Mipui nghawngtu Taxi-pute lungawi lohna

Taxi driver pakhat chuan, "Kan intlan chhawk chuan kan tan khawsak ngaihna a awm lo ang. Dik chiah chuan, intlan chhawk ta ila, ka pu te hian thla khat hlawh min pe hauh lo ang. Thla chanve chauh thawk chunga thla khat hlawh min pe turin ka ring zo lo," a ti.

Mizoram sorkar chuan Aizawl khawpuia service taxi-te chu September ni 14 atanga intlan chhawk turin a ti a, mahse, taxi driver-te'n he rawtna hi an pawm lo. An pawm lohzia hi kawng hrang hrangin an lantir a, September ni 14-ah hian an service lo nghe nghe.

September ni 14-ah hian taxi an service loh avangin city bus lam a tawt thei hle a, bus chang lo pawh an tam hle. September ni 15-ah chuan Mizoram Road Transports Union hmalaknain taxi bakah city bus te pawh an service ta lo. Ni tina mi engemaw zat phur thintu taxi leh city bus an service loh avang hian mi tam tak an buai a, sikul thenkhat phei chu an chawl tawp!

2006-ah khan Mizoram sorkar chuan taxi te hi intlan chhawk se tiin a lo rawt a, hma pawh thui tak chu lak a lo ni tawh. Kumina taxi intlan chhawk tan ni atana tih - September ni 14 (2006)-ah Aizawl SP chuan intlan chhawk tur thu hriattirna order a chhuah a, ni 18 atanga intlan chhawk tura tih a ni.

Hriattirna chuan "mipui himna leh remchan zawk nan leh Aizawl khawpui chhunga lirthei tawt lutuk tih ziaawmna a nih beiseiin, pawl hrang hrang hruaitute leh mipui tam zawkte rawn chung leh duh dan angin" he ruahmanna hi siam niin a sawi.

Taxi-te hi number kawpkim leh kawpkim lo an intlanchhawk ang a, mahni service loh ni-ah chuan mahni motor ni mah se tlanchhuah ngawt phal a ni lo. Mahni service loh ni-ah chuan zing dar 8 leh zan dar 6 inkarah chetsawn phal a ni lo. |ul bik thilah chuan traffic office-ah phalna lak tur. Inrinni leh sorkar chawlhah (holiday) chuan intlanchhawk a ngai lovang. He'ng hi 2006-a ruahmanna tlangpui a ni.

He ruahmanna hian sawirik a nih tirh atangin dodalna a tawk nghal. Taxi neitute leh a khalhtute chuan an duh lo hle a, he ruahmanna an duh lohzia te pawh an lo lantir nghe nghe. Taxi enkawltu lamin an duh loh em avang hian ruahmanna hi a lo thuanawp tawh a, 3rd IR lak a nih dawn vangin he ruahmanna hi sawnhlat a ni phawt a, chumi hnu, September ni 18 atanga intlan chhawk turin taxi-te chu an ti ta a ni.

Hemi tum pawh hian Zoram Taxi Owners Association leh Zoram Taxi Drivers Association te chuan chhan hrang hrang avangin intlanchhawk hi an duh lo a, tun tumah erawh Zoram Taxi Owners Association lam chuan intlan chhawk hi an duh ta thung.

Taxi intlan chhawk hi Aizawl khawpui traffic tawt lutuk tihziaawm tumna a ni a, taxi driver-te erawhin hei hi anni tan chuan chawbel inchhuhsaknaah an ngai. Tin, taxi pute hi traffic ti-jam-tu berah an inngai lo.

"Aizawl khawpuiah traffic a jam nasa tih chu kan hre vek a, mahse, taxi service hi traffic ti-jam-tu bulpuiah kan ngai lo. Keini hi traffic ti-jam-tu berah kan inngai lo," tiin Zoram Taxi Drivers Association (ZRDA) president C Lalromawia chuan a sawi.

Sorkar chawlh ni-ah (holiday) taxi an service tho a, mahse, traffic a jam ngai lem lo tih a sawi a, chu chu taxi service hi traffic ti-jam-tu ber a ni lo tih tichiangtuah an ngai tih a sawi a ni.

