Hneh theih loh nun neitu Abraham Lincoln

¢ Lalthlamuana Ralte

U.S. President ropui bera mi tam takin an ngaih Abraham Lincoln-a kha chhungkaw rethei tak atangin a lo piang a. A dam chhung zawng khan harsatna namen lo a nasain a tlakbuak thin a, vawi tam tak hlawhchhamin, a tlawm zawkah a tang fo thin. A hlawhchham ngun em avang leh harsatna chi hrang hrangin a tlakbuak zin em avang hian beidawng mai awma mawi a ni, mahse a beidawng duh lo. Sumdawnnaah vawi hnih a hlawhchham a, inthlan chi hrang 8 ah a tling zo lo a, rilru hah luat vangin a mu hlawm reng tawh bawk. Mahse, a tlawm duh loh vang chauhin United States history a president ropui ber zingah a ngaih a ni ta hial a ni.

President ni tura Lincoln-a kalkawng chhukchho chu :

Kum 1809, February 12 ah a piang.

Kum 1816 khan an chenna in atangin an chhungkua chu hnawhchhuah an ni a, an chhungkaw intunnunna atan rim takin hna a thawk thin.

Kum 1818 khan a nu in a boral san.

Kum 1828 khan a farnu-in a boral san ve leh.

Kum 1831 khan sumdawnnaah bul a tan a, mahse a hlawhchham chiang hle.

Kum 1832 khan an awmna state roreltu inthlanah a chuh ve a, mahse a tla.

Kum 1832 bawk khan a hna a chan a. Dan lam zir a tum leh a, mahse a tling lo.

Kum 1833 khan sumdawn tumin a thianpa pawisa a puk a, a hlawhchham chiang hle, kum tawp lamah chuan a cha fai vek a. A hnu kum 17 chhungin a leiba hi a rul tauh tauh a ni.

Kum 1834 khan an awmna state roreltu inthlanah a chuh leh a. Hemi tum hi chuan thlantlin a ni ve hlauh.

Kum 1835 khan a bialnu nen an inhual a, mahse a hmangaih em em nupui tura a hual tawh chu a thi hlauh. Rilru hrehawm leh khawhar takin a awm.

Kum 1836 phei kha chuan a rilru hah lutuk chu inah a tawm reng a, thla 6 chhung zet khumah a mu hlawm reng.

Kum 1838 khan an state rorel khawlah speaker nih tumin a chuh a. Mahse, a tling zo lo.

Kum 1840 khan ram hruaitu tur thlang chhuaktu (elector) nih tumin a chuh a. A tling zo lo.

Kum 1842 ah Marry Todd nen an innei a. Fapa 4 an nei a, mahse an fate zinga 3 chu an naupan laiin an thi.

Kum 1843 khan ram rorelna sang Congress a tel tur (member of the Congress) thlannaah a chuh a. A tling zo lo.

Kum 1846 khan Congress a tel tur thlannaah a ding leh a. Hemi tum hi chuan a tling a, Washington ah a insawn a.

Kum 1848 ah Congress atan a chuh leh a. A tla leh.

Kum 1849 khan an awmna state chhunga thawk turin Land Officer hna a dil a. Mahse, a tling lo.

Kum 1850 khan a fapa Edward-a'n a boral san.

Kum 1954 ah an ram rorelna sang Senate of the United States inthlannaah a ding ve a. Mahse, a tla.

Kum 1856 khan national convention-ah an party aiawh a Vice President chuh tumin a bei a. Vote 100 pawh a hmu tling lo.

Kum 1858 ah Senate inthlanah a ding leh a. A tling zo lo leh pek.

Kum 1860 khan United States President atan thlantlin a ni a.

Kum 1862 ah a fapa kum 12 a upa Willie-a'n a boral san.

Kum 1865 April 14 khan kahhlum a ni.

Related Posts :