Kei zawng ka thlang, Mizo puan ngei

¢ PB Lalrammawia

Mizo hnam incheina zuartu, Aizawl khawpuia dawr hrang hrangte chuan tunlai hian hnam incheina thawmhnaw lei duh an pung niin an sawi a, a then phei chuan mipuite mamawh an phuhru zo lo hle tih an sawi.


Cheraw hmanga world record siam tum a nih thu puanchhuah a nih atanga world record siam ni thleng khan Aizawla Mizo hnam incheina zuartu dawr hrang hrangte chuan tourist (domestic & foreigner)-te pawhin Mizo hnam incheina an lei nasa hle tih an sawi bawk.

Aizawl khawpui chhunga Mizo hnam incheina zuartu dawr thenkhat chuan world record siam dawn kar hnih chhung kha dawrtu an ngah ber hun a nih thu an sawi deuh vek. Canteen kuala Zo Dawr neitu chuan, "Mipui mamawhna kan phurhru zo lo a ni ber a, kan handloom atanga kan tah bak Thenzawl atangte pawhin kan chah a, mahse kan duhkhawp min rawn pe thei chuang lo," a ti.

"Kar hnih chhung kha chu ni tin min dawrtu an tam avangin chhun thingpui pawh kan in hman meuh lo," tiin dawr nghaktu chuan a sawi bawk.

LR Handloom and Handicrafts, Bazar Bungkawn-a mi neitu Pi Ruati pawhin Thenzawl atangin an chah belh a, an duhkhawp an rawn pe thei lo niin a sawi a; Ngotekherh, Hmar-am, Kawrchei leh Thangchhuah kawr an hralh tam ber niin a sawi. "Chawlhkar hnih chhung kha nitin cheng sinhnih/singthum vel lei ang kan ni," a ti.

Mizorama handloom buaipuitu hlun tak Zonunsang Handloom neitu Pi Ralmanthangi, Chhinga Veng-a mi chuan world record siam tum a nih thu puanchhuah a nih atang khan an inbuatsaih nasa hle tih sawiin, Kawrchei leh Thangchhuah kawr bu hnih (bu khat hi metre 150 zela sei) an tiral vek niin a sawi bawk. Hmar-am, Ngotekherh leh Puanchei an hralh tam hle niin a sawi a, ni tin cheng singli/singnga man an hralh niin a sawi bawk.

Dawr hrang hrangte pawhin mipui duhkhawp an nei zo lo tih an sawi deuh vek a, hnamdangin Mizo incheina leh Mizo kutkawih thil an lei nasa hle tih an sawi deuh vek bawk.

Dawr nghaktu pakhat chuan, "Mizote hian kan hnam thil hi ngaihsan nachang kan hre viau tawh na a, a man lamah harsatna kan nei thin," tiin a sawi.

Related Posts :