Independence Cup 2009 Tan A Ni Dawn Ta

¢ Hmingsanga

All Indian Football federation-in Mizoram football tournament a hriatpui kan neih chhun Independence Day Celebration Football Tournament 2009 (Independence Day Cup tia hriat lar) chu August ni 3 hian Lammual-ah khelh a ni leh dawn ta. Mizorama football tournament, tun thlenga khelh zingah chuan a upa ber a ni tawh a. Kum 1982 atanga khelh tan he tournament hi kum 1986 khan khelh a ni lo a, hemi kum tih loah chuan khelh ziah a ni.

Kum 2007 khan Independece Cup Silver Jubillee a nih avangin state pawn atangin he tournament khel tur hian ARC (Shillong) leh TRAU (Manipur) te sawm an ni a, ARC, Shilong te hi champion a ni nghe nghe a nih kha.

Kuminah hian kum danga tih thin angin, Mizoram Football Association chuan champion team te tan pawisa fai lawmman tha tawk tak buatsaih a tum. Heng bakah hian Top Scorer, Best Player te pawh lawmman pek ngei tumin hma a la mek.

Kuminah hian MFA-in Mizoram football tana hma a lak dan hi a lawmawm lam a ni zel a. Season tan tirh phat atangin Vodofone MFA League chu khelh tan a ni a. Tunah hian a thawh khatna khelh zawh a ni tawh. A thawh hnihna khelh leh hun tur hi la sawichian chiah awm lo mah se MFA lam chuan season tawp lama khelh chhunzawm an tinzawn deuh niin a lang. Vodofone MFA League thawh khatna chawlh lailawk laiin Independence Cup 2009 chu khelh tur a ni a, hei vang hian Ist div club te pawhin chawlh hahdamna hun an nei thei rih lo. Club hrang hrangte chu Independence Day Cup khel tur hian an inbuatsaih leh mek tawh a ni.

Independence Day Cup-ah hian MFA chuan registered player te chauh ni lovin club hrang hrang te chu palyer 5 theuh an duh a nih chuan team tichak turin reinforced (lak belh) phalsak an ni a. Kuminah hian Independence Cup-a champion hmasa ber 1st Bn MAP te chu an hmel kan hmu thei dawn lo a. Anni hi tarlan tawh thin angin hremna an tawh avangin II Div lamah an awm mek a. Kum 1998-a champion 3rd Bn MAP te pawh hrem an nih avangin an hmel kan hmu thei dawn lo bawk.

Independence Cup khelh tawhah khan champion nihna hauh ngun ber chu Ist Bn MAP te an ni a, vawi 27 khelh tawhah vawi 14 champion an ni tawh. Mizoram club club lar leh hlun ni reng thin Aizawl Football Club, AFC tia kan hriat larte leh PWD SC te hi vawi hnih ve ve champion an ni tawh a. Power Dept SC leh PHE SC te pawh vawi khat ve ve champion an ni tawh bawk. Heng bakah hian 3rd BN MAP, ARC, Shillong, FC Kulikawn, Dinthar FC, Vaivakawn FC leh Ramhlun S/C te chu vawi khat theuh an champion tawh bawk.

Champion tawh zingah tun thlenga club la awm te chu 1st Bn MAP, 3rd Bn MAP, FC Kulikawn, Dinthar FC, ARC. Shillong, te an ni. Vaivakawn FC te hi tunah hian divsion hniam lamah an awm. Ramhlun S/C te hi chu an awm tawh lo a ni awm e. Kum 2002 khan Ramhlun S/C te chuan mite rin loh takin final an lut a, final-a an khingpui MRP chu hnehin champion an rawn ni nawlh a nih kha. Kum 1996 khan mite rin loh deuhin Republic GSA te chuan final an rawn lut nawlh bawk. TBL khan kum 1997 khan final an lutin a vanduai zawkah an tang hlauh.

