Nalhna Thuruk - Cosmetic Surgery - II

‘Cosmetic surgery’ leh ‘plastic surgery’-a thiam hmingthang Dr. M.L. Pathak kawmna, kar hmasa-a mi kha kan rawn chhunzawm leh e...

Dr. Pathak hian MBBS leh MS (General Surgery) a zir zawh hnu-ah Mumbai-a J.J. Hospital of Grant Medical College atangin plastic surgery hi a hranpa ngatin a zir chhuak leh a. Kum 1989-a M.Ch. a zawh leh hnu hian Guwahati-a Nursing Home leh Hospital hrang hrangah a thawk kual a. Chutih rual chuan khawvel huapa kut zai mawi thiam hmingthang Dr B.B. Joshi bakah Chicago khawpui (US)-a cosmetic surgeon hmingthang Dr S.P. Arumugam te kephah bulah a seilian chho bawk a ni.

Mit hi inhriat theihna pawimawh a ni a, mit leh a bul vela thil inthlak thleng a awm chuan a entu-in kan hre thuai thin. Mitko hnuai emaw a chunglam pawh a uai deuh hian a hriat thin a. Hetiang hi engtia tih chi nge?
Heta i sawi ang hi ‘blepheriptosis’ an ti a, saptawng chuan ‘baggy eye’ an ti mai. Mit vun fan theihna a lo rul a, chu chuan mitko hnuai emaw chunglamah pawh tisa hlawm tullo a siam thei. Hah lem loh lai pawha chau riau hmel put theih a ni a. Hmel a ti lang tar hle bawk.

Hetiang tih reh dan hi ‘blepharoplasty’ an ti mai a, tunlaia cosmetic surgery lar ber a ni. Damdawiina riah ngai kher lova awlsam taka tih theih a ni a. Vun leh thau tlem paih a ni mai e. Mongolian thlah mitvun inthuah velo ang chi pawh hi duh chuan siam that theih a ni a. Thil harsa lo tak a ni.

Thenkhat mit ko hnuai leh chunglamah hian thil eng (yellowish spots) a awm thin a, zai lohva siamthat theih a ni em?
Hetiang hi mi thenkhat chuan cholesterol tam vang niin an sawi a, mahse inlaichinna a neilo. Cholesterol sang lote pawhin hetiang hi an nei thei thova, a hmingah ‘Xanthelesma’ an vuah a. Cosmetic surgery hmanga tih that theih a ni a, ser a awm zui lo.

Doctor in min zai hnu emaw hliam kan neih avang emaw a ser awm thin hi advertisement-a kan hmuh thin cream hmanga tih reh theih tak tak a ni em?
Hliam emaw zai emaw vanga ser chi reng reng hi enkawl fimkhur tawkloh vang a ni a. Ser hi tihbo hlen hlauh theih a ni lova, lang mang lo erawh chuan a siam theih. Eng cream emaw hmanga tihreh theih a nih chu ka ring chiah lo.

Mi thenkhat chuan an taksaah khuavangchhinchhiah tam fe an nei thin a. Pian tirh atanga khuavangchhinchhiah hi tihbo loh hram tum a ni thin a, hei hi enge a chhan ni bera i hriat?
Khuavangchhinchhiah leh thuangvuak kan tih ang chi hi a hlauhawm a awm a, hlauhawm lemlo a awm bawk a. A hlauhawm tur chi chu cancer-a chang thei a nih avangin zai-a paih vat tur a ni. Piantirh atanga awm pawh ni se zai a nih hian side effect a awm lo.

Mi thenkhat chu an mitko chunglam hian an mit a hliah deuhthaw thin a, hei hi siam dik theih a ni em?
Hetiang hi mit piansualna chi khat a ni mai a, khawhmuh a tibuai thei a. Zai-a siam that theih a ni.

Tlangval thenkhat hi an hnute mawilo khawpa lianin hmeichhia ang maiin a awm thin a. Damdawi hmanga tihdik theih a ni em?
Tlangval chauh an ni lo putar pawh an awm tho. Hei hi chu mihring chi (hormone) in a thlen theih a ni a. Damdawi hmanga tih chi a ni vak lova, thau vang liau liau a nih chuan thau kha a hip chhuah theih mai a, taksa hlawm a nih chuan paih then mai tur a ni.

Taksa vun var hi plastic surgery hmangin engtinnge a tihreh theih ?
Taksa-a var awm thluah thluah (leukoderma) hi paih theih a ni a, kha natna veitu vun hrisel tha lai khan a thlak theih. Chu vun thar chu a dam chhungin a pu thei tawh thin a ni.

An tattoo tihreh duha rawn pan che an awm tawh em ?
Tattoo hi thalaiin tunlaiin an uar a, incheina chi khat a ni hial tawh mai. A thiamin an tih chuan a tha maia thiamlo tih erawh chu an tih thuk vang pawhin a hnu-ah harsatna a awm thei a. Min rawn pan ve nual tawh a ni. Upat hnu-a tihreh duh hrim hrim tate pawh an awm thin. Tihreh theih a ni a, cosmetic surgery a ngai thung.

Arngeng nalh lo tak a awm thei a, damdawi hmanga tihreh theih a ni em?
Arngeng hi vun nawh (by polishing the skin) doctor tawnga ‘Dermabrasion’ hmanga tihreh theih a ni. Hetiang hi chu Lal Isua pian hma daih khan Aigupta mithiamte’n an lo ti thei tawh a ni. Hei bakah hian vun thar bela tih dik theih a ni bawk.

#####

Mi tam takin an taksaa mawilohna an paite hi aesthetic surgery (cosmetic surgery) hmanga siam dik theih a ni a. Hetianga mahni lan dan a aia mawi zawka siamthat hi zahpui chiah tunlai chuan an ngai tawh lo. Tunlai, thangthar duhdana kan nunphung a inher tawh hunah hi chuan lan upat ringawt pawh hi thil fello tak a ni. Kum 60 i pelha i hna i chawlhsan hma daih hian hmel tar luat vangin i che chhe thei. Inelna a sang tawh a, chal kawlh emaw, vun chuar leh hmai chuar ang chi pawh hi tihdik vat zel a tha ber. Tunlaiah hi zawng kum 35 leh 40 lek nih laia hna hloh chuan a dang a hmu leh lawk lawk tawhlo thei tlat a ni.
Zawh belh duh nei chuan Mobile no.
098640 64601-ah hian Dr ML Pathak hi zawhna zawh mai tur a ni.

Related Posts :