“Chi inthliarna tuartu ka ni,” tiin chief minister Lal Thanhawla chuan a sawi lo.
“I am a victim of racism” a ti ni awma sawi chu Times of India leh CNN/IBN leh NDTV te tarlan a ni a. Mahse, “I am a victim of racism” tih tawngkam a hmanna a lang lo.
“I am a victim of racism” tih hi headline-ah an hmang fur a. Chanchinthar la khawmtuten a ngaihthlak nuam zawng leh mite ngaihven an hlawh theihna tura an phuah mawi a ni.
TOI chuan, “I am a victim of racism” tia thupuiah dah hnuah ti hian an ziak chhunzawm a. “India ramah chuan miten Indian ka nih leh nih loh min zawt thin. South India lama ka kal chuan chutiang zawhna chu min zawt thin a. Nepal emaw khawi ram emaw atanga kal angah min ngai thin. Northeast India hi India ram bung a ni tih an theihnghilh thin niin ka hria. Mi tam tak hnenah, en teh u, nangmahni ang bawkin Indian ka nih hi ka ti thin” tiin a sawi niin an report a.
Lal Thanhawla chuan sawi chhunzawmin, “India ramah hnam hrang hrang hlawm lian pathum an awm a - Dravidians, Aryans leh keini Northeast-mite” tiin a sawi bawk niin an tarlang.
Tun hnaiah Indian mi Australia rama awm te chuan vun rawng vanga harsatna an tawk mek a, hei vang hian Mizoram Chief Minister thu sawi pawh hi a lar zual phah niah a ngaih theih bawk.
Chutih rualin India ram hmun laili a an kal apianga harsatna tawk thin North East mipuite chuan Mizoram CM thusawi hi an pawm em em thung.
Times of India-in a report dan chuan he seminar-a tel Indian dangte chu an lawm vak lo nia sawiin, “A dik hlel deuh a ni. India mite hi then hran reng kan ni a, Australian ho chu an lawm ngawt ang” an ti thung.
Hetihlai hian Congress party chuan Lal Thanhawla thlavang hauhin, “Kum 1986 a Laldenga Chief Minister a nih theihnana a dinhmun kiantu hi ram hmangaihtu a ni,” tiin Congress party thupuangtu Manish Tiwari chuan a sawi thung a.
Singapore atanga media report tarlan dan erawh a inang lo hle.
India mi thenkhatten an ram chhung ngei North East a chengte an hriat loh luatna chu Mizoram Chief Minister Lal Thanhawla chuan international conference-ah chiang takin a tarlang nia sawi an awm thung a.
Singapore-a Indian Journalist The Hindu reporter P. S. Suryanarayana chuan ti hian a report thung.
Lal Thanhawla chuan, “Business of Water in India” tih chungchang sawinaah Northeast State-te chu India ram a nih thu sawiin, “Helai ka rawn thlen hnuah pawh mi tam tak chuan Indian i ang lo min ti a. Kan ram lamah ngei pawh ka kalna hmun a piangah Delhi-ah a ni emaw India chhim lamah a ni emaw Mizoram atanga kal ka nih thu ka sawi apiangin khaw’nge Mizoram chu tiin min zawt thin a. Mizoram chu India ram chhunga awm a nih thu ka hrilh thin” tia sawiin, “National leader nia inngai tam takte chu zawhna ka zawt let thin a. India ram ropui tak hi he khawvela hnam chi hrang pathum lian deuhten an luah tih in hre lo em ni, ka ti thin” tiin a sawi.
A thu sawi tih chiannan hian Lal Thanhawla chuan chhim lama chengte chu Dravidian-ho an ni a, hmar lamah Aryan-ho chengin khawchhak lamah Mongoloid thlahte an cheng tiin a sawi.
NorthEast India chu India ram laili atanga hmun hla tak a nih avangin harsatna leh buaina an tawk tam bik niin a sawi a. Hmasawnna tura sum (fund) tam tak dawn theih loh a nih thin thu sawiin mahse international financial institution kaltlangin Look east policy behchhanin Mizoram chuan hmasawnna atan funds tam tak neih dan a zawng dawn niin a sawi bawk.
The Hindu report dan chuan “I am a victim of racism” tih tawngkam pakhat mah a lang lo.
TOI leh CNN/IBN te report leh The Hindu report a inang lo. TOI velah chuan “Chi inthliarna tuartu ka ni” ti a headline an vuah chungin Chief Minister Lal Thanhawla sawi ang erawh chuan sawilang leh lawi chuang si lo.
The Hindu chuan, “I am told ‘you do not look like an Indian!’: Mizoram CM Lal Thanhawla” tiin an chhuah thung a ni.
Heng news report pahnih hi i chhiar ve ve a nih chuan a inang lo tih i hmu ang a, TOI hi sensationalised deuh niah a ngaih theih a ni a. “I am a victim of racist” tih tawngkam hi Lal Thanhawla’n a hmang lo.
Chief Minister Lal Thanhawla thu sawi hi kaihlek hlek niin a lang thei a. Vun rawng vanga hmuhsit a tawh thu a sawina a lang lo va, regional difference vanga an hai fo thu erawh a sawi.
Hetih lai hian phai lam chanchinbu thenkhat chuan Mizoram chief minister chuan India mite chu chi inthliar lama nasa (racist) anga puh leh amah pawh racism vanga tuartu a nih thu sawi angin an puangzar nasa hle a.
