Chhung Tinte Enghelh Tawp Theih Loh Cooking Gas Hi Aw!!

¢ Lalngheta Sailo

Aizawl khawpuia chengte hi chu thingtlang kilkhawra awmte aiin vannei zawkah kan indah deuh a ni awm e. Amaherawhchu, khawpuia cheng chhung tinin kan enghelh tawp theih loh chu Cooking Gas, eirawngbawlna tur tlakchham hlauva awm reng mai hi a ni. Thingtlangah chuan Gas an neih loh pawhin daiah thing tuah tur an la mai thei a. Khawpuia mite chuan thing phurhna tur ram kan nei lo. A hla lutuk a, ngaihtuah phak a ni lo. Khawnvartui a awm loh leh zel phei chuan chhungkaw rorel a buai nak mai. Chawnghei mai a hlauhawm thei rum rum mai.

Eirawngbawlna Gas hi central sorkar chuan khuahkhirh (control) lova chhung tinin mahni mamawh ang zat chu petrol leh desiel te ang bawka lei mai theih turin kum 10 vel hmalamah khan tih theih an lo inbeisei tawh a. Chuti chung chuan tun thleng hian kan la harsa zel a, kan harsa tawlh tawlh emaw tih tur a ni. Engnge a chhan ni ang? Thing aia Gas hmangtu kan pun vang te, mihring kan tam zel vang te pawh a ni ang. A supply lam a pung mang chuang si lo. Eng vang pawh ni se keini Mizoram hi chuan lighter-a thun khawp takngial pawh kan siamchhuah thiam ve loh avangin ‘Vairampur’ atanga lo kalah kan innghat tawp mai lo thei lo a ni. Kan tih theih a tlem a. Kan tih theih chin chu kan Agent ten Gas Company atanga a tam thei ang ber an lakluh a, a awlsam leh rang thei ang bera a hmangtute (Consummer) mamawh anga min pek zung zung hi a ni.

Aizawl khawpui chhunga veng hrang hranga zing exercise nei thinte tan chuan kawng sira Gas bur tlar thup mai leh a nghaktu mihring zi nuai nuai mai tuk tina hmuh tur awm hian rilru ngaihtuah a ti thui thei hle. Pakhatnaah chuan Gas nghaktute tha sen tamzia leh hna tul dang an thulh phah nasatzia hi, an hlawh phu tawk ang pe dawn ila a tam tham awm mang e. A dawt lehah chuan zing khawvar hma, a chang chuan zan lai atangin a sur a sa hnuaiah, step chhuk chho thui tak takah Gas bur rit tak put kawi reng ngai mai leh an hlawhchham chang tam daih zawk bawk si te hi. Mahni inkhawngaihna chang hria ila chuan thlem ban rual lohva tahna tham a ni. Kan khawngaih thlak a ni tawp mai. Khawvel hmun danga kan mihring puite zingah hian hemi kawngah ngat hi chuan min awt an vang khawp ang. Kan awhawm loh em a ni !

Tunlai hian Gas Company lam thuchhuak nge kan Supply Department lam hotute hmathar lakna ka hre chiang lo, tiang tur hian an ruahman a; he ruahmanna thar mipui vantlang n kan lo hriat ve dan chu – (1) mahni awmna veng changtu Agent theuhte hnenah hmun danga Gas Connection neite chuan in-transfer vek tur, (2) Gas Agent te'n an area chhung ngeia anmahni hnena connection neite chauh hnenah an pechhuak ang, (3) Gas connection transfer-na atana ogiginal voucher nei tawh lo te'n Court-ah Affidavit siamin an transfer thei ang, (4) Gas semchhuah dan zawng zawng computerise vek tur a ni ang, tih te hi a tlangpui a ni.

He ruahmanna hi ‘tha awm taka lang, mahse a tak ram thleng phak lo’ a nih ka hlau hle mai. A chhan hrang hrang han sawi ila.

