Ka thlir ka thlir thin... (A fanu hmu let tura beiseina nei chu)

¢ Zoa Tlau

Zarkawt hmun rem lai pawh a ni lo a, mi thenkhat tan chuan 'garage' kawt tia sawi mai tur a ni. Chu hmunah chuan ni tin mai hian pitar ni awm tak hmel pu leh mipa naupang hmel fel tak hian chawhmeh an thutpui thin, an kianga chawhmeh thutpui midangte nena an danglamna tu'n an hre lo. Ni tina chawhmeh zuara eizawng pakhat kha an ni ve mai a, mahse chu chu an nihna dik tak a ni lo. Chhungrilah thil inthup lian tak a awm a, chu thil inthup vanga chawhmeh zuar mai chu an ni.

Taima takin an fehchhuak a, ni tina ei tur leh chenna in luahna man pe zo tura Aizawl khawpuia hna thawh rim a ngaihzia hrechiang tak an ni ngei ang. Chu mite nupa chu tuk tin ka hmu a, mahse thil danglam hmuh tur ka hre lo.

A fapa sikul kai rual tawh a nu bula chawhmeh zuara ni tin mai a tap ve chawt chuan ngaihtuahna a tithui a, mi thenkhatin a sikul kai loh chhan an zawh chuan... "Kan haw hunah ka kai ang," a ti mai thin.

Mipa naupang hian a chenna hmun chu hmun nghetah a ngai lo a, sikul kai rual tawh tak ni mah se sikul kai turin Aizawlah a awm lo tih a inhrechiang a, a haw huna sikul kai a tum thu chu a sawi mai thin.

A nu nen hian mite ngainat an hlawh ni ngei tur a ni, dawrtu pawh an haihchham ngai lo, he mipa naupang leh a nu, mi thenkhat tana pitar tia sawi mai theih tur khawpa hmel zur hian mite thinlung hneh theihna lian tak an nei pawh a ni mai thei.

"Zanah te hian an chawhmeh zawrhna hmun hi naupang hian a phiat fai vek zel a, a fel tak tak a ni," tiin chawhmeh an phona bula chengte chuan he naupang hi an fak. A nu awm loh hlanin chawhmeh dawr chu amahin a nghak a, a chang chuan ni a vui zawh loh avangin a muthlu lawp lawp thin.

Ni tina inhmuh fo chuan he mite nupaah hian thil danglam hmuh tur a awm lo, amaherawhchu, rinhlelhna lian tak ka neih fo chu naupang fel tak, pawisa kir pawh thiam tak hian sikul kai a tum tlat lo hi a ni. A chang chuan a nuin a hnathawhna bula ni tin a hruai ve ringawt mai chu mak tih chang a awm a, 'a zirna tur te hi a ngaihtuah lo em ni aw....' tia ngaihtuahna hmangte pawh an awm chawk.

Tuk khat chu Human Rights & Law network director Vanramchhuangi (Ruatfela Nu) te inah hian chanchinbua chhuah tur Builuma an zuk kalna report leh thlalak laa ka kal a, chumi tum chuan tuk tina ka hmuh thin chawhmeh zuarnu chu a lo thu ve reng tih ka hmu ta!

"Ka fanu min hralhsak a, tih ngaihna ka hre si lo a, Ruatfela Nu te tanpuina hi ka dil thin..." tia a lo sawi atang chuan hriat belh chakna thinlung lian tak a lo piang ta.

Ni tina inhmuh chuan chanchin inzawh zauh zauh chang a awm.

"Chanchinthar in nei em? Beiseina thar a awm em?" tiin.

Ani chuan, "Aaa..... engmah thil thar kan la hre lo, kei hi thil hi ka hre si lo a..." tiin a hriat tlemna avanga 'complex' a ngahzia a lang fo.

A fanu kum 16 mi chu vaiin an hralhsak niin a sawi a, chu zawng chu ka hriat theih chin chu a ni.

Hun te a lo liam zel a, he nu chanchin hriat chian chakna lian tak hi thinlungah a lo piang chho ta zel a, chanchinbu lama ka thawhpuite lah chuan, "Hmanah pawh an buai chiam tawh kha, chanchin an nei chiam tawh alawm..." an lo ti mai a, chu chuan hriat belh chakna min pe lian ta zel mai.

