Democracy hnuaiah Zoram

Tun hma chuan lal-in min awp thin a, a khua khuain kan inrelbawl mai thin. Khawvel tharah erawh democracy hmangin kan inrelbawl ta; chu chu tunlai khawvel ram inrelbawlna tha bera ngaih a ni a, kan hmang ve thei hlauh hi kan vannei hle a ni.

Kan democracy hnuaiah chuan political party an awm a, an zing atangin roreltu tur mipuiin kan thlang thin. Tichuan, political party-te chuan ro an rel ta a, kan chhiat kan thatah political party te'n mawh an phur a nih tak ber chu. Chutih rualin kan duhthlante an nih avangin mipuite mawh pawh a sang hle. Beram-in a pu tur a thlang ngai lo a, mihring erawhin a thlang thin. Mihring an fin leh hruaitu an thlang tha, an mawl leh an thlang fuh lo, chutiang vel chu tuna kan inrelbawl dan hi chu a ni ber awm e.

Hruaitu chu kan thlang fuh thin em? Ngaihdan a inang lo thei viau ang. Political party te neia democracy hmanga kan inrelbawl hnu hian kan hnam hi kan danglam nasa ta hle a, rethei leh hausa kar a zau kan ti, corruption a hluar kan ti, sawi dan hrang hrang a tam. A then erawhin chutiang chu khawvel kalphung ve reng niin an hria a, titi-na vela kan sawi ang em emin kan chhe lo ni te pawhin a then chuan an sawi.

Engpawhnise, hemi chungchanga inhnialna hi chu a awm reng; lehkhathiam zingah pawh 'democracy aiin lal rorelna kha kan thatpui zawk' tih ngaihdan nei te an awm. Chutiang ngaihdan pawm lo chu an tam hle bawk. Inhnial chu mihring zia a ni a, kan la inhnial dawn chauh alawm.

Tichuan, lal rorelna hnuaia let leh thu a awm lo a, lal rorelna kha democracy aiin kan thatpui zawk a ni thei, kan thatpui lo zawk a ni thei bawk, lal rorelna hnuaia kan let leh hi chu a rinawm hrih lo. Thil a inthlak thut te a nih loh chuan democracy hi kan la hmang rih dawn niin a lang.

Amaherawhchu, khawvelah hian sawisel bo a awm lo a, tha famkim a awm hek lo. Democracy ngei pawh hi thil tha famkim a ni lo, a aia tha kan hriat rih loh avangin khawvel hian a tuipui rih mai mai a ni. Hun a liam ang a, eng tikah emaw chuan democracy aia tha hi mihringte hian kan la nei ang chu. Mahse, tun dinhmunah chuan a thlakna tur kan la nei lo a, kan nei hnai pawhin a lang lo. Kan ramah pawh kan la hmang rih ang tih a rinawm a, kan thatpui leh thatpui loh te, kan hmang dik leh hman dik loh te erawh ngun taka zir reng a tul. 'Democracy aia tha a awm lo' ti-a thawveng taka faifuk hlerh hlerh ngawt tur a ni lo.

Thil pakhat, chiang em em chu - kan ramah hian rulling party aiin opposition party te'n ram leh hnam an hmangaih zawk tih hi a ni! MNF-ho hian hetia eptu party an nih hnua ram an hmangaih ang hian an sorkar lai khan lo hmangaih se tha tur. Chutiang bawkin Congress pawh hian eptu party an nih laia ram an hmangaih ang khan an sorkar hnu-ah hian ram hmangaih se tha tur.

Nikum kum tawpah kan inthlang a, chu inthlana chak ber party chuan sorkarna an siam ta. Chu sorkar chu kum 1 a lo tling ta a, an thlak takte pawh eptu pawlah kum 1 an awm tling ta. Opposition party-in ram leh hnam an hmangaih thin tih hi, he kum 1 chhung hian a chiang hle lo maw? Chu chu 'Change' an tih fo hi a ni em?

Related Posts :