Media leh kan infiamna khawvel

¢ Hmingsanga

Ni tin chhuak chanchinbu han keu la, a phek hnung lam zawng chu infiamna huangin a luah khat deuh zel ang a. Zanah Local TV i thlir chuan infiamna chanchin thar hmuh leh ngaihthlak tur i nei bawk ang. Hetah tang ringawt pawh hian tunlai Mizo society-ah infiamna leh a khaihnawih thil te hian hmun pawimawh tak a chang tih chu a chiang mai awm e.

Pathianni-a Sunday School kalkawngah te, hnatlan leh thlanlaihna hmunah te, tlangval leh rawlthar rual tam tak te titi tui ber chu infiamna leh a kaihnawih lam thil a ni. Sorkar office-ah pawh hunawl leh remchangah he'ng thu te hi titi tui ber pawl a tling phak a. He'ng zawng zawng hi media thiltihtheihna tunlai thalaite zinga langchhuak langsar ber chu a ni awm e. A nghawng hi a naran lo teh asin.

Thingtlangah pawh kal la, infiamna lam chanchin hre thui leh hre thuk deuh i nih chuan i mikhual miah lo ang. Mizoram pawnah pawh infiamna lam ngaihventu i nih chuan titi pui tur i haihchham hek lo ang. Heng hi tunlai Mizo society-a thil bet tlat a nih tawh. Infiamna khawvel leh a kaihnawih, print media leh visual media hmanga kan hnena rawn thlentute hian khawpui chhhung leh pawna mite thlir miah loin nitin zan tin min hlui a. He thil avanga hlet a chhuahna langsar ber chu football-ah hian a ni awm e.

Mizorama football fans te hian an tan zawng an tan na hle; chanchinbu leh TV lama sms-ah pawh "Arsenal an chak dawn" an ti ngai lo, "Arsenal kan chak dawn" an ti zawk thin. EPL club-a team manager te hi Mizoram a fans ruh deuh te intite chuan "Kan pu" tiin an sawi mai thin. An khawvelah kan lut nge kan khawvelah kan lalut tih a hriat ta lo!

Mizo naupangte'n kan chhenna India ram footballer te leh Mizo footballer te kan hriat mumal loh laiin sap footballer-te erawh an kan hre hle a, Mizo naupangte hi state pawna khel chhiar tel awih lohvin Mizo footballer hming 10 tal sawi turin ti ila, sawi thei an awm kher lo ang. Chutih laiin EPL club larho, a bikin top 4 kan tih te player-te erawh an sawichhuak thei fur ang a, star tling lem lo hming thlengin an sawi thei ang. European football club neitu emaw inti khawpa khawvela tlangnel kan ngah ta hle.

Football hi chu kan lawm hrim hrim a, media power-in min luhchilh ta bawk nen, kan ngaihsan zawngte chanchin kan hre bel ta hle a, hei hi football-ah pawh a lang a ni ti ila kan sawi sual awm lo e. Ni tin chanchinbu lam leh TV lamah te European football hian hmun a luah nasa a, chu chu thalaite'n ngaihnawm an ti hle a ni. Min chiah hneh em a, kan rilru a luah ta a ni tiin a sawi theih awm e.

Hriat theih chinah Mizoramah European football club palite'n fan club an nei ta. Manchester United, Arsenal, Chelsea leh Liverpool te fan club a awm tawh a, Manchester United leh Liverpool fan club te hi a changtlung deuhte chu an ni awm e. Manchester United Sopporters Association chu Manchester United fans te'n an bawh hle a, kawng hrang hrangin hma pawh an la nasa hle. Charity lamah pawh tha an thawh ve nual nghe nghe. Chumi hnu lawkah Liverpool Fan Club, Mizoram a piang leh a, chu pawh chu mahni tawka kei ka ni inti ngam tur ngatte din a ni.

He pawl pahnih hian member an ngah chak hle a, hmeichhia pawhin an bawh ve hle nghe nghe. English Premier League big four club Manchester United, Chelsea, Liverpool leh Arsenal te hian fan club an nei vek a, member pawh an ngah hlawm hle. He'ng fan club hrang hrangah hian mi langsar tak tak pawh an tel nawk mai.

Liverpool Fan Club-a hruaitu Francis Paul chuan Steven Gerrard hming chawiin a fapa hmingah pawh Gerrard tih a phuah hial a, chutiang bawkin Liverpool fan ruhkawl, Lawma Enfield neitu RCh-a chuan Liverpool player Fernado Torres a ngaisang bawk a ni ang, a fapa hmingah Fernando Lallawmsanga tiin a phuah nghe nghe.

Universal Games tia sawi, football tia kan hriat leh sawi tthin zet hi zawng a zun leng ngaih a na a ni ang e, kan milarte rengin an tuipui mai!

