Sorkar thar tlawmna hmasa - ZU?

April ni 30-ah khan Mizoram chief minister Lal Thanhawla chuan tun term-a a vawi khatna atan thuthar lakhawmtute a kawm a, chumi tum chuan sorkar hmalakna tur hrang hrang sawiin, zu khapna dan ennawn an tum niin a sawi a nih kha. Ennawn an tum thu sawi tluangtlam lovin, ram tana tha turah chuan huaisen takin an kal dawn niin a sawi a, chu mawlh chuan khel zui a hlawh ta a nih hi.

"MLTP Act hman mek hi a hlawhtling lo. Congress sorkar hun hmasaa kan tih tan dawn pawhin a hlawhtlin ring lo chungin, Kohhran nawrna avangin kalpui a ni. Kohhran leh pawl dangte nen inrawnkhawm a la ngai dawn a, kan ram tana tha turah chuan huaisen takin kan kal ang. Tuna kan kal dan hi chu, Mizoram mi dik tak ni lote eizawnna siamsakna mai a ni a, michhiate'n an tuar a, mithate'n an tuar thlawt lo," tiin chumi tum chuan thuthar lakhawmtute zawhna a chhang a ni.

A office-a thuthar lakhawmtute a kawm tum hian chief minister chuan huaisen taka an kal thu hi a sawi uar hle a, "Ram leh hnam tana tha tur chu huaisen takin kan ti zel ang. Tlak phah a ngai a nih chuan thla khur chawr chawrin kan tla mai tur a ni," ti hialin a sawi.

Mizoramah The Mizoram Liquor Total Prohibition Act, 1995 hmangin 1997 atangin zu khap a ni a, hemi chungchang hi he ramah hian titi a tling kumkhua a ni ber e. Chief minister-in thuthar lakhawmtute hmaa he dan chungchang a sawi atang phei hi chuan a vung zual hle a, media lam pawh a nghawng nasa malh malh hle.

Chief minister-in zu khapna dan chungchang a sawi lai hian minister H Liansailova bakah parliamentary secretary pathum - R Selthuama, Lal Thanzara leh Lalrinmawia te an awm ve a, anni hian eng kiin nge chief minister hian MLTP Act chungchang hi a sawi tih chu an hre chiang ang.

Chief minister-in MLTP Act chungchang a sawi hnu hian mipuite chuan an sawi zui luih luih a, chutiang boruak karah chuan sorkar thar din Law Commission lamin MLTP Act siamthatna tur chungchangah Kohhran leh tlawmngai pawlte a rawn ve leh bawk. Chu mai a ni lo, mi thahnemngaite'n zu khapna dan chungchang sawihona leh debate te an han buatsaih zui a, chu'ngah chuan mi thenkhat chuan MLTP Act chungchanga sorkar thar rilru sukthlek chu chiangah an ngai ta.

Chutianga ngaih loh theih pawh a ni lo; entirnan, pawl pakhatin debate an buatsaih tum chuan minister te meuhin zu khapna dan hlih a tul tia tang turte chu sawi tur an lo rawlruk a, zu khap a nih vangin drugs a hluar tia sawi tur tein an hrilh a nih kha.

Law Commission hian The Mizoram Liquor Total Prohibition Act, 1995 siamthat hi rawtin Kohhran, YMA, MHIP leh MUP te a rawn a, MLTP Act-in Beer huam lo se tiin an rawt a, inhremna pawh thil tihsual len leh tet a zir tea inhrem ni se tiin, he dan bawhchhiat vawi khatnaah chuan jail-a intantir kher lova inhrem dan awm se tiin an rawt a ni.

"Tuna a nih angah hi chuan dan nunrawng tak a ni a, state dangte'n rawn hria se chu 'Draconian Law' an ti hialin a rinawm. Ngaihdamna leh hriatthiamna kan tih ang chi kha a awm lo reng reng," tiin Mizoram Law Commission chairman R Lalrinawma chuan an thil rawt chungchang hi a sawi.

"MLTP Act hian grape wine a huam lo a, grape wine ai chuan beer hian 'alcohol' a pai tlem zawk daih a, chutiang a nih chuan beer hi huamtir loh tur ni awm takah kan ngai," a ti bawk.

Mahse, Law Commission rawtna chu an rawn-a te chuan an pawm hlawm lo. Mizoram Kohhran Hruaitute Committee (MKHC) chuan Law Commission rawtna hi zirin June ni 5-ah khan an ngaihtuah a, MLTP Act siamthat rawtna hi an pawm lo a nih kha. CYMA pawhin June ni 5-ah vek khan an ngaihtuah a, Law Commission rawtna hi an pawm bik lo. June ni 5-ah vek khan MHIP lam pawhin an ngaihtuah a, June ni 10 thleng executive member te'n mahni ngaihdan thawh ni se an ti a, chutianga ngaihdan an thawhkhawm hnuah chuan he rawtna hi an pawm ta lo a ni.

