Zawlkhawpui senmei chan thlaah senmei bawk

March ni 5 chu Zawlkhawpui senmei chan ni tia sawi a ni fo; March ni 5, 1966-ah jet fighter hmangin Aizawl leh khaw thenkhat beih a ni a, Zawlkhawpui beina tuartu Dr Laltanpuii'n 'Zawlkhawpui senmei chan ni kha' tiin MZP Chanchinbu-ah thu a ziak a, he tawngkam hi a lo piang ta a ni.

Kum 44 a liam ta; March thla a lo herchhuak a, Mizoram chuan senmei bawk a la buaipui.

March ni 5-ah MZP te'n Zoram Ni tia vuahin jet fighter hmanga Mizoram beih a nih cham an hmang a, titi a siam hle. Zoram Ni an hmang zo a, senmei bawk chu Mizoramin a la buaipui ta zel mai. Mahse, chu senmei chu jet fighter hmanga beihna vanga thleng ni lovin, thil dang vanga thleng a ni.

March ni 21, World Forestry Day-ah (ramngaw humhalh pawimawhzia inzirtirna ni) meuh pawh Mizoramin senmei vangin ramngaw hlu tak a chan duai duai mai.

March ni 21 hi Pathianni a ni a, a hma ni velah chanchinbu lamah forest deptt. chuan World Forestry Day pualin ramngaw humhalh pawimawhzia an puangzar a ni. Mahse, a ni lo thleng a, ramngaw humhalh lai, ngaw tha tak a kang ta hluah hluah mai.

He thil thlenna hi Saitual a ni a, an khaw 'reserved' ramngaw a kang a ni.

"Kan ramngaw a kang duai duai mai, a alh chak em em mai lehnghal. Ramngaw-ah pawh a ngaw tha lai a nia, a uihawm tak tak a ni," tiin Saitual VC president Rochhara chuan a sawi.

Hun engemaw chen an lo humhalh tawh ramngaw, zan khat thil thu emaw leka a kang chu mipui pawhin an ui hle.

Inrinni- March ni 20-ah Saitual Silaizawn ram a kang phawt a, VC koh hnatlanga thawkchhuakte'n chhun dar 1 velah hmuin thelh tumin an bei nghal a ni. Zan dar 12:30 velah a mit tawhah ngaiin an hawsan a, mahse, Pathianni- A tuk- World Forestry Day-ah, Sunday School banah chu ram chu a kang leh tih an hre leh ta mai. A thelh turin an thawkchhuak nghal a, a kan chak em avangin khaw chhung lam pawh an insingsa zui nghal nghe nghe. Nizan lamah khan mit tawhah an ngai a, thi leh hliam na an awm lem lo niin an inhria.

Silaizawn ram kang hian Saitual khaw hnuaia an 'safety reserved' a kang kai a, ramngaw a chhe nasa hle tih thu dawn a ni.

He 'reserved' hi Saitual VC enkawl a ni a, ramngaw tha tak a ni. Saitual VCP Rochhara sawi danin 'reserved' ram tin 30/40 hmun vela zau a kang a, a kanna lai hi 'reserved' ramah pawh a ngaw tha lai a ni.

"Kan khaw hual velin 'safety reserved' hi kan siam a, a ngaw tha khawp mai a. Amaherawhchu, hmun thenkhat- motor kawng kaltlangna chu a ngaw tha vak tawh lo a, tuna kang hi motor kawng kaltlang lohna, a ngaw tha lai a ni a, a uihawm zual khawp mai. Tih theih a awm tawh si lo," tiin VCP chuan a sawi.

Kangmei hian khua pawh a hliau zuai zuai hman a, rizai mut rum rum te pawh a awm hman. |in 100 hmun vel zet a kang hman. Ruallung, Keifang leh Rulchawm khaw tlangvalte'n an thelh pui a, Pathianni zan tir lamah khan thelh mitah an inngai ta a ni.

Serchhip-ah pawh March ni 18 vel atang khan YMA Sanctuary a kang a, tin 3/4 vel hmun a kang. Ramngaw a kang chhe hle tih thu dawn a ni.

He sanctuary hi Serchhip Sub Hqrs YMA te enkawl a ni a, a ngaw tha hle. Mi tlawmngaite'n an thelh a, Inrinni khan an thelh mit ta a ni. Thi leh hliam an awm lo.

Mizoram puma hmun hring (green cover) chu 91.27% ni mah se, thing puitling (dense forest) tak tak erawh chu 0.64% chauh a ni tiin forest minister chuan February ni 24-ah khan ‘Nest Box Week & Environmental Awareness Campaign’ hawnna inkhawmah a sawi a, hetia ramngaw humhalh lai a kan avang hian ramngaw tam zawng chu a tlahniam leh ta phawt a nih chu. Hmun dangah pawh ram a kang nasa hle bawk.

Related Posts :