Goal thun tam zingah MAP lam hian an thawh hnem lawrlak a, player pasarih an thawh a, Police player, top scorer-te goal thun zat belhkhawm chu goal 33 a ni. Police player zingah Zohminga Zote chuan goal 9 thunin pakhatna a ni.

Independence Cup khelh tawh a goal thun hnun ber chu Lalchawiliana, Power Dept SC niin goal 23 thunin kum 1987 khan top scorer a ni. Goal thun tam chawimawina dawng zingah rau rau hian Lalringliana, PWD SC chu kum 1990 khan goal 3 thunin Top Scorer a ni ve tho mawle!

Top scorer ni thei zingah J.Lalmuanpui chu vawi thum top scorer ni thei awm chhun a ni. J.Lalmuanpuia hian 1993 khan PWD SC hminga khelin goal 6 a thun a, chumi hnuah 1995-ah PHE SC hminga khel lehin goal 6 bawk thunin top scorer a ni leh a, kum 1996-ah AFC tana khelin goal 5 thunin top scorer a ni leh bawk. Hetih lai hian top scorer nihna a kum zawna ni thei an awm bawk. Chung te chu - Zohming Zote (1982 &83), K Lalhmangaiha Power Dept SC (1991&92), Ari Benjamin LR Hmar 2000& 2001 ah te an ni. Joseph Lalsangzuala, MAP chu a kum zawn ni loin 1997&2003-ah te khan top scorer a lo ni tawh a ni. Foreign player zingah top scorer ni hmasa ber chu Uzoma Ejiaque (FC Kulikawn) chu kum 2008 khan goal 6 thunin he chawimawina hi hlan a ni.

Kum 1985 khan a vawi khatna leh a awm chhun ni turin Ist Bn MAP leh Power Dept SC te chu Independence Cup-ah joint holder ah puan an ni a. Kum 1997 khan Lalthansanga leh Joseph Lalsangzuala Ist Bn MAP te chu top scorer an ni a, hemi tum hian goal 7 ve ve an thun.

Final a inhnehna tam ber chu kum 1985 khan Ist Bn MAP te chuan an khingpui Combine XI chu 4- 0 a ni a. He margin bawk hian 1997 khan Ist Bn MAP te chuan final a an khingpui TBL chu hnehin an champion tawh bawk. Final ah hian 2- 1 a iunhneh na vawi 8 ngawt a awm bawk. Penalty hmanga a chak zawk zawn vawi thum a awm tawh bawk.

Season hmasa khan Mizoram Football chanchin a hriat reng tlak ni turin Mizoram club ah foreigner a vawi khatna atan an hmel kan hmu a. Kum 2009 Independence Cup khelh turah hian Ist Div Club paruk te chu pool hnihah then an ni a. Group A ah season hmasa a runner up FC Kulikawn chua seeded niin, SSA FC leh College Veng FC te an awm a. Group B ah nikum a semi finalist Dinthar FC chu seeded niin, Luangmual FC leh RC FC te an awm bawk a. Group A leh Group B a point hmusang pahnih te hian semi final an lut thei dawn a ni. Kuminah hian foreigner te pawh kan hmu leh nawk mai thei a ni. Team hrang hrang te in thlir kual thuak thuak teh ang.

LUANGMUAL FC: MFA League thawh khatna a hmahruaitu Luangmual FC hi veng chhung mipuite tawiawm thatna avangin tunhnaia club thang duang ber pawl an ni. Anni hi Mizoram football chanchin ziak danglamtu pakhat niin foreigner rawn hruai lut thei an ni. An player tha thenkhatte'n phai lamah 'kal bosan' mah se an hmun ruak luh khat thei tur player an thlang khawm leh tawh.

MFA League ah khan vawi nga khelhah vawi thum chakin vawi khat ve ve draw leh chak loh nei an ni a. Point 10 hmua hmahruaitu an ni. Eng tak ang chhunzawm zel ang maw?

Independence Cup-ah hian league hmahruaitu an nihna hi lan tirin champion ni thei dinhmunah an ding mek.

