Israel Rama Naupang, Thalai Leh Kum Upa Lamte An Enkawl Dan

¢ Lalthakimi

Israel ramah hun engemaw chen kan cheng ve ta, hriat loh karah hun a lo liam zung zung a, he rama kan khawsakna pawh a rei ve dawn dawn ta. Ka tawn ve chin atangin Israel rama naupang, thalai leh tarte an enkawl dan tlangpui hi ka'n sawi teh ang. Mizote tan a bengvar thlak vein ka ring.

Naute/naupang enkawl dan tlangpui
Naute chu nu pum chhunga a awm lai atangin uluk taka enkawl a ni a, tichuan a lo piang ta a, a pianna damdawi in atangin a pian ni atangin engkim record fel nghal vek thin a ni. A rammi nihna ID card fel taka hawntir nghal a ni a, a nu leh pate chu naute entir leh hun tur engkim hriattir sa vek an ni.

Naute appointment neih hi Hospital hian theihnghilh an hlau khawp a, an nute phone-in an remind ziah thin. Check up neih reng reng hian naute upat dan a zira a tih theih awm chi leh a taksa than dan, a lu, kut leh ke, taksa bung hrang hrangte uluk leh chik taka teh leh check vek a ni thin. Tin, a thla a zira a ri hriat theih dan leh khawhmuh dan, a hmuh theih hlat lam te, check vek a ni thin a, check-na result atang khan naute chak lo deuhte chu special treatment pek nghal char char an ni. Chuvang chuan rual ban lo tur tam tak an chhanchhuak ta thin ani. Hetiang enkawlna hi Mizoramah tunhma atang khan naute zawng zawng khan lo dawng ta se rualbanlo kan tlem phah sawt ka ring thin.

Naute upat dan a zira an ei theihawm chi hi an uluk em em bawk a, a thla indawt hian a awm vek a, thlai rawt dip te leh theirah tih dip sa leh bawnghnute lam chi te a tam em em a, duh thlan tur a tam khawp mai. A duh leh remchang apiangin dawr siam ve theih a ni lo a, sorkar hriatpuina fel tak neih chauhin dawr a siam theih. Eichawp dawr leh second hand kan zawrh kawp ang chi kha chu a theih loh hul hual, ei leh in dawr phei chu uluk taka an thil zawrh kha check fel vel hnuah chauh an inzuar a, khaw tin Super dawr lianah hian naute mamawh ei leh in tur dahna lane bik hi a hranin a awm tawp a, flavor chi hrang hrang thianghlim si te hi chuta mi chu kan lei thin.

Naute sum/pawisa dawn
Naute chu a lo pian veleh khan a nu leh pa account-ah a enkawlna tur sum tlem a zawng a lut nghal a, a mamawh lam velna tur a ni ber ang chu. Hei hi kum 18 a tlih thlengin a dawng thei thin. Damdawi ina awm man, nauneih leh inzai (operation) hi a thlawn vek a ni a, hnathawkte tax chhunluh atangin he senso hi an siamrem mai thin.

Naute nu chu hnathawk emaw thil zir emaw a nih chuan nauawmna hmun, naute dahna tur khaw tinah a awm a, ka hriat sual loh chuan thla 3 an tlin atangin a dah theih a, heta dah man hi keini group-a mite tan chuan pem thar nih vangin kum khat chhung a free a, tunah hian kum 3 vel a ni dawn ta a, tlem a zawng chu an chawi ve tawhin ka hria. Lo awm nghet tawh leh pem thar chawi hi a inang lo zel a ni. Kawng engkimah pem thar 'concession' hi a awm zel.

