Khuarei A Chang Zo Ta!

Kum a upat hian mahni chanchin sawi a nuam an ti thin. Pitar putar te hian an vanglai chanchin an sawi lai chuan chil pawh an lem hman meuh lo thin a nih hi. Zozam Weekly erawh kum 5-a upa chauh a la ni a, mahni chanchin sawi nuam han ti rual pawh a la ni lo. Amaherawhchu, nuam tih vang ni lo, a kum 5 tlin lawmnaah chuan a inhmeh e tih avang zawkin chanchin hlui thenkhat kan han tarlang teh ang. He'ng kan han tarlante hi kan vanglai thil a ni e kan ti lo, vanglai ni lovin naupan lai thil ni zawk se kan ti!

Nl. LALREMSIAMI THATTUTE INPUANNA (September, 2004)
Kum 2004 May thla khan Republic Veng (Aizawl) nula Lalremsiami chu vai mutia-te'n rawng takin an that a, a hnuah tlangval rual thinrimin Aizawl khawlaia vai an hmuh apiang an khawih a, hnam dang zingah hliam tuar pawh an awm nual a nih kha. He tualthahna chungchangah hian thu lengvak a tam hle a, police te'n Remsiami thattute Bihar-a an man a, an rawn hruai chhoh hnu-ah phei chuan thudik leh dik lo hriat hleih theih loh khawpin hriat dan leh rin dan a inperhsan a nih kha. Zozam Weekly chhuah tirh lam, September 14-20, 2004 chhuakah khan Remsiami thattu nia ngaih Bihari Muslim pahnih Mohammad Mister Anwar leh Mohammad Gulzar-te court-a an inpuanna te chiang taka tarlan a ni. Chanchinbu-in hralh a tlak phah hle.

KRISTIAN HLABU THAR - SYNOD A BUAI RU (October 2004)
September 30, 2004 khan Kristian Hlabu thar, Mizoram Presbyterian leh Mizoram Baptist Kohhran tangkawpin an buatsaih chu tlangzarh a ni. Kristian Hlabu thar hi a buatsaih chhung pawh a rei a, hla thar engemaw zat sengluh niin hlabu hluia mi paih a awm nual bawk. Hla 600 lai awmin, a chhuak hmasate aiin hla a tam zawk a ni. Kristian Hlabu thar (2004 edition) hi Prebyterian Kohhran leh Baptist Kohhran mipuite'n nghakhlel taka an lo thlir laiin a rawn chhuah meuh chuan chhutsual leh tihdik loh a tam em em mai a, Kohhran mite an phun nasa hle a ni. He hlabu sawisel hlawh tak chungchang hi Zozam Weekly (October 12-18,2004) ah chipchiar ang reng takin chhuah a ni a, a buatsaih dan phung fel lo te, a mawhphurtu nia lang te, Synod kalphungleh committee thurel palzutna te, inpuhmawhna awm te mipui hriata puanzar a nih meuh chuan mipui phun thawm a ring zual hle. Synod pawhin thupha chawina a chhuah hial reng bawk. Hemi hnu hian Cable TV lamin Kristian Hlabu chungchang programme neih an tum a, mahse Synod hruaitu lu pakhatin a ngen avangin thulh a ni nghe nghe.

THAWHLAWM HUI DUAK DUAK HENRY HINN
Kum 2005 November thla tir te khan US lama tihdam rawngbawlna kalpuitu rawngbawltu pakhat Rev Henry Hinn chu ram hruaitu lawk thenkhatte hmalaknain chahchhuah a ni. Amah hi tihdam rawngbawltu langsar tak Benny Hinn-a nau a ni a, Aizawla rawng a bawl chhung hian natna khirh tak tak veite an dam thu a puang a, beisei ang zat mipui pungkhawm lo mah se Henry Hinn-a 'Joy to the world peace feastival' hi rawngbawlna ropui tak chu a ni ve hrim hrim. Mahse, Henry Hinn-a rawngbawlna hian a hnu lawkah sawi zui a hlawh viau a, security guard a neih thu te, damna chang nia a puante zingah an beisei ang ni ta lo sawi an awm thu te chu thuhran ni se, inkhawm laia thawhlawm khawn nawntir a chin thu leh thawhlawm tlingkhawm chu organising committee hriatpui lova a thuihruaite'n an lak chungchang te sawi a awm ta zel mai. A lo dawngsawngtute kawm kualin uluk taka chhui zui a ni a, Zozam Weekly (November 15-21,2005) a thawhlawm a hui duak duak thu leh sum duh viau anga a lan thu tarlan a ni ta. Hei bakah hian a hnu lama Zozam Weekly chhuakah Benny Hinn hian TNT naupang pakhat chu a dam chhunga chawm a tum thu leh naupang dangte pawh Krismas thawmhnaw thawn a tiam thu leh a thutiam hi a ngaihsak zui tak loh thu pawh tarlan leh a ni bawk.

