Media leh Fiamthu

¢ Stephen Auhmun

Kan naupan lai chuan 'han ti ve khanglang ila' tiin mi thenkhat chuan inthlahrung ang reng takin an sawi thin a, kei chu ka inthlahrung lem lo. Huaisen leh tumah zahpah nei lem lovin he tawngkam - 'kan naupan lai chuan' tih hi ka thu bul tan nan ka hmang dawn a ni. Fapa nei tur hian naupang a nih theih tawh tlat lo! Tlat lo mai a!

Tan ang.

Kan naupan lai chuan Thangkura Drama Party kha an va han lar thei hmiah hmiah tak. 'Chhiahhlawh chhaw' khan bul an tan ni khan ka hria a, a cassette mai bakah a video cassette te pawh khan a awmin ka hria. A video-ah phei chuan sakhi (sazuk emawni?) te pawh a lang.

Anni Thangkura te kha hun rei tak chhung chu mumal taka Mizo mipui min nuihtirtu an ni a, drama album pawh kha an 'release' nual reng a nih kha. |awngkam dangdai fe fe pawh an ching chhuak hnem narawh. Tun hnu thleng pawha lar zui Ka Pa Mawia hi; Deficit; Kher ve e; Chhingmami etc kan hriat hlawm theuh hi.

Mi pathum emaw lek khan drama hlawhtling zet zet an siamchhuak a, kei pawhin an fiamthu lemchan kha Vanapa Hall-ah ka en ve. An va han indaihlo thin tak. Hun a her zel a, Thangkura paw'n zawngte te a neih belh ta vel a nih kha.

Thangkura te hunlai tho hian mimal fiamthu thiam tak tak hming pawh a lan nual kha. Kan hre nual hlawm awm e C Lianmawia leh H Zoliana te thiandun te; Fiamthu Kutpui-a C.Vanlalduha, Dusty-a, Laltuvela etc te fiamthu cassette te kha. Tun an haw em lo ang a, H.Zoliana cassette-a '|hianpaaaaa..... eeeeiiihhh....ina hruizen kha han la la min rawn khai chhuak rawh' te kha tun nge theihnghilh thei ang? 'Touh pe ta ti toh pe pe ti loh la la ti toh pe. Touh pe ta ti touh pe, lau pau li ti ouh pouh pa solfa te kha! Lai-kai-rawk in a tawp a nih ngei kha.

Khang hunlai khan Mizoramah media a la chak lo hle mai. Kum 1990 hmalam kha a ni hlawm a, kan naupanlai a la ni na a, eng engemaw kha chu kan hre ve rual tawh. Cable TV a la awm lo a, TV nei pawh an tam lo. TV programme kan en ve thin pawh kha Doordarshan ni lovin India a ni tawpin ka hria. Bangla man an awm nual bawk a. Khang hunlai khan zaimite ang deuh bawkin fiamthu thiamte tan khan inphochhuahna remchang a lo vang thin awm ngawt mai. Thangkura te leh H Zoliana te khan casette an siam a ni mai a, chanchinbu-ah te khan hetiang lam hawi a chhuah vak pawh ka hre lo, Mizo Arsi, Romei, Zoeng, Sakeibaknei tih velah khan.

Thangkura te kha an daih rei hle mai a, anni bak kha chu mumal taka chhum lo chat lova fiamthu khawvela inlan rei an awm lem lo niin ka hria.

Chutia Thangkura te kawp ten an mal len ngawk ngawk laiin Tuarpuii te an rawn lang hlawl mai! |awng mawi lo ni suh sela, anni Leikhi Miss khan Thangkura te chauh awm reng mai kha duhthlan tur dang min rawn siam niin a lang. Cable TV rawn hmang tangkai hmasatu an ni bawkin ka hria.

Ka hriatsual loh chuan khatih laia Luangliam Superstar, LPS Nonnie kan tih mai thin Nu Mali ngei mai khan Tuari leh Suna te kha a interview ka en fuh tlatin ka hria ka ti. Khatia Nu Mali a rawn lar tirh khan tuna emo tam zawk hi an la piang awm hlawm lo e.