Chutiang chhung chuan MLTP Act chungchang chuan sawi a hlawh hle a, media lamah pawh a lang zing malh malh hle. Sorkar thar chu he dan hi hlip ngei turah mi engemaw zatin an ngai a, mahse, June ni 18-ah khan he dan hi hlih tum a ni lo tiin sorkar hruaitute chuan thu an puang ta.

Chief minister Lal Thanhawla chuan Mizoram mipuite leh Kohhrante rawn lo leh an remtihna lo chuan Mizoram sorkar leh party hian zu khapna dan hi tihdanglam a tum lo tih ka puang, a ti.

Chief minister thusawi hi June ni 18-ah khan, MP CL Ruala'n Aizawl Press club-a press conference a neihnaah home minister R Lalzirliana'n a chhiarchhuak a ni.

April ni 30-ah chief minister-in MLTP Act ennawn an tum nia sawiin, ram tana tha turah chuan huai takin an kal dawn niin a sawi a, chu chu mi tam takin MLTP Act hlih tum thu-ah an ngai a nih kha. Chumi hnuah Law Commission-in Kohhran leh tlawmngai pawlte a'n rawn leh a, MLTP Act-in beer huam lo se tiin an rawt a, mahse, home minister chuan, "Beer zuar leh dawn tih thawm keimahni atanga lo chhuak ni awm takin chanchinbuah te kan lo chhiar a, sawifiah a ngai tiin CM chuan a zin hmain press statement hi a siam ta a ni," home minister chuan a ti ta daih mai!

Home minister chuan, "|ul lovah Fakselna tih angah te kan bei nasa lutuk a, a buaithlak ang reng a. Thil tul zawk dang a tam ka ring a; chuvangin hei hi chu, sorkarin Kohhran kan rawn lo a, engpawhnise, an lo ngaihtuah ve a, an lo ti a nih chuan, an duh loh dan kan hria a. Lo rawn ta ni ila, Kohhran nena in-confront tur kha kan ni nghal mai a, chuvangin sorkar thuneihna a ni a, midang tam tak hi zu rawn zu rawn pawh a ngai hranpa lem lo a, kan ti dawn a nih chuan. Amaherawhchu, kan chief minister, kan party president-in hei hi tuna a thupuan a nih avangin, he lamah hi chuan buai teh chiam a ngai lovah kan ngai a ni," a ti.

Chief minister-in MLTP Act ennawn an tum niin a sawi a, Law Commission lamin siamthat dan tur chungchangah Kohhran leh tlawmngai pawlte an rawn bawk. Mahse, home minister thusawi leh chief minister thupuan nen chuan chu'ng chu a inang ta lo hle.

Congress worker-te pawhin zu khapna chungchangah hian mi rilru sukthlek an thlir uluk hle a, sorkarin zu khapna dan hi hlih a tum nia ngaih theihna tur khawp thil sawi tur a awm nual mai. Chu'ng chu chief minister leh a minister te hian an hai hauh lo. Mahse, titi a tam viau hnuah sorkar hotute chuan he dan hi hlih emaw siamthat emaw an tum lo a, Kohhran an rawn hek lo niin an sawi ta daih si! Chu chu zu khap chungchang ai chuan mipuiin an tuipui zui ta zawk niin a lang.

Chief minister thupuan (statement) leh home minister thu leh hlate hi mi tam takin MLTP Act chungchanga Mizoram sorkar ngaihdan nia an hriat nen chuan a inang lo hle a, chief minister-in April ni 30-a a sawi dan leh Law Commission lam hmalak dan nen a inang lo hle bawk.

MLTP Act chungchanga tunlai titi leh sorkar hruaitute thusawi atang hian "Mizoramah Congress thli a tleh em?" tih chungchang pawh a ngaihtuah theih viau awm e. MLA 32 nei, VC thlan leh MP thlanah tea hnehna an chan vangin Mizoramah Congress thli a tleh tia sawi a ni. Mahse, Congress thli tleh se MLTP Act chungchangah tiang hian thil a kal lo ang tiin a duh tan chuan a sawi theih ang. Congress thli a tleh a nih chuan mipuiin an zui hut hut ang a, an thil tum leh ruahmannate chu mipuiin an thlawp hle ang. Amaherawhchu, "MLTP Act hlin an tum a, mahse, mipui mar an han dek a, a duh lo an tam avangin sorkar chuan a ngam ta lo," tiin a duh tan chuan he thil hi a sawi theih tlat. A awih loh tan a hnial theih viau bawk ang a.

Related Posts :