Lalruotmawi A Mawi Hluan E..
Kum 2005 Krismas vela Mas hla ai maha thlan hlawh zawk, cable TV demand channel luahtu chu Lalruotmawi hlate kha a ni.

Pahoin an buaipui a, nuho lunglen a kaitho a, putarho a chawktho a, a zai mawi tak chuan Zoram khawvel a dengchhuak chiang kher mai. Kum a lo thar a, Ruotmawi buaipuitu an pung tial tial a, a chanchin ngaihventute an awm hle hle thei tawh lo a chha chu a ni ber e. Kum 2006 tir lamah khan chuti taka Zoram mipuite buaipui rawn, paho lairil fantu nula biangno chu biakpawh tumin kan bei a, phai lama rawng an bawl laiin mobile phone leh internet hmangin kan be pawp thei hlauh mai. Tichuan Zozam Weekly (January 17-23,2006) chhuakah cover story atan he nula chanchin hi hmangin, a thupuiah 'Lalpa ruat lawk Lalruotmawi' (Kan ngaisang lo tih thu sawi thei kan ni ta nawh) tiin a chanchin tlangpui leh New Life Ministry hnuaia a rawngbawl dan te tarlan a ni. Chumi tum chuan phung zinga piring vawrh ang maiin kar loah Zozam Weekly copy chu a zo duak mai a ni.

Ruotmawi hi kan buaipui chhunzawm zel a, Mizorama a lo kal tur thu te, a lo kal chanchin te, a hnua a lo kal leh chanchin te, Mizoram hmun hrang hrang a fan kual thu te, hmingchhiatna a tawh dan te, a pasal neih dawn atanga an inneih chungchang te pawh kan chhuah chhunzawm ta zel a. Mak ang reng tak, mak vak si lo chu he nu chanchin kan chhuah apiang leh a kawma a thlalak kan dah apiangin a zuartuten hralh nuam an ti viau zel. Lalruotmawi tluka kurpuitu ngah hi Zofate zingah an vang viau awm e.

Tatoo leh thalaite
Hun engemawti lai atang khan Mizo thalai zingah tatoo buaipui an tam hle a, khawthlang lama milarte leh infiammite tih danin an taksa peng khawi maw lai laiah milem an chhu kai nasa hle a ni. |henkhatin an kut leh an bana an tatoo an neih laiin hmeichhe thenkhat chuan an awmah te, an hnuteah te, an ngumah te, an kapah te, an hnungzangah te leh an taksa peng dang dangah an nei thluah a ni. Mizo thalaite leh tatoo chungchang hi cover story-ah atana hmangin Zozam Weekly (February 21-27,2006) ah chipchiar takin kan tarlang a, Kohhran thenkhatah chuan tleirawl leh thalai inkhawmah tatoo chungchanga inzirtirna an nei zui nghe nghe.

Right To Information Act Leh Zozam
Kum 2005 October thla khan India ram pumah (Jammu & Kashmir tel loin) Right to Information Act hman tan a ni a, he dan hi mipui rawngbawlna atana tangkai taka hman tumin keini lam pawh kan inpuahchah nghal a, sorkar office hrang hrangah zawhna siamin document pawimawh tak tak kan nei thei ta. Puanhnuai thil tam tak haichhuakin mipui tana tangkai tur puanzarna hmanruaah kan hmang zui ta a ni.

MLA ten Dawt Bill an la
Right to Information Act (2005) hmanga Zozam Weekly-in chanchin lian tham a neih hmasak ber chu August 22-28, 2006 chhuaka cover story 'MLA ten dawt bill an la' tih kha a ni awm e.

