India sorkar chuan Tipaimukh Multi-Purpose Project siama Tuiruang lui khuap a tum a, he tuikhuah hian Mizoram hmun thenkhat pawh a chim dawn.
Tipaimukh tuikhuahin a nghawng tur khua, Manipur leh Mizorama mite chuan an thiam dan danin an damna tur an zawng mek zel a, he tuikhuahin a nghawng tur khuate hian Affected People Association dinin, Manipur leh Mizoramah Manipur Division leh Mizoram Division invuahin an inbun a ni.
Tipaimukh Multi-Purpose Project hi a thuthmun chu Manipur-a Tamenglong district niin, kawlphetha MW 1500 pechhuak thei tura chhut a ni. A thuthmun awmna hi Manipur leh Mizoram inrina lai vel, Jiribum atanga hla lo te a ni a, Tuiruang lui (Barak) khuapa, kawlphetha chakna siakchhuah tumna project a ni. Kawlphetha siakchhuah bakah tuilian venna tha tak ni tura chhut a ni bawk.
1954 atang khan Central Water Commission chuan Tuiruang hi ngaihvenin a lo zir tawh a, kawlphetha siakchhuah nan te, tuilian ven nan te, tuilak leh tui kawng atana hman theih tur a awm leh awm loh te mithiamte'n an lo zirchiang tawh thin a ni. Lui mawng lamah hmun remchang dap a ni thin a, mahse, hmun that tawk loh vang leh a chim chin a san dawn avang tein a lu lam, Tipaimukh hi remchang berah ngaih a ni.
1978 atang khan ngun lehzuala zir a ni a, 1984-ah khan NEC hnenah Detail Project Report thehluh niin, Brahmaputra Board-in enfel ngai te a enfel a, chu'ng chu NEEPCO-in chhunzawmin, vawiin thlengin anni hian an hma ta a ni.
Tuivai leh Tuiruang lui infinna atanga a mawng lam metre 500 vela hla, kurung hmunah tuikhuah (dam) hi awm tura tih a ni a, a kuang ding lam chu Manipur niin, a vei lam erawh Mizoram a ni thung ang. "A kam ding lama Tuiruang leh Tuivai lui inkara Vangai tlangdung te reuhte inkhawh chu kawlphetha lak penna tur tunnel leh tui bawm lian lak penna atana tha fahran a ni," tih Mizoram sorkar ngaihdan a ni.
He project hi nikum December ni 19, 2006-ah khan khatih laia union power minister Sushil Kumar Sindhe chuan lungphum a phum a, he hunah hian prime minister aiawhin chutih laia union steel minister Santosh Mohan Dev-a a kal bawk.
He tuikhuah hian ram sq.km 12,758 a awh dawn a, Mizoram bik chu sq.km 17-a zau a chim ang. Manipur-ah hian thingtlang khaw 12-te chu khaw thar din ngai khawpin a chim dawn a, a nghawng tur khua zawng zawng phei chu khaw 77 vel nia chhut a ni.
Mizoramah chuan a khua khuaa chim tur a awm lo a, khaw engemaw zat chu an ram a khawih thung ang. Mizorama nghawng a neih tur khua hi report thenkhatah chuan khaw 13 tih a ni a, a nghawng tur khuate chuan khaw 24 vel niin an sawi thung. Khawpuar chu a tuar ber tura ngaih a ni a, he khaw ram hmun thuma thena hmun hnih vel zet a chim dawn nia hriat a ni.
Hetiang a nih avang hian Manipur leh Mizorama a nghawng tur khuate chuan theihtawpin hma an la a, Manipur lamah phei chuan dodalna a nasa hle. Manipur-a a nghawng tur khuate hi Zeliangrong Naga leh Hmar-ho khua a ni hlawm.
Eng nge a nghawng tur?
He project hi a hlawhtlin chuan kawlphetha tam tham tak a siakchhuak ang a, amaherawhchu, he lui hi khuap a nih chuan nghawng dang a nei bawk ang.
