Hausakna, Hlawhtlinna leh Hmangaihna

Nu pakhat hi an in chhung atangin a lo chhuak a, an kawt phula putar, hmuihmul var vo tawh pathum lo thu chawl chu a hmu a. A han enchiang hlawm a, tumah chu a hmelhriat an awm lo na a, pawna thuttir reng chu a felin a hre chiah lo deuh a. "Ka hmelhriat chiah lo che u na a, in ril te a tam hmel tawh bawk si a, lo lut ula ei tur pawh kan nei a nia," tiin a sawm a. Putar pathumte chuan, "In neitupa hi a awm em?" tiin an zawt a. Nu chuan, "Tunah chuan awm lo, a leng chhuak a," tiin a chhang a. Anni chuan, "Chuti chu kan lo leng lut thei lo a nih chu," an ti a.

Tlai lam a lo ni a, an pa leng chu a lo haw ta a, putarte nena an inbiak dan chu a lo hrilh thuai a. A pasal chuan, "Chuti chu va ko nghal vat rawh," tiin a tir nghal a. Mahse, leng lut tura a va sawm leh chuan putar pathumte chuan, "Chuti mai chuan kan vai hian a rualin kan lo lut thei hlei nem," an lo ti leh ta tlat a. Nu chuan mak tih hmel takin, "Engati maw?" tiin hriat chak takin a zawt a. Putar pakhat chuan ti hian a sawi ta a, an zinga pakhat chu a kawk a, "Ani hi a hming chu Hausakna-a a ni."

Pakhat chu a kawk leh a, "Ani hi a hming chu Hlawhtlinna-a a ni a, kei hi Hmangaihna-a ka ni thung," a ti te te a. A sawi zawm zel a, "In chhungah chuan va lut leh la, i pasal hnenah chuan kan hming theuh hi va hrilh la. Tu ber hi nge leng tura in sawm duh tur chu va sawipui phawt rawh," a ti a.

Nu chu in chhungah chuan a va lut leh a, putar thusawi chu a pasal a va hrilh a. Chu thu a han hriat chuan a pasal chu a lawm kher mai. "A va han lawmawm ve le! An insawi ang an nih chuan Hausakna-a chu sawm chi a nih chu. Lo leng lut sela, kan chhung hi hausakna tinrengin han tikhat teh se," a ti a. Mahse, a nupui thung chuan, "Kei chu Hlawhtlinna-a saw sawm ka duh zawk, kan tan a tha berin ka hria," a ti ve tlat mai a. An nupaa an inhnial lai chuan pindan chhung atangin an mo chuan a lo ngaithla reng a. A rawn chhuak nghal a, "Kei chu Hmangaihna-a chu sawm ka duh ber, kan chhungkua hian hmangaihna hi kan mamawh berin ka hria. Sawm ila, kan chhungkua hi hmangaihnain min han phuarkhawm se a that ka ring," tiin a ngaihdan a rawn sawi ve a.

Pa ber chuan a ngaihtuah vung vung a, "Kan mo rawtna chu a tha berin ka hria. Va chhuak leh la, Hmangaihna-a chu va sawm rawh," tiin a nupui chu a tir ta nghal a.

Nu chu a va chhuak a, putar pathumte bulah chuan a va kal a, "A tu ber hi nge Hmangaihna-a kha? Khawngaihin lo lut la, kan lo mikhual ang che," tiin a va sawi a. Hmangaihna-a chu phur takin a tho nghal a, in chhungah chuan a lut ta a. Putar pahnihte pawh chuan an zui lut nghal a.

Nu chuan mak ti takin a rawn zuitu putar pahnih Hausakna-a leh Hlawhtlina-a te hnenah chuan, "Hmangaihna-a chauh ka sawm si a, 'ngati nge in lo kal ve?," tiin a zawt a. Putarte chuan, "Hausakna-a leh Hlawhtlinna-a te hi a tu emaw zawk zawk i sawm a nih chuan mi dang pahnih hian kan zui thei lo a, pawn a kan lo awm hi a ngai dawn a ni. Mahse, Hmangaihna-a hi a kalna apiangah kan zui zel a ngaih avangin kan rawn zui a nih hi. Hmangaihna awmna hmun apiangah Hausakna leh Hlawhtlinna a awm zel thin si a!," tiin an chhang a.

(Richness, Success and Love tih lehlin a ni a, a ziaktu hriat a ni lo. Lalthlamuana Ralte)

Related Posts :