A tlangpuiin kum 3-6 inkar enkawlna hi chi 2/3 a awm a, an kum a zir zelin, 'hei hi chu a thang duh deuh a, hetah hian awm se' tih ang chi kha a theih ve loh a, an kum mil vekin enkawlna hmunah an lut thei chauh a ni. Tichuan kum 6-ah school pangngai an rah tir chauh a, hetah pawh hian pem thar, kum 2/3 chauh la awm tan chuan fee engmah chawi a ngai lo a, sikul bag leh lehkhabu te pawh a free-in an dawng vek a, kum 12 an tlin hnuah hostel-ah a awm theih a, heta awm man hi kum eng chen nge an free dawn ka hre lo. Hei kum thumna thleng chuan kan naute chuan a la chawi lo a, chawi chu sawi loh an lo chhuah changa an rawn hawna motor chuan man thlengin an rawn hire sak vek a, tu pa tawngkam takin emaw, siki khat pawh kan la chawi lo chu a nih hi â! A mak khawp mai, a awihawm lo rum rum zawk a ni. Tichuan mi thahnemngai leh thilpeka rawngbawltute atangin a ni ang chu ka ti mai a, thawmhnaw tshirt, kekawr, pheikhawk te hi an la rawn dawng a, lehkhabu pawh engmah kan leisak rih lo chu a nih hi.

Pem thar te'n lei rem an rah hun hi kawng engkimah an nghak ni berin ka hria.

Thalai sipai tan dan
Mi hrisel pangngai, thluak pangngai pute (pianphunga rualbanlo a nih loh chuan) chu kum 18 an nih huna sipaia tang tura ngaih an ni. San zawngin an teh lo, an tling nghal tawp mai a ni.

Kum 17 vel an nih atang hian sipai hmunpui atangin lehkha an dawng a, ka tehkhin ber chu - Mizorama 'nauhualna' kan tih ang chi kha. Sipai-a intlar a ngai ve lo a, an nu leh pa te ID Card-ah an fate hming leh pian kum fel taka record a nih avangin sorkar hian a hre hneh khawp a, a ram mipuite hi biruk theih a ni lo. India ram nen chuan a inang lo khawp mai, sipai an han luh hian kum thum chhung chu hlawh an nei lo a, pocket money chauh an dawng thin. Mahse sorkar khan an chhungkaw dinhmun kha a ngaihsak ve ta thung a, an nu leh pa te account-ah thla tin sum a chhunluhsak thin. Tin, an sipai va tanna te khan tang tharte in leh lo an check chhuak leh vek a, an mamawh thil - sofa set, khum, almirah, fridge etc te an pe thin. Hei kan nau te pawhin an hun ve tak dul hi!

Sorkarin a hlauh ber nia ka hriat chu an tlangvalte sipai-a an tan chhungin in lamah an chhungte an lo rethei ang a, rualawt takin an lo awm ang tih hi a ni. Tlangval, sipai tan laia nupui nei pawh an buaipui leh vek a, an in danna tur bungrua te an pe a, an in luah man leh an nupui fanaute khawsakna tur kha an account-ah a pe char char thin. Nupui neih hnua nu leh pa te bawhbuai hi chu an vang khawp mai. |halai sipai zo tawhte hi chuan mahni kea din an tum vek a, kum 18 an tlin atangin mahniin bank account an nei hrang vek tawh.

Sipai hi India ram ang thovin chi hrang hrang an awm a, mahni duh duh an zawm mai niin ka hria. Chutih laiin talent nei tha leh lehkha thiam te chu an dang hle thung. Sipai tan lai hian computer te, mahni tuina thil hrang hrang, 'driving' thlenga zir theih dan kawng a awm vek a ni.

Israel rama puitlin hnua pem tan pawh a kum a zirin sipai-a luh hun kha an siam rem mai a, an tang vek tho, mahse, a rei lo thung. kum 1 te, kum 2 te, thla 6 chauh tangte pawh an awm. Mizoram atanga kal zingah pawh sipai-a tang an tam ve khawp mai. Kum 18 tlin huna luh khan kum 3 (compulsory) a zawh hnu-ah an tan chhunga thuawih leh record nei tha, talent nei tha bawkte tan chuan hlawh pangngai neiin a chhunzawm theih a ni. Sipai-a tan chhung hian India ram ang bawkin uniform hak a ngai a, ID card a show phawt chuan bus leh rel chuan man chawi a ngai lo.

Thalai kum 18 chung lam hi chu an dim lo khawpin ka hria; an thluak an su a nih hi ka ti mai a, an sipai tang lo haw zawk thin hi an hah thin khawp mai, mut kham lah awm lo, an mu bawrh bawrh zel mai chu a nih hi. Tin, fapa mal, pa nei tawh lo, sipai-a tangte chu kar tin a nu Shabbat hmanpui turin haw an phalsak thin.