He tuikhuah hian tribal khua engemaw zat a chim dawn a, a dang khaw engemaw zat a nghawng cheu bawk ang. Zeliangrong Naga leh Hmar ho chu a tuar nasa ber tur an ni.
Zaliengrong ho hi khawtlang nun nuam tak nei niin helai velah hian hlim takin an cheng mek. Pi leh pu atanga an lo luah tawh an ram leilung te chuan an nitin nun leh culture, rilru leh hawiher thlengin hmun a chang sang hle. Tuiruang luia Ahu waterfalls (tui khawhthla) te chu Manipur-a hmun mawi ber bera ngaih a ni a, mahse, Tuiruang lui hi khuap a nih chuan tuilian chuan hei hi a tichhe dawn a, chuti a nih chuan an culture, an hmanlai thawnthu leh hmanlai atanga an lo inrochun tawh an hnam thil tam tak a chhe dawn tihna niin Aram Pamei chuan a sawi (Economic and Political Weekly, Vol. 36, No. 13, March 31-April 6, 2001). Ahu Waterfalls-ah hian Naga pasaltha hmingthang pakhat, Jadonang-a ngunhnam thiltithei (magical sword) chu thuhruk niin an sawi a, hei vang ringawt pawh hian anni chuan Tuiruang lui khuap hi an duh lo hle. Hei bakah hian, tuikhuah hian Ahu Waterfalls kiang vela dil panga, Naga hmanlai thawnthu (mythology) a dil pawimawh ber bera ngaih a tichhe dawn bawk.
Chutiang chu a ni a, pi leh pu atanga an lo rochun, an culture-a hmun pawimawh tak luahtu an hmun leh hmate chu he tuikhuah vang hian an chan dawn a, tin, a ramngaw leh leilung hausakna pawh kumkhua atan an hloh dawn tihna a ni bawk. An eizawnnain a tuar hle dawn a, mi engemaw zat chu kutdawhah an chhuak lo ang tih sawi theih a ni lo. Chu ai maha an lakrun chu an culture leh tradition-a hmun pawimawh tak luahtu an chan tur hi a ni. Chu lo rengah pawh, he tuikhuah awmna hmun vel hi lirnghin mai theihna hmun (earthquake prone area) a ni a, chutiang hmuna tuikhuah lian tak han din chu an ngam thei lo. Hengte avang hian Manipur lama a chim tur leh nghawng a neihna tur khuate chuan he project hi an duh lo hle a, a tir phat atangin an la do char char reng a ni.
A tuikhuaha ngau ngau hian Mizoram leilung 17sq.km a chim dawn a, thil dangah (catchment area) Mizoram leilung 2,153sq.km a awh bawk ang.
A ram awh tur zawng zawng (Manipur leh Mizoramah) hi sq.km 12,758-a zau a ni a, zaa 95 chu Manipur lam a ni ang a, zaa 5 chu Mizoram leilung a ni. Amaherawhchu, Tuiruang leh Tuivai infin luang zel hian a mawng lamah Assam-a Cachar District leh Bangladesh-a Syhlet District te pawh a nghawng tel dawn a, Bangladesh sorkar pawhin a enghelh hle a ni.
Manipur leh Mizorama he tuikhuahin a nghawng tur khuate chuan tuikhuah hi an phal lo a, an thiam ang angin an dodal thin. Mahse, an dodal hneh lo zawng a nih hi. An thiam ang angin an himna turin hma an la zui a, Mizorama a nghawng tur khuate chu an himna tur ngaihtuah kawngah hian an baihvai hle. Thingtlang mi, loneiha eizawng an ni a, mahni hna kalsanin NEEPCO hotute an dawr ve bap bap thin. Mizoram sorkarin a ngaihsak lo hle a, Mizoram sorkar hian a ram chhungah miin tui an khuap dawn tih a hre lo emaw'n le tih theih tur khawp a ni. 2006 lam atang khan Zozam Weekly chuan he tuikhuah chungchang hi tarlangin, a khawmite dinhmun te a lo tarlang tawh thin a, mahse, vawiin thlengin he tuikhuah vanga tuar turte hian puitu an la nei lo tiin a sawi theih ang.
No comments:
Post a Comment