1. Gas Agent-te area insem dan hi Aizawl khaw hmun rem loh vanga kan inkalpawhna kawng awm dante nen a inmil lo. Entir nan: kan kawmthlangpa ina kal tur chuan thui fe, Km 1 emaw Km 2 emaw zet hel kuala midang area kaltlang a ngai mai thei. Kham karah kawng remchang dang a awm theih loh vang a ni mai. Mizoram chhunga kan khaw pawimawh dangte dinhmun pawh a dang chuang lo. Chuvangin, min bialtu kan area Agent te aia kal awlsam leh kawng remchang zawk an awm reng laia Agent dawr harsa zawk atanga lak ngai tam tak an awm ngei ang.

2. Gas Agent-te hi kan tawng an huat thu suhah, an dinhmun (capacity) a inang lo hle. A thenin sum leh a phurtu tur motor-ah harsatna an neih loh laiin a then chuan harsa tak chungin, a chang chuan puk chawpte pawhin a ni ang, an ti ve hram hram a ni. Gas bur an lak theih zat hi bituk chin awm mah se Company atanga a man hi 'advance'-a pek lawk vek ngai a ni. Chu bakah a bur ruak neih tam a tul bawk. Hei vang hian agent pachhe deuh tan chuan a tul hun dik taka pek 'advance' tur neih loh chang a awm thei fo a. Tin, a phurtu tur motor pawh a remchang lo thei fo bawk. Chuvangin, kan chenna venga kan area min bialtu agent a fuh loh palh vaih chuan kan tal buai hle mai dawn a ni. Veng dang Agent atanga lak theih a ni dawn si lo.

3. Gas Agent te hi sumdawng an ni na a, he ruahmanna tharah hi chuan anmahniho zinga inelna ‘Competition’ a awm a tul dawn tawh lo, an chanpual tur an hriat sa vek tawh dawn avangin. Hetiang a nih avang hian Agent-te chuan an Consummer/Customer te lakah that leh hawihhawm an chhuah pawh a tul tawh hauh lo bawk ang. Customer te'n kan Agent-te duhsakna leh khawngaihna dil fo a tul tawh zawk ang. Tin, Agent te'n engemaw chhungkaw harsatna vang pawhin an Quota hi an lak zawh theih loh chang pawh a awm mai thei. Hei hi Consummer te'n kan tuar mai dawn a ni. Tin, kawng lehlamah chuan hei hi hriat atan a tha; Gas Company te hi sudawng an ni a, Agent te pawh sumdawng an ni. An hlawkna turah chuan Agent chak takin a leina advance Gas Company-ah a pek theih phawt chuan Gas Company te hian Quota aia tam deuh pawh pekchhuah an hreh lem lo. Tuna kan kalpui tum danah hi chuan hei hi thil awm thei lo, harsa a ni. A tuartu chu mipui ‘Consummer te kan ni leh mai. Thingtlang lama chengte tun hmaa khawpui kuang bang lo nghak ve thinte chungchang phei chu a thim lehzual hle ang.

4. Aizawl khawpui chhungah pawh hian mahnia in nei lo, mi in luah, a remchang zawk an hmuh chuan veng hrang hranga insawn kual tam tak kan nei a. A thente phei chu an sorkar hnathawhna avanga insawn ngai thin an ni. Hengte hian an awmna area atanga hmun danga an insawn apiangin an Gas Card transfer a tul dawn bawk. Hei pawh hi consummer leh Agent te tan hna titamtu leh hun khawhralna mai a ni. Mi inluaha eizawnna mumal nei lo, Agent te ngaih pawimawh hlawh pha lo tan phei chuan a awlsam lo leh pek viau ang. An hun leh tha sen nen retheihna belhchhahtu a ni ngei ang le.