He document hi hun engemaw chen kan kawl a, uluk taka kan chhui zui hnuah MLA 15 laiin bill lem siamin an zin loh bill an lak thu tarlan a ni. The Mizoram Salries, Allowances and Pension of Members of the Legislative Assembly Act, 1999 (Free Travelling Allowance)hmangin ram hruaitute hian zin lohna bill phuahchawpin cheng nuai khat chuang zet an la hlawm tih puanzar a nih takah chuan mipui thawm a ring hle a, a nghawng pawh a na hle a nih kha.

MLA (Minister,Speaker leh CM)-te hamthatna dan hian sawi zui a hlawh a, an hlawh leh thil danga hamthatna an dawn zozaite hi ngaihthei lotu an tam hle. |henkhat chuan RTI Act hmanga document kan lakchhuah te leh pawikhawihna lian tham kan tarlan thin te hi chanchinbu hralh tam duh vangah min ngai mai thei. Mahse, hei hi a ni chiah lo tih chu MLA Dawt Bill chungchangah hian a lang chiang khawp mai, khami tum khan ni dang aiin kan hralh tha lo mai a ni lo a, a copy chuang a awm teuh zawk!

Amaherawhchu, MLA Dawt Bill chungchang vang hian RTI Act hmang tangkai tak state tia hriat kan hlawh phah tiin mi thenkhat chuan an ngai a, ram hruaitute an fimkhur phah a, mipui kan zahawm phah sawt ni pawhin a lang.

Hemi hnu September 26-2 October, 2006 chhuakah sorkar motor enkawlna senso tam uchuak tak mai, RTI Act hmanga kan zawh chhuah chu tarlan a ni a, Secretariat Administration Department (SAD) motor enkawl zinga kum thum chhunga senso sang filawr zualte, POL man tam zualte tarlan a ni. He thu hian engemaw chen chu nghawng a nei ve niin a lang.

Stadium, stadium
Kum 2005 khan 12th Finance Commission-in Aizawla sports complex dinna tur Cheng vaibelchhe 25 a ruahman a, mahse hemi hnu hian thawm a reh zui ta vang vang thung. RTI Act hmangin stadium din tur chungchang hi kan chhui zui ta, Zozam Weekly (April 25-1 May,2007) chhuakah department lam atanga chhanna kan hmuh dan te tarlangin Aizawl (Lammual)-a stadium sak chu mumang ram mai a la nih thu mipuiin an han hre ta a, khelmual tha nghakhlel taka thlirtute rilru pawh a chawktho hle a ni. Sawi zui pawh a hlawh hle a, hemi hnu lamah pawh hian Mizoram Annual Plan leh Budget atanga chhui zuiin stadium sakna tura hmalakna a chak lohzia vawi tam chhuah a ni bawk.

Post Mortem Examination Report hmasa ber?
RTI Act hmanga Zozam Weekly hmalakna langsar ber pakhat chu tualthihna chungchang police-in an chhui laia mitthi ruang exam-na report (post mortem report) kan dil chhuak thei kha a ni.

May ni 8,2007 khan C Lalbiakliana chu YMA hnuaia mi SRS, North Zone kuta a awm laiin a thi a nih kha. Hliam nasa tak tuara thi a nih avang hian mi tam tak ngaih a tha lo a, mipuiin thudik an hriat ngei theihnan tiin doctor-in a ruang an exam-na (post mortem report) chu RTI Act hmangin kan dil ta a ni.

Dil chhuah a harsat zia te, a kawltu lamin an uizia te, MSIC-Chief Information Commissioner hnena kan zualko hnu pawha min pekchhuah hleih theih loh dan te kha ziah fe tham a ni. Harsa hle mah se hmun dangah pawh an ti thei a, kan theih ve hlauh chuan Mizoram tan thuthar thehdarhna lamah 'Mel lung' pawimawh tak a ni thei dawn tih kan hria a, kan bei tang tang a. A tawpah chuan kan hlawhtling ta nge nge a, doctor report kimchang chu May 9-15,2009 chhuakah khan kan tarlang ta a ni.

RD Department sum chingpen
RTI Act hmanga document kan lak chhuah hmangin kum 2007 tawp lamah khan rural development department sum chingpen chungchang kan chhuah thin a, he sum chingpen chungchang bawk hi a hnu lamah political party pakhat chuan an buaipui chiam nghe nghe. PMGY sum hman dana thil fel lo te, dan kalha bank-a sum dah te, BADP sum hman dan dik lo te kan tarlang thin a, hei hian rahtha a chhuah zui ta nge chu kan hre lem lo a, mahse sorkar erawh a fimkhur phah deuh chuan a lang.