Ka hriat ve phak chinah sawi ta ila, Cable TV, internet leh mobile phone kan neih hma khan kan fiamthu thiamte leh fiamthu hrim hrim khan a hawlh thui tehchiam lo, Thangkura te tih loh. Thlan laih nikhua leh khawhar in kha local comedian te in-show-na hmun a ni deuh mai a, veng tinin kan neih fiamthu thiam te tan khan an thiam lantirna hmun a awm meuh lo.

Cable TV a rawn lang a, chuti chungin fiamthu leh nuihzatthlak lam thil a rawn keng tel tam tehchiam rih lo. Ti deuh dawrh ila, Zephyr Drama an rawn lang hlawl mai! Ramhlun Sports Complex-ah KTP Khawmpui lian a awm a, Dawrpui Vengthar Bial KTP aiawha Mapuia te'n drama an rawn chang zet chuan Mizoram a dengchhuak hneh hle. Cable TV awm lo se chu kha drama kha a hmuna en ten an sawi luih luih anga, khawmpui tiak ruala ral ve nghal mai tur a ni. Mahse, cable TV vangin a chhuah nawn awn awn theih ta tlat. Rotluanga leh a team ten an lar phah a, tun thlengin fiamthu team tha tak an ding ta reng mai a nih hi.

Kei takngial pawh fiamthu ngaina hlek lo ni mah ila Cable TV vangin fiamthu lam mi nia ngaih ka ni ta ringawt mai. Skylinks-ah UANG HUANG kan ti e, kan ti a, mi fiamthu rawn thawn khawm sa kha kan lo chhiar a, kan nui vak vak ringawt a, thil har pakhatmah zuk awm hauh lo a! Fiamthu thiam te kha a ngai lo reng reng.

Kan Zephyr Rotluanga bawk hian media hmasawnna chu a chhawr thiam ka ti. Zonet Cable TV kaltlangin Look Alike programme a buatsaih a, kha pawh kha a nihna takah chuan fiamthu huanga khung chi a ni. Chutah LPS-ah a thiante nen Comedian Search an ti leh a, a hlawhtling leh em em bawk. Kha'ng programme avang te khan K.Lalngaizuala te, Bematuale te, Freddy Mercury niawm tak te, TBC-a tam deuh te, Chhara te, Chhana te, Roluaha te kan hriat phah a nih hlawm hi. Tin, C.Vanlalduha (a thi bo ta emaw ka tih) kan hmu leh nawlh bawk. A Fiamthu Huang reng hi a hlawhtling mai.

A chhiara chhiar chi fiamthu pawh kha kan nei nual na a, sawi hat khawpa lar kha a awm meuh lo emawni chu a tih theih. HV Publications, Albany cyclo printer etc velin cowboy bu an chhuah thin lai khan cyclostyle fiamthu bu kha a awm ve zeuh zeuh. Sudden Muanga bu te pawh kha engemawchen chu fiamthu huangah a seng luh theih mai thei e.

Sabereka Khuangkaih chanchinbu kha a lar vanglaiin 'Nui takin mangtha ule' tih huang a awm ve reng thin tak kha.

Hemi chungchang sawi dawn chuan kan pu PL Liandinga hi sawilan a tul. Tunhnaia "Fiamthu Ngeiawm" bu a siam hma daih tawh hian hmanah "Fiamthu Daihzai" bu a siam tawh. A hrim hrimin a lehkhabu lehlin duhzawng pawh a hlimawm lam Tom Sawyer tih te kha ania. A thuziak thin tlangpui pawh hlimawm tak a ni deuh zel. Anni thianho hi hetiang lam hawia thuziak chi an ni deuhin ka hre bawk. Chutiang bawkin Mafaa thuziakah pawh a sap tawng takin humour a tam.

