Monday, December 21, 2009

I thil tih zawng zawng saw thlir teh, Hunin a liampui saw...

Mizoram sorkarin zu khap burna dan a hlip dawn ni-a ngai an awm a, hlih tha ti leh tha ti lote an inhnial zui nghal.

Mizoram sorkarin Sairang thlenga rel luhtir a tum a, kum tir lamah chief minister chuan a dodaltute a hlawhtling dawn lo tiin a sawi. Rel kawng tha ti leh ti lo an inhnial nasa hle.

Rel kawng chungchanga inhnialna a intham lai vel hian khua a lum huam huam a, ruah a sur bawk si lo, 'kan chenna khawvel a chhe ta hle' tih thawm a lo ri. Chutah Lengpui Airport-ah thlawhna a tum thei lo a, lohal khu vangah mithiamte leh thuthar lakhawmtu lam chuan an ngai. A hun lai chuan he'ng thu hi a ri deuh laih.

Tuikhuahin a chim pil dawn avangin Builum mipuite an insawn a, insawn ve duh lo pawh an awm. Titi a luah ngang mai.

Builum khaw mipui chungchangin chanchinbu leh TV-a hmun pawimawh a luah lai chuan chief minister-in Singapore-ah "chi inthliarna tuartu ka ni" a ti ni awmin sap tawng chanchinbu lamin an chhuah a, Builum aiin Singapore lam mipuiin an thlir nghal. A thenin "a sawi ngei e" an ti a, chutah a thenin "a sawi hlei nem" an ti thul, inhnialna pawh a chawkchhuak viau a nih kha.

Singapore atangin chief minister a lo haw a, mipui paw'n Singapore lam an thlir lo ve nghal. Mahse, rei lo te-ah taxi intlanchhawktir tura sorkar ruahmanna thawm a lo ri a, mipuiin titi thar an nei leh ta.

Aizawla Taxi intlanchhawk chungchang chuan sawi a hlawh hle a, inhnialna pawh a chawkchhuak nasa. Chutiang boruak karah chuan sorkarna changtu party office, Congress Bhavan kawtah bomb a puak ta dur mai! Kum khat em pawh an sorkar hmaa an party office kawta bomb a puak ta mai chu mipui tan sawi zui loh theih a ni lo, a ring em a ni!

Sorkarin Look East Policy a buaipui laiin Zoram mipuite chuan khawthlang lam an thlir thut mai; Singapore an thlirna mit ngei hmangin Vairengte an thlir a ni. Vairengte Police Station thuam thatna tur sum chu sorkarin hmun danga hman a tum a, chumi dodal tum chuan Vairengte lamin tan an khawh. Silai te pawh a puak nghe nghe.

Vairengte boruak a dai ta tihah Zarzokima thih thuin Zoram a thawng a, in a kang, ram a kang, mahse, kha'ng mei kang ai khan mipui thinlung kha a sa zawk awm asin!

Chutah chiahpuam chanchin a lo lang leh; he chiahpuam hi chu mipui chiahpuam ni lovin Synod Chiahpuam a ni. Tute emawin kum khat chhunga 'news lian ber' te thlang ta se, he chiahpuam chanchin hi a hniam lam a ni bik lo ang.

December ni 11, 2008-a lakluh sorkar thar kaihhruaina hnuaiah Mizoram-in kum thar a chuangkai a, bul kan tan dawn chauh emaw tih laiin kum khat chu a lo liam dawn ta reng mai!

CYMA, MHIP leh MZP inthlan kumah hian Mizoramin hruaitu thar a nei a, MP thar leh VC thar chenin a nei. Mizoramin thil thar a nei nual mai.

2009-ah hian Mizoram-in thil hrang hrang a tawng a, chanchin lawmawm loh lam leh inhnial chiam chiamna pawh sawi tur a tam. A chunga tarlan tak inhnialna hrang hrang bakah mahni intihlum an tam thu te, kangmei vanga nunna chan an tam kum a nih thu te leh NLUP chungchangte pawh mipuite titi tui a ni. Chu'ng chu hunin a liampui mek a, Mizoram hian a thil tih zawng zawng saw thlir se, hunin a liampui mek saw, lawm tak maw!

Chu'ng thil zawng zawng ai pawh chuan he thil te hi a lar mai thei. He thil kher hi chu, a lar dan hian a huapzau tlat. Rel kawng chungchang te, taxi intlanchhawk chungchang te, Builum chungchang te leh thil dang kha chu a tuipui deuh bik awmna thil a ni a, he thil erawh pitar, putar leh naupang, nu leh pa leh thalaite'n an tuipui tlat. Icon tlukchhiat thu kha.

Related Posts :



No comments:

Post a Comment