Sex, Drugs & Money, Setana Betu Nen Darkar Khat

¢ lalremruata renthlei

Kum 2005 khan setana a be tan tawh a, chutih lai chuan kum 14 mi emaw chauh a ni. Tun hnaiah Vaivakawn biak in a suasam vangin police te'n an la a, a chanchin a thang ta. Mahse, police te'n la ngawt mah se sorkar ngaihah kum a la tling lo, misual hrem dana hrem theih a ni lo.

Hmeichhe rilru lian leh luhlul zet mai a ni a, a sawi duh loh thil te chu a sawi duh lo satliah lo, a sawi duh lo bur a ni tawp!

Setana betu a inti a, a sawi dan chuan amah chauhin setana hi a be ngai lo. Pawl an awm a, an pawl hming pawh ‘The Big Shooter’ a ni. The Big Shooter-ah chuan member nghet tak 15 vel an awm a ni awm e.

School naupang a nih laiin setana a be tan a, chu chu kum 2005 daih tawh kha a ni.

“Summer Camp kan neihnaah ka be tan” tia sawiin, “Tuman min nawr lui lo, ka duhthu ngeia ka biak a ni” tiin Zozam Weekly a hrilh.

Chutih lai chuan sikul naupang mai a ni a, summer camp an neihna Lungleng-ah setana an biak thu sawiin, a thiante - a sikul luhpuite nen an biakho thu a sawi.

“Kum 2005 April thla tawp lamah khan Lunglengah Summer Camp kan neihnaah ka be tan” tiin a sawi a ni.

A thiante hnung a zui nia sawiin, “Ka thiante'n a hmain an be tawh a, kei chuan ka zawm ve a ni mai. Ka be chak a, ka be duh a, ka zawm ve a ni,” a ti.

He nula hi kum tling lo a ni. Tichung chuan khawvel sualna thilah erawh a mikhual lo hle. Thil danglam tak awm erawh setana a biak hmain ruihtheihthil a ti ngai lo hi a ni awm e. Setana a biak hnuah chauh ruihtheihthil a ti niin a sawi.

“Setana ka biak hnuah chauh ruihtheihthil ka ti. A hma chuan ruihtheihthil ka ti ngai lo, ka biak hnuah ganja leh damdawi te ka ti thin," a ti.

Setana a biak hnuah erawh a nun a khaw lo ta hle thung. A tlachawpin a nung vel mai mai thin niin a sawi. Mipat hmeichhiatna lam thlenga chet pawlawh a awl thu pawh a sawi.

Mipat hmeichhiatna a hman hmasak ber chungchang sawiin, “Taxi driver hnenah a nia,” a ti. 'Tihluih emaw nawrluih emaw i ni em?' tia zawhna chu, “Ni lo, keima duhthu ngeia ti ka ni,” a ti hmiah.

Chumi hnu chuan mipa dang pawh a mutpui leh niin a sawi a, setana an biak vangin damdawi leh ganja te an hmu thei a, an ruih thin avangin sual dang a kaitho hma niin a sawi bawk.

Pawisa a ni emaw mamawh dang anneih pawh setana an dil mai thin nia sawiin, “Kan tawngtai a, min pe mai zel,” a ti.

Setana a biak chak chhan zawh a nih pawhin a biak chak hrim hrim avanga bia angin a sawi zel a, a bak a sawi lo. Chhungkuaah emaw khawtlangah emaw Kohhran-ah emaw lungawi lohna a neih a hre lo. A be chak a, a be tawp mai niin a sawi.

Mahse, Vaivakawn biak in a suasam hma hun rei tak chhung chu setana a biak tawh loh thu a sawi thung.

“Kum khat chuang ka be tawh lo,” a ti a, “Vaivakawn biak in ka suasam hma kum khat chhung setana ka be tawh lo,” tiin a dinhmun a sawi.

