Hei le rel chu

¢ Vanlalremruata Tonson

In pakhat chauh pawh ni lo, 30-40 vel, ke vir thei vuaha hnuh sawn tur, a kalna tur uluk taka siam ngai, level tha takah lo chuan tihdin mai mai pawh thil harsa tak tur tih hriat ngawih ngawih, a thil phurh chauh ni lo, a in rit lutuk, ke vir thei leh lir duh tak chunga innghat din tir chu thil awlai tak a ni lo ang tih a hriat mai. Chutah a in khat tlata bungrua dah tura ruahman; chu chu Mizoramin lakluh a tum mek - rel chu a ni. Khawvel chuan harsa ti lo takin hetiang thil ropui hi a din thei tawh. Sum sen pawh a ui lo, a mamawh miau a, a nei thei bawk.

A tirah chuan lung tumte, thing tumte hmangin thil an karsawn ang. Mihring chanchin mumala chhinchhiah a awm hma zirtute chuan ngaihdan hrang hrang an nei ang. Chutiang thil mawlte te chu hmang tangkaiin thil bial vir thei chu thil rit tihsawn nan a hman tangkai theih tih an hmuchhuak ang a, tawlailirte an siam ang a, rel thlengin an siam thei ta a ni mai. Mamawhna leh sum leh paiin tlin viau lo chu ni se suangtuahna khawvel thil ni awm tak a ni. Suangtuahna leh a taka thil thleng thei lo tur ni awm tak chu a taka chantir turin an tum a ruh a, an thei ta mai a ni ber. A theih loh kan tih fo hi a theih tih a chiang hle. Rel pawh kan duh chuan kan nei em em ang. Kan rin leh suangtuah thiam aiin a nghawng a na bawk ang.

Khawthlangho hi khawvelah chuan hmasawn leh changkang hmasa, khawvel ngamtu an ni. Rel pawh a hmuchhuaktu leh hmang tangkai ber an ni. India laka ui hum pawh zat lo tur ni awm takin heti taka ram zau leh a mihring pawh hetiang zozai mai an awpbeh tlat theih nana thil tangkai tak chu rel a ni tih loh rual a ni lo. Hel rel hmang hian India hausakna chu a hnuhin an hnukchhuak a, an phur liam a, sum tam tak an lei chhuak a, chu sum hmang chuan power (thil tihtheihna) an lei leh a, chu an power chu thiam taka hmangin India sub-continent chu kum 100 zet zawt an awp bet ta a nih kha.

Mahse, rel hmanga thlentir an tum miah loh thil pawh rel chuan India ramah hian a thlen ve tho. Mipui an inpawh a, British chu an tan hian hmelma tur a ni tih an hriat phah a, inpumkhatna nghet tak a siamsak bawk. Tun hmaa inen hrang leh inhmusit em em thinte kha rel chhungah chuan inthliar a lo har a, zin a lo awlsam tawh a, hnam changkang leh thianghlim inti Brahmin tan pawh rela zin chu a chakawm a, mahse, khawih thiang lo leh hnam hnuaihnungho thutna a ni palh ang tia thut duh loh emaw sil phawt zel emaw chu thil theih a ni lo. An inchiahpiah a, chu chuan ngaihdan leh thlir dan thar a neihtir a, British-ho nawrchhuak turin an tangrual a, an nawrchhuak thei ta reng a ni.

Tichuan, rel chu India ram hneha awpbeh theihna hmanraw tha tak leh British leh India te inhuattirtu, British-ho nawrchhuak thei tura tanrualna thlentu a ni. Sumdawnna kawnga bungraw phurh vel nan a tangkai a, hlawk taka an sumdawn theih phah chu thuhran ni se, sipai leh an mamawhte rang taka, tam lua awm lova phurh sawn zung zung theihna chuan mi tlemte pawh a tihchak loh nakah. Mi tam zawk ruai tura sum an nei theih phah si chuan.

