Thih lai leh thih hnu a kan taksa a thil thleng te

¢ Lalhmachhuana M.Sc Forensic (Biology & Serology)

Thiamna alo sang zel a, sualna pawh a lo pung ve zel a, sualna tharlam mak tak tak leh chi hrang hrang a hring tel ve zel bawk a. ‘Khualthuthang leh ar pan chuk’ an tih angin, Mizote hian thusawi kan uar thei em em a, tunlaiin kan Zoramah ngei pawh thil thleng duhawm lo pui pui leh maksak tak tak kan tawng chho ve ta zel a ni. Hetiang a nih avang hian mihring kan thih atanga a hnulama thil thleng thin tlangpui han sawi ila.

Mihring kan thih hian kan lung-in (heart) thisen a pechhuak tawh lo a, kan chuap pawhin a boruak (oxygen) hip luh a chawlhsan nghal a. A awmzia takah chuan kan taksaa timur (cell) te chuan thisen leh boruak an dawng tawh lo nghal a ni. Thisen semdarhtu ber lung-in (heart) a hna a chawlhsan tak hnu chuan thisen te chu kan taksa hniam lamah an tling khawm ta thin a ni. Hemi avang hian kan taksa chunglam chu a lo dang (pale) a, hnuai lam (lei hnaih lam) chu a lo duk ta thin a ni. Zangthal zawnga mi a thih chuan a awm leh hmai velte chu a lo dang (pale) ang a; a hnungzang, malpui leh lei hnaih lam apiang a lo duk dawn a ni. He thisen tling khawm avanga duk lo awm hi kutthlakna duk nen a chang chuan hriat pawlh awl tak a ni thin. Hei hi Post-Mortem Lividity emaw, Livor mortis emaw Hypostasis emaw tiin an vuah. A tangkaina ber chu mitthi ruang chu a thih hnuah khawihsawn a ni em tih leh a thihna engtia rei nge tih hriat nan engemaw chen a hman theih a ni.

Taksaa timur (cell) te hi mihring kan thih hian an thi ve nghal vek mai lo a, thluak (brain) hi lung-in (Heart) thisen a pek loh hnu minute rei lo teah a thi ve nghal mai a, tihrawl (muscle) te erawh chu darkar engemaw zat an la dam thin a, vun leh ruh te phei chu ni hnih khat lai pawh an dam thei a ni. A chhan chu kan lung leh chuap te’n hna an thawh lai chuan timur (cell) te hian aerobic (oxygen hmang) in an nung (thaw) a, mahse lung leh chuap an thih hnuah chuan Anaerobic-in (Oxygen tel lo) an nung chhunzawm ta a ni. Oxygen tel lova an nun (thawk) hian taksaa timur (cell) te a ti khawng (stiffen) ta thin a ni. Hei vang hian a ni kan thih hnu rei vak lovah kan khawng thin a ni. Hei hi Rigor Mortis an ti a ni. Rigor Mortis hi thih atanga darkar 3 velah intanin darkar 36 hnuah a reh leh tlangpui thin. Rigor Mortis awm tan leh a reh hun hi taksa pian a zir te, ruihhlo tih leh tih loh te leh environment a zir tein a danglam thei a, khabe leh nghawng atanga intanin ke hmawr thleng a khawng a, a reh leh lamah pawh khabe leh nghawng atang bawkin a reh leh tan thin a ni. Livor Mortis ang bawkin Rigor Mortis hi mi engtia rei nge a lo thih tawh tih hriat nan a tangkai em em a ni.

Kan taksaah hian bacteria leh enzymes te a awm a, heng hnathawhte avang hian kan taksa a lo tawih (decompose) tan thin a ni. Thih hnua taksa a tawih hian a tawih nasat dan a zir zelin stage 5- ah an then a, chungte chu:
(1) Initial decay (2) Putrefaction (3) Black Putrefaction (4) Butyric Putrefaction leh (5) Dry decay.
(1) Initial decay: Hei hi thih atanga ni 3 vel chhung sawina a ni. Ruang chu a pawnlangah la him viau mah se a chhungah (kawchhungah) chuan a tawih (decompose) tan tawh a, kan ril leh pumpui vela bacteria awm te hian kan taksaa chaw pai tawih tawhsa an ei zawh (digest) hnu chuan pumpui (stomach) leh ril (intestine) te chu an ei leh a, ril leh pumpui vel an ei pawp atanga lo chhuakin taksaa organ dangte pawh chu an ei chho ta zel a ni. Kan ril leh pumpui a enzymes awmte pawh chu lo chhuakin taksa chu an rawn ei (digest) ve ta zel a, taksa timur (cell) te leh an inzawmnate chu an rawn ei chhe zo vek thin a ni.

Mi a thih hnu rei lo teah chuan tho, (flies, order-diptera) chi hrang hrangin an rawn bawm nghal a, a bikin tho tle (blowflies) leh tho rang (Fleshflies) te hi a thleng hmasa ber te an ni. Thotle-te hi hliam awmna pemah emaw taksaa kua-ah (natural Orifices) te an tui a, darkar 24 chhungin an tui (egg) chu keuvin a lung (maggots) a lo awm hman thin a ni. Thorang (Flesh flies) te chu tui lovin note (live maggots) mitthi ruangah chuan an dah thin a, heng a lung (maggots) te hian taksa chu an ei a, taksa tawihralna (decomposition) ah nasa takin a pui thin a ni.

