¢ Sangzuala Hmar
Kan kutchhuak liau liau khumbeu kan nei a, kan chhuang a, phai lam atanga mikhual lo kal reng reng kan pe a, anni pawhin mawi an tiin mau leh hnahthial atanga siam mawi em em maia tahkhawm khumbeu hi an hlut thin kher mai. Phai lam atanga vai leh ram pawn lam atanga sap lo kalte hian Mizo sapthei tui an ti thin hle bawk. Heng bakah hian Mizo kutchhuak bungrua leh tualchhuak thei leh thil dang tam tak ram dang mite'n an hlut em em tam tak a awm a, Mizo nih ti nuamtu tling khawp hiala thil danglam leh kan hnamzia lanna thil siamchhuah tam tak kan nei.
MAHSE, heng kan rama Pathianin min dahsak leh kan hnamin he ram kan luah avanga kan vela hmanraw awmte hmanga kan thilsiamte hi engtinnge kan humhim ang?
Khumbeu hi a mawi nameuh mai, a design a nalh a, hnam dang pawhin uluk tak takin an thlek ngial thin, chutiang bawkin kan tualto sapthei hi a tui em em a, India ram hmun danga awm ve hauh lo a ni, chu mai a ni lo, Mizo samtawk hi India ram chu sawi loh khawvela a tualto awmna hmun awmchhun tia sawi ngam khawpa kan rama awm bik thlai a ni. Keini aia hnam changkang zawk leh thiamna leh hmanrua nei tha zawkte hian khumbeu technology hi an entawn ang a, tam tham takin an dekchhuak ang a, an sumdawn pui hmiah hmiah ang tih hi thil hlauhawm tak a ni. Kan sapthei chi hi an la ang a, green house hmangin kan ram sik leh sa ang thlapin an ching ang a, a neitu zawk kan hawi lel lel ang tih hi thil hlauhawm tak, thil thleng thei a ni!
India ram hi agro-climatic zones an tih mai, sik leh sa danglam avanga thlaiin a ngei bik boruak leh lei chi hrang hrang tam em emna ram a ni a, hei vang hian thlai pawh India ram hmun hrang hrangah chi hrang tam tak a awm. Tharchhuah a danglam hlawm em avangin India ram hmun hrang hranga loneitute leh thiamhnang emaw, puantah emaw, an tharchhuah hmanga thil siamchhuak thinte pawhin thil chi hrang hrang an dekchhuak a, hmun pakhata chengte chuan thil engemaw bik an thiam a, hmun pakhata mite'n a aia danglam deuhvin thiamhnang an khawih thin. Mizoramah ngei pawh khawthlang lamin mau an ngah avangin mau hmanga thilsiam chu khawchhak lama mau tam vak lohna hmun a chengte ai chuan an ngah zawk a tih ngam.
Hetianga hmun pakhata chengte'n an chenna ramin a pek atanga thiamna danglam bik emaw, an chenna hmuna thlai tha duh bik neite hian danglamna an nei a, Sihphir-ah iskut a tha duh em em a, Sihphir iskut tiin kan sawi lar viau. Sihphir iskut tiin kan chhal a, a dik, mahse dan ang thlapa chhal tur chuan dan hmanga ziahluh a ngai. A awmna hmun Sihphir hming a put dawn chuan hmun danga iskut nen a danglam bik tur a ni, hmun dang aiin a tha tur a ni a, a thatna chu chiang takin a lang thei tur a ni thung! Chutianga thlai pakhat emaw, thil siamchhuah bik a siamchhuahna hmun hming nena inkawpa a hming phuah chu dan hmangin a tih theih a, chutiang tharchhuah emaw, siamchhuah emaw chu Geographical Indications tiin GI Registry, Chennai-ah registration a tih theih; mahse thil awlsam tak a ni lo, a bik a nihna lai tak a chiang tur a ni a, hmun danga tharchhuah ve harsa a ni tih amah atangin a lang tur a ni.
Geographical Indications hi thil tangkai em em a ni a, tunhnai deuh khan Pipli Applique Work, Orissa, Lucknow Chikan Craft (Uttar Pradesh), Uppada Jamdani Sarees (Andhra Pradesh) te chu United Nations Conference on Trade and Development (UNCTAD) India Programme hmalakna leh puihbawmnain registration tihfel an ni.
Agriculture atanga tharchhuah pawhin GI registration a nei thei a, hmun pakhata thlai thar emaw, hmanrua awm atanga thilsiam thlengin GI registration hi a tih theih a, chu chu a sawifiahna awlsam a ni, entirnan: Canadian Rye Whisky, French Champagne, Budweiser Beers, Bourbon Whisky, etc.