Mingo-ho thil tih dan a dik lo tih hre pha ve vek, a huat pawh huate pindan pakhata an awm tlan fo chuan engah nge tanrualna chang pawh an hriat ve mai loh ang?

Thil ropui tak, engkim peih a nih tawh hnua a lan dan erawh mawlmang ang reng viau, mihring chesawn thei leh ngaihtuahna nei bawk chuan awlsam tak an chhawr ve mai theih chu rel hi a ni. Kum 100 zen zawn an lo hrawn tawh chu India mipuite thinlungah chuan nghet tak a ni. Tuithiam chu awlsam taka li-a an lut ang hian rel tlan chak tak atanga chhuk tur pawhin harsatna an nei lo. Mizopain hlo thlawh a hneh tluk zetin a tih dan tur leh an hlawkpui dan tur zawng zawngte lamin rel thlenna hmuna cheng India mite chuan an hre chiang. Eizawnna bera an neih a nih tlat avangin nitin tui thianghlimlo hralh hmuh tur pawh an awm.

Chutiang chu Mizoram pawhin lakluh ve a tum mek chu a ni. Mi tam tak chuan rel ropui lutuk Mizorama a rawn tlan ve tluk tluk tur chu ropui an lo ti lawk hle ang. A kawng hrim hrim pawh a pui alawm. Mihring aia infrastructure development ngai pawimawh zawkte tan chuan ropui han tih loh rual a ni lo. Kawr ruam an hnawhkhat ang a, tlang an rawt hniam bawk ang a, feet engemaw zata zau chu a zawl mam pur mai dawn a ni. Lei an verh kaw hur bawk ang. Tlang pang sir laih heka zawl ve deuh siam a, kawngpui tha tih ngawt ai chuan a hmel chu a pui dawn chiang alawm. A chhuatte lah alkatra hmanga rawra charkhawm a ni ringawt dawn lo a, kawng siam dan pangngai angin muk tawkin an lei chhun pawn leh rawt hniam chhuat chu an sawh muk ang a, motor eng tianga rit pawh tlan mah se a chhe ve mai mai lo ang. Chumi chungah chuan rawra lung chang tha tawk an han chhung leh te te ang a, chumi tan zawngin thing chang tha tawk an han kham ang a, chumi chungah chuan thir tlawn, rel kein a rah tur an kham zui bawk ang. A ru peih an awm hlauh a nih chuan a hlawk ve viau ang chu. Rel chetsual erawh a hlauhawm viau thung ang.

Mu diai diai chung pawhin Guwahati a thlen theih tawh ang a, sumo chuan ai chuan rela zin mai chu a thlanawm fe zawk ang. A hahdam bakah a chuan man a tlawm zawk fe dawn lehnghal.

Dawr bungrua vel pawh rela inthawn dan a awm chuan a tlawm zawk dawn a, vai fel tak thawhpuina chang hriat chu dawrkai hmangchang hria tihna a ni ngei ang. ILP nei lo tan pawh venthawn em em tur a awm lo ang. Rel hnathawktu zingahte chuan Mizo pawh an lo awm ve ang chu. "Vawiin chu kan pa a 'gate' lo a, ka bazar thei lo," tih aiah "Vawiin chu kan pa a 'rel' lo a…," an ti ve tawh mai ang chu!

Thil man tlahniam tur kan thlahlel tak tak a nih chuan Vairengte checkgate tihtawp chu sawi ngai loah pawh lo ngai ila, ILP tihtawp vat hi kan tih tur a ni ang. Engah nge mi inthamna sum tur mai mai kan lo thawhpui ve fo ang? Rel wagon khat tawp tawpa bungraw la thei tura thawhho dan thiam turin sumdawnna kawngah hian lo sang ve deuh tawh ila aw ti vawng vawng tawk an lo awm ang. Sumdawnna chuan hma chu a sawn ngei ang tih erawh chu a chiang, mihring pawh relin kan veivak nasa ang. Chuvangin rel station posting chu kum khat hlawha lei theih a nih chuan a iaiawm dawn lo a, 'black money' leh 'unaccounted tax' chu mipuiin kan thawh leh tliar tliar mai a ni ang chu. Checkgate-a mi tur pawh kan thawh tho avangin rel lo luh avang ringawt chuan chimral nih kan inring lo a; good governance kan neih phawt chuan kan him lohna chhan tur kan hre lo hlawm kha a ni a.

