An zing atan a hrangin an awm ta a

May ni 15-a chhiarpui tan a nih atanga chanchin langsar ni nghal chu 'sakawlh' chungchang hi a ni awm e. Chawlhkar khat emaw chauh chhiarpui hi thawh a la ni a, mahse, hmun hrang hrangah he 'sakawlh' hian harsatna a thlen der nasa tawh hle.

"Chhiarpui a ni lo, sakawlh lo lanna tur a ni. Setana hian thiam takin mihringte min bum mek a, ringtute tel vena chi a ni lo," tiin Aizawl nu pakhat chuan a sawi a, a tang na hle.

He nu ang hi Mizoram hmun hrang hrangah engemaw zat an awm a, 'an tam hle' ti pawhin a sawi theih ang. An buaina ber chu- a thawh hnihnaa neih tur, kutzia (fingerprint) lak tur a ni leh thla lak tur a ni hi a ni a, chu chu 'chhinchhiahna'-ah ngaiin, sakawlh chhinchhiahna, ringtute tel vena chi lohah an ngai ta a ni.

Fingerprint leh thla te lak a nih hnu-ah UID siam tur a ni a, UID chu kawng hrang hranga thil tangkai tur a ni. A nei ve lote tan kawng hrang hrangah a harsatna a awm dawn a, thil lei leh hralh chungchang te pawh nghawng hle tura ngaih a ni. Bible chang- "Tin, mi zawng zawng a lian a tein, a hausa a retheiin bawih leh bawih lo pawh, an kut ding lamah emaw an chalah emaw chhinchhiahna a neihtir hlawm a," (Thupuan 13:16) te, "Chhinchhiahna-Sakawlh hming emaw a hming nambar emaw-neite chauh lo chuan tuman engmah an lei leh an hralh theih loh nan. Hetah hian fin a tulzia a lang. Chhut thiam chuan Sakawlh nambar chu chhut rawh se; mihring nambar a ni si a; a zat chu 666 a ni," (Thupuan 13:17&18) te nena hmehbelin, chhiarpui chu sakawlh lo lanna turah an ngai ta a ni. Nikum lam atang khan chhiarpui leh sakawlh sawi zawmtu an lo awm tawh reng reng bawk.

Hetianga sakawlh nena hmehbel vanga chhiarpui-a inchhiartir ve duh lo hi eng zat nge an nih tih chiang faka sawi theih a ni rih lo. Vairengte-ah chuan chhungkaw 30 an awm tawh tih thu dawn a ni a, Kolasib-ah chhungkaw 50 chuang hriat an ni tawh bawk. Aizawl District-ah chuan bawrhsap C Thanchhuma'n a zat hre turin chhiarpui-a thawkte a hrilh a, anni hian a hnenah report an thehlut dawn a ni.

Zozam Weekly zawhna chhangin Aizawl bawrhsap chuan, "An tam khawp mai," tiin chhiarpui-a inchhiartir duh lo tam zawng a sawi a, "Khawpuiah pawh an awm, an tlem lo," a ti.

Fingerprint lak a la ni lo a, thla pawh lak a la ni lo. Mahse, NPR atan hian chhungkaw hotuin signature an pek a ngai a, signature pe duh lo an awm thin tih Aizawl bawrhsap chuan a sawi a, tin, pian ni leh thla zawng zawng chhinchhiah tur a nih avangin mahni chhungkua ngeiina an sawi loh chuan midang tan lo sawi sak turin lo hriat ve kilh kelh a har tih a sawi bawk. An hlauh ber- UID hi nakkum lama tih tur la ni chauh mah se a hlaute chu tun apangin chhiarpui-ah an tel duh lo a, chu chuan harsatna a thlen ta tih a sawi bawk.

Zozam Weekly-in a biakpawh, chhiarpui buaipuitu hrang hrangte thusawi atanga a lan dan chuan, chhiarpui-a tel duh lote hi mi chi hrang hrang an ni a, a Kohhran zawng leh eizawnna zawng pawhin an huap zau khawp mai. Kohhran pangngai te, pawlchhuak te an ni a, Sabath serh chi te, Kohhran nei lo te an awm bawk. Hmel han en pawha lehkha chhiar zau lo tih hriat deuh te leh lehkhathiam, inchhiar zau pangngai deuh te an ni nawk a, sakhaw mi tak takte leh sakhaw mi lo fe fe te an inpawlh nawk. Bible hre deuh deuh an awm a, Bible hre lo fe fe, sakawlh awmzia pawh ngaihtuah ngai lo, mahse, mi sawi hriaa hlau ve ta te an awm bawk.

Kolasib-ah chuan nupa tuak khat an invuak phah; nu berin inchhiartir a duh lo a, pa berin a nawr lui, nu ber a tang tlat si, a chhiartu (enumerator) awm laiin pa ber thinrim insum zo lo chuan a vaw ta a ni!

Chhungkaw thenkhat chuan a chhiartute hi an lo chhang duh lo a, an kalbosan daih thin. "Kan bialah chuan in 3-ah min kalbosan tawh. In pahnihah chuan bedroom-ah min luhsan a, in pakhatah chuan min chhuahsan," enumerator pakhat chuan a ti.

Hetianga chhiarpui-a tel duh lo zingah hian sorkar hnathawkte pawh an awm a, Zozam Weekly-in a hriat chinah chuan zirtirtu leh jail hnathawk an awm.

A chhiartu thenkhat, hmai vela ser emaw kutchuk emaw neite chu thenkhatin an hlau a, chutiang chu sawi tur a awm nual.

Related Posts :