Boxing-a khawvel champion a nih tirh khan mi thenkhat chuan Mizo zinga world champion ni hmasa berah an ngai a, thenkhat erawhin an pawm lo thung. World champion nihna hi tum li a chang tawh a, India rama infiammite chawimawina sang ber - Rajiv Gandhi Khel Ratna dawng tura thlan a ni.
He Kom nula, MC Mary Kom hi Rajiv Gandhi Khel Ratna dawng tura thlanchhuah zingah a tel a, a hming chu a hmasa berah dah a ni nghe nghe. Thuneitute'n chawimawina dawng tur hi an la thlangfel lo deuh a, mahse, Mary hi chu dawng ngei tura ngaih a ni.
Amah hi Zo hnahthlak chi pakhat, Kom Rem hnuaia Kom hnam mi a ni a, Mizo nula a nih hria, Zofate inpumkhat lehzual hun nghakhleltu a ni. Kom Rem chhungah hian Kom bakah Aimol, Chiru, Koren (Koireng) leh Purum te an awm.
Kom Rem-ho hi Magnolia atangin China lamah an thlangtla a, chuta tang chuan Burma-ah, Burma atang hian tuna an khawsakna hmunah hian an lut ta nia hriat a ni. Manipur tih lohah chuan Assam leh Tripura velah an bit deuh. British-ho kha chuan Old Kuki zingah an dah.
Manipur-ah hian Naga (Tangkhul) ho nen an inawm pawlh nasa a, a lian leh changkang zawk Tangkhul-ho hian an chiah hneh hle. Naga-ho hi mi chuh ti-na tak mai an ni a, khawiah pawh awm se an chhehvela mite Naga-a luhtir zung zung thin an ni nghe nghe. Kom-ho ngei pawh hian Naga-ho hi an ngam lo hle a, an zinga thenkhat phei chuan an nihna haiin Naga emaw an ti fur tawh. Tun hnaiah hian Manipur-a cheng thenkhat - Anal, Kom leh Thangal te chu Naga-ah an inchhal der tawh a nih hi.
MZP-te’n Kom-ho hian Naga emaw an inti ang tih hlauvin, Mizo an nihzia an theih ang angin an lo hrilh tawh thin. 2002-a Churachanpur-a Zofest hmasa ber neih a nih tum khan Zofate insuihkhawm nana MZP hmalakna chuan Kom-ho hi a hneh hle a, chuta tang chuan chhanchhuah an ni a tih theih ang. Eng pawh ni se, Mary Kom hi chu Mizoah a inchhal. Zofest 2006-ah khan MZP chuan Mary Kom hi Zofate tihmingthatu tiin chawimawina an hlan nghe nghe.
"Kristian vek kan ni bawk si, Mizo kan ni a, inpumkhat chu a tha alawm,” tiin Mary hian Zozam Weekly a lo hrilh tawh a, ‘Mizo nula’ han tih pawhin a lawm thin hle. Manipur hminga khelh ai chuan Mizoram hminga khelh a chak thin bawk.
Monday, August 3, 2009
Zo nula tan chawimawina
Subscribe to:
Post Comments (Atom)
No comments:
Post a Comment