Kei ve erawh chuan eng tik lai mahin Mizoramah hian good governance hi beisei tur a awm lai reng reng ka la hre ngai lo. Sorkar sum chalai tam chu 'department mawm' tih hi kan thurolum ber tih hi ka hriat ve dan a ni. Sum tam tak sengin sorkar department kan nei thluah a, awm mai mai chunga indaih lo em em tur hnathawktu kan la tawk tawk a, mipuite min 'facilitate' tâk sawi tur ka hre lo, a hmingin kan tan hian sum tam tak an seng ve ringawt, a hming mai maiin. Ka mawhah pawh ka ngai lo, mipui leh sorkar department te'n inalichinna (relationship) an neih chhiat vangah ka ngai mai. Pawl din tur a ni tihte chu kan hria alawm, mahse, pawl chuan mipui leh sorkar department karah palai hna a thawk leh si lo. Ka hriat ve pakhat erawh chu MSACS leh HIV pai leh high risk group an tihte inkarah NGO an awm. Chu chu kalphung fel tak an neih vang a ni a, mahse, chu kalphung chu zawm harsa an ti ve hle ni awm tak a ni, ka lo ralhriat ve dan chuan. DRDA-ah te chuan chutiang chu kan la hmu lo a ni ang, kuthnathawh bansan kan chak zek zek hlawm a, khawpuiah kan pem khawm nasa em mai.

Ka rin ve dan mai mai chuan rel hian nghawng nasa tak rawn nei mah se kan 'statecraft' em chu a thlak lo ang. Tuna kan 'statecraft' chu sorkar fawng vuangtute tan hian a hlawk ber a, sumdawnna leh eizawnna a tling a, khawsaknaa insawhnghehna leh ngelnghehna a ni bawk. Kan value system leh moral te'n min pek chu chutiang chu a la ni rih tlat. Chutih a hnua good/citizen centric governance hmuchhuak tur em chuan hmabak leh tawnhriat tur kan la ngah ve deuh niin ka hria.

Rel chuan eizawnna thar tam tak a rawn siam dawn. Chu chu a chiang a, eizawnna thar kan bawh loh chuan 'intelligent living being' kan lo ni pha lo emaw a ni hial ang. Gang te pawh kan insiam ve ang chu. Kan nu leh pate an tar tan a ni tawh a, kuthnathawh kan peih tak tak tawh si lo, awlsam zawka sum siamna kan zawn mai loh nakah. Rel lo luh avanga 'statecraft' em a inthlak ring lo, good governance neih mai la hla deuha hre bawk si tan chuan agriculture administration a inthlak a, thangtharte pawh kuthnathawha an tui thar thut rin a har alawm. Rel lu hmu phaa awm tan phei chuan 'engah nge ni sen sa leh ruah sur hnuaiah kut hnathawka kan fehchhuah fo bik lem ang le?'