Anmahniho sawi dan takah, kum 18 atanga kum thum chhung thuawih taka sipai tang zo chu khawiah pawh an chhawr tlak a, an tuarchhelin an puitling zel. An lo chhuah hnua hna an zawn pawhin an hmu hma bik a, duhsak an hlawh khawp mai. A duhin lehkha an zir chhunzawm a, a tlangpuiin keini Mizoho chu sipaia tang chhunzawm kan tlem a, a hun bithliah zawh hnu-a hna dang thawk leh an ni deuh ber.

Thalai zawng zawng sipai-a tan tur a nih rual hian dinhmun a zir a lut lo an awm tho a, kawng danga sorkar tanpuina dan (rule) pawh a awm a, kum 2/1 chhung deptt hrang hrang an tanpui mai thin. Tin, fapa mal neihchhun, pa nei tawh lote pawh 'consider' dan a awm a, hrisel lo leh thluak hniam deuh te chenin. Kan Mizo nulate an lut lo tlangpui, hna dangah sorkar an tanpui thin (a chipchiara sawi dawn chuan a sei dawn lutuk a, hei hi a tlangpui thuak thuak a ni).

Kum upa lam te enkawl dan tlangpui
Mipa kum 65, hmeichhia 60-ah an pension thin (tunah hian dan an siam thar a, a kum bithliah ka la hre chiang rih lo). Pension kum tlin hmaa hnathawk thei lo, hrisel lohna vang a ni emaw, eng vang pawh ni se, khangho hnathawk lote tan khan ti mai teh ang, hming sign-na office a awm a, hming sign tih hian signature va pek ni lovin computer-ah mahni ID card number chhuta kut zungpui nem tur a ni. Tichuan 'acceptance' ti mai ila, 'chit' a lo chhuak a, tumah intih kep theih miah lo, mahni ngei a ngai, chutah chuan kum 50 hnu lam tan thla khatah vawi khat a ni a, kum 50 hnuai lam tan kar khatah vawi khat a ni thung a, hetia va tih hian sum tlem a zawng account-ah a lo lut zel thin. Chuti a nih laiin hnathawk chunga va sign tum erawh chu theih loh bur a ni berin ka hria. Computer-ah khan a 'stag' tlat mai a ni. Nupa, pension kum la pha si lo, hnathawk lo te pawhin an sign a, tin, hmeithai hi an duhsak em em bawk, kawng engkimah, sum pawh an dawng hnem bik zel. Heta thawkte hian hming sign-tute chu hnathawk rual an la nih chuan hna an thawh theih awm chi an lo kawhhmuh a, an kawhhmuhna company te'n thawk tlak lova an lo ngaih chuan lehkha an lo siam a, hming chu a va sign leh thei thung a, an duh erawh chuan an thawk nghal a, hming sign kha a theih tawh loh thung a ni.

Tichuan, pension kum a lo thlen khan office va nawr buai vak ngai lovin bank account-ah khan pension pawisa kha a lo lut ta nghal a, hming sign-na lam hawi tawh lovin, pension pawisa kha an hmang ta a, in leh lo nei lo an nih phei chuan an in luah man pawh an dawng tel vek thin. A that lai huna sorkar hnathawh leh thawh loh lam ni lovin, a kum avang khan pension benefit kha a enjoy tawp mai a ni.

Pensioner-te tan hian intihhlimna eng engemaw te an siam a, chhunah a duh tan phei chuan va inkawmhova intihhlimna, an phak tawk ang anga infiamna te an neihpui thin. Ei leh in thlenga lo hluina hmun a awm a, chu hmunah chuan hlim takin enkawltu fel tak tak karah an va khawsa ve bawk thin. Israel ramah hi chuan ka hmuh danin naupang leh tar kan tih, kum upate an hlutin an duat a, an ngai pawimawh em em a, engkimah 'priority' an pe a, chutih laiin thalai erawh an dim miah lo thung. Kum 3 chhung sipai-ah an thluak an su vek phawt a nih hi.

