Mizo Idol-ah thil thar

Kum khat dana neih thin tura ruahman Mizo Idol chu tunlai hian a vawi hnihna neih mek a ni a, a hmawr bawk a hnai ta. Tunah hian mi 20 chiah an awm tawh a ni.


Mizo Idol thlannaah hian Mizoram hmun hrang hrang atangin mi 800 chuang an tel a, tuna mi 20 te hian zai pawh an thiam tlang tawh a, intihsiak boruak pawh a tang chho tawh hle a ni.

Zonet Cable TV buatsaih Mizo Idol thlanna neih mekah hian thlirtu mipui tam tak chuan Idol thlanna hmasa ai khan zaithiam an tam zawk niin an sawi. Mizo Idol atana thlanchhuah ni phak ngat phei chu a hlu ngawt ang le.

Mizo Idol thlanna neih mekah hian kum danga tih ngai loh thil thar tam tak a awm. Idol thlanna hmasaah kha chuan prelimenary round-ah Mizo zaithiam hrang hrangte'n endikin, contestant-te chu hmun leh hmunah tling leh tla an puang nghal zel a. Tun tumah erawh chuan a tawp thlenga endik tura ruatte'n a bul atangin an endik nghal chu a fair lehzual hle nia sawi a ni.

Endiktute comment ringawt lo tuipui tawk pawh an awm nual a, he hi Idol thlanna tihlawhtling tute zinga pakhat pawh an ni awm e. Zaithiam nih tuma inzir mekte pawhin endiktute comment atang hian hlawkna tam tak an chhar phah a ni.

Mizoramah hian Youth Icon, Youth Idol, Zostar leh Lelte tih te thlangin hmun hrang hrangah zai intihsiak hi neih a ni thin a, heng zingah hian Mizo Idol hi thawm nei lian ber te zingah a sawi theih awm e. He intihsiakna neih mek hian a vawrtawp a thleng hnai tawh a, TV atanga lo thlirtu mipuite pawhin an ngaihven hle. Aizawl khawpui pawh Idol thlanna boruak hian an tuam leh mek niin a lang.

Mizo Idol intihsiakah mi 20 chiah an awm ta a, August ni 18, 19 leh 20 zanah Chanmari YMA Hall-ah intihsiakna hi neih chhunzawm leh tur a ni . August ni 21(Zirtawpni) zanah result puan a ni ang.

Mizo Ido Organising Committee te chuan kum hmasa lama an tih dan thenkhat her danglamin Top 20 chinte hian Mizorama an la tih ngai loh danin group leh mimalin an intihsiak dawn.

Top 20-a tling te hi group pasarihah then an ni a, group parukah mi pathum zel awmin group pakhatah mi pahnih an awm. Group-a intihsiak hi August ni 18 leh ni 20 zanah neih a ni ang a, hla pakhat ve ve an sa ang a, an hla sak tur hi Mizo Idol Organising Committee te chuan thlang fel tawhin zaithiamte hian hla an zir tan tawh a ni.

August ni 19 zanah hian anmahni hla duh ber an sa ang a, he hla bik hi chu anmahni music track nen an sa dawn a, an duhtawkin in lamah pawh an zir thei dawn a, musician-te tihbuai ngai miah loin anmahniin an inzir ang.

August ni 18 leh ni 20 zana group-a an hla sak tur hi chu musician-te nen an zir ve leh thung dawn a ni.

Group leh group an intihsiak dawn a ni lo a, group khata awmte hi an zavaiin an tla vek thei a, an tling vek thei bawk a, group khata awm si a then tlinga a thel tla an awm thei bawk. Zan thum chhunga an zai that dan hi endiktu lamin an lo teh dawn a, chuta titha ber 10-te chuan top 10 an lut dawn a ni.

Related Posts :