Thil pakhat ka hria, tha deuh tur; XI plan-ah hian hmarchhaka road connectivity atan cheng vaibelchhe 60,000/50,000 vel an dah e, an ti alawm. Thingtlang kilkhawr tak thlengin kawngpuiin a pawh dawn a, ramngaw hausakna kan phur chhuak ang a, relin kan thawnchhuak chur chur mai ang chu. World Bank-in kawngpuite min siamthatsak a, ADB lahin sum tam tak min puktir dawn bawk a, pawn lammi tana inhawng turin min nawr ngei dawn bawk a. Capital-te chu a lungngaihthlak loh, thurualpui tur sum ngah tak tak an tam ang. Tihah te chuan a sumdawng bera kan tan loh pawhin inhlawhna tha tak kan nei dawn hrim hrim. Kan ramte chu kan tichereu vek ang a a ni mai alawm. Kyoto Protocol leh carbon trading-te chu engah nge kan buai vak ang, tih tur neuh neuh a la awm ve dawn si a, tuna tam tawha lo vah tur tihte chu a ho e. Climate change te chu a control-na khawl thangtharin an la rawn hmuchhuak em em ang, lungngaihna tur a awm lo, research an bei tlut tlut reng alawm!

Hei hi thil man tlawm zawkna tur leh sumo aia hahdam zawka zin theihna tura kan ngaih rel nena kan thleng tur nia ka lo rin ve a ni a. Rel lei nan hian tha kan la ti tho a nih chuan thuhran a ni. Development a awm dawn chuan a tuartu an awm a ngai tih hi sawi a ni fo a, hei hi thil ni tur ve rengah kan pawm tur em ni ang tih hi ngaihtuah chian ngai deuh a ni. Thil tha lo a awm dawn tih hre renga chu thil tha lo awm tur ven dan kan zawng dawn lo a nih chuan 'intelligent living being' nih hi eng nge a tangkaina ni ang? India prime minister Mamohan Singh chuan 'development with human face' tih kha inthlan campaign laiin a sawi a ni awm a. Keini hian 'development with suffering face' kan ti dawn em ni ang? 'Development with money face against human face' te ti ila.

Development a awm dawn chuan a tuartu an awm a ngai tih hi: "Mi i rawk chuan sum leh pai i nei ang a, ani chuan a tuar ang. I eiruk chuan i hausa ang a, ramin a tuar ang" tihna em ni ang?

Tunge hmasawnna avanga tuar bik tur chu ka hre lo a, a tuar thin ka hriat erawh chu ram leilung neitute, mi rethei leh khawngaihthlak, chawikan ngai, tanpuitu mamawhte an ni. A hlawkpuitute chu nuam tawl theite an ni.

Khawvel chu mitha leh chak leh thiltithei chauhin kan luah ang a, chuta tling ve lo chu Hitler-a'n German hnam tha leh chak din a tum ang hian kan thehchhuakin khawvel atangin kan thaibo mai tur a ni tihna em ni ang, development a awm chuan a tuartu an awm a ngai tih awmzia chu ni ta ang? Globalisation-te pawh Hitler-a 'eugenic' a ni mai lo'm ni, pianpui identity kalsanin kan 'gene' chu 'expand' tur a ni tih kan changchawi ang a. Rel lo luh vang hian Mizo chu he khawvel ata 'erase' chu a ni kher lo ang a, mahse, new breed of Mizo chu a chhuak nasa viauin ka ring. Dumka-Mizo breed mah a chhuak nasa em mai.

Development keinin kan tih ve hi hmasawnna nge infrastructure siam tihte pawh hi ngaihtuah theih tak a ni.

