Swine Flu laka inveng turin Mizoram inpeih lo

Doctor pakhat chuan tiang hian a ngaihdan Zozam Weekly a hrilh: "Tawng thu chhe lo, swine flu te hi Mizoramah rawn lut palh ta se ka ropui lo ngawt ang. Kan society kan la inpawh tha si a, hri inkai darh a awl a nia," tiin.

"Thingtlang khaw pakhata ka awm laiin 'experience' ka nei tawh a," tia sawiin chu doctor chuan, "Zan khat thil thu-ah a khaw pum pui deuh thaw khan hritlang awm na an vei ta sup sup mai a, a tirah chuan mak kan ti khawp mai a. Mahse, kan han hrechiang a, mitthi lumennaah kha hri kha a darh ta niin a lang," a ti.

"Thingtlang khua a ni a, an inkawm tel tel a, tin, an inchhung kual them bawk a. Chu mai a ni lo, khaw thenawmah khan thenrual leh chhungkhat laina an nei deuh fur bawk a. An intlawhpawh nasa a, rei lo te chhungin a khaw chhehvel thlengin hritlang awm na kha an vei ta sup sup mai a," tiin chu doctor chuan a sawi.

"Chu chu thingtlang khua a ni a, khawpuiah pawh kan la inpawh tha hle a. Kan inkawm tel tel a, vantlang thil tih kan ngah bawk a, tin, kan inchhung khat them bawk a, chutiangah chuan mihring atanga mihringin a kaichhawn theih natna hi a darh chak em em a ni. Chuti a nih chuan H1N1 te pawh hi mi pakhatin lo vei ta se, kan fimkhur viau loh chuan a darh phut mai ang tih a hlauhawm khawp mai," a ti bawk.

"Kan health care facility hi a la hniam em em a, Mexico te chu keini aia changkang daih, health care facilty lamah pawha kan phak miah loh an ni a, mahse, H1N1 vei zinga za zela 0.7 vel an thi a, kan ramah hian lo lut ve ta se, kan inpawh that avanga a darh chak a rinawmna chu thuhran ni se, kan health care facilty a that loh avangin kan inveng hlei thei lo ang tih a hlauhawm khawp mai," tiin a ngaihdan a sawi.

Vanneih thlak takin khawvel tiralkheltu H1N1 chuan Mizoram a la thleng lo nia hriat a ni. He natna - Swine Flu tia sawi hian India ram a thleng tawh a, he thu buatsaih lai thleng hian mi 8-in an thihpui tawh. Mizoram thenawm Manipur-ah pawh he natna vei mi pakhat hmuhchhuah a ni tawh a, Mizoram erawh he hri hian a la thleng ve lo nia hriat a ni.

He hri thlen tawhna hmun atanga Mizorama lutte chu thlawhna hmanga lut tura ngaih an ni a, chuvangin Lengpui Airport-a thlawklutte dinhmun hriatchian chu a invenna lama hna hmasa tura ngaih a ni. Mizoram sorkar pawhin chuti zawng chuan hma a la a, mahse, a hmalakna hmasa chu a ropui hran lo. Kar khat vel chhung nurse duty-in thlawhnaa Lengpui Airport-a thlawklutte address leh an phone number a lo chhinchhiah thin! "Mi address hriat hnem vanga inven theih ni se he hri hi khawvelah a leng lo ang," tiin chanchinbumi pakhat chuan a sawi.

August ni 8 atangin Lengpui Airport-ah hian doctor 1 a duty ta a, nurse pahnihin an pui ang a, thlawhnaa rawn lutte chu an khua a sik em tih an lo enfiah zel ang. Chu chu thil tangkai tak turah ngaih a ni a, khawvel hmun dangah pawha an tih dan a ni. Mi address leh phone number chhinchhiah ringawt kha chu a him tawk lo tih health deptt. hotute pawhin an pha lo.

Hetia Lengpui Airport-a thlawhna passenger-te dinhmun lo enfiah tura hmalak a nih lawk loh chhan hi doctor an indaih loh vang a ni! Official thenkhat, Zozam Weekly-in a biakpawhte chuan Lengpui Airport-a duty tur hian contract basis-a thawk tur doctor rawih mai an rilruk thu an sawi a, mahse, August ni 10-ah chief secretary hova high level committee an thutkhawmnaah hmun danga thawk lai doctor dah an rel ta a ni.

High level committee hian Ngopa-ah pawh khualzinte dinhmun enfiah an rel. Churachandpur leh Aizawl inkarah sumo 4 vel a service a, Manipur-ah chuan swine flu vei an awm tawh a, chuvangin Ngopa-a heti zawnga hmalak hi tangkai hle tura ngaih a ni. Ngopa damdawi in (Community Health Centre)-a thawkte'n he hna hi an thawk ang a, police te nen an tangtlang ang.

Bairabi, Vairengte, Marpara, Tlabung, Zokhawthar leh hmun dang atang pawhin Mizoramah ram pawn atangin a luh theih a, mahse, tun dinhmunah chuan Lengpui Airport leh Ngopa-a duty hi tul hmasaah ngaih a ni.

"Duhthusamah chuan Mizoram luhkha tinah hian khualzinte dinhmun enfiah tura duty indah chu a tha a, mahse, vawi leh khata ti tur chuan kan tlin lo. A tul dan a zira hmalak zel a ni ang," tiin swine flu laka invenna kawnga tha thawhtu doctor pakhat chuan Zozam Weekly a hrilh.

