Vai Film Leh Mizo Tunlai Zia

¢ H.C. Vanlalruata

Naupan laiin vai film tlemte ka en ve tih loh chu phailama ka awm laia sap film tuipui velo thian thenkhat nena kan en thin kha ka ‘Hindi’ film en ve chu a ni mai a. Mahse, vai film hi a kalphung hriat theih deuh vek a nih avangin keini ang vaitawng thiamlo tan pawh an tawng hrelo chungin a kalphung chu a hriat a harsa miah lo. Vai film kalphung mak ka tih hi ka thian vai-te hnenah ka sawi thin a. Hmangaih vanga innei (love marriage) ti ngai miahlo deuhthaw ni si kha film-ah chuan hmangaihna lam a tam em em a. An nunphung pangngai-ah zai chunga thing phena an inchhai kan hre ngai lova, film erawh chu a tel lovin an chang theilo a ni ber e.

Engatinge an nun dan ang lo lutuka film an chan tia ka vai thiante ka zawhin ka thian pakhat tuna Mumbai-a awm mek chuan “A bikin miretheite hi an nun a chep em em a. Dam khawchhuak turin innawr reng ngai, mi bum deuh reuh reng ngaiin an khawsa a. Chutiang a nih avang chuan hetianga an nun dan phung leh an zia ni hauhlo anga lem chan hi an en duh em em a ni,” a ti a ni.

Mizote pawh hi kan nun han bih chiana kan nihna darthlalang dik taka kan en ngam phawt chuan vai film leh a taka an nun dang nen hian kan danglam lo. Thanpuii Pa (J. Malsawma) article ‘Kan Mizia’ tih kha a hunlai chuan miin an tawng nasa hle a. Mahse, khami pawm ngamlo hlawmkhawm kan nih avang reng hian tuna kan ze diktak hi kan chhawm ta zel a ni.

Naupan lai atangin Sunday School-ah thil tha hlir, Pathian thu hlir kan zir a. Chutiang atanga lo seilian na na na chu rukruk chinglo awm tak kan nih laiin Naupang Sunday School chhuaka puitlinga kal leha Kohhran-a nasa taka inhmang zingah mi chanai eiruk hrehlo kan tam em em a ni. Pathianni-ah nalh taka incheiin Bible thianghlim leh Kristian Hlabu kan zakzeh a. Biak Inah chuan mi dik leh tha ber angin kan awm a. Thu tha hlir kan ngaithla a, a sawi lah kan sawi tam em em a. Ramdang kohhran, a zirmite chauhvin Pathian thu an sawi thin ang ni lovin a mipui mimir hian kan sawi thiam em em vek a. Mahse, a zawm erawh chu kan tum lo. Brig. T. Sailo te nupa inneih champha kum 60-na lawmnaa thusawitu Pastor khan Mizoramah midik za zela 5 tal an awm a rin thu a sawi a. Sunday School atanga naupang lai tawha chhum hmin Mizote dinhmun chu chuti chu a ni tlat a ni.

A langah chuan Kohhran leh khawtlang leh min hriate mithmuhah a tha leh mawi thei ang bera awm kan tum a. Chumi kan tumna kawngah chuan zu te kan haw em em a. Mahse, hmuh loh lamah chuan zu in duh miahlo hi uihum lek an ni. Khawtlang zu dap duty 10 zingah hian 8 chuan remchang an hmuhin an in duh reng tih hi thudik a ni. Kohhran leh KTP-a inhmang tak takte pawh remchang an hmuha zu in duh an tam em em a. A takah chuan sual tehchiamah kan ngai lova, a huho hian kan haw leh viau mai thin pawh a ni.

YMA-in ruihhlo do kum a puan pawh hi en let leh ila, hun engemawchen chu a dap leh man awl zawk zu buaipui nan hun tam zawk an hmang tawh a. Inrinni-a beihpui an thlak thin pawhin zu chauh an luh chilh tawh a ni. Kum 1982-a ‘Corruption Do Kum’ kan puan laia corruption tak tak, mipui chanai cheng vaibelchhe tel, nuai tel eiru-te bitum ta lova a hahdam zawng kan zawnga sorkar pin hmawrbawk mimal tana hmante, lehkhapuan phek khat mahni tana hmante leh minute khat kal tlai pawh corruption a ni tia inzirtirna hmanga kan ho ta der ang kha a ni. Kraws rit zawk ruihhlo do tak tak ai chuan plastic-a siam kraws zang zawk zu do chu kan peih tawk a lo ni tih a lang chiang leh ta bawk.

Eirukna-in kan ram a tihchhiat dan kan hre vek a. Mahse, eiruk hmangte chu kan do lo chauh pawh ni lovin kan intlawn siak ta daih a. Eiruk hmang mi hausa do ai chuan zu zuar hmeithai rethei te te in tlu lek leka khawsa sa in suasam chu a awlsam fe zawk reng a ni.

Kohhran pawh hian eiruk atanga neih sum a hnawl hma chuan eiruk hi a do thei lova, a do tak tak ngamlo reng a ni. Luangmual Pastor bialin ‘Eiruk avanga court-in thiamloh a chantirte chunga kohhranin thununna a lek dan turah Synod-in kaihhruaina siam rawh se’ tia rawtna an siam pawh Presbytery a kaltlang hnu-in Synod khawmpui chuan tualchhung kohhran kutah a vawm let leh mai a ni. Kan thian pakhat phei chuan kan Kohhran Biak In sakna atan hian eiruk pawisa kan hmang hnem ta lua a ni ang harhna pawh Biak Inah thleng lovin sikul lamah hlir a thleng tawh tiin a sawi hial a sin.

Bethel, Camping, Gospel Campaign leh Crusade kan tih zozaite pawh hi zu leh eirukna chungchang kan sawi anga lemchanna khawvel vek a ni zo ta. Vawi 12 piangthara vawi 12 bawk da leh tawhte pawh kan awm a. Chatuan nunna leh Krista anna tak tak nei silo, simna tak nei lova a phawvuaka piangthar intiha lan mawina kan um avangin kan nun hi lemchanna a lo ni ta. Chu chu a thlakna tur Kohhranin a hre lo. Takna tello Kristianna, Simna tello piantharna, thatna tello pawnlam mawina, sual huatna tello tha anga lanna hian kan zia hi a tichhe thuk hle tawh a ni.

Huat tur dik tak huaa pawmloh tur dik tak hnawl ngam, chawimawi tlak chawimawi thei, thil diklo leh mi diklo sawisel ngam kan nih hma chuan kan zia hi lemchan nun a ni reng ang a. Zu kan do tlukin corruption kan do ngam ngai lovang a. Vai nun lem, an rilru lan chhuahna vai film ang chauh kan ni kumkhua ang a. Hnam zahawm kan ni ngai lovang.

Related Posts :