Khawvel hian hmasawn a tum reng a, beih pawh a bei nasa. Hmasawnna thlen tura an ngaih tam tak chu a thlen lo mai ni loin chhiatna a thlen thin. Chutah chuan hmasawnna pek an tumte hian mawh an phur thui hle. |hal laia power indaih lo avanga kan inenchhawk (loadshedding) fo vangte pawh a ni mai thei, fur laia power hman sen loh nei chauh pawh ni lo Indian Energy Exchange (IEX)-a hralhchhuak thin hian hydel power project kan atchilh tlat a, ram tam tak tichhiain mi tam tak tawrhna thlen kan pawi ti der lo. Kan power transmission system hi eng tiang chiaha rintlak leh tha nge a nih kan ngaihtuah lo a, system tha tawk lo kan neih avanga power bothlau tam tur zia te pawh kan ngaihtuah lo. Chutiang kan system chu tuten emaw sum siam nana an lo hman avanga tha tawk lo a ni ang em tih lah kan ngaihtuah hek lo. Hman kumte kha chuan aggregate transmission & commercial (AT&C) loss kha 45% vel lai a ni. Mi thenkhatin power an ru a, transmission system atana kan hman tur material supplier-te hian sub-standard/defective material an supply a ni ang em tih lah kan ngaihtuah hek lo. Good governance chu awm se AT&C loss chu sang viau tur a ni lo. Kan society-a a pau thei deuhte chuan chulai chu an ngaihtuah tel lo ni berin a lang a, mi sum siamna leh hlawkna uchuak lo telna avanga kan thil neih tur ang nei pha lo hian sum siamna awng chu kan lo hnawh khat vel mai maite hi a ni mai lo maw? Power management/administration chu kan hmasawnna tur ni zawk awmah ka lo ngai ve deuh ngawt a, kei chuan.

Development kan ngaihtuah dan chu a 'citizen centric/human face' lo thei em a, Builumah pawh chhungkaw khawngaihthlak tak tak an awm a nih kha. Eizawnna pakhata innghat tamna ber nia lang loneihah te hian kan dinhmun chu hetiang hian a sawifiah theih ang: food production hi kan la control lo a, food chu kan domesticate ve tawh. Chumi bak chu agriculture-a doctorate-te leh IAS leh politician-te meuh pawhin min la thlenpui lo. Chuvangin kan ram compensation te hi danin a sawi dana dawng tur kan nih chuan a tam thei lo a, kan dawn pawhin kan lo inbenbel leh sawhnghehna ang dinhmunah min hlangkai ngei ang tih sawi ngam a ni lo. Eizawnna thar indap chawp a, khawsak bul tan tha leh turtein kan inbeisei a, hlawhchham hlauh chuan a bak a awm tawh lo. Sum tlemte nen an suangtuahna innghahna hmun, an mumangah pawh awm nia an inhriat tlatna hmun, an duh leh hmangaih berte an lo chhaina hmunte chu chhuahsan turin kan beisei a, chutih laiin mihausa leh thiltithei chuan an chan tur aia tam fe ruh(t) an tum leh si. Chutiang value system leh kalphung nei chuan infrastructure ropui tak hi kan phu em? Tih tak takah chuan thlarau lam nuna kan hruaitute pawhin nun kawng dik leh thaa min hruai ai chuan khawvel dan khauh tak min bel luih a, min khuahkhirh an duh zawk a, Pathian rawngbawlna aiin ram rorelna chu an ngai pawimawh zawk emaw tih mai tur kha a ni tlat a ni. 'Human face development-te good governance' te chu beisei thei awm pawh kan ni lo a ni.

Khawpuia chengte tan hian thingtlanga chengte chuan lo tuar rawh se, miretheite chuan mihausate tan an tuar tur alawm tih ngaihdan chu a letling leh pawm nuam zawngin kan hrilhfiah a, miretheite hian mihausa zarzoin inhlawhna tur an nei ang, tiin welfare economics-ah kan chhuah zawk mah emaw tih tur a ni. Ram leh resource dang awmte hi tlema a lo changkang hmasa deuhte hian insem zo sela midangte chu a hminga an khawngaihna dawng turah kan dah a ni ber.