Mizoram sorkar pawhin thuchhuah siamin Chief Minister thusawi chu a nihna ang lova kalpui a nih thu an sawi a.
India mi ni chunga northeast lam mi a nih avanga hai a nih fo thu leh India chu hnam hrang hrang awmna a nih avangin taksa pianphung vang ringawt pawha inhaipalh awl tak a nih thu a sawi mai chauh niin tarlan a ni.
Vun Rawng Vanga Inhmuhsitna
Kum tinin zirna sang zawk duhin hmarchhak a zirlai tam tak chuan Delhi leh India ram khawpui lian zirna in tha an pan thin a. Mahse, tum tam vun rawng vang leh taksa inan loh vanga hmusitna an tawk thin.
“Tun hnaiah Australia-ah India mi thenkhat beih anni a, media lam chuan a nasa thei ang berin an puangzar a. Mahse, northeast mi tam takte tawrhna erawh an sawi lang ve ngai lo. Australia a Indian-te an sawisa hi kan dem viau rualin north east zirlaite India ram khawpui hrang hranga lehkha zirten hmuhsit leh diriam an tawk thin hi ka dem ve tho a ni” tiin Madhu Chandra, North East Support Centre and Helpline, New Delhi, thupuangtu chuan a sawi.
Chandra chuan, “New Delhi khawpuiah phei chuan kum telin hmarchhak zirlai an pung tual tual a, hnam hrang hrang zirlai pawlte nena zirlai lo kal tharte muanawm taka lehkha an zir theihnan kan inbe pawp reng a ni,” tiin a sawi bawk.
He center hian hmarchhak zirlaite puitu atan liau liau helpline service siamin phone numbers - 98681 84939, 98183 14146, 98681 57066, leh 98105 54901 bakah e-mail address info@nehelpline.net ah te biak pawh theih reng anni.
“Australia chauh a ni lo, India pawh hi a racist a ni” tiin Gyati Talo, kum 32 a upa Arunachal Pradesh mi zirtirtu chuan IANS a hrilh thung a.
“Delhi-ah ngei khuan tawngkam na tak leh hmusit takin min an khumin min um tawh a ni. Pian phungah pa lian ka nih loh vang leh mongoloid thlah ka nih vangin min hmusit a. Kum thum Delhi ka awm chhungin zan lamah ka chhuak ngam meuh lo,” tiin Talo chuan a sawi.
Center & Helpline ten figure an neihah chuan tawngkam mai bakah taksa khawih bawrhban (molestation) leh pawngsualte nen vek kum 2006 leh 2007 chhung khan north east zirlaite chunga hetiang tawrhna hi tum 100 a chuang a thleng.
“Kum 2008 khan Delhi police te hmalakna avangin a tlem sawt a, hmarchhak zirlai sawisak thu tum thum chauh kan beng a thleng a. mahse, hmeichhiate chhaih nawmnah leh zahmawh rawngkaia elsen erawh a tam tho mai” tiin Chandra chuan a sawi bawk.
“Northeast India atanga zirlai tam takten vun rawng avanga hmusit an tawk thin hi a tha lo tak zet a ni. Ka fanu pawh New Delhi-ah lehkha zirin a awm a, tum khat chu telephone hmangin a thianten mongoloid hmel a put vanga ‘chinky’ ti a an koh thu min hrilh a. Hei vang hian hrehawm a ti hle nghe nghe a ni,” tiin Assamese poet and columnist Samir Tanti chuan a sawi bawk.
Tu emaw chinky (mit zim vangin chinky an ti) tia an koh chuan north east ho an kohna a ni a. Chu chu Delhi mai ni lo India ram khawpui dangah pawh north east ho koh elnana an hman a ni.
Kum tinin Assam, Arunachal Pradesh, Sikkim, Manipur, Mizoram, Meghalaya, Nagaland leh Tripura atangin zirlai 80,000-100,000 velin India ram hmun laili paninlehkhazir in an chhuak thin a a. A tam ber chu New Delhi, Bangalore, Pune, Chennai leh Hyderabad ah an kal thin. Heng khawpui zingah hian New Delhi chu chi inthliarna lam hawi nasatna ber nia sawi a ni.
Sawi Hlawh Chief Minister
Lal Thanhawla tih hming chu a lar vet vet hle. Central-ah pawh dah hniam theih a ni lova, Congress party meuh pawhin a thusawi avanga rang taka a thlavang an hauh nghal a ni.
Internet blog hrang hrang leh ngaihdan sawina a piangah Chief Minister hian thlawptu a ngah hle a, a thu sawi vang hian public debate te hial neih a ni bawk.
Hetihlai hian North East Students’ Organization chuan Mizoram Chief Minister Lal Thanhawla chu an fak thu thuchhuah siamin an tarlang.
“Mizoram Chief Minister hian hmar chhak biala awmte rilru dik tak a pholang a ni. NESO chuan a nihna tak sawi ngam Chief Minister kan nei hi lawmawm kan ti,” tiin NESO Vice-Chairman Lalmuanpuia Punte chuan a sawi.
NESO chuan khawvel pumhriatah Mizoram Chief Minister chuan vun rawng avanga inhmuhsitna hmarchhak mipui ten kan tawrh thin chu a pho lang nia sawiin, “Mi zahawm tak a nih vangin Chief Minister Lal Thanhawla chuan racism hi a tawng lo a ni thei, mahse, vun rawng vanga hmusitna tawk tam tak tan hmahruauiin hruaitu a nihzia a lantir a ni” an ti bawk.
No comments:
Post a Comment