(2) Putrefaction: Thih atanga ni 4 atanga ni 10 chhung vel hi a ni. Kan taksaa bacteria te’n timur (cell) te an ei ral pah chuan boruak (gas) an siam chhuak ve zel a, chu gas-ah chuan hydrogen sulphide, methane, cadaverine leh putrecine te an tel avangin a rimchhe em em a, ruang uih kan tihna chhan pawh hi heng boruak ho vang hi a ni. Boruak lo insiam chu a lo tam zel avangin ruang pawh chu a lo puam ul thin a ni. Heng rannung zingah hian tho (diptera) te an tam ber a, sephung (beetles) leh tlumpi (mites)-te an tel bawk a, boruak chuan taksa tuihnang te chu pawn lamah a nawr chhuah bel zel a, bacteria leh lung (maggots) te tan chaw tha tak leh inthlahpun nana lum tha tak a siamsak nghal bawk thin a ni.

(3) Black Putrefaction: Thih atanga ni 10 leh ni 20 chhung hi a ni. Ruang chu bacteria leh enzymes te’n boruak chhia an siam avanga puam chu a reh leh tawh a, taksa chu a lo eng (yellow) deuh tawh thin a ni. Taksa thawleng (exposed) engmahin a khuh loh lai chu a lo dum tan a, a rim pawh a lo na zual zel thin a ni. Taksaa tuihnang te chu a hma aiin a chhuak tam zel a, chu chuan rannung chi hrang hrang a koh belh zel a, sephung (beetles) leh tlumpi (mites) te chuan taksa chu an ei filh deuh thaw tawh thin a, bacteria te pawhin taksa chu la ei ve zelin, rannung awm tam loh pawhin bacteria ringawt pawh hian an ei zo vek thei a ni. Taksa lumna (temperature) pawh rannung (insects) leh lung (maggots) te vang hian alo sang chho leh thin a ni.

(4) Butyric Fermentation: Thih atanga ni 20 atanga ni 50 chhung sawi nana hman a ni. Taksaa tisa la awm zawng zawngte chu he stage-ah hian a ral vek hman a, ruang chu a lo ro (dry) tawh thin a ni. A rim uih dan pawh butyric acid lo chhuah avangin a lo danglam leh deuh a, cheese rim lam deuh a lo nam tawh thin a ni. A rim avang hian rannung chi dang an pun belh ve leh a, taksa lei lam depah chuan hmuar (mold) lo awm tanin, sephung an lo pung nasa hle thin a ni. Taksa a lo ro tan tawh avangin Lung (maggots) te chuan taksa chu an ei tawh lo a, tho-a (flies) la chang ve lote chu an thi zo mai thin a ni. Sephung te erawh chuan vun leh tha (ligament) ro te an ei theih avangin, he stage-ah hi chuan sephung an tam ber thin a ni.

(5) Dry decay: Thih hnu ni 50 atanga kum 1 (ni 365) hun chhung sawi nan a hman a ni. Taksa a lo ro tak em avangin a tawih muang hle tawh a ni. Bacteria leh lungphur, phengphehlep te chite’n sam (hair) te pawh an ei thin a, ruhro chiah an hnutchhiah thin a ni. Ramsa lian deuh, sihal, sanghar etc te ruhro pu bo thei chi te an awm a nih loh chuan ruhro te chu an awm ngai rengin an tawih ral thin.

A chunga mihring taksa tawih ral dan kan sawi te hi sik leh sa (climate) ah a innghat nasa ber a, khaw lum leh vawhah te, boruak hnawn dan leh rannung awm dan a zirtein a danglam nasa thei em em bawk a ni. Nipui laiin a tawih chak em em a, thlasikah erawh a muang thung. Rannung phum loh (exposed) chu phum aiin a let engemaw zatin a tawih ral chak zawk bawk a ni.

Taksa tawih dan a zir leh rannung (insects) leh lung (maggots) atangte hian engtia rei nge a thih tawh (Post mortem Interval) a hriat theih a, tin, engvanga thi nge tih pawh engemaw chen chu a hriat theih a ni. Tura hrai emaw, ruihhlo vanga thi ni a rinhlelhah te chuan taksa a lo tawih nasat tawh avangin tisa atangin hmuh tur a awm tawh thin lo a, lung (maggots) te chu ruang eitu an nih avangin tur (poison) leh ruihhlo te pawh chu an ei tel ve vek a, hetiang lam zirna atan hian an tangkai em em bawk a ni. Thih atanga ni thum chhungah chuan a hmalama kan sawi tak, body temperature te, Post-mortem lividity te, Rigor mortis atang te hian a thihna engtia rei nge ni tawh tih leh engtia thi nge anih tih engemaw chen chu a hriat theih thin a, mahse nithum hnu ah chuan ruang alo tawih tan tawh thin avangin Rannung (Insects) leh an Lung (maggots) te hi evidence awm chhun a nih tawh thin avangin an pawimawh em em a ni.

Related Posts :