Mahse, Vaivakawn biak in suasam chu a lang tlat a ni ber awm e; a hma zanah biak in bul in ruakah a riak niin a sawi a, biak in a suasam tum pawh hian a tum lawk lo niin a sawi. “Ka tum lawk ka hre lo, biak in chhungah ka lut a, a thawh dan dan khan ka che ta mai,” a ti.

Biak in chhunga a luh veleh a chet nghal bawrh bawrh loh thu sawiin, “A tirah chuan thalai thutnaah ka thu phawt a, ka tawngtai,” a ti a, “Chairman thutnaah pawh thuin inkhawm kaihruai ang deuhin ka awm bawk,” a ti.

'Setan is God' tih a ziah chhan sawiin, “Ka rilruah a awm a, ka ziak a ni mai. Bible ka pawhthler chhan pawh kha ka pawhthler chak vang a ni,” a ti.

“Bible ka pawhthler chiah khan ka thlamuang a, chairman thutnaah ka thu ngawi reng,” a ti.

He nula hian hlauh a nei lem lo, zamna pawh a nei hek lo. Thim a hlau lo a, misual a hlau hek lo. Zawhna zawh pawhin a sawi duh loh chin chu a sawi lo mai. “Min zawt eng ang mah ula ka sawi dawn chuang lo,” a ti bur.

Mizoram Leh Setana Biak
Kum 2005 velah Mizoramah setana biak a hluar hle nia hriat a ni a, setana hnawhchhuah thawm pawh hriat tur a tam hle.

He nula pawh hi kum 2005 atang daih tawha setana be tawh a ni. Setana betute an lar hluai hnu, an reh takah khan an awm tawh lo emaw kan ti fur awm e.

Mahse, an lo reh awzawng lo a, felfai takin an lo awm zawk a tih theih ang. Pawl awm ngai lo kha pawl angin an awm ta a, puithiam an nei a, an puithiam chu an hruaitu a ni nghal.

The Big Shooter pawh hian puithiam an nei a, an puithiam chu hmeichhia a ni. An pawl member zingah hian mipa pawh an awm tho a, mahse, hmeichhia an tam zawk.

The Big Shooter te hi chuan zanah setana hi an be ve ngai meuh lo a, chhun engah hlir an be thin.

Setana biaknan hian thlanmual hmun an thlang thin. Aizawl khawpuia thlanmual zawng zawng hi setana biaknan an hmang deuh vek tawh niin a sawi.

“Aizawl khawpuia thlanmual zawng zawng hi chu kan hmang deuh vek tawh ang,” a ti mauh mai.

The Big Shooter te hi a tirah chuan member pariat emaw chauh an ni a, an tam ber tum lai chuan 15 an ni. A tlangpuiin 12 atanga 14 an ni deuh ber thin niin a sawi.

Setana an biak dawn chuan hriattirna dawng ang maiin an kalkhawm mai thin nia sawiin, “Tikhan kan kal khawm a, hmun hrang hrang atangin kan kalkhawm tawp mai. Chutiangin kan inhre lo,” a ti.

Big Shooter member dangte chu a hriat vak loh thu sawiin, “Kan inhmu a, kan inhria a ni mai a. A bak a awm lo, ka hre chhunzawm lo. Kan kalkhawma kan be ho a chuan kan kal hrang leh a ni mai a. An vengte ka hre si se lo,” a ti.

An puithiam hming chu han zawh ngial pawhin, “Rebeki a nia, Chhinga Vengah a awm” tih bak a sawi duh lo.

Setana betute hi pawl angin an awm a, Big Shooter bakah Wings leh C11 te pawh an awm niin a sawi.

Aizawl khawpuiah hian setana betu zingah a khaipa chungchuang a awm nia sawi a ni.

“A hming ka hre mai tawh lo, a nghawngah ganja hnah lem hi tattoo nei” tih chu amah a sawi dan a ni. “Pulsar bike a nei,” an ti bawk.

Bike rider zawng zawng ni lo, rider rual thenkhatte chu setana be thin an nia sawi a ni bawk. Mahse, tute nge an nih a, an pawl hming nen lama zawh pawhin a sawi duh lo.

