Awi! Zonunmawi!

Leite atangin Zoram dengchhuak khawp zaithiam a lo chhuak tawh. Chu mi chu T Lalengzauva a ni. Zai a chawlhsan tawh a, Kohhran Upa, chhungkaw pa a ni ta. T Lalengzauva hnuah, hei, nula pakhat a lo lang a, tun hnaiah chuan Zoram zaithiam zingah ani aia ngaihven hlawh an awm bik lo ang. Chu nula chu Zonunmawii a ni.


July ni 25 zanah The Hunt-ah pakhatnaah puan a ni a, mahse, pakhatna a nih hma hauhvin a lar fe hman. The Hunt thlirtute chuan zaithiam an ti mai pawh a ni lo, hmeltha an ti. A zunah mi tam tak an uai hman.

Zonunmawii hian hetia hriat a hlawh mai hi a ring hran lo. GSM (Grand Society of Mizoram) te'n Indian Idol thlannaa tel tur an thlang dawn tih a lo ral hriat a, Hindi hla pahnih sain a tel theih tih hriain, hla pahnih nen Aizawl a pan ve rawih mai. Mahse, GSM te chuan LPS kaltlanga mipui en theih turin, TV Show kal dana kalpui an lo rel a, hla pawh pahnih mai a tawk ta lo. Chutiang a nih avang chuan Zonunmawii chuan hriat a lo hlawh ta a, amah vanga inhnialna te pawh chanchinbu lamah a lang ta uai uai mai a nih kha.

"Hetiang dinhmun te hi chu ka beisei pha lo hrim hrim, hla pahnih nen Aizawl ka rawn pan ve rawih a, ka tel ve chak vangin tel ve mai mai ka tum a ni deuh ber,' tiin a sawi.

Zonunmawii hian a naupan lai atangin vai hla hi a ngaina reng reng a, vai film te hi hmuhnawm ti deuhin a en phah thin. Chu mai a ni lo, film-a an hlate hi ngaihthlak zui a chak avangin cassette a lei a, a ngaithla thin.

"Vai hla hi ngaihthlak a nuam ka tia, ka ngaina hrim hrim. An aw hi a ngaihnawm ka ti a, bakah an hla thluk kal dan vel hian min lem ka ti mai," Zonunmawii chuan a ti.

Mahse, a nulat hnuah vai hla a sa ngai lem lo, The Hunt-a a tel hma chuan. Amah hi zaimi a ni hrim hrim a, Lungleia TV Show hlawhtling tak, JB Cable Network buatsaih Zostar-ah pawh pasarihna a lo ni tawh. |KP programme leh puipunna hmun hrang hrangah a zai thin a, Pathian hla a sa thin. Mizoram chhim lamah chuan hriat pawh a hlawh hle a, The Hunt atangin zau zawka hriat a hlawh ta a ni.

The Hunt-a a tel hi hlawkpui a inti hle a, "Kawng hrang hrangin hma ka sawn phah. Mahse, chu ai chuan min duhsaktu ka chhar hi ka hlawkna berah ka ngai. Min duhsaktu ka chhar hnem khawp mai," a ti.

He intihsiakna neih chhung hian, a zai apiangin a zam ziah a, "Inelna a nih chuan a dan a dang tlat," tiin a sawi. Tin, mipui hmaah zai fo tawh thin mah se The Hunt platform kha chu a dang tlat, tiin a sawi a, hnai teah endiktu an thu a, mipui tak tak awm lovin, judge-ho hnungah mi an lo thu bawk a, chu'ng mite hmaa zai chu a thil tawn ngaih loh a nih avangin zahthlak a ti thin.

Zak chung chungin a zai a, a zai zawha a thil tawn tur chu a huphurh thin hle bawk. An zai zawhah endiktute nen inbiain, eng engemaw an sawiho thin a nih kha. Kha mawlh kha a huphurh thin.

Endiktute zinga mi Sangliana tawng dawnin a huphurh thei hle; "A duhtui hmel lutuk a, ka huphurh ve tawp," tiin a sawi. VR Ralte hun a thlenin a hunphurh thin bawk. "Hindi-in min bia a, thil min zawt vak vak a, Hindi ka thiam vak si lo a, ka huphurh thei lutuk," a ti.

RD Barman-a awmna state an zawh tuma 'Tibet' tia a chhang pawh kha a zam vang a ni. 'Hmarchhakah a nia... a state hming bulah chuan T a awm...' tiin a zawttu judge chuan a sawi hmawrhmuh a, Zonunmawii chuan "Tibet" tiin a chhang ta mai a nih kha.

"Ka lai thei lutuk a, khami tum pawh khan ka hamhaih vek alawm! Ka chhungte pawhin min hau nasa lutuk," tiin hemi chungchang hi Zonunmawii chuan a sawi.

"Pi Mali bula awm kha nuam ka ti, min tihlim thin. A fel a, nuih a heh bawk a, a bula awm kha nuam ka ti lutuk," tiin The Hunt host Mali chungchang pawh a sawi.

Endiktute thusawi hrang hrangte chu hlawkpui a inti a, anmahni vangin hma a sawn hle niin a sawi.

"Judge-te thusawi leh min fuihnate kha ka hlawkpui a, an zarah hma ka sawn khawp mai. Pi Vanhlupuii'n zinga exercise la thin turin min fuih a, boruak hipa thaw vak vak thin tur te'n min fuih a, kha'ng te kha ka zawm nghal. Ka hlawkpui lutuk," a ti.

The Hunt a zo ta hi a thaw huai mai. "A hahthlak lutuk a, hetia kan zo fel thei hi ka thaw huai mai, ka hahdam huai huaiin ka hria," a ti.

Zonunmawii hian Mizo zaithiam zingah RTC Lalduhawmi leh C Luri te zai a ngaithla nasa hle a, Rintea (Albatros) hi zaithiam a ti hle bawk. "Hla hi chu ka ngaithla kual deuh duah. Hranghlui zai te hi ka ngaina a, Lallianmawia Pachuau, Laltanpuia Tochhawng te, hranghluiho zai kha ka la ngaithla reng. Tin, sap hla pawh, Mizo hla pawh, ka ngaithla kual deuh duah," tiin a sawi.

The Hunt-a pakhatna a ni chu a lawm hle a, "Min khawngaihtu, min khawngaih vanga min duhsaktute zar a ni," a ti. "Min duhsaka sms-a min lo vote-tute chungah ka lawm tak zet a ni," a ti bawk.

Indian Idol-a tel tura inbuatsaih nghal deuh mai a tum a, album siam lam a ngaihtuah rih lo. Music video erawh a rem chuan a siam mai thei.

Zonunmawii hian pasal neih mai a tum rih lo a, nula nih nuam a ti rih. "Pasal atan chuan Pathian tih mi, Kristian chhungkua min dinpui theitu tur, min hmangaihtu ka duh," tiin a pasal duhzawng a sawi.

A nih tum chu - rinawm taka Pathian rawngbawltu leh nupui tha tak nih te a ni.

Related Posts :