Thil Man Sang Engtia Tih Tur Nge?

India ram state khawpui zinga ‘cost of living’ sanna ber pawlah Aizawl khawpui hi a tel mai thei.

Taxi chuan man a to a, bus chuanman pawh chuti tho.

Thawhchhuah nei ve lo state kan ni a, chhiah lakna tur mumal kan nei lo. Aizawl khawpuia chen erawh a hautak hle thung. Thil man sang lah chuan zual lam a pan tial tial a, tharchhuah aia chawkluh a tam tlat avangin kan buai lo thei lo.

Sorkar tan pawh thil man bithliah hleih theih a ni lo. A chhan ber pawh supply a control theih tlat loh vang a ni.

Kan neih chin tur kan hre thei lo a, kan hnianghnarna tur pawh kan hre thei lo.

Furpui a hnai a, buhfaiah kan buai nghal titih a. Dimasa helho an hlauh vangin hun rei lo te rel a tlan thei lo a, buhfai-ah buaina kan tawk nghal titih chu a nih kha.

He state hian inghahna tur ro thil kan nei si lo. Vawiin thlengin kawlphetha kan duh tawk kan nei thei lo a, sum lakluhna tur tharchhuah kan nei bawk si lo. India sorkar sum ringin kan nung ve tawk tawk a ni ber.

Aizawl khawpuiah thil man a sang tial tial a, intodelhna kan neih loh vanga sang tial tial a ni. Eng thilah mah kan intodelh lo a tihtheih. Sa-ah tak ngial pawh kan intodelh zo lo.

Arsa ringawt pawh kg-ah Rs 180- a ni tawh. Chtih laiin minimum wage of labour chu Rs 103 emaw vel lek a ni. Chumi awm zia chu patlingin nilenga hnathawk a a hlawhchhuah chuan sa kg 1 pawh a lei zo lo tihna a ni.

Nikum khan Mizoram Consumers’ Union hruaituten State Transport Authority-in motor chi hrang hrang chuan man nasa taka a tihsan chu ennawna, tihniam turin khatih hunlaia transport minister Lalrinchhana an ngen a nih kha.

MCU hruaitute chuan City Bus leh Town Bus, Bazar Bus, Night Bus, MST Bus chi hrang hrangte, Taxi leh Maxi-Cab chuan man tihpun chu mipui mimir leh miretheite dinhmun ngaihtuahna nei lova thil tih nia an ngaih thu te, ennawn leh thuai a nih loh chuan mipui tuarna a nasa lutuk dawn nia an hriat thute an sawi a ni.

MCU te chuan Mizoramah hian India ram state dang zawng aiin Pertol leh Diesel man a tlawm a, chawhrualin state dang aia petrol man tlawmna hi litre l-ah cheng 5 vel a nih laiin diesel chu litre 1-ah cheng 4 velin a tlawm a, motor chi hrang hrang chuan man tihsan hma pawh khan Mizoram hi India ram state dang zawng aia Bus, Taxi leh Maxi-cab chuan man sanna ber a nih tawh thute an sawi lang tel bawk a ni.

MCU hruaitute chuan chuti chunga Taxi chuan mante, Maxi Cab leh Motor dang chuan mante tihsan nawn leh a ni chu motor neitute hlawkna chauh ngaihtuaha mipui rahbehna a ni tiin minister chu an hrilh a, City Bus, Bus dang, Maxi-cab leh Taxi neituten Association siamin sorkar an nawr a, hetih lai hian mipui lamah an dinhmun sawitu an awm ve lo a, an aiawhtu ber, Mizoram Consumers’ Union hruaitute pawh mipui vantlang nghawng chi, hetiang thil relnaah hian tel tur emaw, an ngaihdan sawi tur emaw a sawm an ni lo chu dik lo an tih thu Minister chu an hrilh bawk a nih kha.

Tun hnaiah MCU lam chuan tha thawh lehin Bus chuan man tihsan an duh loh bakah ticket system-a kal an duh thu an tlangaupui leh bawk.

Mahse, ticket system chu Bus neitu lam chuan an duh bau lo thung. Motor neitute chhuanlam ber chu Petrol leh Diesel man to zel a ni ber a, mahse, a nihna takah chuan Mizoramah India ram hmun dang aiin petrol leh diesel a tlawm si.