SSA FC: Nikuma khan I Div-a kai an ni a, I Division club zingah hmel thar ni chungin rin ai takin an hming an chher. Season hmasa khan MFA league-ah pahnihna dinhmun hauh thei khawpin an rawn 'inlar' a, Independence Day Cup-ah group league an paltlang zo lo thung.

BSNL Cup-ah runners up an ni a, MFA Cup-ah runners up an ni leh bawk. An player pawimawh te phai lamah an kal nasa a, team thar an din chho leh mek a. MFA League ah bul an tan tha lo viau a. Mahse a thawhkhatna khelh zawh a nih chuan pahnihna dinhmunah an rawsn inhlang kai leh thei a. SSA FC te hian vawi nga khelhah vawi 2 chakin vawi khat an chak lo a, draw vawi 2 neiin point 8 hmun pahnihna an ni a. Beiseiawm loh an ni lo ang.

DINTHAR FC: Mizorama I Div club zinga daih rei ber pawl an ni. Mizoram chhung leh pawnah record an nei tha. Season tharah hian player senior thenkhatte paihin rawlthar rual an khawm a, season hmasa khan MFA league champion an ni a, Independence Day Cup-ah semi finalist an ni.

BSNL Cup-ah beisei an phak lo a, an che tha lem lo hle. MFA Cup-ah semi finalist an ni. Kumin hian team chhe lo ber pawl an ni leh thei ang em? An player tha thenkhatte chan mah se an aiawh zo tur player an nei turah beisei a ni. Champion thei tur zinga rinkai an ni. MFA League-ah vawi 5 khelhah vawi hnih chakin vawi hnih an chak lo a, draw vawi khat neiin point 7 an hmu aan ni pawh team tha pawl ni tur a beisei an ni.

RC FOOTBALL CLUB: Season thara Aizawl District Football Association buatsaiha zone hrang hrang champion-te inkhelh kual hnua champion an nih avanga Season thara I Div club-a rawn kai thar an ni. Kuminah hian Durtlang leh a chhehvela player thate an khawm tha viau. Hmun danga mi an team tichak tura an lakte hian kawngro a su a. Hmel thar ni mah se player an nei chhe lem lo. Beisei phak bakin an che tha a. Vawi nga khelah vawi khat chakin vawi thum an draw a, vawi khat an chak lo a point 6 hmuin MFA League-ah palina an ni mek.

COLLEGE VENG FC: MFA League-ah a mawng phah an ni. College Veng FC te hian team thar dinin player naupang an la khawm a, veng chhung player an nei that te chhawr tangkai chungin veng pawn lam mi an team ti chak thei tur an lak an nei nual.

MFA League ah bul an tan that viau laiin a thawh khatna tawp lamah an che tha zui ta zak lo a. Vawi nga khelah College Veng FC vawi khat chakin vawi hnih an draw a, vawi hnih an chak lo a, point 5 hmuin pangngana an ni mek a. Engtiang takin rawn insiam tha ang maw?

FC KULIKAWN: Mizoram football-ah FC Kulikawn hi hmel thar an ni lo. Mizoram chhungah kher chuan tun hnaia record nei tha ber pawl an ni ngei ang. Hneh theih lohva ngaih thin Police team pawh anni hi a pal dai hmasatu an ni. Tunhnaia Mizoram football-a chanchin tha 'thlentu' te an ni pawh ti ila, a dik ang. A chhan chu Mizorama foreigner chahlut thei hmasa ber an ni.

Season hmasa khan Independence Day Cup-ah runners up niin MFA league-ah pathumna an ni. BSNL Cup semi finalist an ni bawk. MFA Cup-ah pawh semi finalist bawk an ni. Kuminah hian player naupang zawk an khawnkhawm a, team thar tha tak din tumin theihtawp an chhuah a. MFA League ah khan beisei phak lohin an che tha lo tlat. Vawi khat chakin vawi khat an draw a, point 4 hmuin a mawng phah an ni mek.

Related Posts :