Chhiarpui-ah 666?

Chhinchhiahna- Sakawlh hming emaw a hming nambar emaw-neite chauh lo chuan tuman engmah an lei leh an hralh theih loh nan. Hetah hian fin a tulzia a lang. Chhut thiam chuan Sakawlh nambar chu chhut rawh se; mihring nambar a ni si a; a zat chu 666 a ni: Thupuan 13:17&18

Khaw pakhata chhiarpui chhiartu (enumerator) pakhat chuan a hmaiah kutchuk a nei a, a lian ang reng bawk nen, chhiarpui leh sakawlh hmehbeltute'n an hlau ngei mai! "Tin, mi zawng zawng a lian a tein, a hausa a retheiin bawih leh bawih lo pawh, an kut ding lamah emaw an chalah emaw chhinchhiahna a neihtir hlawm a," (Thupuan 13:16) tih ziak a ni si a.

2011-a tihchhuah tur chhiarpui neih mek a ni a, India rama cheng kum 15 chinte chanchin kimchang chhinchhiahna tur National Population Register (NPR) atana thil pawimawhte pawh lakkhawm nghal a ni. Mizoramah chuan May ni 15 atang hian a thawh khatna tan a ni.

Chhiarpui hi thuang hniha neih tur a ni; a thawh khatna hi April atanga June 2010 inkarah state leh UT tinte tuam hman tum a ni. 'Houselisting & housing census' te tih a ni ang a, in leh a sakphung te, in chhunga thil awm te, tui lakna hnar, inthiarna siam dan, kawlphetha leh thil hlui neihte chhinchhiah a ni ang. National Population Register atan chhung tina mihring zat, pian ni leh thla, zir san zawng leh hnathawh/eizawnna te chhinchhiah tur a ni. A thawh khatna hi tih mek a ni.

Chhiarpui thawh hnihna hi February ni 9-28, 2011 chhunga neih tur a ni a, 'population enumeration' neih a ni ang. Mi cheng zawng zawngte chhiar a ni dawn a, kum 15 chin chu an fingerprint (kutzia) lak a ni ang a, an thla lak a ni bawk ang. Chutianga tih zawhah identity card pek an ni ang a, chu chu UID tia sawi, Unique Identity Card chu a ni.

April ni 1-ah khan India ram state leh UT thenkhatah tan a ni a, June ni 15-ah a hnuhnung ber te'n an tan ve ang. Mizoramah chuan May ni 15-ah tan a ni a, mahse, sakawlh-in chu chhiarpui chu a tibuai ta a nih hi!

Related Posts :