Chu chu development kan duh avanga kan ngaihtuah chhuah ni ngei tur a ni, eng tik lai pawh hian mihring te chuan hmasawn kan tum a, thil thar kan hmuchhuak, tun dinhmun hi kan thleng theuh a ni. Hmasawnnain min tlansan ang tih kan hlauh luatah kan dinhmun hre chang lo lekin khawvel hmasawnna chu kan buaipui a ni. A changin globalisation kan ti a, liberalisation te pawh kan ti bawk. Globalisation/liberalisation chu kan mithiamte pawhin Multi-National Company thil siam kan neih ve theih phahna tiin an hrethiam ta reng a ni. Thil tha tak tak man tlawm zawka kan neih theihna chu thil tha niah kan ngai ta vek nghe nghe. Keiin an thu sawi atanga globalisation/liberalisation ka lo hriat thiam ve dan chuan dan rual loha thiltithei, engemaw ti taka harhtharna kan nei a nih loh chuan Mizote chuan kan ralpui ngei ngei tur thil thar/change a ni. A positive deuh zawnga thlir tan chuan Mizo thar a chhuak mai thei! |awng thu-ah Mizo tawng a ral ang a, chi leh kuangah mi tharte chuan Mizo chi an la pai tel ang, chu chu Mizo thar tia 'identify' tur.

Globalisation/liberalisation hi keia hriatthiam ve dan leh kan mithiamte sawi ka hriat ve thin chu a inang lem lo: Europe khuan kawng hrang hrangah hma an sawn a, chuvangin economic lamah pawh an thang uak uak mai a. Khawvel pawh an cho a, an ngam ta a ni. Hmasang Greek-ho ngam ang kha a ni lo. Chuvangin New Imperialism te a lo chhuak a, an hausakna chuan thuneihna te pawh a lei zo bawk. Chu chu 'colonialism' a ni a, khawvel chuan a buaipui a, an thawmah chuan midang an rawn harhchhuak ve a, 'decolonisation' an rawn ti ve leh a. Terrorism a lo chhuak ta a ni. Decolonisation zawhah chuan thuneihna an hum zuina kawngah Cold War a lo chhuak a, mahse, kal reng thei ni hek lo, a tawp a, terrorism chu a thuam chak hman hle nghe nghe. Cold War ber a tawp tawh a, khawvel hmasawnna leh thiltihtheihna chuan lanchhuahna dang a mamawh leh a, Globalisation chu a lo lar tak a ni. Indo awm miah si lovin thunei, thiltithei leh hlauhawmte an awm. Chuvangin an economy liberalise tur chuan finance, human leh infrastructure capital-ah hian confidence an nei sang hle. US khu he globalisation-ah hian a langsar ber chu a ni. Economic crisis an han tawk a, an confident lohna laiah chuan protectionism lam a hawi hmak chu a ni ber.

Kan sawi ve fo thin, 'global village-a cheng kan ni' tiin. Kan hriat tel tur chu chutianga cheng kan nih pawhin outskirt-ah kan awm a, 24X7 internet connection leh power supply kan nei thei lo a, tui supply tak ngial pawh kan nei mumal lo tih hi a ni. Kan resource tam tak chu phuar a la ni tlat a, chungte chu han liberate ve phawt tur a ni dawn lo'm ni, global competition-a luh kan tum chuan? Handicap saa luh ve thawr mai chu… a puarpawleng 'confi' deuh riauin a lang.

India hian a economy a liberalise a, disinvestment-te a kalpui hian a tawng pawng tih lo. A bikin media leh retail sector-ah chuan a fimkhur hle. Retail sector-ah hian 2005-te kha chuan inhnialna a nasa hle a, India hian tlin ve tawk tawh nia an inngaih hnuah an phal ve a nih kha. Kumina zau deuh zawka an hawn pawh khan foreign company-te an lian lutuk thei tih hlauhthawnna a la awm tho a ni.

Communist hruaitu ropui Lenin-a khan New Imperialism chu highest state of capitalism a lo ti ngawt tak nain chu aia sang zawk globalisation/liberalisation chu kan tawng mek a ni.