Suangpuilawn Kidnap Drama
Kum 2003 Mizoram Assembly inthlan dawn hnaia Suangpuilawn biala MLA candidate 3 rukbo chungchang khan a tir lamah chuan mipui thin a thawng hle a, a hnu lamah titi leng vak a tam zui a, thu dik leh dik lo hriat hran harsa khawpin sawi dan a tam hle. A thenin lemchan thil mai mai nia an sawi laiin helho rukbo ngei nia ngai tawk an awm bawk.

Kum engemaw zat a liam hnuah pawh a chhuitute leh sorkar lamin thudik an puangzar ta lawk si lo a, RTI Act hmang bawkin hma kan la leh ta. Home department-a zawhna kan thehluh chu beisei ang chhanna kan hmu lo phawt a, a hnuah a hma aia chiang zawkin zawhna kan thehlut leh ta. Tichuan, hun tiam ral dawn a ruaiah MLA candidate rukbo dan chhuina report kimchang chu kan dawng ta a ni.

October 10-16,2007 chhuakah Inquiry Report behchhanin, a thupuiah 'Suangpuilawn MLA Candidate Rukbo Kha Lemchan a ni' tih vuahin hemi chungchang hi kimchang ang reng takin kan chhuah ta a, mipui pawhin an bengverh viau niin a lang. Thuthar thehdarhtu dang pawhin an chhuah zui na viau a nih kha. He bial MLA ni lai pawhin, "Tunah chuan ka thaw huai e," tiin a sawi chhuak hial a ni.

Nursing College Building?
Sorkar laipuiin Mizoram sorkar hnuaia college of nursing atana hman tur cheng nuai 150 a pek atangin Cheng nuai 70 chu building atan hman tur a ni a, March ni 31, 2008 hma ngeiin nursing zirna hian building a nei tur a ni. Kum 2005 khan he pawisa tam tham tak mai hi Health & Family Welfare department-in a dawng a, Mizoram College of Nursing, Aizawl building sakna tur a ni. Sum hi a hman dan tur bithliah fel vek a ni nghe nghe.

Mahse, he pawisa tam tham tak mai hi tihchingpen nia hriain kan chhui zui a, rin lawk ang ngeiin a phenah hian thil fel lo tak tak a lo awm teuh mai. Building sak a ni lo a, a hmanna tur taka hman a lo ni mang lo hlawm. Cheng nuai tam tak a bo pil ngawt mai chu Zozam Weekly (November 21-27,2007) ah chiang takin kan tarlang ta a ni.

Thlai chi leina sum a pamhmai lua
Loneitute leh kuthnathawktu dangte mangang an intelkhawm a, Zoram hmun hrang hrangah an so chhuah mek lai khan loneitute chin tur thlai hrang hrang chi sorkarin a lei danah thil felhlel a awm reng tih Zozam Weekly chuan a hmuchhuak a.

RTI Act hmang bawkin April 1 - October 25,2007 inkara agriculture department thlai chi lei dan kan zawh chhuah hmangin kan chhui zui ta kha a ni a, ram pum huapa loneitu mangangin thawm lian tak an neih lai khan agriculture department chuan thlai chi man to tak takin a lei khawm a, a then chu Mizorama kan la hmelhriat loh thlai te a ni. Thenkhat chu mamawh aia tam daih te an lei bawk. Thlai chi thenkhat chu a tak hmuh tur awm lo te pawh a ni hlawm. Hemi chungchang hi Zozam Weekly (December 5-11, 2007) ah tarlan a ni a, kuthnathawktu lamah leh sorkarah pawh nghawng a nei zui viau a nih kha.

OPD Building chhawng khat a bo!
Aizawl Civil Hospital a Out-Patient Department building sak zawh takah thil fel lo a awm ngei nia ngaiin kan hmanraw neih that ber leh hman thiam ber RTI Act bawk chu hmangin kan chhui chiang leh a, a hun lai chuan hemi chungchang hian sawi a hlawh hle.

Document kan neih ang angte hmanga ngun taka kan chhui hnuah chuan OPD building-ah hian chhawng khat a kim lo ngei tih chu kan thutlukna a ni a, hei bakah hian thil dik lo inphum tel a awm nual niin a lang. Tichuan January 23-29,2009 issue-ah 'Civil Hospital OPD Building Chhawng Khat a Bo' tih chu cover story atan kan hmang ta a ni.

