Hun inher

Hun han inher velin kan hnam nuna nghawng a neih dan hi thawnthu ngaihnawm takin a ziah theih ang.

Hman ni lawkah khan he hnam hi hnam mawl, A AW pawh nei lo kan ni a, tuma tlawhpawh lohvin, mahniin, mahse, khawhar si lovin kan awm thin.

Kan tum leh kan sualchhuah pawh ni chiah lovin khawvel tharah kan lut a, kan luh dan pawh - zawi zawia lut ni lovin, Aihniara speed daih a ni nghe nghe. Chu 'speed' hmu phakte chu vawiinah, kan zingah ngei hian an la awm.

Tuna la dam, kan pi leh pute hi ek ina inthiar lova naupan lai hun hmang an ni deuh fur a, an naupan lai chuan khawnvar eng chu sawi loh, mei enga lehkha chhiar thin an ni deuh fur bawk.

Chutianga seiliante chuan vawiinah, computer age-ah an tu leh fate min la dampui a, post office pawh chhawr mumal pha lo thin khawpte khan mobile phone thlengin an hum ta.

Vawiina kan zinga awm pitar/putar te khawvel hi; culture engzat nge an paltlang tawh tih chungchang hi thawnthu ngaihnawm tak tur a ni. Sap putarte tunlai khawvel leh an naupan lai khawvel khu, a kar a zau bawk na a, keini pute khawvel ang em hi chu a ni lo.

Thangtharte khawvel ringawt pawh hi ziah fe tham a awm tho ang. 'Chitrahar' en tura a neinung deuhte ina an kalkhawm lai kha hmanni lawk a ni a, veng khata phone nei hmasa te'n khawtlang zualko hna an thawh lai te kha nimin lawk tak tak a la ni. Han thlir let thuak chuan mumang ang mai a ni a, mahse, hman ni lawk a ni si.

Khawlaiah nalh deuh deuhvin kan insulpel a, mahse, a nihna takah chuan, hmanni lawka TV nei, hmanni lawka English Premier Leauge hrethiam, hmanni lawka fridge nei pha kan ni deuh fur. A nawlpuiin telephone kan neih phakna te hi kum 10 em pawh a tling dawn em ni?

Khawvel tharah kan lut a, changkanna nia kan hriat apiang kan bawh ruak ruak a, hmasawnna kawng nia kan hriatah kan inhnawh ang tawt tawt a, mahse, kan nihna tak chuan kan hriat loh lai pawhin hlimthla angin min lo la zui reng thung.

Tumah awt bik lova hlim taka kan zik huai huai laiin mi pakhat, Hamlet-a ni lo Ruotmawi'n kan hmaah darthlalang a rawn dah a, tah chuan kan nihna a lo lang ta a ni. Kan lunglenna tak tak chu hmana mi tho kha a la ni. Kan lo kalsan mai mai a!

"Ba ba black sheep" hmanga awih mut, Mizo pawnto hla pakhat pawh thiam si lo, Vana Pa hre lo, mahse, naupan tet atanga van Nistelrooy-a inkhel en thin, lung loh tui hre lo Greek thawnthua 'lethe water' hre phian si te'n kawng hrang hranga a fawng pawimawh an chelh hnu-ah he nula zai dana zaite hian hriat an la hlawh tho ang em aw!?

Chutiang a nih kan remti tur a ni lo a, kan 'Zo' tlat tur a ni.

Kan ramah hian Zo te, sap te, vai te a awm a, Zo hian chhan a ngai char char. Tunlai hian a rawn huai ngam ve ta deuh emaw'n chu aw!?

Related Posts :