ZU

¢ Dr Lianhlupuii (Puitei)

Zofaten 'Zu' kan tih mai, 'Alcohol' hi mihring tan damdawi lama a thatna a tlem hle na a, taksa leh thluak lam a khawih pawi theih em avangin fimkhur a tul khawp mai. “Beer te chu Zu a ni hlei nem,” kan han ti thla ngawt mai thin te hi a dik lo ngawt mai.

Zu kan tih- Alcohol hi Beer-ah 3-6 %, Wine-ah 10%, Port-ah 20% leh Spirit-ah 40-50% a tel. International level-a taksa tana pawi lo tawk zu in duh chuan Pure Ethanol an tih chi mipain 60g leh hmeichhiain 30g aia tam lo in tur a ni. Keini Zofate zingah hian zu thatna hi sawi han tum chiam mah ila, taksa a khawih pawizia leh khawtlang a tihbuai em avang hian fak a hlawh lo khawp mai. Zu-in mihring a khawih pawi dante han thlir ila:

Thluak lamah (Central nervous system effect):
Zu in chuan rilru a phur ve mai a. Mahse, zu chuan thil chik duhna, rorel thiamna, ngaihtuah thiamna leh tih tang tang duhnate a tibo vek thei. Thisen chhunga zu a tam lutuk chuan taksa a tizawiin thil hlauh rukna thinlung a thlen a; patling, nutling pawh hi zu vangin nikhaw hre lova leh der a awl hle.

Rilru control theihna a tihbuai avangin zu hian thikthu chhiatna, dawt sawi duhna te, zahmawh sawi hreh lohna te a thlen thei bawk.

Zu hi Nula, hang ngaihno bei tak ang mai hian zun a ngah em avangin a ngawl vei a awl hle. Hei tak hi a ni zu hlauhawmna chu. Zu ngawlvei chuan chhiatna tinreng leh thihna hial a hmabak reng mai zu nia! Thluak a tibuai a, mi-a-ah a chhuah thei bawk a ni.

Lung lamah (Cardio vascular system):
Taksa chhung lam a tihsat thin avangin thlan a tichhuak a, taksa pawn lam a vawt si a, zu in awm duhdahte phei chuan chutiang atang chuan lung hamda vung natna leh lung natna chi dang dangte an vei thin.

Kawchhung lamah (Gastro-intestinal system)
Pentawngho chu zingah an luak a chhuah avangin an uak nasa thin, pumpui natna an vei thin bawk. Luak nasat chuan hrawka thisen kawng a thler thei a, thi-in an luak duh bawk. Thin vung leh thinro natna (Mallory Weiss Syndrome) tam zawk hi zu vang a ni. Thin chak lo tan chuan zu hi 'tur' a ni. Thisen mur var hian natna hrik a do thin a, thisen mur var hnathawh zu-in a dan thin avangin zu in mi chu natna hrikin a zuam riau a, thisen sang pawh a tisang zual a ni.

Kal lamah(Renal system)
Zu hian zun ti tam hle mah se zunna Urate (Urea a chhuak thei) chhuak tur a dan avangin kal natna a thlen a ni.

Sex lamah
“Alcohol provokes the desire and takes away the performance” tiin Shakespare-a chuan a sawi a, chakna (desire) chauh nei-a a tak ram thleng zo tawh lo tihna a ni. Zu in mi nupui chu mi rethei ber a ni thei a, a tawpah phei chuan a lo chin (impotence) phah theih hial a ni.

Zu that ve nate

1. Damdawi siam nan leh zan mut theih nan.

2. Pem, pan, hliam vel hrik dangtu leh tithianghlimtu atan.

3. Tha-na chiu reh nan (Neuralgia effect).

4. Chhul insang tur a dan avangin a hun lova naupai tur a veng a ni.

Zu hi a thatna aiin a that lohna a tam zawk avang leh a ngawlvei mai a hlauhawm avangin, in ngai lote tan chhin loh law law, in thinte tan sim tum, ngawlvei te tan ban thak tura inenkawl a ngai a ni. Zu ngawlvei rehna damdawi tha tak chu Bisulfiram (Antabuse) hi a ni.

Related Posts :