BUDGET BANG NAWI!

¢ HC Vanlalruata

Kum 1998 khan Union Finance Minister-in Parliament-ah ram pum sum hman tur ruahman (budget) a pharh lai takin Delhi-ah ka awm a. Mak ka tih em em chu a tu pawh maiin budget an ngaihven em em mai kha a ni a, kei, budget-in mipui ngaihven a hlawh reng reng lohna state atanga lokal tan chuan hmuhnawm a ni a, ennawm mak tak ka hmu hi a ni ringawt mai.

Kawngpui sirah thingpui satliahlo ‘Chai’(nge ‘Cha’ zawk?) kan in a; kan thingpui tui zet min siam sak thintu chuan radio hi a lo ngaithla a, nidang aiin a siam tuilo deuh tlata hriatna ka neih chhan chu kan office bula awm a nih avanga nitin deuhthaw-a a thingpui in sak thin (regular customer) ai khan thingpuife, chini leh thingpui bawlhlo dang man a sang dawn nge a hniam zawk dawn tih kha a a ngai pawimawh zawka ka hriat vang ni fa hmiang.

A piah lawkah ka thianpa sikret lei thanna dawrah kan kal leh a, chuta an ‘Paan Dukan’ nghaktu pawh chuan keini ai chuan sikret man to dawn leh tlawm dawn te, a kuhvakhawr-a a tihthlumna leh tih rimtuina ilo zarda leh thildang man a to dawn leh dawn lohte kha a lungkham pui ber a nih avangin keini tehlul kha ani teh chai chuan barah min khawnlo hrim hrim tih a lang reng mai. Company lian leh industry lian, a bikin zu siamtute leh sikret siamtute, thir siam chhuaktute leh a dang lian pui pui-a thawk leh mawhphurtute’n an ngaihven dan tur phei chu keini hriat ve mai mai phak a ni lo.

Keini kan Zotlang ram nuamah erawh chuan Pu Lalhmingthanga a ni emaw, Pu J. Lalsangzuala a ni emaw, Pu Zoramthanga a ni emaw Pu Lal Thanhawla a ni emaw, an budget pharh ni hian tuma’n an uksak lova, tuma ngaihven a hlawh lo. Delhi pa tan chuan a mak thei a, Kolkata emaw, Bangalore pa tan chuan a awihawm loh thei hle ang a; mahse, Mizo pa tan chuan a mak thlawt lova, thil nih phung pangngai a ni.

A chhan hi zawn chhuah a har lova, thil chhui chhuah atana khirhkhan tak a ni hek lo. Mizoram mipui mimirin heti khawpa kan mipui sum (public money) hman dan tur duan chhuahna (budget) kan bengkhawn loh chhan chhui chhuak tur hian Sherlock Holmes pawh kan mamawh lo.

Union Budget an pharh hian chanchinbu-ah cheng khat thir lem ( a bial) hi an ziak a, chutah chuan pawisa lokalna leh a hmanna tur a lemin an entir thin a. Chutianga an tih ang chuan kan Mizoram budget (sum hman dan tur) hi a lemin ziak ve ta ila engtinnge a lan ang le? A pawisa lem bial-ah khan a phel phawk aia tam mah chu sorkar hnathawk hlawh-ah a kal anga, pension ho pension lak tur zat pawh a awh zau ve phian ang. A takin lantir ila chuan sorkar hnathawkte lirthei siamna man leh a petrol/diesel hman man pawh a lian khawp ang. An kawlawm leh a tui mante leh an lehkhapuan leh a behbawm (stationery) kimchang tel hauhlo pawhin.

A taka chhutchhuaha a lema ziahlan theih phei chu ni sela chuan kan hotu lian politician leh sorkar hotu lu, a che theiho eiruk zat hi chu a lang lian ngawt ang le! Mahse, hei hi chu keini tehlulin a zat kan hriat theih loh a ni a, budget buaipuitute’n an tilang lek lovang. NLUP te anga mipui hnena sem tur sum hlawm dah a nih loh phei chuan mipui mimir chuan kan sorkar hnathawk mihring zaa 5 vel-te’n kan budget sum anei bang nawi kan inchuh ve mai mai chauh tihna a ni. Sorkar hnathawk hlawh pung avanga sa zuar, thlai zual leh midangin hlawkna engemaw an chan ve bak hi budget atanga hlawkna hmuh tur mipui tan a tlem hle.

Budget sum hmangin kan kawngpui an lai a, kawng a chhe em em a. Tui khamkhawp min la pe theilo chungin a cheng vaibelchhe tel kan seng reng a, electric eng phei chu tah tichhuak a ni. Loneitu, huan siamtu leh thalai mahni ke-a din tumte tan beidawnna pachhe kum tiam kan hmang a. Sorkar hnathawh a hlut em em dan hi chu thil mak a ni lo ‘sorkar zem an zen’ pha miau a. Mahse, mipui zaa 95 velte hi sorkarna chelhtu hotu lian leh sorkar hnathawkte budget ei bang chil puta min thlir tir reng chuan kan ram hi ram nuamlo tak a la ni ang. Kan budget sum-te hi loneitu/huan neitute’n hlawk zawk leh intodelh tura hna an thawhna atan te, thalai lehkhathiamte hlawk taka mahni ke-a an dinna tur rahbi tuk sakna atante kan hman lohva tun anga mipui hnena a bang nawi kan chang tir chhunzawm reng chuan a let leh kan tuar ngam chiah ang em?

Related Posts :