Zofa - chhak leh thlanga mite inhrethiam sawt?

June ni 25-ah kha Aizawla Transport Deptt. Directorate hlui, Temple Square bulah Mizoram Committee for Democracy in Burma (MCDB) te chuan Aung San Suu Kyi an thlawp thu tlangaupui nan 'Sit-in-Demonstration' an huaihawt a, he huna thusawitute sawi dan atang chuan Mizorama Zofate hian Burma rama Zofate dinhmun an hrethiam sawtin an lainat ta hle niin a lang.


Burma sipai hnuaia tang mek Aung San Suu Kyi chuan an ram thenawm Mizoramah tantu a nei hraw hle; Mizorama political party te leh tlawmngai pawl hrang hrangte chuan Suu Kyi an lainat thu an puang hlawm. Tin, Burma rama Zofate an lainat thu pawh an sawi bawk. He hunah hian political party leh tlawmngai pawl hrang hrang an tel a ni.

MPCC general secretary C Chawngkunga chuan: "Keini Indian National Congress chuan khi ramah khian democracy awm leh se, mipui hlim se kan duh a ni," a ti a, Burma ram mipuite tawrhna nasat dan sawiin, "Burma ram tlangmite tawrh ang hi Mizoram hian tuar ve ta ila Burma mite aiin kan sual daih ang; ngaihdamna nena kan en a ngai," a ti bawk.

MNF |halai president Lalchhandama Ralte pawhin, "Burma ramah democracy a awm theih nana hmalatu Aung San Suu Kyi leh National League for Democracy te kan duhsak a ni," a ti a, Burma ramah democracy palzut a ni chu "keini Mizote tan chuan kan taksa pangkhing ang a ni... Zofa engemaw zat Burma ram chhungah an awm," tiin a sawi.

Burma ramah democracy tundin ni se a duh thu sawiin, India sorkar leh UNO pawhin nasa lehzualin tanla se a duh tih a sawi bawk.

ZNP |halai vice president PC Vanlalruata pawhin Burma ramah sipai sorkarin ro an rel avangin mipui an ralmuang lo tih sawiin, Burma rama cheng Zofate chu Mizoramah an rawn tlanchhe thin tih a sawi a, "Sipai rorelna hrehawm tak avanga Zoram - inpui rawh pantu, kan thenawm, kan unaute nunphung pangngaia nung lova pawikhawih thinte kan rum thaih thin che u a, 'in ram lamah kir leh rawh u' kan tih chang a awm thin. Heng zawng zawng hin Zo hnam kan nihna hi min then hrang lo sela, hnam khat, chhul khat kual kan nih i theihnghilh ngai lo ang u. Engkim tan hun ruat a awm kan tih thin kha. Ram thleng khat luah, Zo hnahthlak zawng zawngte rorelna pakhat hnuaia kan awm hun tur thlirin hma lam panin ke i pen zel ang u," a ti.

MZP general secretary VL Krosshnehzova chuan Burma sipai sorkar hian Suu Kyi hi chhuah zalen thuai se an duh thu leh Burma mipuite chu democracy sorkar nei thuai se MZP-in an duhsak tih a sawi a, Mizoram a buai laiin Burma rama Mizote'n Mizo mipuite min tanpui, tia sawiin, "Burma rama kan unau, Mizo mipuite'n kan harsat lai leh kan buai laia kan chunga an thatna zawng zawng kha MZP chuan kan theihnghilh lo," a ti a, hetia hrehawm taka an awm ve lai hian Mizoram hian Burma-a Zofate hre reng se a duh thu a sawi bawk.

PUCL president David M Thangliana pawhin thu sawiin, Burma ramah khawsak a hrehawm avangin Burma rama Zofate'n Mizoram an rawn pan thin tih a sawi a, "Mizoramah an rawn chhuk lo thei lo a, Mizoram mipuite leh sorkar pawh hian hriatthiamna nen en i tum ang u," a ti.

Human Rights and Law Network, Mizoram director Ruatfela Nu chuan Burma ramah Mizoram mipui aia tam Mizo an awm tih sawiin, "Burma ramah democracy a awm theih nan Mizoram hi kan vaia auchhuak tur kan ni," a ti.

"International politics kan thlir pha lo a nih pawhin kan unaute tan hian pheikhai rual taka, Burma ramah democracy tundin a nih theih nana tha thawh hi kan bat a ni," Ruatfela Nu chuan a ti bawk.

MPC aiawha thusawitu C Hualthanga chuan: "Aung San Suu Kyi hi chhuah zalen se, khi ramah khian democracy tundin ni rawh se tih hi MPC ngaihdana ni," tiin an party ngaihdan a sawi. "Kan ram buai lai aiin an dinhmun hi a chhe zawk," a ti bawk.

