Sports in the City

¢ Joseph Lalrintluanga

1st Inter-school Basketball Championships

Mizoram Basketball Association (MBBA) buatsaih Inter-school Basketball Tournament, sikul leh sikul basketball-a inelna hmasa ber chu kar kalta Zirtawpni khan Zarkawt Recreation Center-ah khelh zawh fel a ni ta. He Tournament hi tournament lian tak mai a ni a, final pawh nikhatah pali zet khelh a ni. MBBA hian sorkar hmalak mekna Catch Them Young policy bawhzuina atan naupang exam chawlh chhung remchanga lain he tournament hi middle school tan, high school tan, Higher secondary school tan leh hmeichhe lam inelnan a buatsaih a ni.

Hmeichhe lamah bik hian team 4 chauh an chhuak a, chutah chuan Helen Lowry School ‘A’ team chu an chak ber a, final-ah hian an School B team an hneh a ni.

Middle school final hmuhnawm dangdai takah Gospel Centenary School chuan St Lawrence School chu 24-17 in an hneh a, he final match hi a hmuhnawm em em mai a, supporter an tamin court kiangah chuan ri thei chitin reng leh thuziak leh banner te nen naupang leh nu leh pate an ding khat tlat mai a. Chungho hmaah chuan naupang te tak te te an rawn che tek tek mai a, ball an thiam hlawmin an thun thei em em mai lehnghal a, khawvela basketball league lar ber USA-a NBA team turu tak takte tihdan angin hun pangngaiah an han inhnehtawk ve leh ta nghal a, Overtime an khel ngat a ni. Chumi hnuah chuan Aizawl chhimlama School lian leh lar Gospel Centenary naupangte chuan Aizawl nikang lama school nuam leh hmunhma nei tha St Lawrence School chu 24-17 in an hneh ta a ni.

Gospel Centenary player Lalliansanga leh St Lawrence player Zonunsanga te chu most promising player atan thlan an ni a, anni pahnih te reuh hian lawmman a hrang ve vein an dawng a ni.

High School inelnaah Aizawl West Academy an chungnung ber a, final ah hian RM High School chu 51-25 in an hneh a, RM hian a tir lamah hma hruai mahse second quarter atangin an inthlahdah deuh niin a lang a, phanchang zawk leh pumrua a lian deuh zawk Aizawl West Academy chuan Second half atang phei chuan an tlansan nasa hle a ni.

Providence School, Zarkawt leh Holistic Mission School, Republic veng ten Higher Secondary School final an khelh hi a hmuhnawm em em mai bawk a, player an nei tha dunin nakin lawka senior lam tournament ah pawh la langsar thei tur an nei niin a lang. Jump shot nalh tak takte leh dribbling nalh tak tak hmuh tur a awm a, chutihlaiin foul trouble in team pahnih a tibuai hma deuh a, hun engemawzat khelh tur a la awm laia player pawimawh foul out te pawh an awm nawk a, hetiang pumpelh tur hian fimkhur a tul tih team kaihruaituten an naute an lo hrilh hmaih te pawh a nia nge. Tichuan team pahnih tantu an zirlai pui bengchheng siam thiam tak engemawzat hmaah Providence School chu Holistic Mission School lakah hian 42-36 in an chak ta a ni.

Champions leh runners-up team te hnenah MBBA chuan Trophy leh Certificate a pe a, an scholarship dil theihna tur a pe tel bawk a, tournament a tel zawng zawng hnenah MBBA chuan thilpek a hlan vek bawk a ni. Lawmmante hi final a khuallian MJA President Pu K. Sapdanga leh MBBA President Dr N Pallai ten an sem a ni.

Mizoram State Wushu Championships
Mizoram Wushu Association buatsaih State Wushu championship vawi 18 na, Central YMA hall, tuikhuahtlanga khelh zawh takah chuan Tuithiang Wushu Club chu titha berin team champion an ni. ITI SSA Academy chu pahnihna an ni.

Lalmalsawma, Tuithiang Wushu club chu mipa lam fighter tha ber a ni a, hmeichhe lam fighter tha ber chu Lalngaihzuali, Dapchhuah Wushu club a ni thung.

He championship a\ang hian National Junior Wushu Championship a tel tur thlan nghal a ni a, heng mite hi Ramhlun Sports Complex-ah Association hotute chuan vawiin a\ang hian camp an neihpui nghal dawn nia hriat a ni.

National Junior Championship khel turte chu —
Hmeichhia :
Kg 45 hnuailama khel turin Lalnunsiami, Dapchhuah
Kg 48 hnuailama khel turin Lalbiakzuali, Kawrthah
Kg 52 hnuailama khel turin Lalchhanhimi, Tuithiang
Kg 56 hnuailama khel turin Lalbiakengi, Kulikawn
Kg 69 hnuailama khel turin TC Lalremruati, North Khawlek

Mipa :
Kg 48 hnuailama khel turin Lianchhuma, Vangtlang
Kg 52 hnuailama khel turin C. Lalrinmawia, Mission veng south
Kg 56 hnuailama khel turin Stephen Lalramzauhva, Mission vengthlang
Kg 60 hnuailama khel turin Vanlalmawia, Serkhan SSA
Kg 65 hnuailama khel turin Ramluahpuia, Mualpui
Kg 70 hnuailama khel turin Lalthlengliana, Tuithiang.


Independence Day Rifle Shooting Championships
Zaua Shooting Club buatsaih, Independence Day Rifle Shooting Championships chu Kulikawna Mizoram Rifle Association Shooting Gallery-ah hlawhtling takin kar kalta Inrinni khan neih a ni a. Hmeichhe lam inelnaah Blackhole Shooting club a mi Feline L Hrahsel chu pakhatna a ni leh a, Feline hian point 179 a hmu a ni. Point 178 hmua 2 na VL Awmpuii leh point 141 hmua 3 na ni ta Crystabel Hriatpuii te chu Regency Shooters a mi ve ve an ni thung.

Mipa lamah chuan Blackhole Shooting Club a mi Vanlalruata Hrahsel chu pakhatna niin point 152 a hmu a, 2 na Lalchawimawia, LAD Rifle Club, Lunglei chuan point 152 hmuin 3 na VL Chhanhima, Blackhole Shooting Club chuan point 138 a hmu bawk.

Mipa inelnaa pakhatna leh pahnihna te hian point 152 ve ve an hmu a, Vanlalruata Hrahsel hian bull’s eye (point 10) a kah fuh hnem zawk avangin champion a puan a ni ta a ni.

He shooting championship, nikhat awh inelnaah hian lawmman pakhatna latute hian Rs. 2500 an hlawh a, pahnihnain Rs. 1500 hlawhin pathumnain Rs. 1000 an hlawh bawk.

Related Posts :