I Thei Ngei Ang

¢ Lalthlamuana Ralte

Kum 46 mi ni tawh la, motorcycle-a i chetsual avangin nasa takin i taksa kang sela, kum 4 hnuah thlawhna accident vangin i kawng chin hnuai lam zawng zeng ta bawk sela engtin nge i awm tak ang? Chutiang hnuah chuan mi hausa tawntaw niin mipui hmaah thusawi thiam langsar tak i ni thei ang em? Nupui neiin sumdawng hlawhtling tak i ni zui thei ang em? Lawngleng khalh leh thlawhna atanga parachute-a uaithlak i thei ang em? A nih loh leh ram hruaitu thlannaah i chuh ve thei ang em?

W.Mitchell-a chuan accident rapthlak tak tum hnih ngawt mai a tawh avanga hmai vun hmelhem nasa tak a neih hnu, a taksa peng dang vuna an thlak hnu-ah leh kutzungtang pawh nei tawh lo leh a ke pawh tiche thei tawh lova wheelchair-a a awm chawt hnuah heng zawng zawng hi a ni thei a, a ti thei vek bawk.

Motorcycle-a a chetsual tum hian a inhliam na hle a, vawi 16 lai zai a ni a, a taksa zaa 65 lai a kang bawk. Fian leh thirkut pawh a lek thei tawh lo a, telephone a dial thei tawh lo a, tanpuitu tel lovin bual inah pawh a lut thei tawh lo.

Marine-a (US sipai chhuantawlawl) lo tel hrep tawh Mitchell-a chuan vanduaina lakah hian engti kawng zawng mahin tlawm a tum bau lo a, a tum a ruh zual sauh zawk.

Thlawhnaa chuang anga inchanin, "Ka chuanna thlawhtheihna hi keima ta a ni a, thuneitu ber ka ni. Ka invawrh sangin ka tlahniam leh thin a. Ka hun tawn mek hi ka duh chuan rokhawlhna min siamtu-ah ka ngai thei a, a nih loh pawhin ka hringnun bultannah ka hmang thei bawk," tiin a sawi.

Thla ruk a vei leh chuan chu pa rothap leh tumruh chuan thlawhna a khalh leh thei ta mai reng a ni.

Colorado hmuna hmanlai in hlui leh ram zau tak a lei bakah thlawhna leh 'bar' a lei a. Chumi hnu chuan a thian pahnihte nen thing tuahna thuk an siamchhuak a, an company din chu Vermont state-a mimal sumdawnna lian ber dawttu a ni ta nghe nghe.

Motorcycle-a a chetsual atanga kum 4-naah chuan vanduaina dang a lo thleng leh ta.

A thlawhna khalh chu a thlawkchhuak tan chauh a, a tla leh a. Hemi tum hian Mitchell-a hi a hliam na hle a, a hnungzang ruh a sawhchhiat avangin a kawng hnuai lam chu a dam chhungin a zeng ta nghe nghe.

"Ka chunga thil lo thleng thin hi mak ta ti kher mai. Eng vanga hetiang vanduaina hi tawk bik nge ka nih le?" a ti hial. Mahse, pa rothap leh tumruh Mitchel-a kha a ni miau a, a theih chen chenah midang rinchhan lova mahni inbuaipui thei turin chhun leh zanah nasa takin a bei ta a. Mi pangngai chung lamah a invawrhchhuak leh thei ta reng a ni.

Colorado hmuna Crested Butte khaw Mayor atan thlantlin a nih bakah he hna a chelh lai hian an khuaa mineral laihchhuah an tum chu a phal lo a, an khaw chhehvel mawi tak humhimtu a ni ta nghe nghe. Chumi hnu chuan Mitchell-a chuan Congress member thlannaah a chuh a, infiamna rorum tak mai, lui khawkrawka hampuar lawnga inkar-ah (White water rafting) a tel thin a, ngaihzawng a nei a, chu nu chu nupuiah a nei leh bawk.

Chu mai a la ni lo, public administration-ah master degree a zir zo leh a, thlawhna a khalh chhunzawm leh thei a, leilung-thing leh mau venhimna lamah nasa takin a inhmang a, mipui hmaah thu a sawi fo bawk.

Accident rapthlak tak tum hnih ngawt tawk tawh, kutzungtang nei tawh lo, hmaifang pangngai pu tawh lo leh taksa chanve zeng lehnghalin hetiang a ti thei hi chu a mak thlawt a ni.

Harsatna namen lo tawk chungin rilru fim a pu thei a, a eng lam zawnga a ngaihtuah tlat avang hian a chanchin hian ngaihven a hlawh a. Time magazine, New York Times, Parade leh chanchinbu hrang hrangah an tarlang chuai chuai a, TV show lar 'Today Show' leh 'Good Morning America'-ah a inlan bawk.

Related Posts :