Rel chu kan economy liberalise-tu tur niah chuan ka ngai a, mahse, liberalise economy-a sumdawnnaah chuan kan tel mai thei lo ang. Kan capital hian pha chu ni se governance, business etc-ahte hian engemaw hmuh theih awm turah ka ngai. Tunah chuan hung hran, pawn lamin an chiahpiah tak tak loh kan la ni a, kan la no a nih pawhin chang turin kan capital chu a la puitling tawk lo a ni. Kan capital hian pha chu ni se kan sumdawnna tun ang chu a ni lo deuh ngei turah ka ngai a, dik tak chuan sumdawnnaah pawh hian thawhho thiam tak chu kan la awm meuh lo a nih hi maw le! Chu'ng te chu keimahniin hmasawn avanga kan hmuhchhuah tur ni lo, infrastructure-in min pek turah hian kan ngai tlat ni te hian ka hria. Kan 'confidence' chu kan finance capital emaw human capital emaw system emawa innghat ni lovin infrastructure, mi min rawn pek tur ni te hian kan hre bawk. Rel a lo lut emaw infrastructure pui tham tak kan nei emaw a nih chuan kan dinhmun tur nia ka hmuh ve chu thawhpui kan dap ang a, anni mihring ni se keini chu a chempui tih ang vel a ni ang chu. Rel ropui takah chuan mi tam tak an rawn chuang lut ang a, keini kan chhuak ve pheuh pheuh ang. Thil intiat lo a innek chuan a nek chak zawk awm a ni ngai e. A rawn chuang lutte chu an duhna hmun apiangah an zuang thla pheuh pheuh ang a, khawiah nge an thang zui tak pawh kan hre hlawm nang. A tam zawkin min chim ang a, sorkar chuan ro a rel zo lo nasa mai dawn si a, mikhual leh khawtual chu kan inep viau te hian ka ring thin. Thuneihna tak tak kan chan loh hunah chuan mihring chu awm mah ila, chu bak baka inchimral.

Tih tak takah chuan Sikkim pawh an bang lo, Sikkim hming thatna kan hriat zawng zawng hi hnam changkang zawkten Sikkimese hming hawha an tih vek. Shillong-ah lah an MLA hlui pakhat sawi dan takin 'Khasi Bengali speaking people' an lo ni leh fur a. Manipur-ah Meitei tam tak an awm a, mahse, chhiah pe tam ber leh Thangal Bazar hmun pawimawh lai ber luahtute chu 'Meitei Punjabi speaking people' te, 'Meitei Mawari speaking people' te an ni, an hel pawl chawmtute pawh chungte chu an ni. Motor mechanic neih that ber berte leh puanthui thiam ber ber hnam pawhin an ngam loh hi kan ngam bik ang emaw chu?

Rel hi kan mamawh vang ni lovin miin an chhawr tangkai tih vangin chhawr theihna tur awmin kan ring a, kan duh ve a ni. Transportation infrastructure lian tak hi mamawh tak tak tawh chu ni ila rel hi him lo deuh nia kan hriat pawhin thil dang kan ngaihtuah mai tur hi a ni a, entirnan kawng laklawha zuan thlak mai mai theih lohna ropeway ang chi te pawh. Rel ai chuan a senso a tlem zawk fe ang. Mi lo tih dan chhawm a, a that lohna awmte pawh chhawm vek tum lo keimahni dinhmun hrechiang leh zirchiang peih a, eng nge kan survive pui theih tur thil tha tih ngaihtuah a, tihhlawhtlin tum mithiam leh hruaitu kan mamawh hle. Economic/material revolution tih ringawt lam a ni lo. A bikin kan economist zingah hian chutiang ngaihtuah peih chu kan mamawh zual nghe nghe awm e.

Hahdamna te, tuna kan dinhmun aia tha hreta awm ringawt tumna te avanga mi tlemte tana kan ram hausaknate hi kan phalrai a, kawng zau tak hawn sak a, inhlawhfakah emaw hahdam taka khualzinah emaw kan lungawi mai dawn a nih chuan engah nge corruption te hi kan sawi fo? Chhiah tlem kan pek leh, kan tana mi chhiah tlingkhawm India sorkarin a rawn pek chu a hlawmin mi thenkhatin an lo ei bik a, chu chu corruption kan tih chu a ni mai a. Mi corrupt-ho zar chu kan hriat loh lamah kan zo fo a, inhlawhna pawh kan hmu fo. A inang reng, mipui nawlpui chan theih tur lo chhuhsak theuh theuh, hei lo liama corruption.