He building hi ruahman lawk dan chuan chhawng li tur a ni a, mahse ground floor chungah chhawng hnih chiah a awm ta si a, a sakna senso tam zia te, ruahman lawk aia a zim thu te, ruahmanna hrang hrang palzut a nih dan te chipchiar takin kan tarlang ta a ni. He thu hian a nghawng na ang reng viau a, thuthar thehdarhtuten an chhuah chhawng a, sorkar lamin insawifiah a tum nasa mai bawk. Sorkar hnathawkte sawmna chhangin thuthar thehdarhtute hian a hmunah an enho nghe nghe a nih kha.

Kuthnathawktute an so chhuak
Kum 2007 tir lam atang khan Mizoram hmun hrang hranga kut hnathawktuten thawm an nei tan a, Saitual-ah Zoram Kut hnathawktu Pawl an lo din tawh chuan loneitu harsatna tinreng tuar mekte rilru a chawktho a, hmun hrang hrangah an insehmur ta tuau tuau mai a nih kha.

April 19,2007 khan thingtlang hmun hrang hrang atanga kalkhawm loneitu thahnem takin Aizawl Chanmari kawn atanga Tennis Court thleng kawng an zawh phei kha chuan Zoram pum a nghawr nghing a nih kha. Zozam Weekly pawhin kuthnathawktute hmalak chhoh zel dan hi a tir lam atangin kan chhui a, hun harsa tak tak an tawh laite leh politics a an inrawlh tak thlengin kan um zui a ni.

Rev. Chanchinmawia kha
October 1,2007 khan Presbyterian Kohhran Pstor langsar tak, Moderator hlui, MPF president ni bawk, Pastor Chanchinmawia chu an chenna Khatla Pastor Quarters chokaah thia hmuh a ni a, hemi chungchang hian Zoram a thawng hneh hle.

A ruang bulah chemte leh tuboh a awm bakah a taksaah hliam a awm nual avangin a thih danah hian titi a tam hle. Rin dan leh ngaihdan mak pui pui a tam a, sawi belh tur a piang zel bawk si a, mipuiin an ngaihven zual tial tial bawk. Hei vang hian Zozam Weekly chuan a tir te atangin he thihna chungchang hi a ngaihven char char a, thu thar awm apiang hlah loin kan tarlang chhunzawm ta zel a ni ber e. A rawngbawl hun hnuhnung lama chanchin ropui tak tak neitu, a thih hnu pawha mi tam tak hnena thusawitu a nih avang hian hemi kuma Zozam chhuak hnuhnung berah Person of the year ah kan puang hial a ni. Pastor Chanchinmawia anga rawngbawlna lama thahnemngai leh inpe zo, huaisen leh taima, Pathian leh ram tana tim miah lo a ke pen ngam hi engtikah tak nei leh ang i maw..

Chawlhhmun thlahrang chhuichhuahna
Chanchin thain kan ramah ramhuai a um bo ta, tia a huai leh rau lam pang hlau lova hun rei tak kan awm hnuah hun engmaw lai atang khan ramhuai a inlar leh thin nia sawi a ni. Pi pute kha huai leh rau chi hrang hrang hlau thin an ni bawk a, hengte hian min kian san tak tak thei lo pawh a ni mai thei.

Kum 2008 tir lama Chawlhhmun (Aizawl) thlahrang pawh khan mi tam tak a tithlabar hle a nih kha. Hun engemaw chen thawm a reh hnuah thlahrang chungchang hi kan ngaihven thar leh a, mipuiin thlahrang emaw kan lo tih kha ramhuai hnathawh, ramhuaiin a tihtir zawk niin he hmuna naupang pakhat chuan Zozam Weekly a hrilh fai ta leng mai a ni. Hemi chungchang hi April 2-8,2008 chhuakah kan tarlang a, mahse Zozam Weekly chuan ngaihdan mumal tak kan nei ta lem chuang lo.

Open Your Mouth..Ha!ha!ha!
Kum 2008 chhoa chhiartuten an hlimpui ber nia lang chu 'Open your mouth ha!ha!ha!' series kha a ni awm e.

