Guwahati-a thite kha eng tia thi nge?

March ni 22 zing karah Guwahati-a Hatishila Ganesh temple bulah ruang pathum chhar a ni a, pahnih chu Mizo an ni tih hriatchhuah a ni.

Mizo pahnihte hi Saidingliana Sailo, N Vanlaiphai khua-a mi leh Lalhmingmawia, Lamchhip khuaa mite an ni.

Guwahati atanga thudawn danin, Saidingliana hi motor lei tura Guwahati-a kal a ni a, Lalhmingmawia hi nupui fanau nena guest house te siama Guwahati-a awm niin, mi motor leite Mizoramah a khalh hawsak thin. An pahnih hian an inzui a, ni 21 chhunah pawh khan Mizoram House-ah an kal a ni.

Ni 22 zing karah an ruang chhar a ni ta mai a, police te chuan zing dar 3 vela thi niin an hria. Ruang chharna bul vela chengte chuan dar 3 velah hian thil puak ri an hria a, mahse, inneihna lawmna halpuah ri emaw an lo ti niin Guwahati chanchinbute chuan an chhuah.

Ruang hi police te'n an la a, Guwahati Mizo te'n an buaipui a, tlaiah GMC Hospital-ah post mortem tih a ni. Ni 22 zanah Mizoram House-ah anmahni thlahna hun hman a ni a, Mizoram pana rawn chhuahpui nghal an ni.

"An motor leina te nen pawisa inpe tura inhmuh an tum a, chuta an chhuak chu an ruang chhar a nih thuin a zui ta a ni," thudawn chuan a ti a, police te'n an chhui nghal.

He thihna chungchang hi Guwahati police te'n an chhui nghal a, 'gang' pawl pakhat thah an nih rinna a lian hle.

An taksaah hliam a awm bakah an ruang bulah silaimu a awm avangin kahhlum ni ngeia rin nghal an ni. Mizo pahnihte hi an nghawng leh hnute hnuaiah silaia kahna hnuhma ni ngeia lang a awm ve ve a, an hliam na hle.

"A thattute hi an 'professional' hle niin a lang a, silai hmang thang leh hetianga che thangte thah an nih ngei a rinawm," tiin Guwahati Mizo pa pakhat chuan Zozam Weekly a hrilh. Chutiang chu police te rin dan pawh niin a sawi.

Police te'n an han chhui a, Screw Driver Gang Group te thah nia rin an ni ta a ni. NETV chuan chu ngaihdan chu an puang tawh nghe nghe.

He gang pawlin rinhlelh an kai chhan hi rinthu ringawt a ni lo a, an thih dan chhuina atangin a ni. Amaherawhchu, eng vanga that nge an nih ang tih erawh rin thiam a la har rih hle niin thudawn chuan a sawi.

"Vanduaina tawktu mi pahnihte hian pawisa an nei lo a, thil an chhuhsak hriat a ni bawk lo," thudawn chuan a ti. Ruang chharna bulah motor (scorpio) a awm a, motor pawh a thattute hian an la lo tihna a ni. An thil neih chhuhsak an duh vanga that ni ta se a thattute hian motor an hnutchhiah a rinawm loh. Chu chuan mi thenkhat ngaihtuah a tithui hle a ni.

Screw Driver Gang Group neitu hi Anil Chauhan a ni a, he thihna chungchang chhuinaah Anil Chauhan-a hming hi a lo rik tak avangin a gang-te hian rinhlelh an hlawh ta niin NETV chuan an puang.

Anil Chauhan hi lirthei hralha sumdawng a ni a, Aizawla State Bank of India main branch-a account a nei niin NETV chuan an puang.

Thudawn danin, a account number chu 3070954485 a ni a, Guwhati atanga thu dawn danin, Aizawla a bank account hi midangin an enkawl a nih loh pawhin hmanpuitu an awm.

Related Posts :