Tun hnaiah pawh khawvel pumah ram hrang hrang te economy-in chhiat lam a pan vangin India ramah ngei pawh thil man tihhniam a ni. Insakna bungrua te leh thil dang dang pawh nasa taka tihhniam a ni. Mahse, chu chu Mizoramah chuan kan hmang leh chuang lo. A chhan chu a man sanga kan hralh theih tho vang a ni a, dawrkaiteah compettition a awm loh vang a ni bawk.

Thil man sang hrim hrim hi tun dinhmunah chuan ‘control’ hartak tur a ni. Tunah pawh sa man bithliah chungchang khel mek a ni a, rualkhai zawka tih theih dan zawn mek a ni.

Buaina kan neih thin taka chu a tova lei duh an awm tho thin hi a ni. A tova hralhtu te’n an hralh thei tho. Chumi awmzia ber chu kan intodelh thlawt loh vang a ni.

Vawksa chungchangah pawh Mizo vawk note ai chuan Burma vawk note a tlawm fe zawk. AH&Vety-a thawk doctor te chuan, “Hriselna lam ngaihtuah pawhin tualchhung vawk hi vulh vek thei ila a tha zawk a, chutiang hawi chuan hma kan la a, mahse Burma hovin an vawk an titlawm vak a, mipui ten kan nep leh thei lo. Chumi a nih vang chuan vawkpui vulh duh an awm tam lo a ni,” an ti.

Kan vawksa man chu indirect takin Burma hovin min ‘control’ sak a nih tak ber chu. An vawkte chhiar to leh tlawm a zir zelin vawksa man a toin a tlawm mai dawn a ni.

Vawk ang tho hian bawng te pawh a ni tho. Burma lam atang leh state pawn atangin kan lalut a, Mizo bawng tia kan sawi thin erawh Aizawl khawpuiah ngat phei chuan a sa hmuh tur a vang khawp mai.

Sorkar Hnathawk vanga Thil Man Sang
Mizoramah thil man a pung a, chu chu sorkar hnathawkte hlawh milin a kal thin. Vawksa, arsa te pawh a rate chu tunah hian control theih a ni miah lo a, a hralh theih tih a chian miau avangin a rate hi duh zat zat a chhiar theih tlat. Sorkar hnathawkte'n sum an lalut tam tih hi mipuiin an hre tlat. Chu chuan thil man a tipung a, mahse, lakluh pung kha chu sorkar hnathawkte chauh an ni si ang.

Nikumah khan sorkar sum hmuh zawng zawng atanga za zela 26.49% chu sorkar hnathawk hlawhah hian a kal a, kuminah hian a pung lehnghal. Chutah, budget pharh hnu, tun hnaiah Mizoram sorkar chuan a hnathawkte hlawh a'n tisang leh a!

Kan budget sum heti zat hi sorkar hnathawk hlawhah a kal ral thin hi puitham tak a ni. Office inrelbawlna te, lirthei enkawlna te leh thil dang dangah a liam teuh teuh bawk. A nihna takah chuan Mizoram budget za zela 50 vel lai hi sorkar hnathawk hlawh leh inenkawlna behbawm velah a liam zel a ni. Chu mai a ni lo, eiruk tam tak a awm kumtin bawk! Sorkar hnathawk te hi Mizoram population atanga chhut chuan 7.8% vel chauh an ni a, 93% vel chu sorkar hnathawk lo an ni si a, manganthlak tham a ni.

Kum hlui (2007-2008) chhunga Mizoram mipui sum thawhchhuah/lakluh chu cheng vaibelchhe 3,287 leh nuai 89 nia chhut a ni a, heta sum lakluh zinga za zela 67.12 zet chu sorkar hnathawkte lakluh a ni. Thil siamchhuahna lama thawk (industrial sector)-te lakluh chu za zela 17.65 a ni. Kuthnathawktu - lo neih leh huan thlai bakah ran vulh, sangha dil siam leh ramngaw hausakna hmanga eizawngte lakluh erawh chu za zela 15.23 chauh a ni.

Kuthnathawktute hi Mizoram mihring tam ber an ni a, Mizoram mihring zawng zawng atanga chhutin zaa 70 vel an ni. Chumite lakluh chu zaa 15.23 a ni a, chutih laiin zaa 5 vel (sorkar hnathawkte lakluh) chu za zela 67.12 lawih a ni thung. Chu chuan Mizoram hi ram rethei leh rorelna that lohna hmun a ni tih a tarlang.