He hmalakna hi World Trade Organisation bultum a ni a, WTO-in a tum ber chu hnam pakhat tualchhuak thil thiamna changkang zawk neite'n changkanna hmanga an chhuhsak mai theihna tur kawng dal a ni ber. Tarlan tawh angin khumbeu hi Mizote thiamhnang kutchhuak liau liau a ni a, Nike company te hian a tam tham zawkin han dekchhuak ta se, tlawm em em mai leh tha takin an dekchhuak thei ngei ang, khumbeu a nihna kha a bo dawn chuang lo. Mahse a hlutna lai tak erawh chu Mizopa ngeiin ama kut ngeia a tahchhuak zawk kha a ni. Kha kha GI-ah registration fel tak a awm chuan Mizo Khumbeu tiin emaw ziahluh ni ta se, Nike company siam khumbeu kha chu Mizo Khumbeu a ni ve thei tawh dawn lo a, a siamchhuaktu dik tak khan a hming nghet a pu thei dawn a ni. Chutiang chuan khawvel hmun hrang hrangah tualchhuak thiamna te vawnhim a ni a, tunah pawh India ramah UNCTAD chuan hmalakna lian tak tak a nei a, tualchhuak thawmhnaw emaw, thlai emaw thei hmun pakhat atanga dehchhuah that bik riauna nei te chu registration tih tumin heng hmuna cheng loneitute leh thiamhnang lam dek mite a pui mek a ni.
Tuna UNCTAD hmalakna kal meka registration hmu hnai tak chu Bihar state-a Shahi Litchi an tih leh Rajasthan-a hmasang atanga tualchher puan cheimawi Sanganeer hand block prints an tih te khu an ni.
'A ho e' ti tawk kan awm mai thei, mahse hei hi nakin zela kan thlah, he ram rawn luahtu turte tan a pawimawh hle. Kashmir Shawl an ti a, Kashmir Carpet an ti a, khawvelah a hmingthang em em a, a to pawh a to na laileng. Mahse tunah chuan China ramin kashmir Shawl man tlawm te te, mawi ve em em mai bawk si an siamchhuah mup mup tawh a, a leitute lamin a khawinge a Kashmir Shawl dik tak an hre thei tawh bawk si lo, chu chuan Kashmir state-a mirethei te te shawl tah hmanga eizawngte eizawnna a tihtawp der tawh a ni.
Hemi chungchangah hian June ni 12, 2009 khan New Delhi khawpuiah workshop neih a ni a, he workshop hi UNCTAD buatsaih a ni. India ram hmun hrang hrang atanga tualchher hmanrua chi hrang hrang hmasang atanga an lo siam tawh thenkhatte pholan a ni a, heng mi rethei te te te'n a nu leh pa, pi leh pute hnen atanga thiamna a rochun chu khawl tha leh changkang zawk hmanga upbeh mai a nih tur thu an saiw uar hle a, chu sumdawnna an inrochun a lo dam khawchhuah theihnan UNCTAD hian registration lamah hma a lak pui a, mithiam tak takin an puibawm zel a, state tin deuhthawin hetianga anmahni bil kutchhuak emaw, an thlai tharchhuahte register tum hian an buai phili tawh hle a ni.
An ngai pawimawh kher mai, tuna Prime Minister's Economic Advisor Board chairman ni lai Professor Suresh Tendulkar meuh pawhin a pawimawhna sawiin he hun hi a hmanpui a ni.
UNCTAD-in a tum ber pakhat chu khawvel sumdawnna thang zel vanga engkim mai luangho dual dual tawh kara tualchhuak hmanrua leh thil dehchhuah vawnhim a ni. Globalisation khawvelah chuan engmah hian bik a nei thei tawh si lo a, chuvang chuan heng hnamzia nena inzawm tlat thil hlu tak takte hi chhanhim a ngai a ni tih chu an thupui pakhat a ni.
State dangte'n thahnem an ngaih tawh hle lai hian keini state hian kan la ngaihven lo hle a, Manipur atanga he khawmpui chhimtu pakhat chuan Churachandpur District-a Mizote'n khumbeu pawh registration tih tuma hma an lak thu te a sawi zauh a, eng chen nge an kalpui tawh tih erawh hrechiang lo mah se Mizorama chengte'n kan hnam nena inzawmna nghet tak nei kan thil siamchhuah, hnam dangte'n an thiam ve loh leh a chak emaw hmanrua pawh an neih ve theih loh thil tam takte hi kan enchian a, kan chik a ngai hle tawh a ni.
Tunah hian India rama state 10 velte chuan an state chhunga hnam bik leh hmun bika chengte thil tharchhuah leh dehchhuahte register tumin UNCTAD tanpuina an dil mek a, an state mithiam tak takte mawhphurhna pein a mipuite pawh an zirtir nasa hle tawh hlawm. Karnataka state chuan an chhuan em em Mysore Silk Sarees an buaipui a, Madhya Pradesh-in Maheswar Sarees, Uttar Pradesh in Ghaziabad Jacquard Furnishings, Haryana in Panipat Floor Coverings. Naga Shawl kan tihte pawh naga ho chuan an buaipui ve mek bawk a, keini lam hian kan puan neih mawi tak takte hi engtinnge kan tih ve dawn tih hi kan in zawhna ni se a tha hle tawh a ni.
UNCTAD chuan India tama hetianga thil siamchhuah leh tharchhuah 50,000 zette chu GI Registration hmanga vawnhim a tum niin a ngai a, mahse India ram state hrang hrangte hian inzirtirna kan la tlachham hle a, state changkang leh state lian zawkte'n hma an la chho mek a, Mizoram pawh hian he lama ke pen ve nachang kan hriat hmasak hi a finthlak hle ang.
No comments:
Post a Comment