He nula hian a sawi duh lo a ni mai lo, a sawi duh lo bur. A sawi duh tawh loh zawh thlen a nih chuan chhuanlam a siam a, zawh chhuah theih a ni lo.

An biak setana leh a kaihhnawih dang a sawi that duh loh chhan chu thuthlung an neih vang niin a sawi.

An thuthlung chungchang pawh han zawh ngial pawhin a sawi duh lo. Mahse, an thuthlung bawhchhetu nih chu a hlau a ni tih a hriat theih thung.

Setana a biakpui tumah a sawi duh lo a, police lamin an man zanah te pawh rei tak tak telephone-a mi biak a nei a, a mi biakte pawh a sawi duh chuang lo.

Thuthlung an nei a, an thuthlung bawhpelh aia hlauh an nei lo.

“Thuthlung kan nei a, kan thuthlung kan bawhpelh chuan kan na vak thin,” a ti.

He nula hi police te'n an man vel lai khan a T-shirt hak chu khawiah emaw a paih a, a T-shirt hak a paihna pawh hi a sawi duh lo.

“Kha T-shirt ka hak apiang khan engtin emaw ka awm thin a. Ka thaw te a hah thin. Keimahah engemaw tak a awm thin,” a ti. Mahse, a T-shirt hak lai a paihna chu a sawi duh chuang lo.

Setana an biak dan
Setana hnena inthawi dan pawh mumal takin an nei thin. An biak dan hi an hmuhchhuah niin a sawi a, midang te tih dan emaw film atangin emaw lehkhabu atang emawa an lakchhawn niin a sawi lo.

Setana hnena an inthawi dawn apiangin thisen an la a, an kut emaw ke emaw an zai thlera chuta thisen far chu no-ah an dawh a, chumi hnuah Rom bung 6 kher an pawt thler a, chu chu an hal a, a vap chu thisenah an chiah ta thin a ni.

Chumi hnuah Bible anhal vap thisena anchiah chu an in thin a, setana hnenah an tawngtai ta thin a ni.

“Kan tawngtai hian kan duh duh ka dil mai thin” a ti. An thil dil an hmuh fo thin thu sawiin, “A chang chuan kan dil hlawhtling vek lem lo, mahse, hlawhtlin a tam zawk. Kan duh kan dil a, pekin kan awm mai,” a ti.

He nula hi a malpui leh banah thisen sawrchhuahna hnuhma blade-a zaina ser a tam hle a, a ban dinglamah phei chuan hmun nga ngawtah a awm a ni.

Thla khatah vawi khat zel an inthawi thin niin a sawi a, an inthawina hmun ber chu thlanmualah a ni.

Hriattirna
Mizoramah hian amah chauh setana bia an awm lo a, Aizawl khawpui mai ni lo Mizoramah hian setana biaa a hnena inthawi thin an awm nual mai.

Setana betute hian a dera Pathian rawngbawl thinte hi an hre thei hle niin an sawi. He nula ngei pawh hian a hre thei a, hriattirna a dawng mai a ni.

Setana chuan biak ina inkhawmte pawh a phalsak vek a, mahse, tih tak zeta Pathian thu ngaihsak a phal lo thung.

“Inkhawm te pawh a phal vek a, mahse, Pathian thu kan ngaihsak deuh dawn chuan kan thaw te a hah a, kan buai thin,” a ti.

A dera Pathian be thinte pawh an hre tho nia sawiin, “An vai chuan min hriattir vek chuang lo. Mahse, thenkhat chu mipat hmeichhiatnaa fihlim chuang lo te, eiru te pawh an awm, chu chu min hriattir duh min hriattir mai a ni,” a ti.

Setana biak leh sual tih chu thil inkaihnawih lakhran theih loh a ni. Setana a biak hnu atangin he nula hian damdawi leh ganja zuk a ching. Chu mai a ni lo, nun khaw lo a neih phah a ni.

Related Posts :