Happy Birthday - Good Bye

1991-ah Zorock album a siam a, chuta tang chuan Zo rimawi khawvelah a tlar hmaah a thu ta char char tiin Rosangliana dinhmun hi a sawi theih mai awm e.


August ni 10 zanah Vanapa Hall-ah concert a nei a, chu concert chu a piancham lawmna leh a concert hnuhnung ber tur a ni.

He concert hi mipuiin an hlut hle a, Vanapa Hall khat tlata inek beng mipuite chuan nuam an ti hle. A birthday lawm nan mipuiin 'Happy birthday to you' tih hla an sa a, tichuan, he hun atana Hmingliani Bakery buatsaih - Zorock birthday cake chu a zai ta a ni.

August ni 10, 1956-a piang Rosangliana hian hemi zana a birthday cake hi birthday cake a neih ve vawi khatna a ni a, a lawm thiam hle.

Concert entute hian Zorock tia hriat lar Rosangliana hi an ngaisang hle a, dawhsana a lan tirh phat atangin thawm a tha thin hle. An hmelah an ngaisang tak tak tih a hmuh theih. Tin, concert entute zingah mi puitling tak tak, zirna leh eizawnna lama mahni tawka 'kei ka ni' inti thei chin an tam viau bawk. Rui lo hai lova lam su nghawng nghawng an tam viau mai kha thil chhinchhiah tlak tak a ni ngei ang. 2007 kum tawpah khan Vanapa Hall-ah vek hian Zorock Tribute Concert neih a lo ni tawh a, chumi tum pawh chuan concert entute zinga mi puitling tak tak an thahnem viau tawh bawk. Chu'ng chuan mipui zingah Zorock hi a tla na hle tih a lantir awm e.

He concert-ah hian Mathlenga leh Hard Ray te an inlan bawk a, anni zai lai hian Zorock chu stage hnung lamah a hahchawl a, chutih lai chuan Zozam Weekly chuan a kawm thei hlauh. Lunglen chanchinbu-in 'Father of Mizo Rock Music' tia a lo chawimawi tawh Zorock titi chu hei le...

He concert hi nuam i ti em?
Nuam ti e, a hlimawm khawp mai.

Eng nge nuam i tih chhan ber?
Rin aiin ka lo la 'fit' a, hei rin aiin ka lo la zai thei daih mai a, Zorock ngainatute nena hetia hun han hmanho hi nuam ka ti a ni.

He concert hi i concert hnuhnung ber tur niin an sawi a...
Ni e, ka concert hnuhnung ber turah ka ngai, hei bak chu kan tih ka ring tawh lo.

I peih tawh lo em ni?
Peih tawh lo pawh a ni lo; kawng na ka nei a, ka tlin tak tak tawh lo ang tih ka ring. Kan lo upa ve ta deuh a, kawng na neih bawk nen, a boruak hi ka zo ta lo niin ka hria.

Concert nei tawh ngai lo turin i rilru i siam tihna em ni? Kohkir theih i ni ang em?
Aaa...ka kawng te hi a that chuan kan la ti leh mahna...

Music hrim hrim i chawlhsan dawn em? Zorock album a chhuak tawh ngai dawn lo tihna em ni?
Music chu chawlhsan dawn lo e, a theih ang angin kan la ti zel ang chu. Album te pawh siam leh ka la tum e.

Eng tikah nge album chu i peih ang?
A la rei deuh ang... tun hnai chu a ni lo ang. Hla te chu ka nei tawh a, amaherawhchu, thil han tih zung zung hi a har a.

1991-ah Zorock album i siam a, a hit em em mai a, vawiin thlengin kha album-a i hlate kha a la lar a, hetiang hi i beisei dan a ni reng reng em?
Beisei lo. Hetiang ka beisei lo. Mahse, Mizo hla hi chu a nem lam chi a ni thin a, khatia rock music hmanga Mizo hla han neih kha chu ka phur khawp mai. Ka chak deuh zak chu a ni alawm, ti mai ang, Mizote hian rock hi kan duh a, chuvangin rock music hmanga album han siam kha chu kan chak ve deuh zak chu a nih kha.

A nih leh Zorock hmingin hei chen hi Zo rimawi khawvelah i tal ve ta a, i 'contribution'-ah i lungawi tawk em?
Titha ve tawk pawh ka inti chuang lo, ka tuina kha ka thiam ang angin ka sa ve a ni mai a. Amaherawhchu, fans te'n heti taka min lo ngaina ve hi chu ka lawm khawp mai. Nia, lungawi tawk te chu a awm thei lo a, duhtawk tak tak thu chu a awm lo.

