Landmarks of Indian Football

¢ C Chawngthansanga

Football-in hmun sang tak a channa khawvel-ah kan cheng mek a, kan ram, India ai pawha kan ngaihven leh kan buaipui te chu EPL, Champions League, Spanish League te an ni daih ta mai. Hetih lai hian India Football pawhin hmasawn ve zel in, Indian ram a club leh club inelna sang ber I League-ah pawh kan Mizo Players hmelhmuh tur kan nei ve tawh a. Anni bakah hian Mizo footballer 50 chuanglai chuan India ram Club lian hrang hrang-ah khelna an hmuta. Hei vang hian EPL, Champions League etc. te kan hriat bel tluk zet a, kan ram India Football chanchin kan hriatbel a ngai ve tawh a, a pawimawh tulh tulh dawn a. Football a tui mite leh player te tan ka thiam ang tawkin Landmarks Of Indian Football hi kan thai lang ve dawn a, tun tumah hi chuan (Kum pawimawh leh chhinchhiah tlak zual chauh kan tarlang dawn a ni)

1888 : India football chanchina thil chhinchhiahtlak hmasa ber chu kum 1888 a Sir Motimer Durand, Foreig Executive Councillor to the Viceroy in British sipai te tana intih hlim nan Durand Cup buatsaihin hei hi India rama Football tournament kan neih hmasak ber a ni a. India ram leh Asia ram tournament upa ber leh khawvel a tournament upa ber 3-na a lo ni ta a ni. Kum 1924 ah Mohun Bagan(Calcutta) chu civillian club India atanga team tel hmasa ber niin semi final an thleng.

1893 : Sumdawnna avanga Europe atanga lo kal tam tak ten kum 1874 khan Kolkatta ah in kulhin Trades Club an lo din tawh a, hun a kal a Dalhausie AC te chuan in elna hrang hrang an lo hmachhawn chho ta a, tichuan Club Official te leh Nagendra Prasad Sarbadhikary of Sovabazar club te chuan 1892 khan Indian Football Association dinin hei hi Bengal football thuneitu a ni. A kum leh kum 1893 chuan vawiin ni thlenga an la khelh IFA Shield ropui tak mai chu neih tan a lo ni ta. He shield lian zet leh mawi tak mai siamtu chu Elkington, London te an ni.

1898 : Calcutta football league(CFL), Asia ram league upa ber chu IFA kal tlang a tan a ni, IFA hi India rama Sports Association hmasa ber leh khawchhak lama football Association hmasa ber a ni. Inkhel hmasa ber hi Dalhousie leh Rangers Club ren May 28,1898 khan Rangers Ground ah an khel. Mohammedan Sporting chu India team zingah champion hmasa ber niin kum 1934 khan he CFL hi an la. Mohun Bagan leh Aryans club te chu India Team zinga tel hmasa ber te an ni a, 1914 khan CFL ah hian telh an ni.

Kum 1954 atang chauhin Football boot hi bun ngei ngei tura tih a ni, a hma zawng chuan ke lawngin an khel a, khelh hun chhung pawh 1965 hmalam zawng 50mins,1966 atangin 70mins niin 1992 atangin 90mins hi hman chauh a ni.Live Radio commentary pek hmasak ber chu 1957 a Culcutta league, Mohun Bagan leh Rajasthan te in khelh laia pek chhuah a ni.He IFA league hi East Bengal ye chuan Vawi 31 champion ni tawhin an hmelma kumhlun Mohun Bagan ten vawi 26 an lo chawi tawh bawk.

1911 : India football chanchina hriat rengtlak thil awm pakhat chu 1911 a Mohun Bagan in IFA Shield a an Champion hi a ni. Ke lawng ngatin East Yorkshire Regiment 2-1 in an hneh.He hnehna hi 29 july 1911 a thleng niin, India team ten British sipai te lak a hnehna an chan vawikhat na niin mipui 80000 chuangin an en.

1937 : India ramah Football a lar zel theihna turin Jun23, 1937 khan Army Headquarter, Simla ah All India Football Federation chu din a ni.AIFF dintu te hi Indian Football Association(IFA) Bengal lam thu neitu, Army Sports Control Board, United Provinces, Bihar, North West India Football Association leh Delhi te an ni. Mr P Gupta leh Brandon te chuan he Federation tan hian dan thar an duang a, heng mite hi hruaitu thlan chhuah hmasak berte an ni :
President - Brigadier VHB Mejedine,DSO(ASCB).
Hon Secy.- Major A.C Wilson(ASCB)
Hon.Treasurer - Pankaj Gupta(IFA).

