STRONG BEAUTIFUL NAILS

¢ Debbie Chawngthu

Hmeichhe kut nalh tak leh fai tak, sei seng sawng hi chu hmuh a nuamin en a hlawh hle thin. Mipa hian hmuh nuam an ti zualin hmeichhia te erawh chuan an awt thung a. Kut no nalh leh tin nalh tak nei tur chuan enkawl that, ei leh in dik leh taimak a ngai a ni.

Kut pianzia hi chu thlak danglam theih a ni lova, mahse sawizawi ngun leh enkawl ngun chuan a tin nalh tak a ni thei a ni. Tin hrisel tur chuan taksa a hrisel tur a ni a, ei leh in a inbuk tawk a ngai a, regular taka tihfai bawk tur a ni. Tin atang hian taksa hrisel leh hrisel loh a hriat theih hle a. Doctor te pawh hian mi an en hian tin an en tel thin. Tin dang bem mai hi chu thisen nei tlem tihna a ni a, tin tlang rualrem lo tak hi chu pumpui thur tam lutuk vang te, ruhna neih vang leh thisen kal that tawk loh vang te a ni thei a ni.

Tin tha tur chuan clacium leh protein hi taksa mamawh tawk ei chuan tin a hrisel a, protein hi sangha, artui, soyabean atangtein a hmuh theih a. Calcium hi bawnghnute atanga eitur an siam cheese, paneer, butter, yoghurt atang te in a hmuh theih bawk. Bawnghnute tui pawlh miah loh leh yoghurt 415mg.clacium pai te hi taksa tan a tha em em ani. Heng bakah hian multi-vitamin hi nitin ei a tha a, a chugna kan sawi tak te khi ei theih loh pawhin multi-vitamin kan ei chuan kan taksa mamawh ang tawk a hmuh theih tho a ni.

Tin nalh tur chuan nitin oil hmanga massage ngun a ngai a, kut thap leh ro tak mai hi chu a nalh lovin hmuh a hrehawm a ni. Inchhung sekrek khawih, puansuk, huan thlai khawih te hian kut a tichhe thei hle a. Heng hna thawh dawn hi chuan glove puan pangngaia siam bun thin a tha. Kutkawr hian tin tliak mai tur a veng a, kut ro lutuk tur a veng bawk a ni. Kut hi fai tawkin nikhatah vawikhat tal sil ziah tur a ni a, sil zawh hnu a la hnawm laiin thil mawm hnawih nghal tur a ni. Chhuna vawihnih sil bakah hian zan mut hmaa oil hnawih hian kut tin a hrisel a, vun a tih mam mai bakah vun chuar tur a veng thei bawk a ni.

Manicure-kut tin enkawl-kan tih mai hi karkhatah vawikhat tih ngei ngei a tha bawk a. Nangmaha i tih duh chuan hetiang hian ti ang che---Nail polish i hnawih kha tireh vek phawt la, chutah nail file in i tin nawt rual rawh. Ikut chu tuilum phuanah chiah la, i chiah lai hian i tin te brush fai ang che. I tin hnate orange stick- in dimtein nawr tawm la, i tleuhfai hnuah hru hul leh ang che. Chumi hnuah cream mawm tha takin i kut chu massage la, a tukah nail polish hnawih chauh ang che.

Ni tin i kutbawr sawizawi la, hetiang hian ti thin ang che---I kut ruh takin hum la, phelh leh la, hetiang hian vawi 20 ti ang che. Nikhatah vawihnih/vawithum ti la, i kuta thisen kal a ti tha ang. I tin ngun takin nawt thin la, i tin a tlein a khauh ang. Karkhatah vawikhat tal oil tretment ti thin la, hetiang hian ti ang che---Olive oil chhuang lum la, chutah chuan vitamin E oil tlem far ang che. A la lum laiin i kut kha minute 15 chiah la, i chiah hnuah i kut leh tin nuai nan hmang ang che. I nuai hnu darkar khat chu sil lovin dah la, a theih chuan hot oil treatment hi i mut dawnah ti la, silfai lovin zankhuain chiah la, a tha lehzual. Hetianga regular taka i tih peih chuan thla khat chhungin i tin a nalh sawtin a hrisel sawt ang. I tin a hrisel nan nitn bawnghnu no 1-2 in ziah la, multi-vitamin leh clacium ei thin bawk ang che.

Q. Tin seh hi ka ching thin khawp a, tin a nalh duh loh em avangin ka sim ta a. Mahse ka tin rawn thang leh hi a nung lo riau va, tinhna bul lai tak phei hi chu a dum deuh a, hei hi vitamin tlakchham vang a ni thei em?
= Tin seh ching chu mahni inrintawkna nei lo, mi zakzum leh thlaphang hma an ni thin an ti a. I sim thei chu i lawmpuiawm khawp mai. I tin nung lo riau chu enkawl nguna tha leh tehi a ni a. Hand cream leh cuticle cream lei la, chu chuan zantin i tin leh tinhna te nuai thin rawh.

I tin la zuah sei lo la, a mawi tawkte chauhin hlep thin la, rual takin nawt bawk ang che. Chumi hnuah tuilum phuanah chiah la, i chhiah chhung hian brush fai pah la. Brush i hman chu nem tak chi a ni tur a ni. Khauh tak chuan i tinhna te a tichhia ang. Fai takin minute 10 vel i chiah hnuah silfai la, a ro tak tak hmain hand crem hnawihin i tinhna te nuai vek ang che. I kutbawr reng reng i nuaiin i kutphah hma lam hawiin dah la, a chho/chhuak zawngin dimtein nuai thin ang che. Tin hi clacium leh protein tlakchham chuan a tha thei lova, chuvangin, hemi pahnih telna lam chi i lo ei tel bawk dawn nia.

Q. Eye pencil lar tak mai kum engemaw zah ka hmang a, tunhnai te atang khan ka vun vel a tisenin ka hre tlat a, hman zel a hlauhawm em?
= Company lar tak siam ho hi chu hman tura zawrh chhuah hmain test na tha tak neih vek a ni a, mahse i ngeih lo anga i hriat chuan hmang lo mai la. Tuna i hmanlai company siam nilo kha han hmang chhin la, i vunin a thatpui chuang lova i hria anih chuan vun lam thiam rawn zawk ang che. Eye make-up hi hnawih fimkhur tur a ni a, mit chhunga a luh lohna turin rin thiam leh fimkhur a tul a ni. I hman reng rengin zanah i mut hmain tifai ziah la, i mut laiin i mit chhungah a luh theih avangin mutpui lo hram ang che.

Related Posts :