¢ David M. Thangliana
Mizorama a hmasa ber tur Call Centre dinna tura ZIDCO leh Public Soft India Corporation (PSCI) te'n Memorandum of Understanding an ziah chu a chiangkuang lo hle a, han zirchian tak tak chuan a tha lo tih a lang mai a, hemi vang hi a ni mahna, ZIDCO lam chuan he MoU hi an uibet hle a, a file pawh ZIDCO MD chuan a room-ah a kawl daih nghe nghe a ni.
Vanneih thil thu-ah he MoU copy hi thla hnih thla thum liam ta khan ka nei nawlh mai a, call centre-a hnathawkte leh an hotute inkara inhmuhthiam lohna a lo awm takah chuan ka MoU copy neih chu ka'n haichhuak a, ka han zirchiang ta a ni.
Call Centre dintute hian call centre din nan mamawh engkim an intum vek tur ni awm tak a nih laiin ZIDCO lam tum turin Rs 109.20 lakhs chu MoU-ah hian a awm vang mai a, an tum tur tih thu erawh chu MoU-ah hian a chuang hauh lo thung. MoU-a a lan dan chuan Call Centre Operation tih hnuaia paragraph 3.6-ah “PSC will pay for all the working capitl cost of the Call Centre & ITES Training Centre” tih a inziak a, hetichung hian Call Centre atana mamawh chi hrang hrang leina Rs 90.70 lakhs leh Training Centre atana mamawh leina Rs 18.50 lakhs te chu ZIDCO theh chhuah tur angin alang lawi bawk si a. Hemi ringawtah pawh hian he MoU hi a chiangkuang lo nghal ringawt mai a ni.
MoU-a Annexure II Training Centre mamawh leina tur list an ziah chhuah hnuaiah 'Terms & Conditions' tih a awm a, hetah hian Payment terms tih a awm leh a, hemi ang hi chuan Rs 20 lakhs chu PSCI hnenah pek nghal tur tih a ni, Rs 45 lakhs chu thlahnih hnu-ah pek leh tur niin Rs 109.20 a tlin nana a bak la awm zawng chu thla li hnu-a pek leh tur tih a ni. Heng ZIDCO-in sum a sen zawng zawng hi rulh let leh tur tih a awm lo a, mahse rulh letna ni awm takin hlawhtling taka call centre hi run a nih hnu kum khat atangin thlatin PSCI hian ZIDCO hnenah Rs 1 lakh a pe ang tih a awm a. Hetiang ang chuan kum 10 atana MoU sign-ah hian kum 9 chhung thlatin PSCI hian ZIDCO hnenah cheng nuai khat a pe ziah tur a ni. Chutih lai erawh chuan PSCI hian pawisa a pek tur hi lo pe ta lo se hremna dan engmah a lang lo a, PSCI hian a duh chuan a pe lo reng thei tihna tlukah a ngaih theih awm e.
MoU Annexure I leh II-ah hian Call Centre leh Training Centre-a mamawh tur chi hrang hrang ziah chhuah a ni a. Chung zingah chuan generator 2, UPS 3, computer, headset tih ang reng a tel. Mahse, MoU-a ziak loh angin tunah hian PSCI hian generator 1 leh UPS 2 chauh a la dah a ni. Headset pawh hi 70 lei tur tih a ni a, pakhat man Rs 5000 zela chhut niin a zavaia man chu Rs 3.5 lakhs a ni. July ni 14 khan Call Centre awmna hmun Ch Chhunga Bus Terminus hi ka va tlawh a, headset te hi pakhat mah hman a awm lo a, an lo dah that pakhat ka en chu computer dawra Rs 500 man awm vel hi a ni a. ZIDCO lam hian an MoU sign puite thil lei hi an check lo reng reng niin a lang.
MoU-a Annexure III-ah chuan ITES Training Set Up tih a awm a. A hmalama an lo ziah danin ni khatah batch thum zela zirlaite train tir an ni ang a, batch khat train chhung hi darkar hnih leh a chanve, a vaiin minute 150 a ni. Mahse Annexure III-ah hian training hun an dah dan chuan Call Centre Technology zir nan minute 40, English Speaking & Accent Training zir nan minute 40, Call Centre computer lab a zir nan minute 45 tih a ni a, zir chhung hi a zavaiin minute 125 a ni. Heti a nih chuan zirlaite zir hun chhung tur tih minute 150 atang chuan minute 25 a chuang ta der mai a, ZIDCO lam hian MoU hi an zirchiang lo hle a nih ngawt loh chuan helai zir hun chhung inang lo hi hmuh thelh chi ni pawhin a lang lo. Mahse sawiselna awm thawm hriat a la ni lo.
ZIDCO hian a tih ve tur MoU-a a lan dan chuan Call Centre dinna atan hian hmun zau tawk tak, square feet 10,000 atanga 15,000 a pe ang a, he hmun hi Ch Chhunga Bus Terminal building-ah a ni ang tiin a inziak a. ZIDCO lam hian intiamkamna an neih hi an hrechiang lo nge CBT building call centre atana luah an han tum chuan alo rem der lo mai a, dawr tura siam, a chhawng hnihnaah chuan engtin tin emaw an invawm lut ta ringawt a, bang te thiah a a ngaiin siam danglam a ngai ta a, hemi atan hian (electric leh tui bill tiamin) Rs 45 lakhs lai PSCI hian a seng niin ZIDCO hian an sawi a ni. MoU hi felfai in ZIDCO hian thil chian hmasa lo a thil ti ni lo se chuan sum senbelhna hi a awmin a rinawm lo.
ZIDCO tih turah hian “ZIDCO will pay to PSC as per the terms mentioned in Annexure I & II” tih a awm leh a, hei hi a hmalama kan sawi tawh kha a ni. Mahse PSCI hian ZIDCO hi a rul leh ang tih engmah a chuang leh hauh lo thung a, hei hi thil mak tak chu niin a lang.
MoU hi ziah fel vek a nih tawh avang leh Mizoram sorkar sum cheng tam tak hman tawh a nih vang hian MoU hi sawisel mah ila tih theih a awm tawh lo a. Tih theih la awmchhun chu call centre hi tha taka hna thawk thei tura siama, hemi hmuna kan thalaite’n thlakip-a inhlawhna an lo hmuh ve theih dan hi ngaihtuah a ngai ta a. Private company mah ni se Mizoram sorkar hian call centre-in hnathawka a rawihte hi an hlawh tha taka a pek theih nan PSCI pawh hi a vau zeuh zeuh a ngai mai thei a, chumi atan chuan sorkar pawh a inpuahchah a ngai awm e.
No comments:
Post a Comment