Mizorama kan tih ang lo takin thalai in nei reng reng hi an in dang nghal a, nu leh pa bulah an awm lo a, chumi avang chuan tu leh fate bawh buai lohvin pensioner nupa pawh nupa chauhvin an khawsa thin. Zing leh tlaiah kawngsir hmun nuam tak takah kut insuihin an kal rial rial thin a, ka thlir vawng vawng thin. Pa upaho chuan dawr hmun thawl nuam lai, thut hahchawlhnaah lehkha te an deng a, an hlim em em thin. An that laia Israel ram tana tha leh zung seng tawhte hi sorkar hian an hlim loh leh an hrehawm a hlau em em a, an khawlai len paha an hahchawlhna tur hi hmun remchang lai apiangah thuthmun a siam a, khawlum lai phei chuan zan rei tak tak thleng an inkawm a, an titiho laih laih thin. Ka thlir changa ka rilrua lo lang thin chu - Mizorama tar leh upa te, nauawm leh in nghak ringawt tura kan beiseina te, chu mai ni lovin famo mitmei veng reng renga khawsa te, fate harsa taka chawilen tawh hnu pawha tute buaipuia an la hahzia te, an hlimna tur kan ngaihthahzia te hi a ni.

Anni chu buaipui an ngaih pawhin in hrang atangin an va enkawl mai a, hei hian chhungkaw inngeihna, mo leh a pasal nu leh pa inkarah leh unaute inkarah pawh a thlen a, zawm ve chi niin ka hira. Keini chu inngeih awm taka lan kan tum a, kan awm khawm a, mitmei kan inveng tawn a, mo tan lah nuam lo nu leh pa tan lah chuti bawk, chhungrilah han inbih chiang ila, rum rukna nei lo chu kan vang viau ang. Pasal te nu leh pa leh unaute, pianna nu leh pa ang leh unau pianpui ang chiaha en thei chu mo 100-ah 10 an awm ka ring lo hul hual! Seilenna inang lo, duh dan inang lo kha kan han inhrawn khawm ta lui lui thin a, nupa kar pawhin a khik phah bawk, tu tan mah a tha ber lo ang, thunawi a tam a, nupa inthenna hial thlen pawh a tam thinin ka hria.

Old age home
Kum upa lam, mahnia inenkawl zo tawh lote tan khaw tin deuh thawah ald age home a awm a, chutah chuan tarte chu an dah tlangpui. An rualpuite nen an inkawm thei a, nupui/pasal sun tawh tan phei chuan thil tih chi tak niin ka hria. Ina khawhar taka awm ai chuan he hmunah hian mahni zawlpuite nen an khawsa a, an fate leh chhungkhat laina te'n an 'visit' thei reng bawk si.

Old Age Home-ah hian hun rei vak lo chu ka thawk ve a, chuta ka thil tawnte chu ropui ka ti khawp mai. Ka thawhna hmun hi Israel hmar lam Khaifa bul lawkah a ni a, building lian leh fai, changkang leh nuam tak a ni a, compound nuam tak a awm bawk. Chhawng hniha sang a ni a, mi 60 -70 vel an awm a, a chhawng hnuai zawk chu tlema rilru lama chiang vak lote awmna a ni a, la upa vak lo, kum 40/50 bawrte pawh an awm. Chu tah chuan ka va tel ve a, nurse leh anmahni taksa enkawlsaktu thlengin an awm. Zinga an han tho te hi, mahnia intifai thei lo chu an ha te an nawh pui a, an bualfai a, diaper an kaihtir a, tichuan hall-ah dbreakfast an ei phawt a, thenkhat, mahnia ei thei lo leh eina chang hre lote chu an hrai mai thin. An ei leh in hi an tana tha tur vaitamin lam hawi a ni tlangpui a, theirah an ei ziah bawk.