Mizote fiamthu khawvelah chuan mobile phone aia nghawng na hi a awm ang em aw ka ti thin. Hnam dang pawh an ni ve thovin ka ring. Sawi tawh angin kei ngei pawh fiamthu thiam ni tlata min min hriatna chhan chu SMS vang a ni tlat. Mipui hmaah fiamthu thawh tura min sawm hian tluang takin ka la hlawhchham ziah. Marawhchu Uang Huang kan tih thin lai khan mi SMS rawn thawn khawm ka chhiar a, thiam tehchiam ngai heklo- kan nui nghek nghek ringawt a, ho tak a ni.

He SMS hian kan chanchinbute pawh thuchhuah tur a pe hnem awm ngawtin ka hria. Tunah chuan chanchinbu tam tak, a bikin a kar-bi/thla-bi a chhuak thin ten regular takin fiamthu huang an nei thei a, mahni'n ngaihtuah buai ngai hauh lovin SMS hmangin an lakhawm mai a nih hi! Zozam Weekly ngei pawh hi en ila.

Kan thlakip chanchinbu lar ber pawl Lengzem te hi en ila, thupui fun tam tak kara an huang thenkhat hi chu chhiartute thawhkhawm SMS a ni hlawm a, chutiang bawkin chanchinbu dangte pawh. A chhiar thin chuan kan hria anga, Aizawl Post '|halaite Uang' leh Aizawl Thupuan 'Ha! Ha!' te hi chhiar hmasakah kan neih fo mai a nih hi.

Chanchinbu chu dahtha rih ang.

Research leh survey engmah ka ti hauh lo na a, Mizo thalai zinga a tam zawk hi chuan kan mobile phone hi SMS fiamthu thawn darh nan kan hmang rim berin ka ring. He thu ka ziahlai mek pawh hian SMS ka dawng a, 940037 atangin a ni nghe nghe a, a nuihzatthlak em em mai. Mahse chanchinbu meuhva chhuahchhawn atan chuan ka zak deuh e tih mai a ni.

Mobile phone hian SMS hi keng tel lo se chu kan thiante hnenah fiamthu tha deuh kan hriat thar hrilh tura kan phone kher peih ka ring lem lo.

Fiamthu tha zet kan han ngaihtuah chhuak a, tu emaw kan han thawn a, a hnu rei vak lovah kha kan fiamthu phuah liau liau kha mi dang daih hnen atangin kan han dawng leh ngei a, a lawmawm nge lawmawm lo ka hrethiam chiah lo. Anmahni ngaihtuah chhuah niawm takin min la rawn hrilh ve zui. A nih loh leh an han 'modify' hlek bawk a. Kan bula miten midang hnen atangin an han dawng a, nuih za zet chunga min han chhiar rik khum hian engtia awm tur nge ka la hrethiam chiah lo bawk. Ka hre tawh! Keima phuah a nih kha ti ngawt ila, a finfiah tak tak theih tawh siloh.

Tichuan fiamthu tha tak tak, tharlam tak tak leh a hunlai mil tak tak te chu kan lo inkharchhawn sak a, kan lo thehdarh ta chuai chuai mai a nih chu. Copyright a sawi theih tawh loh a, ta ta a awm thei tawh hek lo. Lungawi taka mahni fiamthu nuihpui a fuh ber a nih ber awm chu maw.

Hetia vawi leh khata media lama kan thang thut mai hi kan thatpui ang nge kan chhiatpui ang tih chu mithiamten chhang se; fiamthu khawvelah erawh a nghawng hi a tha lam niin ka ngai. Audio cassette media hmangin Thangkura drama party ten engemawchenah sum an lakluh theih phah a, chutiangin Cable TV vangin Rotluanga ten an nih phakloh tur an ni a, kei pawh inchhiar tel ta bawk ila. SMS fiamthu chhawrtu phei chu thalai zawng zawng deuhthaw leh thalai ni tawh lo tlem azawng kan ni bawk e.

Lunglei lama kan thianpa pakhat, amah chu media lama inhmang ve tho a ni a, zu chi hrang hrang hi in theih loh pakhatmah a nei lo, Whiskey, Rum, Gin, Vodka, Scotch, Dagon, local leh grep wine thlengin. Chuvangin amah hrim hrim hi Multimedia a ni e, an ti. Hei pawh SMS-a ka dawn bawk.

Related Posts :