Nikum khan Mizoramah sorkar hnathawk 47717 an awm tih tarlan a ni a, 2001 chhiarpuia Mizoram mihring zat 8,88,573 atanga chhut chuan mi 1000 zelah sorkar hnathawk 53 vel an awm zel tihna a ni. Mizoram mihring zinga za zela 5 aiin an tam hret a nih chu.

Mizoram chu sorkar hnathawk tamna ram a ni a, Mizoram chu mi tlem tein sorkar budget an insem zawhna ram a ni bawk. Sorkar hnathawk tam zawngah chuan a ram mipui zat atanga chhuta za zela 5 chu a tam tham hle a, chutih rual chuan mipui thawhchhuah zawng zawng zaa 67.12 lawih thawkchhuaktuah chuan an tlem hle thung. Mizoram hi a buai tihna a ni ber.

Kum 2001 chhiarpui chuan Mizoram puma hnathawktu zawng zawng zinga 60.6% chu agriculture-ah an inhmang a, leilet leh thingtlang loneiha eizawng chhungkua 88819 an awm bawk. Chutih laiin 2006-2007 khan agriculture and allied sector hian GSDP (Mizoram gross state domestic product)-ah 16.02% lek a thawh thung. 2007-2008 chhung phei chuan 14% chauh a thawh a ni.

2001 chhiarpuiin Mizoram hnathawktute dinhmun a tarlan dan chuan mihring 8,88,573 zinga 4,67,159 (52,57%) chu hnathawh nei (worker) an ni a, thingtlangah hnathawh nei tam zawkin 57.20% chu hnathawh nei (thawkchhuak) an ni a, khawpuiah chuan 47.87% chauh hnathawh nei an ni.

Mizoram mipui tam berte hnathawh chu a hlawk lo hle tihna a ni. Loneiha eizawng chu Mizoram mipui zinga a chanve aia tam ni mah se GSDP-ah chuan 14% vel chauh an thawkchhuak ve a, chu chuan he hna hi a hlawk lo hle tihna a ni.

Mizoram economy-ah hian hna penhleh zawk deuha ngaih tertiary sector (service) chu a thawhhlawk ber a ni reng a, GSDP-ah 2007-2008 khan 65% chu he sector thawh hi a ni.

State pum economy-ah hian secondary sector chu GSDP-a thawhhlawk lamah tertiary sector dawttu a ni a, 20% vel a thawh a ni. Secondary leh tertiary sector amiten GSDP-a an thawh chu 85% bawr tihna a lo ni a, chu chu hnathawhtu zinga 39.45 vel thawhchhuah a ni

Mizoram University-a economics ziritirtu, Professor Tlanglawma chuan Mizoram kalphung chu tha lo a tih thu sawiin, “Sum a awm a, sum chuan production a siam tur a nia. Kan pawisa dawn te'n production siam si lovin a thamral a, circulation of money a sang a. Thil man state dang zawng aiin a to lo thei lova, kan pawisa dawnin thil hlu engmah kan siam si lo, kan sum neih chu hmun dang atanga thil lakluh nan kan hman a ngai si a ni,” a ti.

Mizoram budget atanga sorkar hnathawk hlawha kal ral zat hi 50 leh 60% inkar vel chu a ni a, Budget atang a pension a kalral ringawt pawh 4% lai a ni.

Sorkar hnathawk hlawhah 50/60% vel a kal a nih chuan Mizoramah hian hmasawnna hna thawh ngaihna a awm lo tluk a ni a, Mizoram budget 50/60% vel chu sorkar hnathawkte hnenah direct-in a thleng tihna a ni.

Mizoram chu India ram state hrang hrang zingah mihring zat atanga chhuta sorkar hnathawk tam berna a ni a, sorkar hnathawkte hlawh leh a behbawmah mipui pawisa tam zawk chu a kal kum tin reng a ni. 6th Pay Commission zulzuia hlawh siam a nih phei chuan sorkar hnathawk hlawh hi a sang hle dawn a, sorkar hnathawk lal lutuk lem lo pawhin Rs 30000/40000 te chu an hlawh fur ang. Tun dinhmunah pawh budget atanga pawisa tam tak mi tlem tein an insem a nih chuan hlawh a pung a nih phei chuan Mizoram sum dinhmun chu a chhe lehzual ang tih a chiang a, thil man sang chu sang taka beisei tur chi a ni ang.

Related Posts :