Chumi zawhah music an ngaihthlak pui leh a, tichuan an phak tawkin an infiampui thin a, an hlim thei dar dar khawp mai. Chumi zawhah chuan mahni chak zawng, hmeichhiain la phiar, thil thui emaw, thil bah neuh neuh lam chi te an ti a, mipa lamin thil rem (naupang infiamna) ang chi te an duh zawng zawng an ti thung a, dar 12 velah chaw tuihnai tak an ei leh a, an ei fel hnu chuan inkawmhona leh zawhna (quiz) ang chi te hmangin mithiamin an ho a, an sirah ka lo thu a, ka nui char char thin, hlimawm tak a ni. A kaihruaitu hian an hneh thin khawp a, an hlim tlangin an nui ve bawk bawk mai. Tlailam dar 2/3 velah chuan an mu tlangpui. Zan lamah chawei turin an kaitho leh a, a then chu an mu lem lo. Doctor-in an check reng avangin damdawi chi hrang hrang ei lai nei deuh vek an ni a, chungte pawh chu a enkawltute khan a hunah an pe thlap thlap zel. Kal hlei thei lo, ke lam fel tawh lo te chu an nawr kual mai thin.

Ka thawhna old age home hi tarte chenna tur renga duan a ni. An manager chuan he hna zir hian USA-ah kum engemaw zat a zu awm thu leh a buiding sak dan pawh chuta a duh ber a entawn thu min hrilh. Bed room tam tak a awm a, hmeichhia ve ve room in-share te pawh an awm a, mahni chauhva luah pawh an awm. Bed room hi bathroom attached vek a ni a, an inbual paha han din leh thut vela vawn tur remchang tak vuah vek a ni. Ka thlek ka thlek thin a, remchang tak vek a ni. A chhunga an veivah paha kal tinuam tur hian vawnchhan nem nuam tak siam vek a ni. Pawn chhuahna kawngka chu lehkha thema hawn chi hi a ni a, chu card thai chi chu hnathawktu chuan an nei vek.

Compound chhungah chuan an leng vel thei a, pangpar mawi tak tak leh thutna nuam tak tak a awm. Hung pawn erawh an chhuak thei lo. Tin, an khum theuhah 'alarm' fit vek a ni a, an zan mu han tal vel emaw anmahnia zunram thiar tum emaw reng reng kha an han cheta an kein chhuat a rah chiah khan duty room-ah alarm a rawn ri nghal char char a, an tlan vat a, an va buaipui thin. An room leh hall hi a fai em em.

Zan lama an enkawl dan hriat ka chak avangin zan khat chu ka tel ve a, zan dar 10 velah ka va thleng a, an lo mu thiap tawh a, duty an lo awm a, tichuan darkar 2 dan velah ni in ka hria, room tin kan fang kual a, an mut that leh that loh te kan check a.

Ka va tel ve lai kha khawvawh lai a ni a, an room hi lum nuam tawka dah vek a ni. He home-a awmte hian Thailand emaw Phillipines atanga kal ka nih an ring hlawm a, ka ni lo tih ka sawi chuan mak an ti thei hle. Thil dang vang ni lovin, ka hmel danglam vang hian ngainat ka hlawh phian a, ka thlen veleh hian min lo kuah chuk chuk a, min fawp a, a mangan thlak lek lek thin! An ngainatawm hlawm si, thawk zui tura sawmna pawh ka phu lohin ka dawng a, mahse kan chenna hmun kan sawn dawn avangin a lehlan phak dawn si loh a, ui tak chungin ka hnar ta a, vawiin thleng hian ka rilru luahtu zinga mi a la ni cheu mai! Kha hmun angah khan kan Mizo upate han enkawl ve ta ila a va nuam dawn em!

Mizo pitar/putar, tu leh fate duatna leh duhsakna dawng lem lo leh chhungkhat laina nei fumfe lo, enkawltu mumal nei lote tan leh a nei te pawh a duh apiangte awm theih nan Aizawlah te hetiang hmun hi buatsaih ni ve ta se, ruihhlo ngai enkawlna te, Kohhran ramthim sutna ang chi-ah te ngaiin, Kohhran, khawtlang leh sorkar tangrualte'n din ve ta se, a tih chi viau awm mange te ka ti.

Mi tu pawh vawiina thalai ngal chak leh thahrui ngah tak takte pawh hi kan vanneih chuan kan la tar vek dawn a, chuvangin kum upa leh tar kan tih ang te hlimna tur leh nawmna tur hi tih tak meuhva chhung tin leh khawtlang pawhin kan ngaihtuah a va hun em ka ti. Ram thianghlim-ah hian tar leh upate hi an lo ngai pawimawhin an nun hi an va lo hlut em tih tih hi ka chharchhuah chu a ni e.

Related Posts :