1941: India Football-a Senior in elna sang ber ni turin IFA chuan Santosh Trophy-a donate-a, hei hi IFA President hlui Maharaja Sir Manmatha Nath Chaudhury of Santosh hriatreng nan an hlan a ni. He Santosh Trophy hawnna ah hian Bengal chuan 5 – 1 in Delhi an hneh. He State inelna sang berah hian Bengal chuan Record an nei tha hle a, vawi 29 Champion in vawi 12 Runners Up an ni.

1948: India team-te hian 1930 hma lam khan hmun dangah an chhuak ngai lo va, Malaysia, Singapore, China leh Japan-te chuan an rawn tlawh thung a ni, 1948 London Olympic-hi India in Major International Tournament an khelh hmasak ber a ni. He Olympic-ah hian India chuan France lakah 1-2 in an tlawm a, amaherawhchu, an khel tha hle a, Penalty pawh vawi 2 lai an miss a ni. India team-te hi kelawnga an khelh a vangin London khawvawt tak hnuaiah hian an che thei lo, amaherawhchu in khelh tawp a nih chuan India team-te chu ding chunga kutbenga lawmin an thlah a ni.

1951: Asian Games-ah Gold Medal an la ve ta. India team chuan National Stadium New Delhi-a sak tharah kelawng ngatin Indonesia 3-0, Afghanistan 3-0 leh Final-ah Iran 1-0 in an hneh. He final hi India President, Dr. Rajendra Prasad leh Prime Minister Nehru ten an en a ni.

1954: India Independence hnu kum 1948 khan AIFF chuan FIFA chu zawmin FIFA hnuaiah Football lama thawh hlawk tak niin Asia leh ram chhung tan erawh chuan a thawh hlawk lo hle. Amarawhchu, Asian Football Confederation (AFC) 1954-a ram 8 dintu te zingah a tel ve a ni.

1956: India hian regular takin 1960 hma lam khan Olympic an lo khel thin a, 1956 Melbourne Olympic-ah phei chuan 6-na a hauh a ni. Semifinal-ah Yugoslavia lakah 1-0 in an chak lo a, he tournament ah vek Australia 4-2 a an hneh tum hian Centre forward Neville D. Souja chuan Hattrick-a siam a, hei hi Asian zinga Olympic-a hattrick siam hmasa ber a ni.

1962: 1962 Asian Games-ah chuan a vawi 2 na atan Gold Medal an la leh a, hei hi India football-a achievement ropui ber pawla sawi a ni. Jarnail Singh, India Defender tha chu a hnu 1965 leh 1966 Asian All Star 11 ah Captain a nip ha hial a ni. He Asian Games 1962 Jakarta a neih ah hian Football lama ram changkang ni tawh S. Korea an hneh a ni.

1970: India chuan 6th Asian Games Bangkok, 1970-a neih ah Bronze Medal an la.

1974: 1974 Asian Youth Football Championship (AFC U-20 Championship) ah Iran nen join champion an ni. India coach hi Olympian hlui M.A. Salaam leh Arun Gosh-te an ni.

1977: AIFF chuan uar zawkin ram chhungah tournament siam chho in knockout tournament hmasa ber Federation Cup chu 1977 khan ram chhunga Club liante inelna turin a buatsaih.

1982: AIFF chuan hma la zelin 1982 ah Jawahar Lal Nehru tournament chu a buatsaih tan. He tournament ah hian Uruguay, Argentina, USSR, Yugoslavia, Hungry leh Poland te chu ram lian atanga rawn tel an ni. Uruguay chu 1982-ah champion in champion hmasa ber an ni a, he team ah hian Enzo Frances Coly chu star player lar a ni. 1984 Argentina champion team-ah hian World Cup star Jorge Burruchaga leh Neri Pumpido te chu squad ah an tel. Tin, Poland team ah pawh World Cup star Euzebiusz Smolarek pawh a tel ve a ni.

1996-1997: FIFA chuan 1995, February khan Semi Professional Football League tan a nih theihna turin Member 3 awmna Committee a rawn tir a, 1996 ah chuan National League an lo tan ve thei ta a ni. He national league ah hian team 8 telin JCT chu team champion hmasa ber a ni.

Related Posts :