"Sorkar hian Aizawlah taxi 4200 vel a service tiin an chhut a, mahse, hei hi registration atanga chhut a ni a, a tak takah chuan heti zat hi kan service lo," tia sawiin, "Traffic jam nasatna - Chanmari leh Sikulpuikawn inkarah hian kan tlan vek bawk lo a, hmun danga service kan tam a ni," a ti bawk.

Zoram Taxi Owners Association lamin taxi hi intlanchhawk se, driver-te hnenah an thla khat hlawh an pe tho ang tih chu an hriatthiam loh thu sawiin, "Hei hi tute sawichhuah nge kan hre lo. Vanapa Hall-a kan inhmuhkhawm tumin ZTOA member engemaw zat an rawn tel a, chutah pawh chuan 'thla 1-ah ni 16 service-in kei chuan driver hnenah thla khat hlawh ka pe thei lo ang' ti tein an sawi," a ti.

Sorkar leh Taxi Owners Association hruaitute an indawr a, Owners Association hruaitute hian intlan chhawk mah se driver-te chu an thla khat hlawh an pe tho ang tiin an sawi a ni awm e. Hei hi sorkar lam chuan tan chhanah an hmang a, mipui zingah pawh hei hi tanchhana hmanga taxi driver-te puhchhia an tam hle. Taxi driver-te erawhin hei hi an pawm lo a, intlan chhawk ta se taxi neitute hian driver-te chu thla khat hlawh an pek tak tak an ring lo. Tin, Zoram Taxi Drivers Association chu taxi-a eizawngte inzawmkhawmna a ni a, mi hnuaia thawk driver leh mahni ta khalh an tam, intlan chhawk chunga driver-te thla khat hlawh pek chungchang pawh ZTDA ngaihtuah zawk turah an ngai.

September ni 15-ah Mizoram sorkar chuan thuchhuah siamin, sorkar ruahmanna zawm lote chu an chungah dan lekkawh theih a nih thu a puang.

"Taxi intlan chhawk tura sorkarin ruahmanna a siam duh lova Taxi ho nawrhna belhchhah tura City Bus service te tihtawp a lo ni ta hi Mizoram sorkar chuan pawi a ti em em a. Hei bakah hian MRTU ten Maxi Cab leh Sumo service zawng zawng tih tawp vek tuma ruahmanna an siam chu mipui tana harsatna siam leh Sawrkar tihbuai tumna niin sorkar-in a ngai," sorkar thuchhuah chuan a ti.

"Mizoram sorkar chuan City Bus leh Taxi neitu zawng zawng te hnenah sorkar duh dan ang leh permit an dil laia ziaka an intiam anga service chhunzawm turin September ni 17 zing lam thlengin hun a pe a. He mi an zawm lo a nih chuan a tul anga thuneihna hman a nih tur thu a hriattir bawk a ni," tiin sorkar ruahmanna zawm lote chungah dan lekkawh theih a nih thu an ziak.

"Hetih lai hian mipuite harsatna beisei loh tak lo thleng hi sorkar chuan pawi a ti a. Theihtawp chhuahin Department hrang hrang Bus te leh MST Bus ten nen Bus 50 zet tlantir mek a ni a. A tul chuan private motor neitute thahnemngaihna pawh ngen zel a ni ang," thuchhuah chuan a ti.

"Heng nawrhna nena sorkar nawr mekte harsatna hi sorkar thu awiha an service an chhunzawm hma chuan engmah ngaihtuah theih a ni lo tih State Transport Authority chuan a hriattir bawk a ni," thuchhuah chuan a ti bawk.

September ni 15-ah hian Mizoram Road Transports' Union hruaitute chu an thukhawm nghal a, mahse, taxi intlan chhawk tura ruahmanna chu an pawm thei ta chuang lo. Ni 16 atang chuan maxi cab leh night bus te pawh service loh an tum ta a ni.

Hetih lai hian Zoram Taxi Owners Association chuan taxi intlan chhawk tura sorkar ruahmanna an pawm thu September ni 15-ah hian an puang.

Taxi service lo hian Aizawlah chuan mi hrang hrang a nghawng a, city bus a tawt hle. Chutah City bus an han tlan lo leh a, mi tam takin office leh sikul an tlai phah a, sikul thenkhat phei chu an chawl hial. Mahse, mak tak maiin office leh sikul kal hun velah chuan taxi leh city bus an tlan lo chungin Aizawlah traffic a jam tho!

Related Posts :