Sorkarin sorkar dan bawhchhia

Ni 100 inhlawhna tia sawi, NREGS hnuaia inhlawhnaah thil tha duhna avangin dan bawhchhiat a ni thin tih rural development minister chuan a sawi.

March ni 25-a Budget Session zawhna leh chhanna hunah Tuipui East bialtu MLA, B Lalthlengliana zawhna- "V/C NREGS hmang dik lo hi sorkarin engtinnge tih a tum?" tih chu, "NREGS hmang dil lo V/C an awm a nih chuan dan angin an chungah sorkarin action a la ang," tiin a chhang a, zawh belhna a chhannaah minister chuan, NREGS hnuaia inhlawhnaah hian thil tha duhna avangin dan baka kal an awm thin tih a sawi a ni. Chu'ng chu haider a ni thin tih a sawi bawk.

"Khaw tam takin dan lovin JCB te an ruai a, hriat loh der thin a ni a," tiin thuneitute leh mipui inhriatthiamna avangin a awlsam zawk zawng thin an awm niin a sawi a, khawl an rawih hian an hnathawh a that zawk avangin, chu chu mipui tana thil tha a nih avangin haider a ni thin niin a sawi.

"Playground leh kawngpui, thil tha zawk kan neih theih nan, Zofate tan vek a ni a..." tiin a sawi zawm a ni.

Tuipui East Bialtu MLA chuan zawh belhin, NREGS sum hman dik loh a tam niin a sawi a, sorkarin hma a la thei em tih a zawt nawn leh a.

MLA chuan Sesih leh Khuangleng inkar kawng cheia NREGS hnuaia inhlawhnaah Sesih V/C te'n mi pakhatah Rs 500 zel cut-in, an cut zawng zawng chu Rs 392544 niin a sawi a, Rs 198000-in JCB leh bulldozer an hire nia sawiin, "Rs 274544 chu an eiral ringawt mai niin a lang a," a ti.

Aibawk-ah pawh chhungkaw 321 an awm laiin job card 369 a awm niin a sawi a, inhlawhte hnenah 'Rs 600 kan pe che u ang a, Rs 500 rawn thehlut rawh u' an inti nia sawiin, chuta pawisa tlingkhawm chu Rs 104000 niin a sawi. Aizawl South III-ah block fund atan NREGS inhlawhna atanga 'cut' a awm nia sawiin, bialtu MLA a inrawlh thuk viau nia sawi a nih thu a sawi nghe nghe.

Lawngtlai West bialtu C Ramhluna pawhin Chhipphir VC te'n NREGS inhlawhna atangin Rs 70000 an cut a, Rs 40000 chu a hmanna hriat a ni lo, tiin a sawi ve bawk.

Zawhbelhna chhangin rural development minister chuan, "NREGS hi sum a tam a, inhlawhnaah pawh hian a buaithlak chang a awm thin a, tun hma pawhin sawi a awm reng a. He'ng zawng zawng hi thla 15 chhunga kan siamthat zawh loh pawhin mipui hian min hrethiam theiin ka ring a, siamthat zel kan tum a..." a ti.

MLA te'n NREGS sum hman dik lohna an sawite chu report an dawng ve lo niin a sawi a, lo enzuia siamthat ngai siamthat a nih tur thu a sawi. National Rural Employment Guarantee Act hmangin thil tidik lote chu Rs 1000 chawia hrem theih an nih thu leh police-ah pawh report-in IPC hmanga hrem theih an nih thu a sawi bawk.

He'ng zawng zawngah hian NREGS hnuaia inhlawhnaah dan bawhchhiatna a nasa hle tih a lang; JCB te, bulldozer te an hmang thin a, chu chu phal a ni lo. Minister ngei pawhin an haider thin tih a sawi.

NREGA Guidelines SALIENT FEATURES OF THE ACT
(xv) A 60:40-ah chuan tiang hian a inziak: 'Wage and material ratio has to be maintained. No contractors and machinery is allowed' tiin. Contractor rawih phal a ni lo a, khawl thil te hman phal a ni hek lo tihna a ni.

A awmzia chu- NREGS hi development programme a ni lo a, eizawnna nei lo miharsate inhlawhna atan liau liauva tih a ni. JCB rawih a nih hian mi engemaw zat chan tur sum chu a nih lohna turah a kal tihna a ni a, chu chu thingtlangmite inhlawhna atana tih NREGS-ah phal a ni lo.

"Kan training-naah chuan 'inhlawhna tur a awm tawh lo a nih pawhin kawng sir lehlam atangin kawng sir lehlamah lungtum chawisawntir ula, an chawisawn zawhah dahlettir leh rawh u. A thlawna pawisa sem ringawt a dik lo a, eizawnna mumal nei lote hian hna thawk ngeiin pawisa hlawhchhuak ve se tihna a ni' ti te'n min hrilh thin," tiin official pakhat chuan Zozam Weekly a hrilh.

Related Posts :