Chelsea Leh Ranger Inkhel A Hmunah

¢ Joseph Vanchhawng, Scotland

Nikum lam thil ni tawh mah se ka hriatrengna bawmah hian hmun pawimawh tak a chang a. Tunlaia football bazar-a player thate an insulpel zut zut karah hian ka thil hmuh leh hriatte hian ka rilru a luah em em a. Ziaka dahthat ve tha nia ka hriat ve avangin, season hmasaa pre season warm up match Ranger leh Chelsea inkhel ka en chanchin kha ka'n ziak thar ve leh teh ang. Mi tan eng tham ni lo mah se, ka tan thil 'hlu' a ni ve tlat. .

Football bazar hun lai a ni a, football fans te tan phei chuan ni tinin chanchin thar hriat tur a awm reng a. Bazar hun la tawp chiah lo mah se season thar atana inbuatsaihna hun hman chhoh mek a ni. Player awmsa leh lei tharhote chu inkokhawm tanin training an neih pui leh tan tawh a, pre warm up match nei turin ram dangah an zin kual vel tan tawh. Kei pawh he'ng hi remchangah lain, ka awmna Scotland-ah Chelsea-in warm up match Rangers nen an rawn khel dawn a, ka thianpa Philipino mi Fabian tia kan koh mai, France rama seilian, Monaco FC junior-a lo khel ve zek zek tawh nen en ngei kan tum a. Chelsea leh Ranger inkhel en theihna tur hian ticket kan nei fel thlap tawh. A inkhel kan en hma hauhin, a ticket kan neih vang ngawt pawhin ka lo hlim ve tawk viau a ni.

TV-a kan en thin, a tak ngei a khelmuala kan hmu tur chu ka vanneihzia hi ka sawi thiam lo a, mumang te pawh a ang duh awm mang nge ka lo ti ve rum rum ringawt a!

Chelsea leh Ranger inkhelh ni tur chu a lo thleng a, ka thianpa Fabian-a nen Ibrox stadium (hei hi Rangers home groud a ni) lam pan chuan kan kal a. Ka nghahhlelh lutuk vang nge, kawng te chu thui ta riau mai hian ka hria a, chutah le Ibrox stadium chheh velah chuan ka mit ngei hian ka hmuh chak chu ka hmu tan nghal phuk phuk a. Stadium pawnah Ranger fans ho an lo zi hut hut tawh a, an zauthauin an phur hlawm hle. Ka thil hmuh zinga mak ka tih deuh chu Rangers fans ho kha chhungkua ang mai hian inhre ngai mang lo pawh kha kum engemaw zat lo khawsa tlang hrep tawh ang mai khan, an han inhmu chu an inkuah thuak thuak a, an hlim tih an hmelah a hriat. Keini pawhin kan han kuah ve thuak thuak bawk.

Stadium chhung kan han lut chiah mai chu mit hian melh tur hi a hmu nasa lutuk a, mit pali neih a chakawm rum rum thei nia! Kan thutna tur kan thlen chuan inkhel chu chiang zeta hmuh theihna turin ground hnaih lai tak a lo ni hlauh mai a, vannei kan inti hle. Rei vak lo kan han thut hnuah Chelsea players-ho chu in-warm up turin tunnel atang chuan an rawn tlanchuak ta. An player chhuanvawr, an captain ni bawk John Terry ngei mai chuan hma rawn hruaiin mual chhungah an rawn lut ta. Mipui thawm a tha kher mai.

Thawm a ring lutuk a, kan beng a chhet mai ang tih pawh hluhawm tak a ni. TV-a ka lo hmuh ve thin Drogba, Lampard, Jo Cole, John Terry te a hring hrana an warm up la lai te leh ball an chaih kual vel ka'n hmu mai chu awm ngaihna ka hre lo tep a ni. Ka camera ka lek chhuak vat a, ka hmet nghal mawlh mawlh a, kan thutna a hnai bawk a, an hmel pawh a chiang duh khawp mai.

Warming up an neih zawhah dressing room lam panin an lut leh a, chumi hnu rei vak loah Chelsea leh Rangers players ho chu tunnel atangin an rawn in kai chhuak leh dam dam a. Mipui thawm chu duhthusama ring a ni.

Chelsea lam atangin John Terry-a'n hma a rawn hruai a, Rangers lam ve thung chu an chhuanvawr Berry Ferguson-a'n a rawn hruai thung. Match an tan deuh nghal mai a, an palian a, an che vel pawh hmuh a nuam hle mai. Drogba te hoin Lampard te ball siam an han um phei mai thin te chu a hlauhawm thei khawp mai.

An innawr tawk chho viau a, a khawi lam lamah pawh goal hlauhawm a awm thei deuh reng. Thawm a ring tluan chuak parh. A mual neitu Rangers lam chuan engtin tin emaw an rawn nawr phei fuh leh hlauh. An rawn pet goal ta mai. An thawm chu mitdel te hriat khawp tih ang mai khan ring tak a ni tih bak hian ka sawifiah thiam lo. An inkuah thuak thuak a, an lam a, an au a, a te teng tung mai.

Chelsea lamin an nawr viau na a, an thun hlei thei lo. Drogba tlan chak zia kha aw.. Lampard ball pet thiam zia te kha.. Mahse Rangers bawk chuan an rawn thun belh leh ta mai a. Hun a tawp zui ti tih.

Ranger chuan Chelsea chu 2-0 ngawtin an lo hneh a, ka player hmuh chakte hmel hmuh theihna remchang ka nei a, ka lawm hle. Inkhelh laia stadium thawm a tha ang bawkin stadium pawn pawh pui tak a ni. Hlimna ni ropui chu a lo thleng tih hla ang deuh khan, an hmel a hlim em em vek. An hlimna leh lawmna chu zawmpui chak ve viau mah ila, hnathawh tur la nei kan nih vangin kan awmna lam ka thianpa nen chuan kan pan dun leh ta hnak hnak a.

Related Posts :