Swine Flu do tur hian health deptt chuan Rapid Response Team a din a, he team hi Integrated Disease Surveillance Project (IDSP) hnuaia mi a ni. IDSP chu NRHM sum ringa din a ni a, NRHM chu sorkar laipui ruahmanna kal lai a ni. NRHM sum hmanga inrelbawl - Rapid Response Team hi sum lamah an mawm lem lo viau a, an sum neih hi thawktute hlawhah a kal tawk vel tih thu dawn a ni.

"Mexico-ah chuan swine flu vei zinga 0.71% velin an thihpui a, keini aia changkang fe zawkah pawh chuti a nih chuan, Mizoramah hian he hri hi lo lut ve ta se, kan tuar viau ang tih a hlauhawm khawp mai. Chuvangin, he hri leng do tur hian pawisa pawh a remchan dan dana pawhkhawm a hun khawp mai," tiin doctor pakhat chuan a sawi.

Chhiatrupna (disaster) leh hri leng chungchangah chuan sum awm loh thu hi chhuanlam a tling thei lo; a remchanna hmuna mi pawhkhawm char char a ngai. Chutiang chu ram danga an tih fo dan pawh a ni. Mizoramah erawh tun thlengin swine flu laka inven nana sum pawhkhawm emaw, a ngaihtuah emaw a la awm rih lo. Indem ngawt theih erawh a ni lo mai thei, thuneitute leh a thiamte'n tul an tih leh tih loh a ni mai a, Mizoram sorkar thuneitute hian tul an la ti lo pawh a ni thei. An vei lo pawh a ni thei tho bawk.

Bird flu a len lai khan Mizoram sorkar chuan sorkar laipui-ah a doletna tur sum a dil a, mahse, financial year tawp nen an innan avangin an hmu ta lo.

"Bird flu len lai pawhin sum a tam tawk lo a, central-a kan dil pawh financial year tawpin min nan avangin kan hmu ta lo. Mahse, financial year tharah pawh kan bawhzui chuang lo ve bawk," tiin health deptt. official pakhat chuan a sawi a, swine flu laka invenna kawngah pawh hian, dil ruala hmuh nghal tur a nih loh dan tur ngaihtuahin, sum ngaihtuah kawngah pawha inruahman lawk tul a tih thu chu official chuan a sawi.

Swine flu chu a tirah vawk natna tia sawi a ni a, chuvanga swine flu tih pawh vuah a ni. Vawk enkawltu tur vety deptt. chu an indaih lo hle. Mizoram sorkar hnuaia animal husbandry and veterinary department-ah hian vety doctor 120 lek an awm. A then chu office-a thu chi an ni lehnghal. Chu'ng mite chuan bird flu len lai khan theihtawp chhuahin hma an la a, khatia bird flu laka Mizoram a him pawh kha an lawm hle!

Mizorama ran lakluhte chu lakluh a nih hmain AH&Vety deptt. hian a him leh him loh an lo enfiah zel ang a, a him chin chauh Mizoramah lakluh tur. Vairengte-ah check post an nei a, chutah chuan phai lam atanga Mizorama ran lakluh turte an lo enfiah thin. Zawlnuam, Kanhmun leh Tlabung-ah te an nei bawk a, chu'ngah chuan Bangladesh atanga lakluh tur an lo endik thin. Zokhawthar-ah an nei bawk, chu chu Burma atanga lakluh tur endikna a ni. Hmun dangah pawh tlem a zawng chu an la nei awm e. Khaw dang kaltlang pawhin Mizoramah duhtawkin vawk a lakluh theih. Mahse, AH&Vety deptt chuan check post an nei tlem hle a, hawng ngawt sela duty tur an awm dawn si lo.

Vety deptt. check post chu surveilance officer-in (VAS tlukpui an ni) a thutchilh tur a ni a, mahse, Mizoram sorkar hian mamawh phuhru khawp chutiang officer chu a nei lo. Bird flu laka invenna lam an buaipui lai pawhin check post-a duty turin vety deptt. chuan mi an pawtkhawm nawk nawk ringawt!

Swine flu chu vawkin a vei thei a, a pudarhtu tak chu a ni lo. Mahse, he natna hrik hian Mizoram rawn thleng palh ta se vawk enkawltu turte chu an indaih dawn miah lo tih a chiang a, Mizoram hna lian tak - vawkvulh chuan nasa takin Mizoram a nghawng ang.

Mizoramah Veterinary Hospital 5 a awm a, a khawia mah hi hmanrua leh thawk zawngin an tling tawk lo.

Mizoram khawpui Aizawlah veterinary hospital 1 a awm a, vety surgeon 1 leh vety assistant surgeon 3 an awm a, VAS hi an indaih ngang loh avangin a theih ang angin hmun hrang hranga mi an pawtkhawm ringawt.

Vawiin thlengin swine flu chuan Mizoram a la rawn thleng lo a, sorkar hruaitute chuan chi-ai lo tur leh inrinhlelhna neite chu doctor hnena inentir thuai thin turin an ngen. He hriin Mizoram a thlen loh nana tha thawhtute hian mipui tawiawmna leh thlawpna an mamawh a, a tha thawhtute hian hmanrua leh pawisa ngah tawk pawh ni se mipuiin an tawiawm loh chuan awmzia a awm vak lo ang tih chu chinchang hriate ngaihdan a ni. Entirnan - tun hnaiah Australia atanga Mizorama rawn haw pakhat chu swine flu laka a him leh him loh hre turin doctor hnenah a kal thlap a, insawiselna a nei pawh a ni chuang lo, he hri hi a lo kawl ang tih a hlauh vang liau liaua doctor hi pan a ni. Chutianga tanho chu a ngai tih chu health deptt hotute sawi dan a ni.

Related Posts :