Gas sem dan chungchangah hian keima experience han sawi ve hlek ka chak a, kum upate hrivei ka ngaihsan lem loh thin a ni na a ('when I was' tih hi!!). Kum hnih leh a chanve tih theih – August, 1998 atanga March, 2001 thleng kha Mizoram sorkara Food and Civil Supplies Department-ah secretary hna ka lo chelh ve a. He charge ka lak tirh lai vel hian Gas semchhuah dan chungchangah mipui te'n harsatna an tawk nasa hle a. Gas khamkhawp kan neih loh bakah a sem dana harsatna keimahni'n kan insiamchawp avangin Gas la turin a bur ruak nen kan intlar thui thei hle. Khatih hun laia harsatna keimahni kan insiamchawp chu - (i) gas bura manufacturer number, Gas Card-a chhinchhiah chu Agent ten an Registerah an verify vek hnuah chauh pekchhuah theih a ni a. Agent te'n gas bur an verify nan hian hun tam tak an hmang lo thei lo a. Hei vang hian ni khata an semchhuah theih zat hi a tam thei lo. Hetianga tih a tulna chhan min hrilh chu ‘mi thenkhatin gas bur an tichingpen thin a, chuvangin mahni ta theuh neih a tha’ an ti a ni. (ii) Mahni Agent te hnenah chauh a lak theih tih ang te hi a ni a. Mahse, tun tuma kan buaipui mek Agent-te area bik neih tur tih hi chu a a takin a la tel lo.

Vanneih thlak takin hetianga harsatna kan tawh mek lai hian Oil Company-a an hotu liante an lo kal hlauh mai a. State Guest House-ah meeting kan neihpui a. Kan harsatnate kan hrilhfiah a. Anni chuan ‘mahni gas bur bik neih kher chu Company lamin an phut lo’ tih min hrilh a. Chuti a nih chuan he dan hi tu siamchawp nge tih tumahin an chhang lo a; an hre lo nge ni ang? Chu dan phuahchawp keimahni harsatna min siamtu chu paih kan rawt a. Gas Compay hotute rem tih zawng tak a lo ni lehnghal! Tin, mahni agent-te hnen atang chauha lak tur tih chu Gas Company te'n ti tura an duh dan a ni. Chu bakah area bik pawh phai lama an tih dan angin neih an duh a. Hei hian ‘Home delivery’ a man kan pek tel sa vek, a taka thleng si lo te pawh hi a taka thlentir a hril nghal a. Heti chung hian kan ram leilungin a zir loh dan leh kawng kal dan te area bik nei thei kan nih loh dan te kan hrilh a, an hrethiam hle a. Mahni Agent kher lo hnen atanga lak theih ni se tih pawh kan ngen a. Official takin phalna min pe lo na a, kan harsat dan, kan khaw hmun remchang lo leh kawng dinhmunte an ngaihtuahin kan mamawhna mila siamrem an hnial lo a. Chutichuan ‘mahni bur bik awm lo, mahni agent kher atanga lak ngai lo, Agent te'n a sem tam thei theiin veng dangah pawh motor-a sem theih’ tih te kan rel ta a. Hemi tuma mak ka tih tawp theih loh chu kan Consummers' Union-a member thenkhat te'n khatianga han tih awlsam lutuk chu rem an ti mang der lo a. 'Official lam nen tanna inthleng awm tak kan va ni em!' ka ti rilru a. Amaherawhchu, Home delivery hi chu kan tum chhin ngam lo. Kan sawi tawh angin kan khaw leilung dinhmunin a zir ngang lo a ni.

