Hlawhfa hlawhin thil man sang a pha lo

¢ Vanlalremruata Tonson

Mizoramah chuan sorkar hnuaia inhlawhte hi danin hlawhfa hlawh tur a sawi zat hlawh la awmchhun an ni tiin a sawi theih ang. Hlawhfa hlawh leh thil man sang chho zel inmil leh inmil loh hi ram chhung ei leh bar dinhmun lanna hnaivai berah a ngaih theih a, mahse, sorkar hnuaia inhlawhchawp – muster roll (MR) te chuan danin a sawi anga an hlawh tur chu an hlawh pha lo a, hlawh tur bithliah tura din - State Level Minimum Wages Advisory Board pawhin thu a titlu ngam rih lo a ni.

Dan ang chuan hlawhfa hlawh zat tur hi bazara thil man chi hrang hrang lakkhawm atanga chhut tur a ni a, chu chu price index an ti. Price index chu base year period price an ti a, hlawhfa hlawh zat tur an chhut hmasak laia price index hmanga sem tur a ni a, chumi chhuak leh an hlawh lak mek chu puntir leh tur niin, chuta chhuak leh a chhuak atanga 25% chu belh leh tur a ni bawk. Hetianga an chhut hian Mizorama thiamna hranpa nei lo hlawhfate hlawh tur chu ni khatah Rs 166 a ni. Hetiang hian: 103X549 (Price Index of December 2008)/424 (Price Index of September 2006) = 133 + 33 (ie 25% of 133) = 166. Tuna an hlawh erawh chu 103 a ni thung. He hlawhfa hlawh zattur chhut dan atang chuan semi skilled-in Rs 186, skilled II-in Rs 231 leh skilled I-in Rs 296 an hlawh dawn a ni.

Sorkar, dan siam leh kenkawh kawnga mawhphurtu ber pawhin a hlawhfa rawihte chu danin a sawi angin hlawh a pe thei tawh lo. Chu chu thil man sang chak lutuk vang a ni. Hlawhfa hlawh chu danin a chhut dan tur a sawi anga thil man chi hrang hrang lakkhawm price index atanga chhut tur a ni. Mahse, price index atanga hlawhfa hlawh tur chhut dan tura an han chhut chhin chuan sorkar dinhmun hrechiangtute chu an tim tlat a ni.

Hlawhfa hlawh zat tur bithliah tuma board an han thutkhawm khan sorkar lam atanga hotute chuan Mizoram sum dinhmunin a tlin dawn lo nia an hriat thu an sawi a, central lama zawhfiah leh phawt an rawt ta niin hlawhfate intelkhawmna pawl lian ber National Trade Union of Mizoram (NTUM) general secretary Francis Lianmawia chuan a sawi.

Sorkar hnuaia muster roll-a inhlawhte chu, "Patlingin ni khat-nileng pawhin sa Kg 1 man pawh kan hlawhchhuak lo," tiin an phun thei a, danin right a pek chu a taka chan ve ngiat theiah an inngai a ni. Anniho zarah contractor lian, company leh sorkar peng dang (corporate) hnuaia inhlawhte chuan beiseina chu an lo nei sang ve deuh bawk. Mahse, sorkar hnuaia inhlawhna hmuh chu thil awlsam tak a ni lo a, mimal laka inhlawh tan phei chuan hun inher danglamin hlawh sang zawk chu a rawn herchhuahpui hun nghah tlawk tlawk a ni deuh tawp mai.

July ni 16 khan Mizoram State Level Minimum Wages Advisory Board chuan an chairman, labour commissioner Lalmalsawma hovin hlawhfa hlawh thar chungchang hi an sawiho a. Mizoram sorkara hun rei tak finance commissioner lo ni tawh, sorkar sum dinhmun pawh hrechiangtu labour commissioner chuan thutlukna a siampui ngam ta lo a ni. Central lamah hlawhfa hlawh zat tur chhut dan (formula) hi zuk zawh chian leh phawt ni se an ti. NTUM chuan an zuk zawt leh mek a, thuthar a la awm rih lo.

NTUM lam chuan hlawhfa hlawh chhut dan hi chiang tawk hlein an inhria a, a thuphunga zawt ve lekah inngaiin board-in hlawhfate hlawh zat tur pek hi a remti lo a nih chuan court-ah an kal mai dawn niin an sawi. Hlawhfa hlawh chhut dan chu Supreme Court pawhin a nemngheh tawh a nih avangin court-a kal hi an tan chuan hlauhthawn eih tur a awm lo niin an sawi nghe nghe.

Hlawhfate hlawh zat tur bithliah tur hian State Level Minimum Wages Advisory Board chu kum nga chhungin vawi hnih thukhawm ziah tura tih an ni. Hetia an thutkhawm dan tura tih atanga chhut chuan NTUM chuan Mizoram sorkar hian April thla atang hian hlawh thar anga hlawh hi pe turah an ngai a ni. Hlawhfa hlawh thar hman hun hi a tlai poh leh Mizoram sorkarin muster roll-a thawkte hnena arrear a pek tur chu a inkhawl hnem dawn tihna a ni a, NTUM-in hlawhfa hlawh tur chhutna hi an sawi hi an sawi ang taka dik a nih chuan Mizoram sorkar hmabak chu a ko hle dawn a ni.

Sorkar laipui chuan a hnathawkte hlawhbi thar a pe tawh a, Mizoram sorkar erawh chuan sorkar inthlak leh chhuanlam dang hrang hrang hmangin a la chelh khawtlai thei zawk. Hnathawktu lam pawhin beiseina neiin sorkar an nghak a, nawrh leh ultimatum thawm a ri rih lo. Hlawhbi thar a hman hunah dan pangngai angin arrear a pe leh teuh dawn tho. Mahse, chu'ng zawng zawng chu hnathawktute hnena a thil phal thua a pek tur a ni loin thil man sang leh sorkar laipuiin hna thawktute hlawh tam zawk a pek tak avanga loh theih loha a tih tur a ni si. Sorkara MR leh regular employee-te hlawh sang tur chu sorkar tan chuan luhai thlak tak tur a ni.

Mizoram chu eng tik lai pawhin thil man tona a ni tia sawi a ni reng reng a, sorkar lam atang erawh chuan thil man to chak lutuk hi khuahkhirh tuma bengsik meuha ngaihtuahna sen a awm thu hriat a la ni ngai lo thung.

Related Posts :