Mihausa leh mirethei te zai khata luan khawm tirtu a ni a, an tan zawng club pakhat vangin huang khatah hausa leh rethei an nui tlang hawk hawk fo. An chak loh vanga an mittui a far chang pawhin 'tahna' ruam khat an zawh thin niin a lang. Milar an ni emaw, zaithiam leh lemchan thiam an ni emaw, khawvelin a hmelhriat mi tam tak hi football zunah an uai nasa hle.

Kum nga kum ruk vel kal ta thleng kha chuan ram dangah lirnghing vang emawa tanpui ngai an awm pawhin he ram hian chet ve tul a ti ngai lem lo. Chu chu rilru chhiat vang ni lovin, midang chetna tur, an chet ve phak lohna nia an hriat vang ni zawkin a lang. Tunah erawh globalisation khawvelin he ram hi a tuam ve tawh a, football ngaihsanna rama mipuite hian European football an en pawhin mi inkhel en lovin mahni pawlte inkhel an en ta!

Kum sawm chuang kal ta khan Lammual-ah football avangin mipui tam tak an kalkhawm thin a. Khatih lai khan mipui nawlpui chuan sap footballer te hming hi kan hre tam lo viau mai. Mizo tlangval leh Mizo tlangval, chirhdiak leh diak loah thapui meuh thawha an inkhel lai kha hmuhnawm ti takin kan thlir thin kha a ni a. A hunlai khan tun angin media lamah hma kan la sawn lo. Tlangkam titi-a kan hriat te, a hmuna inkhel en te titi atanga kan hriat chu inhrilh pung zelin, Lammual-ah mipui sang chuang kan pungkhawm thin a nih kha.

Khatih hunlai kha Mizorama football vanglai tia kan sawi fo thin a ni a. Ni tin chanchinbu-ah Mizo Aw atangin inkhel result tawi kim ang reng deuhin chhiar tur kan nei zeuh zeuh a. Kar tin chanchinbu-ah Zoeng chuan a theih ang tawkin a rawn zep tel bawk a. Khang te kha kan chhiar tur neih chhun a ni deuh mai. Chumi hnuah ni tin chanchinbu Vanglaini chuan European football chanchin thar leh football kaihnawih chanchin chu Mamuana "Soccer Mania" huangah kan nei cho ta bawk. Tualchhung chanchinbu-a ni tina hetiang lam chanchin ziakna regular tak kan neih hmasak ber pawh a ni awm e.

Hun a kal a, mihringin hma kan sawn a. Media pawh nasa takin hma a sawn a. kum 2003-a Mizoram in U-16 National Football Champioship-a a vawi khatna atana Mizoram a champion tum pawh khan player-te that vang a nih rualin, tualchhhung media te thawhrah pakhat a ni pawh ti ila a dik awm e. Print media leh visual media te'n theihtawpin Mizo mipuite min fuih a. Anmahni avangin inkhel entu tam zawkin kawr sen kan ha a, au hla min phuahsak a, kan ngaihsan sap rama football entu te tih dan kan thiam tawka entawn chungin Mizoram team kha kan au champion ta hial a ni ti ila thu kan uar em?

Tunhnai deuh khan Mizoram Cable TV Operator lian ber LPS chuan LPS Pro fight tia a hming vuahin Zoram chhunga a tum khatna atan boxing hmanga intihsiakna a buatsaih a. A tir phat atangin lawm a hlawh nghal hle. Mipui bengverh leh mit titlai thei tura duan a nih piah lamah mumal leh awmze nei taka kalpui a nih avangin lawm a hlawh hle a nih kha. A hun lai kha chuan tlai dar 2 a rik tawh chuan mit-in television lam a hawi ruai ruai a, zan dar 8 a rik tawh chuan eng thil emaw takin min mawlh sek thin! Mizorama infiamna lam hawi TV show hmasa ber LPS Promotional Fight khelhna hmun Contact Sports Centre lam kan pan hum hum a. A hmuna kal thei lo pawhin TV atang talin 'hmuhnawm' chu kan lo thlir a nih kha.

LPS Pro Fight-a tel boxer-te hming chu naupang te te pawhin an sawi thei a. Boxer chetha deuh nei veng leh khua te phei chu mi pakhat avangin a khaw pum/ veng pum huapin an ri luai luai a nih ber kha maw. Khua/veng-a information centre atangin LPS Pro Fight avang ringawt pawh khan inauhkhawm a awm zing hle a ni.

LPS Pro Fight a zawh meuh chuan nu leh pa tam tak te chu naupang bun tawk boxing gloves zawngin Aizawl khawpui chhunga sports bungraw zawrhna dawrah an tlan sup sup a. Sports Goods zuarte chauh zawrh tur emaw kan tih boxing gloves chu dawr hrang hrangah lei tur a awm ta fur mai. Sports Goods zuar te chauh ni lo dawr dangah zawrh a ni ve chung khan mipui mamawh a phurhur zo meuh lo chu a ni. Tun thleng hian sports goods zuartute bungraw hralh hnem ber chu boxing gloves hi a la ni awm e.

Related Posts :