Hetianga ruahmanna thar kan han kalpui veleh kan harsatna zualpui chu a kiang nghal tih theih a ni. Kan la theihnghilh loh ka ring. Tunah pawh hian ka sawi duh chu Gas Company te hi sumdawng an ni a, kan hmunhma leh kan kawng te'n a phak tawk ang leh mipui vantlang tana thil tha leh awlsam zawk ruahmanna kan neih hi an hrethiam em em a ni. An thu hi a kawi a ngila zawm diak diak vek pawh a tul hek lo. Tunah pawh Gas semchhuah dan hi computerise vek an duh tih kan hria. A dik e. Mahse Lala’n bur engzat nge a lak, Thanga leh Liana’n engzatnge an hman tih an ngai pawimawh lem lo mai thei. Lo pawimawh viau ni ta sela engtinnge ‘Emergency Quota’ heti zozai Gas Card ngai lova pek chhuah thin hi an record ang le? Mizoram pumin eng zat nge kan hman tih te, an Agent hrang hrang te’n eng nge an hralh zat tihte mai hi a ni lo maw? Mizoram mipui zawng zawng hian Delhi-a Veng pakhat RK Puram pawh khu kan zat lo. Mizoramin Cooking Gas heti zat hi an mamawh a, heti zat hi kan pe thei e, tih hi Gas Company te'n Central sorkara an report duh tawk a nih a rinawm.

Home delivery te hi kan sawi ri ve fo tak a, kan hmunhma hian a zir ngang lo a ni. A rualawh thlak khawp mai. Delhi khawpuiah chuan Gas an mamawh veleh Gss Agent phone-in an hrilh a. Rei vak lovah an choka-ah a lo thleng mai. Khawpui dangah pawh hetiang tho hi a ni. Amaherawhchu, kan tlangram pui hmun dangah te chuan Home delivery hi a la harsa ve tho. Keini dinhmun bikah hi chuan kan Agent-te hian kham kara step thui deuh deuh koki-a min putsaka Home delivey tak tak min tihsak hun tur hi chu, kei chu, ka ‘vision’-in a thleng phak lo. Mutia Company khat (100 bawr vel tihna) vel lek theuh Agent te'n an mamawh ang! Chuvangin Mipui vangtlang tana awlsam, tha tam tak sen ngai lova kan mamawh ang zela kan hmuh theuh theih dan tur hi a pawimawh ber chu a ni.

Gas Company te ‘Guideline’ leh ‘policy’ tih angreng hi Consummer te harsatna sut kian ahneka belhchhahtu an nih dawn chuan Luka Ziak anga zawm kher a tul lem lo. Mipui vantlang tam berin kan mamawh leh kan remchan dan tur mila ruahmanna siam thiam hi thuneitute tih tur leh an kuta awm a ni. Consummer Union te pawh hian Consummerte hamthatna leh awlsamna hi an thupui ber, an MOTO a ni dawn lawm ni?

Kan that tlan berna tur atan hetiang deuh hian Ruahhmanna siam ni ta sela:- Gas Agent ten Gas Card nei apiangte hnenah area bika inthliarna awm lovin pe se, Gas Card-ah leh Note Buah chhinchhiah se, Bank lian hovin ‘Core Banking’ an tih ang hian Consummer hrang hrang hnena an pek chhuah dan chu Computer hmangin a enkawltu Department, Food & Civil Supplies kaltlangin emaw ‘On line’ in an in hre tlang vek thei ang. Agent-te zingah lak tam leh hralh tama inelna ‘Competition’ sang tak neia Consummer ten a tam thei ang ber kan hmuh theih nan area bik ramri siam loh nise, kan mamawh zat inang lo chunga kan mamawh ang zela rualkhai taka kan chan theih nan ni 10 emaw 15 emaw ral hma chuan Card pangngai hmanga lak phal loh ni se, he minimum period hnuah hian hun tiam chhung bik awm lova lak phal reng ni se.(A chhan chu kan chhungkaw zat leh kan mamawh tam zawng a in ang lo) Tin, Gas semna point hi hmun remchangah atam thei ang berin VC te ruahman puinain neih ni se. An sem hun tur hi telephone hmangin emaw Agent ten hriattir lawkin vantlang Mikeah emaw puan ni se. Hetianga kan tih theih chuan lak khawl teuh a tul lo vang a. Gas Card tam tak neih a tul hek lo vanga, an sem dawn nge dawn lo tih pawh hre lova rei tak tak hun leh tha senga intlar vak vak a tul hek lovang. THA IN I RING VE LO MAW ?

Related Posts :