Hla thu-ah hian 'poetical word' hmang lovin tawngkam tualleng te te i hmang thin a, a rem thlap zel mai bawk si a, hei hi i tum reng thil a ni em?
Ka tum reng thil pawh a ni chuang lo. Keini chu ram pawna seilian kan ni a, hna kan thawh ve hnu-ah pawh ram pawnah kan awm ta char char a, Mizo tawng te hi kan thiam lo khawp mai a. A tawng hrim hrim bakah hla thu te phei chu ka thiam lo em em mai a, ka thiam loh vangin tawngkam tualleng hi ka hmang ta ni ber zawkin ka hria.

Tawngkam tualleng te te hmanga hla phuah chu mi tih ngai loh deuh thil a ni a, a tirah miin an sawisel ang che tih i hlau em? Chuti lo zawng pawhin, a ti hmasa i nih avangin hriat reng hlawh theihna thil te a ni a, experiment-ah i ngai em?
Ka sawi tawh ang kha a ni a, hla thu te ka thiam loh vanga hetia tawngkam pangngai hmang thin ka ni a, ka thiam ang tawka ka tih ve a ni a, mi min sawisel tur leh tur loh pawh ka ngaihtuah chuang lo. Tin, experiment ang zawng pawh khan ka lo ngaihtuah chuang lo a, hla ka phuah a ni ve tawp mai a.
A nih leh i hlate hi 'hit' tura i rinte a 'hit' thin reng reng em? A nih loh pawhin 'hit' lo tura i rin, 'hit' ta viau si te a awm em?

Chutiang chu sawi tur a awm ve nual. 'Hit' vak tura ka ngaih loh te hi a lo 'hit' viau a, ka hrethiam chiah lo. Entirnan - 'Zoram ngaih hla' te hi hetiang a nih ka ring lo reng reng a, mahse, ka beisei phak bakin mi hian an lo ngaina a. Mizo Idol thlannaah te an lo sa kha ka lawm khawp mai. Tin, hla dang pawh 'hit' tura ka beisei lem loh, mahse 'hit' ta zek si a awm nual.

'Zoram ngaih hla' i sawichhuah takah chuan, he hla hi i rilru tak taka i phuah a nih hmel a...
Ram pawn atanga ka phuah a ni a, kei chu Zoram hi ka ngai em em mai a, a awm tlem ber hian ka ngai ber emaw tih tur khawp hi a ni a! Chuvangin, rilru tak taka phuah ti chuan a sawi theih ang chu.

Zoram i ngaih chuan a eng lai hi nge i ngaih ber?
Sawi tur a tam duh khawp ang a, kei hi kum 7 mi lek ka nih laiin Mizoram ka chhuahsan a, ka lo haw leh hnuah ka chhungte kha Manipur-ah an lo pem daih a, Manipur lamah te ka'n khawsa leh a, chumi hnu-ah hna vangin ram pawnah bawk ka awm leh a. Mahse, kan naupan lai atangin kan duhthusam thil reng rengte hi Mizoram thil vel vek hi a ni mai a. Mahni ram a ni a, ngaih loh thu a awm lo, ram pawna awm midangte pawhin an ngai a, tin, hnam dangte pawhin mahni ram chu an ngai alawm.

A mala han sawi dawn chuan... kan society hi ka ngai a ni ber ang chu. Kan la inrual tlang pet pet a, milian leh miretheite pawh kan la inrual tlang deuh a... ti ila, tun hnaiah hian kan lo inrual ta lo deuh ti te'n an sawi thin a. Ka thian pakhat, amah chu Bengali a ni a, chu mi chuan 'in la tlem a, in la inrual a nih hi' te min ti a! Engpawhnise, officer leh vantlang te hi kan la inhnaih. Mahse, tunah hi chuan kan inthlau ta deuh ni chuan ka hria.

A nih leh Mizoram hian music-ah hma a sawn em?
Hma sawn e. Mahse, live music hi chu a tlahniam a, hei hi pawi ka ti.

Chhungkhat pain love song te i phuah a, i nupuiin engtin nge a ngaih?
Love song ka phuah a, mahse, ka va ngaizawng e tihna a ni hlei nem. Kan inngaizawng lo a, tumah thik tur an awm lo.

Mahse, nu ber tan chuan a hrehawm deuh lo'ng maw?
Hrehawm pawh ka hre lo a...hahaha! Kan nu hi a fel khawp a, engmah a sawi lo, a ngaithla a, tui deuhin a ngaithla a, tui deuhin kan ngaithla dun a ni mai ang chu. Kan hlim dun.

A nih leh Zorock hi pa lungleng thei tak a ni em?
Lungleng han tihah chuan, ka chhungte hnen atang te hian ka awmbo ngai lo a, kan khawsaho vek a, album siama ka zinchhuah zauh zauh chang te hi kan inawmbosan lai chu a ni mai a, chuvangin, lunglenna chhan tur ka nei lo ti mai teh ang.

Mahse, ka chhungte hi ka ngai em em thung a, kan nu te hi ka ngai em em mai a, in-ah chuan ka zui ka zui a, a kalna apiangah ka zui zel mai thin a, min ning hial thin mawle!!!

Related Posts :