MSU general secretary Zodinpuia pawhin Burma mipui an khawngaih thu te, Burma zirlai pawl te pawh MSU-in an lo kawm tawh thin thu te sawiin, democracy palzuttu Burma sipai sorkar an dem thu a sawi.

BJP general secretary K Lalchhanhima chuan: "Aung San Suu Kyi, mahni hrehawm pawh pawisa lova ram tana hrehawm tuartu hi 'Dam reng rawh se' tiin duhsakna sang ber, BJP Mizoram Pradesh chuan kan hlan e," a ti.

MHIP general secretary Lalbiakengi pawhin Suu Kyi an thlawp thu sawiin, "A ram mipuite tana a inpekna hi ropui kan ti a ni," a ti a, "Mipuite tana a inpekna hi Mizo hmeichhiate tan hian a entawn tlak a ni," a ti bawk.

"Mizoram chu Myanmar ramri depa awm kan nih bakah kan unau, kan thisen zawmpui leh Mizo hnahthlak thahnem tak Myanmar-ah an awm avangin Myanmar sorkar kalhmang leh inawp dan retheih thlakzia pawh ngaihtuahna hmang chin chuan kan hre tlangpui theuh a ni," tia sawiin MUP chuan Burma ram mipuite an lainat thu he hunah hian an puang a ni.

CYMA pawhin democracy tundin nana beitu Aung San Suu Kyi an thlawp thu leh Burma ramah democracy awm thuai se an duh thu an sawi tih he hunah hian puanchhuah a ni.

Mahila (Congress) hruaitu Zothankimi pawhin thu sawiin, Aung San Suu Kyi an thlawp thu a sawi a, "Burma ramah democracy tundin a nih theih nana a beih theih nan kan zavaiin i tawngtaipui ang u," a ti.

Burma ram atanga Mizorama rawn tlanchhia Rozathanga chuan: "Zoram mipuite leh sorkar humhimna avang hian kan lawm a ni," tiin he hunah hian a sawi a, Burma atanga rawn tlanchhe ve bawk Shalomi chuan India ram hruaitu lawk zingah hmeichhia an pung tih sawiin, "An hmeichhepui hi hre reng se, nasa takin pui se kan ngen a ni," tiin India ram hruaitute'n Suu Kyi thlawp se an duh thu a sawi.

Demonstration hi Lalmuanpuia Punte-in a kaihruai a, MCDB chairman Vanlalngaia'n thu sawiin, "Burma ramah democracy a awm lo a, a tuartute Mizote kan nih avangin kan harsatna hi India sorkar hnena thlen lo thei lo dinhmunah kan ding," tiin India president chu Suu Kyi tana bei tur leh Burma ramah democracy tundin a nih theih nana hmala tura ngen an tum thu a sawi.

Tlai dar 3:30-ah MCDB hruaitute hian Mizoram governor hmuin, India president an ngenna lehkha chu an thlen a, governor hian president hnenah hian a lo hlan chhawng a ni.

President hnena an lehkhathawnah hian MCDB chuan Burma sipai sorkar hnuaiah khawsak a harsat avangin Burma mite'n Mizoram an pan nasa a, chu chuan Mizoram a nghawng nasa hle tih an ziak a, Burma ramah Mizo tam tak an awm avangin Burma ram hrehawmna hi Mizo mipuite'n an maimitchhinsan thei lo tia sawiin, Burma ramah democracy tundin a nih theih nana hmala turin an ngen a ni. A hmeichhepui tana bei turin an ngen bawk.

MCDB hian Burma ramah democracy tundin a nih theih nan Aizawlah kawngzawh leh seminar te an lo huaihawt tawh a, Mizoram chu Burma ram thenawma awm a nih avangin ram pawn lam media pawhin an rawn ngaihven thin hle.

MCDB hruaitute chuan hetia democracy tundin a nih theih nana an beihnaah hian Zofate inpumkhatna lam pawhin hma a sawn hle nia an hriat thu an sawi a, Burma sipai sorkar hnuaia khawsa Burma rama Zofate lainattu hi Mizoramah an pung chak hle nia an hriat thu an sawi. An chairman Vanlalngaia chuan sit-in demonstration-a thusawite'n Burma rama Zofate an lainat thu an sawi deuh zel mai chu lawmawm a tih thu sawiin, "Hetiang thu hi an rawn sawi vak pawh ka lo beisei lo a... kan inpumkhat sawt khawp e," tiin a ngaihdan a sawi a ni.

Related Posts :