Sum leh pai te, hausakna te chu mi zawng zawngin kan duh ang chu. Mahse, hausakna leh sum leh pai te chuan eng nge min pek ang tih hi ngaihtuah ngai a ni. Kan himin kan thlamuanpui ang em? Thiltithei kan nih phah ang em? Khawvel chuan sum leh pai a zawng teh meuh mai, a tawpna chu himna, hlimna leh thlamuanna te hi a ni tho lo'm ni? Chuvangin materialism hian mihring nunah awmzia thuk tak nei mah se a tawpna a ni lo, indona te, politics te leh thuneihna leh chungnung zawk nih inchuhna te a awm a ni.

Hlawhfa hnam ni turah kan inngai a nih chuan rel chauh ni lovin corporate world pawh hi kan pan ruak ruak ang a, a zuanin kan zuan tur a ni. Chu chu kan duh chiah lo a nih cuan kan rural economy te hi kan thuamchak phawt ang a, kan hmeichhiate pawh Dumka MR hlawh it ngawih ngawih lo turin kan siam phawt ang. Chutiang bawkin thalai fel tak takte pawh MR hna it ngawih ngawih lo tura siam dan kawng kan ngaihtuah tur a ni. Rel lo luh man leh hetiang zawnga hmalakna man hi a danglam vak lo ang. Dik tak chuan rel lo lut avangin tawrh leh chan tur kan nei a, rural leh youth empowerment-ah pawh dawh rih a ngai ve tho ang.

Mizoramah hian thil man a to kan ti a, rel lo lut turin kan duh. Thil man chauh a tlawm lo ang a, zin man pawh a tlawm dawn ni-ah kan ngai. Tihah chuan Mizoramah hian thil man te, zin man te chu a to reng ang chu. Kawngpui siam laiin engineering knowledge aiin eiruk dan knowledge chu kan hmang tangkai duh zawk theuh alawm. Rel kawng anga ulukin kan kawngpuite hi siam ve ila, engah nge thil man chu a tlakhniam loh tehlul ang? Thil man tlawm ringawt nge kan um dawn a, corporate pakhatin a thil a hui tawk tawk bik tura hi transporter-te'n rualkhai zawkin insem se, chumi atan chuan kan kawngpuite pawh hi pangngai deuhin siam ila, kan ti dawn?

Motor-a bungraw phurh man hi a to emaw to lo emaw pe zo thlawt lo tur khawp chuan Mizoram sorkar hian min la tirethei lo e, chuvangin, motor-a bungrua phurh a nih avanga tlem kan chawi tam ve deuhte hi corporate pakhata lut khawm mai ni lovin Mizo mi hrang hrang kutah a lut a, Mizoramah hian semdarh a ni tih hriain i tuar rih ang u. Dik tak chuan an ei ruk leh road construction engineering-a an hriatna an hman that duh loh avanga kan chawi chuangtlaite pawh siam that an tum lo a, kan la lungawi lo chuang hleinem.

Amaherawhchu, rel ngei kan ti tlat dawn a nih chuan khawtual leh pemthar leh mikual inkarah intihthiam loh a awm zeuh ang tih pawm lawk ila. Kan rama thawk tura keimahni min la duh lo a, pawn lam atanga an rawn sawn lut emaw, an lak dawn pawha pawn lam atanga keini aia thiam hmel fe fe exam tura an rawn kal hunah chuan Assam-in an lo tawn thin ang hi kan tawng ang a, pawisawi lo kutthlak tiin kan la mualpho ve ang chu.

Related Posts :