo.

Kum 15 vel kal ta khan Assamese nu berh ve te te hian an fate school bân hnua tennis leh table tennis an zir lai, court kianga dawhthei taka an lo nghak lai hi Guwahati-ah khuan ka hmu a, 'heng mite hi an hmel en reng reng paw’n an changkang bik vak si lo a, an rilru erawh a lo va’n changkang bik e…' ka ti a. Tunhnaiah nu leh paten an fate sports training nei lai, field sir leh court kianga an lo nghak far mai ka'n hmuh hian rilru hi a nuam ve veng veng mai thin.

"My Boy" kan la chhuang dawn che
Mizo naupang Basil L. Khuma hi eng tik ni-ah emaw chuan India ram tihmingtha tura Davis Cup leh ATP Tour vela a hming a lan ve ngei i lo beisei phawt teh ang.

Chutih hunah chuan India rama kum 14 hnuailamte inelnaa a hmel leh vaiho hmel a inan loh deuh vanga hnamdangte auh nawmnah a tuar chhuah dan te, a nuin hrehawm a tih thinzia te kha thawnthu ngaihnawm ber ber a la ni ngei ang. Chu Mizo naupang chu eng tik ni-ah emaw chuan amah au nawmnawh ber bertute nen khan kan la ngaihsan rawnin ka ring tlat. A chhan chu Pu Nick-a'n karleh lawk atanga "My Boy" a tih tur kha a ni tlat.

Related Posts :