Ni tina chawhmeh zuara an la inpho ziah avang chuan a fanu chu a la hmu lo tih a chiang a, hmu chu ni se an inpho chhunzawm ka ring lo.

Hreh ang reng tak chungin ka be ta a, ani chuan tihian a lo sawi a...

"Kum thum vel liam ta khan ka fanu kum 16 mi hi Burma rama kan awm laiin a ni bulah a awm a, a ni bula a awm hi Mizo, Burma mi leh hnam dang inthurualin an hralh niin an sawi a, thil hi ka hre tam lo a..." tiin an hralh dan chiah pawh ziktluak taka a hriat thiam phak loh thu a sawi.

Mizo nu mawlmang tak a ni a, thil a sawi pawhin sawi thui dan a hre thiam chiah lo.

Hnam dang pakhat hi vai niin a hria a, Mizo tel vete hi hmeichhia an ni tih erawh a sawi thung. Chutia a fanu a hloh takah chuan theihtawp chhuaha zawnchhuah tumin Aizawl a rawn pan a, a rawn inbengbel lailawk ta rih a.

Kum hnih vel liam ta khan Aizawl veng pakhatah a fanu chu a hmu niin a sawi a, mahse lakchhuah tumtu zawk chu, "Burma mi, kan man tir dawn che u..." tiin an lo vau niin a sawi. An vau avangin a tlanchhe lamah a tang a, engmah hriat a neih thui loh avangin an hneh zel niin a lang ber.

Chutia a fanu a hmuha lakchhuah tuma a beih vel lai chuan Salvation Army lam te pawh a rawn a, Human Rights & Law Network lam tanpuina a hmu bawk. Police hnenah te an hriattir tawh a, mahse an hmalak dan kimchang a sawi thiam lo.

"A lakchhuah nan pawisa a ngai dawn an ti a, chawhmeh zuarin ka intuak ve a, tunah chuan a pawisa hi chu ka khawl ngah tawh," a ti.

Ni tina a chawhmeh zawrh atangin a mamawh zat tur chu a khawl ngah tawh a, tunah chuan a fanu hawpui turin a inpeih tawh, mahse a fanu chin a hre thei si lo.

Aizawlah te hian mipui zingah a hmel hmuh a beisei thin a, a thlir a thlir thin, a thlir nasa a, mahse a fanu hmel ang reng reng a hmu zo lo, a fapa erawhin, "Ka u ang deuh hmai bial lam ka hmu, vai nen an inzui..." a ti.

He hmeichhia an hralh hi vaiin nupui atan an nei niin a nu chuan a hria a, tunah hian kum 19 mi vel chu a ni ve tawh a ti. A thi nge a dam tih a hre lo a, kum thum an inhmu tawh lo, fa pathum a nei a, a fanu upa ber a chan mai tur hi a phal lo. A fanu hmu let leh tur hian a theihna zawng zawng a seng a, a beisei phak ngai lohin Aizawlah nun a hman phah a, mahse a la hlawhtling lo, a hlawhtlin a hnekin a fanu hmel hi kum hnih chuang a hmu tawh lo a, a chanchin a hre hek lo. Chuti chung chuan a fanu tel lo chuan an khaw lama haw a tum lo thung.

"Ka fanu tel lo chuan ka haw thei tlat si lo a, a hrehawm hi ka ti tak tak a ni," a ti. Engtianga hma lak chhunzawm tur nge a nih a hre lo.

"Ruatfela Nu te ka rawn a, thil hi ka rin aiin a kal muang em em mai a, ka hrethiam ve phak si lo," tiin a sawi thin, a hriatthiam ve phak mai loh avang hian, "ka hrethiam ve lo," tih tawngkam hi a hmang nasa hle nghe nghe.

Tunah hian he nu leh a fapa hian beidawng hauh lovin Zarkawt traffic point lam atanga Dawrpui vengthar panthlakna lamah hian nitin chawhmeh an la zuar, he mite pahnih hian nitina chawhmeh an la zawrh chhung chuan an fanu bo chu an la hmu lo tihna a ni ang. Mahse haw bik an tum lo.

Related Posts :