May14-20,2008 issue atang khan khatih laia chief minister-in hmun hrang hranga thu a sawite tarlan thin a ni a, a thusawi inkalh tak tak te bakah a titi ngaihnawm em em mai te kan tarlang thin. A chhiartute lamin an tuipui hle a ni. 'Open your mouth' series hi a la tawp mai lo a, kuminah pawh chief minister thar thusawi behchhana chhunzawm zel a ni.

Tuai, Pherh
Tunhma atangin Mizo zingah tuai leh patil hi an awm reng thin a, mahse an inthup viau thin thung. Tunhnai lawk atang khan tuaiho hi an inlar chhuak tan ta sup sup mai a, hetia society-a thil inthlak danglam lo awm ta hi kan ngaihven zui ta a ni.

An zinga mi thenkhatte kawmin an sawi duh zawngte an sawi a, an dinhmun uluk taka thlirpui chung leh mithiamte rawn chungin Zozam Weekly (June 25-1 July,2008) chhuakah 'Tuai - An rawn lang alawm hei' tih thupuia hmangin Mizorama tuai chungchang hi kan chhuah a, anmahni'n 'Pherh' an intih dan te, an dinhmun te, harsatna an tawh dan te leh thil dangte chipchiar takin kan tarlang a nih kha.

He thu hian nghawng a nei zui viau a, mipui hriatah hming thar an neih phah ni te pawhin a lang a, mi tam takin an nihna thar hi an pawmpui ta ni pawhin a lang.

Chiahpuam leh Zozam
Nikum kum tawp lamah khan Aizawla pawisa peipunna hlawk tak mai 'Chiahpuam' tia vuah chu a puakdarh a, a nghawng pawh a na kher mai.

Chiahpuam chungchang kha kan hriat tirh te atangin kan ngaihven nghal a, 2008 kum laihawl vel atang khan ngun zawkin kan chhui zui a ni. Tichuan September 10-16,2008 chhuakah khan cover story-a hmangin 'Aizawl-ah Pawisa Laihchhuahna Khur - I dawt ngam leh dawt rawh' tiin chipchiar takin kan ziak a, khatih lai phei kha chuan 'Kar khat bank' tih a ni nghe nghe.

Sumdawnna derthawng tak leh chhe rup thei a nih thu te, a hlauhawm dan te pawh kan tarlang nual a ni. Mahse, mipuiah awmzia a nei lem lo khawp mai. Chiahpuam chu a puam lian deuh deuh zel a, chutihlai pawh chuan ngun takin kan chhui zawm zel bawk. Hetihlai bawk hian Mizorama dan kalha din financial institution lem hrang hrang kan ziak bawk a, hei phei hi chuan ngaih pawimawh a hlawh lo hle a ni. Kar khat bank (Chiahpuam) chuan a vawrtawp a hnaih zel tih hriain October 29-4 November, 2008 chhuakah khan 'Kar Khat Bank-in a vawr tawp a thleng - Chiahpuamtute an buai' tih thupuia hmangin kan chhuah leh ta a, he issue hi October ni 29 tuk-ah a chhuak a, tlai lamah Chiahpuam chu a puak ta a ni.

He sum peipunna hi a kehchhiat mek thu leh a him lohzia te, sumdawnna holam tak a nih thu te kan ziak a, kan thuziah a chhuah ni tak hian Chiahpuam chu thawm na takin a keh ta, a bultumtu Muanpuii a bo ta a nih kha. Hemi hnuah pawh hian mi tam tak nghawng, scandal lian ber pawl a nih avang hian kan chhui zui a, kan chhuah chho ta ut a nih kha.

Synod Chiahpuam
Kum 2009 kan chuangkai a, sorkar thar a piang a, ram rorelnaah thil thar lian tham a thleng lo a, 'Change' hmuh tur a la awm meuh lo. Full budget nei loin kan awm reng a, sorkarin hmalakna mumal a nei lo bawk. Chutihlai chuan Synod Pension & Provident pawisa tlingkhawm (Fund) financial institution thenkhata dah a nih chungchangin sawi a hlawh hle. Mi thahnemngaite zarah Zozam Weekly pawhin a chhui zui a, tichuan tun thla tir (August 5-11,2009) chhuakah khan kan tarlang ta a, he thu hian mipui beng a verh hle a, thuthar thehdarhtute pawhin an chhuah zui sup sup a nih kha.

Related Posts :